Genesis 18

CAB. XVIII

1As ren y Chiarn eh hene y hoilshaghey da ayns cheer rea Mamre: as v’eh ny hoie ayns dorrys y chabbane, ayns chiass y laa. 2As hrog eh seose e hooillyn as yeeagh eh, as cur-my-ner, va three deiney nyn shassoo er-gerrey da: as tra honnick eh ad, roie eh nyn guail veih dorrys y chabbane, as chroym eh sheese eh hene lesh y thalloo. 3As dooyrt eh, My Hiarn, my ta mee nish er gheddyn foayr ayns dty hilley, ny gow shaghey, ta mee guee ort, veih dty harvaant. 4Lhig da red beg dy ushtey, ta mee guee erriu, v’er ny choyrt lesh, as niee-jee nyn gassyn, as gow-jee nyn aash fo yn villey. 5As ver-ym lhiam greme dy arran, as jean-jee nyn greeaghyn y gherjaghey; ny lurg shen hed shiu er nyn doshiaght: son er-yn-oyr shen, ta shiu er jeet gys nyn sharvaant. As dooyrt ad, Jean myr t’ou er ghra. 6As jimmee Abraham ayns siyr gys y chabbane gys Sarah, as dooyrt eh, Fow aarloo dy tappee three towseyn dy reih flooyr, fuinn eh, as jean berreenyn er y chiollagh. 7As roie Abraham gys y chioltane, as hug eh lesh lheiy beiyht as mie, as hug eh da dooinney aeg eh, as ren eh siyr dy aarlaghey eh. 8As ghow eh eeym as bainney, as y lheiy v’eh er n’aarlaghey, as hoie eh shoh kiongoyrt roo; as hass eh lioroo fo’n villey, as ren ad gee.

9As dooyrt ad rish, Cre vel Sarah dty ven? as dreggyr eh, Cur-my-ner t’ee ayns y chabbane. 10As dooyrt eh, Neem’s dy shickyr chyndaa hood’s ec y traa cooie yn vleïn shoh cheet; as cur-my-ner, ver Sarah dty ven mac son y theihll. As cheayll Sarah shoh ayns dorrys y chabbane, va ny chooyl. 11Nish va Abraham as Sarah shenn, as er roie, dy mie ayns eash: as scuirr eh dy ve marish Sarah, myr te dooghyssagh da mraane dy ve. 12Shen-y-fa, ren Sarah garaghtee cheu-sthie jee hene, gra, Erreish dooys v’er n’aase shenn, bee yn boggey shoh aym, fakin dy vel my hiarn shenn myrgeddin? 13As dooyrt y Chiarn rish Abraham, Cre’n-fa ren Sarah garaghtee, gra, Jean-yms son shickyrys lhiannoo y ymmyrkey, tra ta mee shenn? 14Vel nhee erbee ro ghoillee da’n Chiarn? ec y traa pointit, hig-yms reesht cordail rish y traa cooie, as ver Sarah mac son y theihll. 15Eisht dob Sarah, gra, Cha ren mee garaghtee, son va aggle urree. As dooyrt eh, Ny gow n’oï, son ren oo garaghtee.

16As hrog ny deiney orroo veih shen, as yeeagh ad lesh Sodom: as hie Abraham mâroo dy choyrt ad er nyn raad. 17As dooyrt y Chiarn, Jean-yms keiltyn veih Abraham shen ny ta foym dy yannoo. 18Fakin dy jig Abraham dy shickyr dy ve ny ashoon mooar as niartal, as dy bee ooilley ashoonyn y theihll er nyn mannaghey aynsyn. 19Son ta fys aym, dy der eh sarey da e chloan as e lught-thie ny yeï, as freillee ad raaidyn y Chiarn, dy yannoo cairys as briwnys; dy vod y Chiarn cooilleeney da Abraham shen ny t’eh er loayrt my-e-chione. 20As dooyrt y Chiarn, Er-yn-oyr dy vel eam Sodom as Gomorrah atchimagh, as er-yn-oyr dy vel y peccah oc feer eajee: 21Hem sheese nish dy akin, vel ad er n’yannoo ooilley-cooidjagh cordail rish yn eam oc t’er roshtyn hym’s; as mannagh vel, bee fys aym er. 22As hyndaa ny deiney nyn eddin veih shen, as hie ad lesh Sodom: agh hass Abraham foast kiongoyrt rish y Chiarn.

23As hayrn Abraham er-gerrey, as dooyrt eh, Jean oo myrgeddin stroie yn sleih ynrick marish ny mee-chrauee. 24Abbyr, dy bee jeih as da-eed dy leih cairal cheu-sthie jeh’n ard-valley: jean oo myrgeddin stroie as gyn sparail yn ynnyd er graih yn jeih as da-eed dy leih cairal oddys ve ayn. 25Shen dy row foddey voïd, dy yannoo myr shoh, dy stroie yn vooinjer cairal marish ny mee-chrauee: as dy bee yn vooinjer cairal myr ny mee-chrauee, dy row shen foddey voïd: nagh jean briw yn seihll ooilley cairys y yannoo? 26As dooyrt y Chiarn, My yioym ayns Sodom jeih as da-eed dy leih cairal ’syn ard-valley, eisht nee’m yn slane ynnyd y sparail er y graih ocsyn. 27As dreggyr Abraham, as dooyrt eh, cur-my-ner nish, ta mee er ghoaill orrym dy loayrt rish y Chiarn, mish nagh vel agh joan as leoie. 28Abbyr dy bee queig giare jeh’n jeih as da-eed dy leih cairal; jean oo yn slane ard-valley y stroie son laccal queig? As dooyrt eh, My yioym ayns shen queig as da-eed, cha stroie-ym eh. 29As loayr eh rish foast keayrt elley, as dooyrt eh, Abbyr dy bee da-eed er ny gheddyn ayn. As dooyrt eh, Cha stroie-ym eh er graih yn da-eed. 30As dooyrt eh rish, O ny lhig da’n Chiarn ve corree, as nee’m loayrt: Abbyr dy bee jeih as feed er ny gheddyn ayn. As dooyrt eh, Cha stroie-ym eh my yioym jeih as feed ayn. 31As dooyrt eh, Cur-my-ner, ta mee nish er ghoaill orrym dy loayrt rish y Chiarn: Abbyr dy bee feed er ny gheddyn ayn. As dooyrt eh, Cha stroie-ym eh er graih yn feed. 32As dooyrt eh, O ny lhig da’n Chiarn ve corree, as cha loayr-ym agh yn un cheayrt shoh: Abbyr dy bee jeih er ny gheddyn ayn, as dooyrt eh, Cha stroie-ym eh er graih yn jeih. 33As hie yn Chiarn roish, erreish da’n taggloo shoh ve echey rish Abraham: As hie Abraham reesht gys e chummal hene.

Currently Selected:

Genesis 18: BIB1819

Highlight

Copy