Luka 6

Bakumulalusya u Yesu nizya Isiku Ilyakutuzya

(Mat. 12.1-8; Mlko. 2.23-28)

1 # Ukk. 23.25 Pisiku Ilyakutuzya u Yesu akadumusannyanga mumaghunda agha ngano. Abamanyili bache bakanda pakupulula imitu iya ngano, bakayitukuta munyobe zyabo nukulya. 2Po aba Falisayi bamo bakalalusya bakati, “Nkimba choni chicho mukubomba zizyo zititikiziwe pakubombiwa Pisiku Ilyakutuzya?”

3 # 1 Sam. 21.1-6 U Yesu akabamula akati, “Nkimba mutabelengitepo zizyo u Devedi na bantu bache bakabomba pakabalilo kako bakaba ni zala? 4#Lev. 24.9Akinjila mu Nyumba iya Chala, akasenda ichibama chicho chikabikiwa kwa Chala ukuti chibanje chakwiyipa nukulya nukubapako abantu bache. Ukuyana ni Ndaghilo zyitu, loli abaputi bene bo babo bitikiziwe pakulya ichibama chila.”

5Pabumalilo u Yesu akababuzya akati, “U Mwana uwa Muntu we Mwene uwa Isiku Ilyakutuzya.”

U Yesu akumupozya umuntu uwa nyobe indemazu

(Mat. 12.9-14; Mlko. 3.1-6)

6Pisiku Ilyakutuzya ilinji u Yesu akinjila munyumba iyakwiputilamo nukumanyizya. Mulamula mukabamo umuntu uwa nyobe indilo yiyo yilemaye. 7Abamanyisi aba Ndaghilo naba Falisayi bamo bakalondagha pakumwagha u Yesu ni chifukwa ichakumupelela inongwa, po bakamwenelezya nkani ukuti bennye nanti angamupozya umuntu yula Pisiku Ilyakutuzya. 8Loli u Yesu akazimanya inyinong'ono zyabo, po akamubuzya umuntu uwa nyobe indemazu yula akati, “Zagha, wimilile kuntazi kuno.” 9Po u Yesu akababuzya akati, “Imbalaluzye: Nkimba Indaghilo zyitu zikutwitikizya pakubomba ichoni Pisiku Ilyakutuzya? Nkimba pakubomba ichintu ichiza pamo ichibibi? Nkimba pakubupoka ubumi pamo pakubunangannya?” 10U Yesu akabenelezya abantu bosi bala, po akamubuzya#6.10 akamubuzya: Amasimbo ghamo aghakale ghasimbite ukuti akanena mubukalale. umuntu yula akati, “Gholosya inyobe yako.” Akayigholosya inyobe yache, po yikaba akiza sona.

11Loli bakakalala nkani, po bakanda pakunenezannya benebene zizyo bangamubombela u Yesu.

U Yesu akubasala abatumiwa 12

(Mat. 10.1-4; Mlko. 3.13-19)

12Pakabalilo kalakala u Yesu akakwela pighamba pakwiputa nukuchelezya ubusiku bosi kulakula ukwiputa kwa Chala. 13Bo kwacha, akabitizya abamanyili bache nukusalapo bamo 12 babo akabita ukuti abatumiwa: 14U Simoni (u Yesu akamwita ukuti we Pitala) nu wamwabo, nu Andeleya, nu Yakobo, nu Yohani, nu Filipu nu Batolomeyo, 15nu Matayi, nu Tomasi, nu Yakobo umwana uwa Alufeyo nu Simoni uwa akabukatila, kako kakalondagha ukuti mu Izilayeli mubanje ubwabuke, 16nu Yudasi umwana uwa Yakobo, nu Yudasi Sikaliyoti, yuyo pisinda pache akamubika u Yesu munyobe izya balwani.

U Yesu akumanyizya nu kupozya

(Mat. 4.23-25)

17Bo u Yesu ika pighamba poka na batumiwa, akima pa butenganu poka ni chilundilo icha bamanyili bache. Ichilundilo icha bantu aba muchigaba chosi icha Yudeya naba mu Yelusalemu, sona na bantu aba mu Tile nu Sidoni, sona na bantu aba mulubazu ulwa nyanja, chikaba palapala. 18Bakiza pakumuteghelezya nukuti bapoziwe ububine bwabo. Sona bope babo bakatamiwanga ni mizimu imibibi bakiza nukupoziwa. 19Abantu bosi bakalondagha pakumupalamasya, pakuti amaka ghakafumagha mumwache nukubapozya bosi.

Nizya basayiwa na baghuniwa

(Mat. 5.1-12)

20U Yesu akabennya abamanyili bache nukubabuzya ukuti,

“Mwe basayiwa amwe mwe bapina,

pakuti Ubumwene ubwa Chala bwinyu!

21Mwe basayiwa amwe mwe muli ni zala akabalilo aka,

pakuti mukwiza pakwikuta!

Mwe basayiwa amwe mwe mukufwifwitila akabalilo aka,

pakuti mukwiza pakusekela!

22 # 1 Pit. 4.14 “Mwe basayiwa nanti abantu bakubabenga, bakubakana, bakubatuka nukubanena ukuti mwe babibi pachifukwa icha nene u Mwana uwa Muntu! 23#2 Imb. 36.16; Imbo. 7.52Bo vinivi vikubombiwa muhobokaye nukujina nkani, pakuti umuvwalo winyu mukulu nkani. Pakuti abanyenya babo bakababombela bunubu abalaghuzi.

24Loli chighune kukwinyu amwe mwe bakabi akabalilo aka,

pakuti mupokelite kale ivyakubahobosya vyinyu!

25Chighune nkani kukwinyu amwe mwe mukwikuta akabalilo aka;

pakuti mukwiza pakuba ni zala!

Chighune nkani kukwinyu amwe mwe mukuseka akabalilo aka,

pakuti mukwiza pakuba ni chitima nukufwifwitila!

26“Chighune nkani nanti abantu bosi bakubanena ubwiza, pakuti momumo abanyenya babo bakababombela na balaghuzi abamyasi.”

Ukubaghana abalwani

(Mat. 5.38-48, 7.12a)

27“Loli amwe mwe mukunteghelezya, inkubabuzya ukuti mubaghane abalwani binyu, mubabombelaye inyiza abantu babo bababengite. 28Mubasaye abantu babo bakubaghuna nukubiputila abantu babo bakubavwima. 29Nanti umuntu yumo akukoma kulusaya loka, umupe sona ulwamwabo ukuti akome sona. Nanti umuntu yumo akusenda inkazo yako, umuleke asende poka nu mwenda bulo. 30Nanti umuntu akukulaba ichintu chimo, umupe, sona nanti yumo akusenda ichintu chako, utakamubuzye ukuti anyosye. 31#Mat. 7.12Mubabombelaye abantu abanji vivyo amwe mukulonda ukuti bababombelaye.

32“Nanti mukubaghana abantu bene babo babaghanite, nkimba mungakabapo ichoni? Pakuti na bantu abambibi bope bakubaghana babo babaghanite! 33Nanti mukubabombela inyiza babo bakubabombela inyiza, nkimba mungakabapo ichoni? Na bambibi bope bulo bakubomba bunubu! 34Sona nanti mukubakopezya bene babo mukubasubila ukuti bakwiza pakunyosya, nkimba bo mwakabapo choni? Na bambibi bope bakukopezyana benebene ukuti bapokele mumo zyabeleye. 35Awe, mubaghane abalwani binyu nu kubabombela inyiza. Mubakopezyanje sona mutakalindililaye ukuti mupokelepo kamo. Po umuvwalo winyu ghukwiza pakuba mukulu nkani, sona mukwiza pakuba mwe bana aba Chala Wapamwanya Nkani. Pachifukwa chakuti akubapelela ichisa abantu babo batakumupala, sona na bantu ababibi. 36Mubanje bantu abachisa ukuyana na mumo Ughuso abeleye ni chisa.

Nizya kubalonga abantu abanji

(Mat. 7.1-5)

37“Mutakabalongaye abantu abanji, po namwe bulo mutakwiza pakulongiwa. Mutakabasusyanje abantu abanji, po namwe bulo mutakwiza pakususyiwa. Mubahobokelaye abantu abanji, po namwe bulo mukwiza pakuhobokeliwa. 38Mubapanje abantu abanji, po namwe u Chala akwiza pakubapa. Naloli mukwiza pakupokela ichipimilo ichiza, ichakusindiliwa, ichakuyingana, ni chakufuluka, momumo abantu bakwiza pakubapelagha munyobe zyinyu. Pakuti ichipimilo chicho mukubombezya pa bantu abanji, cho chicho u Chala akwiza pakubombezya papinyu.”

39 # Mat. 15.14 U Yesu akabataghila sona ichili akati, “Nkimba umufwamaso angamulongozya umufwamaso uwamwabo? Nkimba bosi babili batangawila muchibanka? 40#Mat. 10.24-25; Yoh. 13.16, 15.20Umumanyili ate wapamwanya ukumuchila umumanyisi wache, awe, loli umumanyili wesi yuyo amanyila umwakufikapo we yuyo akwiza pakuyana bulo nu mumanyisi wache.

41“Nkimba choni chicho ukwennya akapato mu lyiso ilya mukamu wako, ukusita ukwinong'ona ichizinka chicho chili mu lyiso lyako? 42Nkimba ungamubuzya buli-buli umukamu wako ukuti, ‘Wee mukamu zagha nefye akapato mulyiso lyako,’ bo utakuchennya ichizinka chicho chili mulyiso lyako? Wee muzimbuli wee! Efya tasi ichizinka chicho chili mu lyiso lyako, po ukwiza pakwennya akiza nukwefya akapato, kako kali mu lyiso ilya umukamu wako.”

Ikwi ni seke zyache

(Mat. 7.16-20, 12.33-35)

43“Ikwi ilyiza litangela ivikomwa ivibibi, pamo ikwi ibibi litangela ivikomwa ivyiza. 44#Mat. 12.33Ikwi lyosi likumanyikwa ni ivikomwa vyache vivyo likwela; mutakuyaba ivikomwa vya vikuyu pamo ukuyaba amampesya mu ntolovu. 45#Mat. 12.34Umuntu umwiza akufumya ubwiza bubo asungite mumoyo wache, wepe umuntu umubibi akufumya ububi bubo asungite mumoyo wache. Pakuti umulomo ghukunena vivyo vili mumoyo.

Nizya bazenga nyumba babili

(Mat. 7.24-27)

46“Nkimba choni chicho mukunyitizya ukuti, ‘Mwene, Mwene,’ loli mutakubomba zizyo inkubabuzya? 47Umuntu wesi yuyo akwiza kukwane akunteghelezya amazyu ghane nukughabombezya, inkwiza pakubalanjizya yuyo ayanite nawe. 48Ayanite bulo nu muntu yuyo akazenga inyumba yache. Akakumba mupaka pilyalabwe nukwalapo ulwalo ulwa nyumba. Ulusoko lukizula nukukoma inyumba yila, loli yitakayingana pakuti yikazengiwa akiza. 49Umuntu wesi yuyo akwivwa amazyu ghane, loli atakughabombezya imbombo ayanite bulo nu muntu yuyo akazenga inyumba yache ukusita ukuzengapo tasi ulwalo. Amizi aghakwizula ghakayikoma inyumba yila, po umwalubilolubilo inyumba yila yikawa. Ukumongoka kwache kukaba kukulu nkani!”

Currently Selected:

Luka 6: LMBNT2016

Highlight

Copy