Genesis 17

CAB. XVII

1As tra va Abram kiare-feed bleïn as nuy-jeig, ren y Chiarn eh-hene y hoilshaghey da Abram, as dooyrt eh rish, She mish yn Jee ooilley-niartal, jean gimmeeaght kiongoyrt rhym, as bee uss ynrick. 2As nee’m my chonaant y yannoo eddyr mish as uss, as bishaghey oo erskyn towse. 3As huitt Abram er e eddin; as loayr Jee rish, gra, 4Er my hon’s, cur-my-ner ta my chonaant mayrt’s, as bee uss ayr ymmodee ashoonyn 5Chamoo vees dty ennym arragh Abram, agh Abraham vees dty ennym, son ta mee er n’yannoo uss ayr ymmodee ashoonyn. 6As ver-ym ort dy ve erskyn-towse messoil, as neem’s ashoonyn jeed as hig reeaghyn jeh dty luight. 7As nee’m my chonaant y niartaghey eddyr mish as uss, as dty luight dty yeï, ayns ny sheelogheyn oc, son conaant dy bragh farraghtyn, dy ve my Yee dhyt’s as da dty luight dty yeï. 8As ver-yms dhyt’s, as da dty luight dty yeï, yn cheer raad t’ou dty yoarree, ooilley cheer Chanaan, son cummal foddey beayn; as beem’s yn Jee oc.

9As dooyrt Jee rish Abraham, Nee uss er-y-fa shen my chonaant y reayll, uss as dty luight dty yeï ayns nyn sheelogheyn. 10Shoh my chonaant, nee shiu y reayll eddyr mish as uss, as dty luight dty yeï; bee dy chooilley lhiannoo mac nyn mast’ eu er ny yiarey-chymmylt. 11As nee shiu giarey-chymmylt yn eill eu, as bee eh cowrey jeh’n chonaant ta eddyr mish as shiuish. 12As bee eshyn ta hoght laa dy eash er ny yiarey-chymmylt nyn mast’ eu, dy chooilley lhiannoo mac ayns ny sheelogheyn eu, eshyn t’er ny ruggey ayns y thie, ny kionnit lesh argid veih’n joarree nagh vel jeh dty luight. 13Eshyn ta ruggit ayns dty hie, as eshyn ta kionnit lesh dty argid, shegin da ve er ny yiarey-chymmylt: as bee my chonaant ayns yn eill euish, son conaant foddey beayn. 14As y lhiannoo mac nagh vel er ny yiarey-chymmylt ayns yn eill echey, bee yn annym cheddin er ny yiarey jeh veih e phobble: t’eh er vrishey my chonaant.

15As dooyrt Jee rish Abraham, Er son Sarai dty ven, cha jean oo ee y enmys Sarai, agh Sarah vees yn ennym eck. 16As neem’s ee y vannaghey, as myrgeddin ver-ym dhyt mac jeeish: dy jarroo nee’m ee y vannaghey, as bee ish moir ashoonyn; hig reeaghyn dy phobble jeeish. 17As huitt Abraham er e eddin, as ren eh garaghtee, as dooyrt eh ayns e chree, Bee lhiannoo er ny ruggey dasyn ta keead bleïn dy eash? as jean Sarah, ta kiare-feed bleïn as jeih, lhiannoo y ymmyrkey? 18As dooyrt Abraham, O dy bee Ishmael foddey beayn kiongoyrt rhyt? 19As dooyrt Jee, Nee Sarah dty ven dy jarroo mac y ymmyrkey dhyt; as nee oo genmys eh Isaac: as nee’m shickyraghey my chonaant rishyn, son conaant dy bragh farraghtyn, as rish e luight ny lurg. 20As mychione Ishmael, ta mee er dty chlashtyn: cur-my-ner, ta mee er vannaghey eh, as nee’m eh messoil, as nee’m bishaghey eh erskyn towse: daa phrince jeig nee eh y gheddyn, as neem’s eh ny ashoon mooar. 21Agh my chonaant nee’m y hickyraghey rish Isaac, eh nee Sarah gymmyrkey dhyt ec y traa cooie yn vleïn shoh cheet. 22As scuirr eh dy loayrt rish, as dimmee Jee seose veih Abraham.

23As ghow Abraham Ishmael e vac, as dagh unnane va ruggit ayns e hie, as ooilley ny va kionnit lesh e argid, dy chooilley yrrynagh v’ayns lught-thie Abraham; as ren eh giarey-chymmylt yn eill oc ’sy laa cheddin, myr va Jee er n’oardaghey da. 24As va Abraham kiare-feed bleïn as nuy-jeig dy eash, tra v’eh er ny yiarey-chymmylt ayns yn eill. 25As va Ishmael e vac three bleeaney jeig dy eash tra v’eh er ny yiarey-chymmylt ayns yn eill. 26Er yn eer laa cheddin va Abraham as Ishmael e vac er nyn yiarey-chymmylt. 27As ooilley deiney e hie, v’er nyn ruggey ayns e hie, as kionnit lesh e argid voish y joarree, v’ad er nyn yiarey-chymmylt mârish.

Currently Selected:

Genesis 17: BIB1819

Highlight

Copy