Malakaus 11

Yexus Caij tug Neeg Luav Moog huv Yeluxalees

(Mathais 21.1-11; Lukas 19.28-40; Yauhaas 12.12-19)

1Thaus Yexus puab moog yuav txug ntawm lub zog Npefakhes hab lub zog Npethanis kws nyob ze lub nroog Yeluxalees, puab moog txug ntawm lub Roob Txiv Ntoo Roj. Yexus khaiv nwg ob tug thwjtim ua nwg ntej moog, 2Nwg qha obtug has tas, “Meb ca le ncaaj nraim moog rua huv lub zog kws nyob tom meb hauv ntej. Thaus meb moog txug huv lawm, meb yuav pum ib tug mivnyuas neeg luav khi rua ntawm ib tug ncej. Tug mivnyuas neeg luav ntawd tsi tau muaj tuabneeg caij ib zag le, meb ca le dlaws caab lug. 3Yog muaj leejtwg nug meb has tas, ‘Meb yuav dlaws caab moog ua dlaabtsi? Meb ca le teb has tas, tug Tswv#11.3 Tug Tswv; lossis tug tswv khoom. xaav siv, ib ntsiv nwg maam le xaa rov qaab lug.’ ”

4Obtug moog pum ib tug mivnyuas neeg luav khi rua ntawm ntug kev ze ntawm qhovrooj. Thaus obtug taabtom dlaws tug neeg luav, 5cov tuabneeg kws nyob ntawd muaj qee leej nug has tas, “Meb yuav dlaws tug mivnyuas neeg luav caab moog ua dlaabtsi?”

6Obtug teb lawv le Yexus tau qha rua obtug lawm, ces puab txawm ca obtug caab moog. 7Obtug caab tug mivnyuas neeg luav moog rua Yexus, obtug hle obtug ob lub tsho ntev pua tug mivnyuas neeg luav nrausqaum rua Yexus caij. 8Muaj ntau leej hle puab tej tsho pua huv kev, muaj ibtxha moog txav nplooj tom ntug zog nqaa lug pua kev. 9Cov tuabneeg kws ua ntej hab cov kws lawv qaab suavdlawg qw nrov nrov has tas, “Ua Vaajtswv tsaug! Thov Vaajtswv foom koob moov rua tug kws Vaajtswv khaiv lug! #Pnk 118.25-26 10Thov Vaajtswv foom koob moov rua tug kws yuav kaav tuabneeg lub sab, ib yaam le thaus peb yawmkoob Daviv, nwg kaav nwg tsaav tuabneeg! Ca le qhuas Vaajtswv tug kws nyob sau ntuj ceebtsheej!”

11Thaus Yexus moog txug huv lub nroog Yeluxalees lawm, nwg moog rua huv lub Tuamtsev, hab nwg saib txhua yaam huv lub Tuamtsev. Tabsis thaus ntawd tub yuav tsaus ntuj, nwg txhaj coj kaum ob tug thwjtim nrug nwg moog tom lub zog Npethanis.

Yexus Foom Tsob Ntoo Txiv Ncuav Pas

(Mathais 21.18-19)

12Taagkig thaus Yexus hab nwg cov thwjtim rov qaab tom lub zog Npethanis lug, Yexus tshaib plaab heev.

13Nwg pum ib tsob txiv ncuav pas muaj nplooj tsaus nti nyob tom nwg hauv ntej. Yexus txawm moog saib puas txi txiv. Tabsis thaus nwg moog txug, tsi pum muaj ib lub txiv le, tsuas pum muaj nplooj xwb, rua qhov tseem tsi tau txug lub caij txi.

14Yexus txawm has rua tsob txiv ncuav pas ntawd tas, “Txij nuav moog yuav tsi muaj leejtwg tau noj koj cov txiv ib zag le lawm!”

Cov thwjtim nov Yexus has le ntawd rua tsob ntoo.

Yexus Moog rua ntawm Lub Tuamtsev

(Mathais 21.12-17; Lukas 19.45-48; Yauhaas 2.13-22)

15Thaus Yexus puab moog txug huv lub nroog Yeluxalees lawm, Yexus moog rua ntawm lub Tuamtsev, hab ntab cov tuabneeg kws tuaj ua laag ua luam kuas tawm moog. Nwg muab puab tej rooj pauv nyaj hab cov tuabneeg kws muag nquab tej rooj nyob ntxeev pis hlo. 16Hab nwg txwv tsi pub leejtwg coj ib yaam dlaabtsi tuaj moog muag rua ntawm lub tshaav puam ntawm lub Tuamtsev. 17Yexus has rua puab tas, “Vaajtswv txujlug sau tseg has tas, ‘Suavdlawg yuav hu kuv lub Tuamtsev has tas, yog lub tsev kws txhua tsaav tuabneeg tuaj thov Vaajtswv.’ Tabsis mej muab ua qhov chaw rua tubsaab nkaum!”#Yay 56.7; Yel 7.11

18Cov thawj ntawm cov povthawj hab cov xwbfwb kws qha Vaajtswv txuj Kevcai nov tej nuav, puab txawm nrhav kev muab Yexus tua povtseg. Puab ntshai Yexus, rua qhov suavdlawg xaav tsi thoob rua Yexus tej lug qha.

19Thaus yuav tsaus ntuj, Yexus hab nwg cov thwjtim txawm tawm huv lub nroog moog lawm.

Tsob Txiv Ncuav Pas Qhuav Lawm

(Mathais 21.20-22)

20Taagkig sawv ntxuv Yexus hab nwg cov thwjtim rov qaab moog tom lub nroog. Puab pum tsob txiv ncuav pas tub qhuav lawm. Txawm yog tej caag los qhuav taag huv tuabsi. 21Petus ncu dlheev txug Yexus cov lug hab has rua Yexus has tas, “Xwbfwb, koj saib tsob txiv ncuav pas kws naag mo koj foom tub qhuav taag lawm!”

22Yexus teb has tas, “Yog mej ntseeg Vaajtswv tag, 23kuv qha tseeb rua mej has tas, yog mej has rua lub roob nuav kuas txaav moog rua huv havtxwv, lub roob yeej yuav txaav moog. Tabsis mej yuavtsum ntseeg has tas, yuav muaj lawv le mej has, ces yeej yuav muaj lawv le ntawd tag.#Mat 17.20; 1 Klt 13.2 24Tub yog vim le ntawd, kuv txhaj has rua mej tas, thaus mej thov Vaajtswv pub ib yaam dlaabtsi rua mej, mej yuavtsum ntseeg has tas Vaajtswv tub pub yaam ntawd rua mej lawm, mej txhaj yuav tau yaam kws mej thov. 25Thaus mej sawv ntsug thov Vaajtswv, mej yuavtsum zaam txim rua tug kws tau ua txhum rua mej lawm. Yog mej ua le ntawd, mej leej Txiv tug kws nyob sau ntuj ceebtsheej txhaj yuav zaam mej lub txim.” [26Yog mej tsi zaam txim rua lwm tug, mej leej Txiv tug kws nyob sau ntuj ceebtsheej yuav tsi zaam txim rua mej hab.]#11.26 Tej phoo qub ntxiv nqai 26 nuav rua.#Mat 6.14-15

Leejtwg Tso Cai rua Yexus

(Mathais 21.23-27; Lukas 20.1-8)

27Yexus hab nwg cov thwjtim moog rua huv lub nroog Yeluxalees. Thaus Yexus moog rua huv lub tshaav puam ntawm lub Tuamtsev, cov thawj ntawm cov povthawj, cov xwbfwb kws qha Vaajtswv txuj Kevcai, hab cov txwjlaug tuaj cuag Yexus, 28puab nug Yexus has tas, “Ua le caag koj muaj cai ua tej nuav? Leejtwg tso cai rua koj?”

29Yexus teb puab has tas, “Kuv yuav nug mej ib lus, yog mej teb tau, kuv maam le qha rua mej has tas yog vim le caag kuv muaj cai ua tej nuav. 30Mej sim qha rua kuv saib, leejtwg tso cai rua Yauhaas muab tuabneeg ua kevcai raus dlej, Vaajtswv lossis tuabneeg?”

31Puab txawm sis thaam has tas, “Peb yuav teb le caag txhaj zoo? Yog peb teb has tas, ‘Vaajtswv kuas Yauhaas ua,’ nwg yuav has tas, ‘Ua le caag mej tsua tsi ntseeg Yauhaas tej lug?’ 32Yog peb teb has tas, ‘Tuabneeg kuas Yauhaas ua…’ ” (Peb ntshai nyob tsaam cov pejxeem ua phem rua peb, rua qhov suavdlawg yeej paub has tas, Yauhaas yog tug cev Vaajtswv lug.) 33Puab txhaj teb has tas, “Peb tsi paub.”

Yexus has rua puab tas, “Yog le ntawd kuv yuav tsi qha rua mej has tas, yog leejtwg tso cai rua kuv ua tej nuav hab.”

Currently Selected:

Malakaus 11: HNJ2000

Highlight

Copy