ગીતશાસ્ત્ર 31
31
વિશ્વાસની પ્રાર્થના
મુખ્ય ગવૈયાને માટે. દાઉદનું ગીત.
1હે યહોવા, હું તમારા પર
ભરોસો રાખું છું;
મારી લાજ કદી પણ જવા દેતા નહિ.
તમારા ન્યાયીપણાથી
મારું રક્ષણ કરો.
2મારી તરફ તમારો કાન ધરો;
ઉતાવળે મને છોડાવો;
તમે મારે માટે મજબૂત ગઢ તથા મારા
બચાવને માટે કિલ્લો થાઓ.
3કેમ કે તમે મારો ખડક તથા કિલ્લો છો.
માટે તમારા નામની ખાતર મને માર્ગ
બતાવો અને તે પર ચલાવો.
4મારે માટે જે જાળ તેઓએ ગુપ્ત રીતે
પાથરી છે તેમાંથી મને કાઢો;
કેમ કે તમે મારો આશ્રય છો.
5 #
લૂ. ૨૩:૪૬. હું તમારા હાથમાં મારો આત્મા
સોંપું છું.
હે યહોવા, સત્યના ઈશ્વર, તમે મારો
ઉદ્ધાર કર્યો છે.
6મિથ્યા વાત પર લક્ષ આપનારાઓને
હું ધિક્કારું છું;
પણ હું યહોવા પર ભરોસો રાખું છું.
7હું તમારી દયાથી આનંદ કરીશ તથા
હરખાઈશ;
કેમ કે તમે મારું દુ:ખ જોયું છે.
તમે મારા આત્માની
વિપત્તિઓ જાણી છે;
8અને તમે શત્રુઓના હાથમાં
મને કેદ થવા દીધો નથી;
તમે વિશાળ જગા પર મારા પગ
સ્થિર કર્યા છે.
9હે યહોવા, મારા પર દયા કરો,
કેમ કે હું સંકટમાં છું;
ખેદથી મારી આંખ, મારો પ્રાણ તથા
મારું શરીર ક્ષીણ થાય છે.
10કેમ કે સંતાપથી મારી જિંદગી તથા
નિસાસાથી મારાં વર્ષ વહી જાય છે;
મારા અન્યાયથી મારું બળ ઘટે છે
અને મારાં હાડકાં ક્ષીણ થાય છે.
11મારા સર્વ વેરીઓ મને મહેણાં મારે છે,
હા, મારા પડોશીઓ તો મને
અતિશય [મહેણાં મારે છે] ,
અને મારા ઓળખીતાઓને
મારું ભય લાગે છે.
જેઓ મને બહાર જુએ છે તેઓ મને
જોઈને નાસી જાય છે.
12સ્મરણમાંથી લોપ થયેલા મરેલાની
માફક તેઓ મને ભૂલી જાય છે.
હું ફૂટેલા વાસણ જેવો છું.
13કેમ કે મેં ઘણાને મુખે [મારી]
બદનક્ષી સાંભળી છે,
ચારે તરફ ધાસ્તી છે;
તેઓ ભેગા થઈને મારી વિરુદ્ધ
મસલત કરે છે,
અને મારો જીવ લેવાની
યુક્તિ રચે છે.
14પણ, હે યહોવા,
મને તમારો વિશ્વાસ છે;
મેં કહ્યું, “તમે મારા ઈશ્વર છો.”
15મારા સર્વ પ્રસંગો તમારા હાથમાં છે.
મારા શત્રુઓના હાથમાંથી તથા મને
સતાવનારાઓથી મને છોડાવો.
16તમારા સેવક પર
તમારા મુખનો પ્રકાશ પાડો,
તમારી કૃપાથી મને તારો.
17હે યહોવા, મારી લાજ જવા દેતા નહિ;
કેમ કે મેં તમને વિનંતી કરી છે;
દુષ્ટો લજવાઓ, અને તેઓ
શેઓલમાં છાનામાના પડી રહો.
18જે જૂઠા હોઠ ન્યાયી માણસોની વિરુદ્ધ
ગર્વથી તથા તિરસ્કારથી
અભિમાનથી ભરેલી વાત બોલે છે
તે મૂંગા થાઓ.
19જે ઉદારતા તમે તમારા ભક્તોને માટે
રાખી મૂકી છે, તથા તમારા પર
ભરોસો રાખનારાને માટે
મનુષ્યોની આગળ તમે દર્શાવી છે,
તે કેટલી મોટી છે!
20માણસના કાવતરાંથી તમારી હજૂરના
આચ્છાદાન વડે
તમે તેઓને ઢાંકીને બચાવશો;
જીભના કંકાસથી તમે તેઓને
માંડવામાં સંતાડી રાખશો.
21યહોવાને ધન્ય છે!
કેમ કે તેમણે કોટબંધ નગરમાં મને
[રાખીને] પોતાની આશ્ચર્યકારક
કૃપા દેખાડી છે.
22મેં તો મારી અધીરતાથી કહી દીધું,
“તમે તમારી દષ્ટિ આગળથી
મને દૂર કર્યો છે.”
તોપણ મેં તમને અરજ કરી ત્યારે
તમે મારા કાલાવાલા સાંભળ્યા.
23હે યહોવાના સર્વ ભક્તો,
તેમના પર પ્રેમ રાખો.
યહોવા વિશ્વાસુઓનું રક્ષણ કરે છે,
અને અહંકારથી કામ કરનારને
પુષ્કળ બદલો આપે છે.
24હે યહોવાની આશા રાખનારા,
તમે સર્વ બળવાન થાઓ, અને
તમારાં હ્રદય હિમ્મત પકડો.
Currently Selected:
ગીતશાસ્ત્ર 31: GUJOVBSI
Highlight
Share
Copy
Want to have your highlights saved across all your devices? Sign up or sign in
Gujarati OV Reference Bible - પવિત્ર બાઇબલ
Copyright © Bible Society of India, 2016.
Used by permission. All rights reserved worldwide.
