Genesis 16
16
CAB. XVI
1Nish cha ren Sarai ben Abram cloan y ymmyrkey da: as va inney-veyl eck, ny Egyptian, enmyssit Hagar. 2As dooyrt Sarai rish Abram, Cur-my-ner nish, ta’n Chiarn er m’y lhiettal veih gymmyrkey cloan: ta mee guee ort, gow stiagh gys my inney-veyl: foddee cloan ’ve aym’s lioree: As hug Abram geill da goan Sarai. 3As ghow Sarai ben Abram yn inney-veyl eck Hagar, yn Egyptian, erreish da Abram v’er chummal jeih bleeaney ayns cheer Chanaan; as hug ish ee da e sheshey Abram, dy ve myr ben da.
4As hie eh stiagh gys Hagar, as ren ee giennaghtyn: as tra dennee ish dy row ee er yiennaghtyn; ren ee beg y hoiagh jeh e ben-ainshtyr. 5As dooyrt Sarai rish Abram, My aggair dy row ort: ta mee er choyrt my inney-veyl gys dty oghrish: as tra honnick ee dy row ee er yiennaghtyn, ren ee beg y hoiagh jee’m: dy jean y Chiarn briwnys eddyr mish as uss. 6As dooyrt Abram rish Sarai, Cur-my-ner, ta dty inney-veyl ayns dty phooar hene, jean myr sailt r’ee. As tra hug Sarai drogh ghellal jee, chossyn ee ersooyl.
7As hooar ainle y Chiarn ee liorish farrane ushtey ayns yn aasagh, liorish y chibbyr t’ayns y raad gys Shur. 8As dooyrt eh, Hagar, inney-veyl Sarai, cre veih haink oo? as caïd t’ou goll? As dooyrt ee, Ta mee roie er-chea veih eddin my ven-ainshtyr Sarai. 9As dooyrt ainle y Chiarn r’ee, Chyndaa gys dty ven-ainshtyr, as jean oo hene y injillaghey fo yn laue eck. 10As dooyrt ainle y Chiarn r’ee, Neem’s bishaghey dty luight erskyn towse, nagh vod ad v’er nyn goontey son yn earroo oc. 11As dooyrt ainle y Chiarn r’ee, Cur-my-ner t’ou torragh, as ver oo mac son y theihll, as bee yn ennym echey Ishmael, er-yn-oyr dy vel yn Chiarn er chlashtyn dty heaghyn. 12Bee eh ny ghooinney feïe: bee yn laue echey noi dy chooilley ghooinney, as laue dy chooilley ghooinney n’oï-syn: as bee e chummal ayns fenish ooilley e vraaraghyn. 13As ren ee geamagh er ennym y Chiarn ren loayrt r’ee [gra] T’ou uss Yee er m’y akin: son dooyrt ee, Vel mish myrgeddin er vakin eshyn t’ayns shoh er yeeaghyn orrym? 14Shen-y-fa va’n chibbyr enmyssit Beer-lahai-roi; cur-my-ner te eddyr Kadesh as Bered.
15As dymmyrk Hagar mac da Abram, as denmys Abram ennym e vac ren Hagar gymmyrkey da, Ishmael.
16As va Abram kiare-feed bleïn as shey dy eash tra ren Hagar gymmyrkey Ishmael da Abram.
Currently Selected:
Genesis 16: BIB1819
Highlight
Share
Copy
Want to have your highlights saved across all your devices? Sign up or sign in
© British and Foreign Bible Society 1819, 2019
