Luka 7

U Yesu akumupozya uwambombo uwa songo uwa basilikali

(Mat. 8.5-13)

1Bo u Yesu anena zinizi na bantu bala, akabuka mukaya aka Kapelinahumu. 2Kulakula usongo uwa Chiloma uwa basilikali 100 akaba nu wambombo yuyo akamughana nkani. Uwambombo yula akaba mubine nkani, umwakuti akaba papipi pakufwa. 3Bo usongo ivwa nizya Yesu, akatumako bamo abalongozi aba ba Yuda pakumulaba ukuti ize amupozye uwambombo wache. 4Bo bafika kwa Yesu, bakamulambilizya bakati, “Naloliloli umuntu uyu umwavwanje. 5Pakuti alughanite uluko lwitu, sona we yuyo akatuzengela ni nyumba iyakwiputilamo.”

6Po u Yesu akabuka nabo. Atakaba pa butali ni nyumba bo usongo uwa basilikali 100 yula atuma abamanyani kukwache pakumubuzya ukuti, “Mwene, utakitamyanje wemwene. Ntabaghiye nukuti winjile munyumba yane, 7sona intakwibika nemwene ukuti ne wakufikapo ukwiza kukwako. Loli nena bulo izyu, po uwambombo wane akwiza pakupola. 8Pakuti nane bulo, indi pasi pa bulaghili ubwa basongo bane, sona pasi papane indi na basilikali abankondo. Nanti inkumubuzya weka ukuti, ‘Bukagha,’ naloli akubuka. Po nanti inkumubuzya uyunji ukuti, ‘Zagha kuno,’ naloli akwiza, sona nanti inkumubuzya umuzya wane ukuti, ‘Bomba ichi,’ po naloli akuchibomba.”

9Bo u Yesu ivwa zinizi, akaswigha nkani, po akaghalabuka nukuchibuzya ichilundilo icha bantu chicho chikamukonkagha ukuti, “Naloli inkubabuzya ukuti ntamwaghite nalumolumo umuntu uwa lwitiko ulukulu ngati we uyu pakasi pa ba Izilayeli.”

10Po intumi zikanyokela kunyumba iya songo uwa basilikali nukumwagha uwambombo wache yula apolite.

U Yesu akumuzyusya kubufwe umwana uwa mufwilwe

11Pisinda pache#7.11 Pisinda pache: Amasimbo ghamo aghakale ghasimbite ukuti Indabi yache. u Yesu akabuka mukaya aka Nayini poka na bamanyili bache ni chilundilo icha bantu. 12Bo u Yesu apalamila pamulyango uwa lupaso ulwa kaya kala, akakomana na bantu babo bakanyamula umuvimba. Umufwe yula akaba mwana umulumendo mwene na mwene uwa mukolo umufwilwe yula, abantu abinji aba mukaya kalakala bakaba poka nawe. 13Bo u Mwene amwennya umufwilwe yula, ichisa chikamulema. Akamubuzya umukolo umufwilwe yula akati, “Utakalilaye.” 14Panapo akapalamila nukupalamasya ichibonde, abantu babo bakanyamula umuvimba bakima. Po u Yesu akati, “Mulumendo! Inkukubuzya, nyamuka!” 15Umufwe yula akazyuka, akikalisya nukwanda pakunena, po u Yesu akamupa unyina.

16Bosi bakanyila nkani nukumupala u Chala ukuti, “Umulaghuzi umukulu aboneka mumwitu!” Bakanena sona bakati, “U Chala iza pakubapoka abantu bache!”

17Ipangwi ilya Yesu ili likasata posi na posi muchigaba icha Yudeya na muvigaba vyosi vivyo vizyunguliye u Yudeya.

U Yohani Uwalozyo akuzituma Intumi zyache kwa Yesu

(Mat. 11.2-19)

18Bo abamanyili aba Yohani Uwalozyo bamubuzya zyosi zinizi, akabitizyapo abamanyili bache babili 19nukubatuma kwa Mwene pakumulalusya ukuti, “Nkimba awe we yuyo akaneniwagha ukuti akwiza, pamo tulindililaye uyunji?” 20Bo intumi zila zyafika kwa Yesu, zikati, “U Yohani Uwalozyo atutuma pakukulalusya ukuti, ‘Nkimba awe we yuyo akaneniwagha ukuti akwiza, pamo tulindililaye uyunji?’ ” 21Pakabalilo kalakala u Yesu akapozya abantu abinji ububine ubwakulekanalekana, akefya imizimu imibibi nukubighula amaso abafwamaso abinji. 22#Yes. 35.5-6, 61.1Akazyamula intumi izya Yohani zila akati, “Nyokela kamubuzye u Yohani zizyo mwazyennya nu kwivwa. Abafwamaso bakwennya, babo bafuye ivinama bakwenda, na bamambombo bakuswepa, na bamapuli bakwivwa, na bantu abafwe bakuzyuka kubufwe, sona Amazyu Amiza ghakulumbililiwa pakasi pa bantu abapina. 23Basayiwa babo batakwilamwa nane!”

24Bo intumi izya Yohani zyepapo, u Yesu akanda pakuchilalusya ichilundilo icha bantu nizya Yohani ukuti, “Bo mwabuka kwa Yohani munkolongo, nkimba mukalindililagha pakwennya ichoni? Nkimba ulutete lulo lukatetemagha ni mpepo? 25Nkimba mukabuka pakwennya ichoni? Nkimba umuntu yuyo avwalite amenda amiza nkani? Awe, abantu babo bakuvwala amenda aghamutengo nukwilagha, bakwikala munyumba izya bumwene! 26Mumbuzye, nkimba mukabuka pakwennya ichoni? Umulaghuzi? Naloli momumo, mukennya yumo uwakuchila umulaghuzi. 27#Mal. 3.1Pakuti u Yohani we yuyo Amasimbo ghakumunena ukuti u Chala akati, ‘Nkwiza pakuyituma intumi yane kuntazi kukwako pakukuyanizizya izila.’

28“Naloli inkubabuzya ukuti pakasi pa bantu bosi babo bakapapiwa muchisu ichapasi, nayumo umuntu uyunji uwakumuchila u Yohani. Loli umuntu yuyo munandi nkani mu Bumwene ubwa Chala, we yuyo mukulu nkani ukumuchila u Yohani. 29#Mat. 21.32; Luk. 3.12Abantu bosi poka na basonkezya umusonko bope bakivwa amazyu, pakoziwa nu Yohani, bakitika ukuti u Chala mugholosu. 30Loli aba Falisayi na bamanyisi aba Ndaghilo bakakana zizyo u Chala akalondagha pakubabombela pakukana ukoziwa nu Yohani.

31“Nkimba ningafwanikizya ni choni abantu abankulilo iyi? Nkimba bayanite ni choni? 32Bayanite bulo na bana babo bikaye muminalo. Akabukatila koka kakukabuzya akanji ukuti, ‘Tukabimbila inyimbo izya pasendwa, loli mutakimba! Tukabimbila inyimbo izya pampungo, loli mutakalila!’ 33Bo u Yohani Uwalozyo iza, akatuzya pakulya, atakang'wela uvinyo, po mukati, ‘Ali nu muzimu umubibi!’ 34U Mwana uwa Muntu akiza, akalya nu kung'wela, po amwe mukati, ‘Ennya, umuntu umupavu nu ching'wela uyu, sona umumanyani uwa basonkezya umusonko na bantu abambibi.’ 35Loli amahala agha Chala ghakulanjiziwa ukuti ghanaloli ni mbombo zyache.”

Umukolo uwa mbibi akumupakazya u Yesu amafuta

36Umu Falisayi yumo akamwitizya u Yesu ukuti balye poka nawe, po u Yesu akabuka kunyumba yache nukwikala pasi nukulya. 37#Mat. 26.7; Mlko. 14.3; Yoh. 12.3Mukaya kalakala mukaba umukolo uwa mbibi. Akivwa ukuti u Yesu akulya munyumba iya mu Falisayi yumo, po akiza ni botolo ilya alabasita ilyizule na mafuta aghakununkila 38nukwima kwisinda kunyayo izya Yesu, akalila nukunyesya inyayo izya Yesu na masozi ghache. Po akapuputa amasozi munyayo izya Yesu ni sisi zyache, akazifyofyonta, nukuzipungulila amafuta. 39Bo umu Falisayi yuyo akamwitizya u Yesu ennya zinizi, akanena mwene akati, “Nanti umuntu uyu akabanga mulaghuzi ngali amumanya umukolo yuyo amupalamasyanga, sona ngali amanya inkalo imbibi yiyo umukolo uyu ali nayo!”

40U Yesu akamula akati, “Simoni indi nacho chimo ichakukubuzya.”

Po u Simoni akamula akati, “Mumanyisi, mbuzya.”

41Kukabako umuntu yumo umukopezya indalama, yuyo akabakopezya abantu babili indalama, weka akamukopezya isalabazya 500, uyunji isalabazya 50. 42Bo bapotwa pakunyosya inkongole, akabahobokela bosi babili bala. Nkimba pa babili aba, we wenu yuyo angamughana umuntu umukopezya indalama yula ukuchilapo?

43U Simoni akamula akati, “Nkwinong'ona ukuti yuyo akamuhobokela inyinji.”

U Yesu akati, “Wamula akiza.” 44Po u Yesu akaghalabukila ku mukolo yula nukumubuzya u Simoni ukuti, “Nkimba ukumwennya umukolo uyu? Ninjila munyumba yako, loli utampiye amizi aghakusukusula munyayo zyane, loli umwene asukuzya inyayo zyane na masozi nukuzipuputa ni sisi zyache. 45Utakampokela pakunfyofyonta, loli umwene atalekite pakunfyofyonta munyayo zyane mumo niziye. 46Utakampakazya na mafuta kumutu wane, loli umukolo uyu apakazya inyayo zyane na mafuta. 47Polelo inkukubuzya ukuti ulughano ulukulu lulo alanjizya lukusimikizya ukuti imbibi zyache inyinji zyahobokeliwa. Loli umuntu wesi yuyo ahobokeliwa panandi, ulughano lwache lope lunandi.”

48Po u Yesu akamubuzya umukolo yula akati, “Imbibi zyako zyahobokeliwa.”

49Po babo bakalyanga poka nawe bakanda pakunenezannya benebene ukuti, “Nkimba we wenu umuntu uyu, yuyo akuhobokela ni mbibi bulo?”

50Loli u Yesu akamubuzya umukolo yula akati, “Ulwitiko lwako lwakupoka, wende akiza.”

Currently Selected:

Luka 7: LMBNT2016

Highlight

Copy