Genesis 15

CAB. XV

1Lurg ny reddyn shoh haink goo yn Chiarn gys Abram ayns Ashlish, gra, Ny bee aggle ort, Abram: mish dty endeilagh, as mooar erskyn towse vees dty leagh. 2As dooyrt Abram, Hiarn Yee, cre ver oo dou, fakin dy vel mee gyn sluight, as stiurt my hie ta Eliezer shoh jeh Damascus. 3As dooyrt Abram, Cur-my-ner, dooys cha vel oo er choyrt sluight erbee: as Cur-my-ner fer ruggit ayns my hie vees my eirey. 4As cur-my-ner, haink goo yn Chiarn huggey, gra, Cha bee eh shoh dty eirey, agh eshyn hig veih dty veeghyn hene vees dty eirey. 5As hug eh lesh eh magh (’sy vagher) as dooyrt eh rish, jeeagh nish seose ’syn aer, as gow earroo ny rollageyn, my oddys oo ad y choontey: as dooyrt eh rish, Myr shen vees dty luight. 6As ren eh credjal ayns y Chiarn; hug shoh gys e lieh son cairys. 7As dooyrt eh rish, Mish y Chiarn, hug lhiam uss magh ass Ur ny Chaldeanee, dy choyrt dhyt’s yn cheer shoh son eiraght. 8As dooyrt eh, Hiarn Yee, cre’n cowrey ver oo dou, dy bee shoh my eiraght. 9As dooyrt eh rish, Gow hood colbagh jeh three bleeaney dy eash, as goayr bwoirryn three bleeaney dy eash, as rea three bleeaney dy eash, as calmane-turtle, as eean calmane. 10As ghow eh ad shoh ooilley, as yiare eh dagh unnane oc ayns daa ayrn, as hug eh dagh peesh ny lhie yn derrey yeh noi yn jeh elley: agh ny eeanlee cha ren eh rheynn. 11As tra haink ny eeanlee sheese er yn eill, ren Abram ad y agglaghey ersooyl. 12As mysh lhie ny greïney huitt cadley trome er Abram, as cur-my-ner, v’eh fo ashlish atchimagh dy ghorraghys mooar. 13As dooyrt y Chiarn rish Abram, Toig son shickyrys, dy bee dty luight nyn yoarreeyn ayns cheer yoarree, dy bee ad ayns bondiaght, as fo seaghyn trome son kiare cheead bleïn. 14As myrgeddin yn ashoon, foue vees ad ayns bondiaght, neem’s y vriwnys: as ny lurg shen hig ad magh lesh mooarane cooid. 15As nee oo goll gys dty ayraghyn ayns shee: bee oo er dty oanluckey ayns shenn eash vie. 16Agh ayns y chiarroo heeloghe hig ad gys shoh reesht: son cha vel mee-chraueeaght ny Amoriteyn foast er jeet gys yn yrjid. 17As haink eh gy-kione, mysh lhie ny greïney, as dy row eh dorraghey; cur-my-ner hie coirrey ayns jaagh, as lamp ayns aile shaghey eddyr ny peeshyn shen. 18Ayns y laa cheddin ren y Chiarn conaant rish Abram, gra, Da dty luight ta mee er choyrt yn cheer shoh, veih awin Egypt gys yn awin vooar, ta shen, awin Euphrates: 19Ny Keniteyn, as ny Kenizziteyn, as ny Kadmoniteyn. 20As ny Hittiteyn, as ny Perizziteyn, as ny Rephaimee, 21As ny Amoriteyn, as ny Canaaniteyn, as ny Girgashiteyn, as ny Jebusiteyn.

Currently Selected:

Genesis 15: BIB1819

Highlight

Copy