Luka 8

Abakolo babo bakamukonka u Yesu

1Pisinda pache u Yesu akenda mutwaya na mutwaya utukulu nkani, pakulumbilila Amazyu Amiza nizya Bumwene ubwa Chala. Abamanyili 12 bala bakabuka nawe, 2#Mat. 27.55-56; Mlko. 15.40-41; Luk. 23.49pakaba sona abakolo bamo babo u Yesu akabefya imizimu imibibi nu kupozya ububine bwabo. Abakolo bala bo aba: U Maliya, yuyo bakatinji u Magadalena, yuyo akamwefya imizimu imibibi seveni, 3nu Yohana, yuyo umulume u Chuza akaba we songo kunyumba iya Helodi, nu Suzana, sona na bakolo abanji abinji babo bakabombezyanga ivintu vyabo pakumwavwa u Yesu poka na bamanyili bache.

Ichili icha mupesambeyu

(Mat. 13.1-9; Mlko. 4.1-9)

4Abantu abinji abakufuma mutwaya utwakulekana-leka bakabungana pabuzilo papo pakaba u Yesu, po u Yesu akababuzya ichili ichi akati, 5“Kukabako umuntu yumo yuyo akabuka pakupesa imbeyu mumughunda wache. Bo ali pakupesa, imbeyu zimo zikawila muzila, mumo zikakanyiwa, sona iviyuni vikiza nukuzizompola. 6Zimo zikawila pilyalabwe, bo imbeyu zyamela, zikuma pakuti itope litakaba ni ching'wezi. 7Imbeyu zimo zikawila pakasi pamivwa ghagho ghakakula nukufyululusya imbeyu zila. 8Sona imbeyu zimo zikawila pitope ilyiza; imbeyu zikakula nukwela ivikomwa 100.”

Pabumalilo u Yesu akati, “Yuyo ali na makutu aghakwivwila, ivwe!”

Ifundo iya vyili

(Mat. 13.10-17; Mlko. 4.10-12)

9Abamanyili bache bakamulalusya u Yesu iching'anamulo icha chili ichi. 10#Yes. 6.9-10Po u Yesu akabamula akati, “U Chala abavumbulila vivyo vifisiwe ivya Bumwene bwache. Loli abantu babo bali kuzi bakwivwa vyosi muvyili, ukuti bangennya nukwennya, loli bate bavyennyanje, sona nukuti bangivwa nukwivwa, loli batangavyivwisya.

U Yesu akulingannya ichili icha mupesambeyu

(Mat. 13.18-23; Mlko. 4.13-20)

11“Iching'anamulo icha chili chila cho ichi: Imbeyu zila gho amazyu agha Chala. 12Imbeyu zizyo zikawila muzila zikwimilila abantu babo bakwivwa amazyu agha Chala. Loli u Satana akwiza nukwefyamo amazyu ghala mumoyo ghabo ukuti baleke pakusubila nukupokiwa. 13Imbeyu zizyo zikawila pilyalabwe zikwimilila abantu babo bakwivwa amazyu nukughapokela nu buhobosu. Loli ghatakwinjila nkani mumwabo. Bakusubila pakabalilo akanandi bulo, sona nanti akabalilo akakuyeliwa kakwana bakuwa umwalubilolubilo. 14Imbeyu zizyo zikawila pakasi pamivwa zikwimilila abantu babo bakwivwa amazyu agha Chala. Loli ukwikolezannya nivya muchisu ichapasi pano, ukuchighana ichuma, sona ni vinyonywa vyosi ivyakulekanalekana vikwinjila nukufyululusya amazyu ghala, po ivikomwa zyabo zitakutona nalumo. 15Imbeyu zizyo zikawila pitope ilyiza zikwimilila abantu babo bakwivwa amazyu nukughasunga mumoyo umwiza nu bwanaloli. Sona bakujimba mupaka bape ivikomwa.”

Inyale yiyo bayikupikiye ni sonta

(Mlko. 4.21-25)

16 # Mat. 5.15; Luk. 11.33 “Nayumo umuntu yuyo akukozya inyale nukuyikupikila ni sonta pamo ukuyibika kusi kuchitala. Loli akuyibika pabuzelu, umwakuti yibalamilaye abantu bosi munyumba mula. 17#Mat. 10.26; Luk. 12.2Chosi chicho chifisiwe chikwiza pakuboneka pabuzelu. Chosi chicho chivwamite chikwiza pakuvumbuliwa.

18 # Mat. 25.29; Luk. 19.26 “Polelo muchebaye na zizyo mukwivwa. Umuntu wesi yuyo ali nako kale kamo, akwiza pakumonjelezyapo ivyinji ukuchila. Loli umuntu wesi yuyo ate nako kamo akwiza pakufyuliwa na kanandi bulo kako ali nako kale, napapo akwinong'ona ukuti ali nako kamo.”

Unyina na bawamwabo aba Yesu

(Mat. 12.46-50; Mlko. 3.31-35)

19Unyina uwa Yesu na bawamwabo bakafika kunyumba kula, loli bakapotwa pakukomana nawe pachifukwa icha chilundilo icha bantu. 20Umuntu yumo akamubuzya u Yesu akati, “Unyoko na bawamwinyu bali kuzi bakulonda bakomane nawe.”

21U Yesu akati, “Umayi na bawamwitu bo bantu babo bakwivwa amazyu agha Chala nukughabombezya.”

U Yesu akuyipumizya impepo

(Mat. 8.23-29; Mlko. 4.35-41)

22Isiku limo u Yesu akakwela mubwato poka na bamanyili bache, po akati, “Twende tulobokele kwisila ilinji ilya nyanja.” Po bakabuka. 23Bo bakuloboka, u Yesu akaghona utulo. Umwakuchenusya bulo impepo iyakoghofya yikanda pakukuka, po ubwato bukanda pakwizula na mizi, umwakuti bosi bakaba muntamyo impalapala nkani. 24Abamanyili bala bakabuka kwa Yesu pakumulamusya ukuti, “Wee Mwene, wee Mwene! Tuli pakudwiba!”

U Yesu akanyamuka nukuyilamula impepo na mayigha ghala ukuti vileke. Po vyosi vikaleka, umwakuti panyanja pakaba myee nkani. 25Po u Yesu akabalalusya abamanyili bache akati, “Ulwitiko lwinyu luli ko kwiyi?”

Loli bosi bakaswigha nukunyila nkani. Bakanenezannya benebene bakati, “Nkimba muntu wenu yunuyu, umwakuti impepo na mayigha ghope vikumwivwila!”

U Yesu akupozya umuntu uwa mizimu imibibi

(Mat. 8.28-34; Mlko. 5.1-20)

26U Yesu na bamanyili bache bakalobokela kuchigaba icha Gelasani,#8.26 Gelasani: Amasimbo ghamo aghakale ghasimbite ukuti Gadala (ennya mwa Mat. 8.28); aghanji ghakuti Gelegesa. chicho chikenannya ni chigaba icha Galileya. 27Bo u Yesu afika pisila, akakomana nu muntu uwa mukaya kalakala, yuyo akaba ni mizimu imibibi. Pakuti akabalilo akatali nkani umuntu uyu akendagha nkule, sona atakikalagha panyumba, loli akalindagha mumapumpa. 28Bo amwennya u Yesu, akakolomoka nkani, nukwisumba munyayo zyache. Akati, “Wee Yesu Mwana uwa Chala Wapamwanya Nkani! Nkimba ukulonda ichoni nane? Inkukulaba ukuti utakanfunde!” 29Akanena bunubu pachifukwa chakuti u Yesu akaghulamula umuzimu umubibi ghula ukuti wepemo mumwache. Akabalilo akinji umuzimu umubibi ghukamulemagha, napapo abantu bakamupinyagha inyobe ni vinama vyache ni mpingu, loli akadumulannyanga impingu zila, sona umuzimu umubibi ghukamuchimbizizyanga munkolongo.

30Po u Yesu akamulalusya akati, “Itabwa lyako we wenu?”

Umuntu yula akamula akati, “Itabwa lyane ne Chilundilo,” pachifukwa chakuti imizimu imibibi imyinji yikinjila mumwache. 31Imizimu imibibi yikamulaba u Yesu ukuti atakayitume mu chibanka ichibizu nkani#8.31 chibanka ichibizu nkani: Abantu bakinong'onagha ukuti imizimu imibibi yikabaghila pakwighaliliwa pasi kusi kwa chisu ichapasi mupaka pisiku ilya bumalilo ilya kufundiwa kwabo. chicho abantu ababibi bakufundiliwako.

32Pakabapo umudimo uwa ngulube, zizyo zikalyanga pighamba. Po imizimu imibibi yikamulaba u Yesu ukuti ayitikizye ukuti yinjile mu ngulube zila, po akayitikizya. 33Po imizimu imibibi yikepamo mu muntu yula nukwinjila mu ngulube. Umudimo ghosi ghula ghukachimbila nukwinjila munyanja, sona nukufwila mulamula.

34Abadimi aba ngulube zila bakennya chicho chikabombiwa, po bakachimbila nukubabuzya abantu mutwaya, sona na mumaghunda. 35Abantu bakabuka pakwennya chicho chikabombiwa, po bo biza kwa Yesu, bakamwagha umuntu yuyo imizimu imibibi yikepamo mumwache ikaye munyayo izya Yesu, bo avwalite, sona inyinong'ono zyache zikanyokelamo, po ubogha bukabalema bosi. 36Abantu babo bakazyennya zizyo zikabombiwa bakababuzya abantu namumo umuntu yula akapolela. 37Po abantu bosi aba muchigaba icha Gelasani bakamulaba u Yesu pakwepako pakuti bakanyila nkani. Po u Yesu akakwela mubwato nukunyokela kuko akafuma. 38Umuntu yuyo imizimu imibibi yikepamo mumwache akamulaba u Yesu ukuti amwitikizye pakubuka poka nawe.

Loli u Yesu akamunyosya nukumubuzya ukuti, 39“Nyokela kunyumba nukubabuzya zizyo u Chala akubombela.”

Umuntu yula akanyokela nukufumusya mukaya kosi zizyo u Yesu akamubombela.

U Yesu akumupozya umwana umulindu nu mukolo yumo

(Mat. 9.18-26; Mlko. 5.21-43)

40Bo u Yesu anyokela kwisila ilinji ilya nyanja, abantu bakamupokela, pakuti bosi bakamulindilagha we yuyo. 41Po u Yayili, usongo yumo uwa kunyumba iyakwiputilamo wepe akiza palapala. Akisumba munyayo izya Yesu nukwanda pakumulambilizya ukuti abuke kunyumba yache, 42pachifukwa chakuti umwana wache weka yuyo akaba na maka 12 akaba papipi pakufwa.

Bo u Yesu achili akwenda, abantu bakafyenyana nawe. 43Pakasi pa bantu bala mukaba umukolo, yuyo akayimba nkani nu bubine ubwa chakumwezi amaka 12. Akatagha vyosi vivyo akaba navyo mu baghanga;#8.43 Amasimbo ghamo aghakale ghatanenitepo akatagha vyosi vivyo akaba navyo mu baghanga. loli atakabapo nayumo umuntu yuyo akamupozya. 44Umukolo yula akiza muchilundilo icha bantu kwisinda kwa Yesu nukupalamasya mulubazu ulwa mwenda wache, panapo na panapo ibanda likaleka pakutonya. 45U Yesu akalalusya akati, “Nkimba we wenu ampalamasya?”

Umuntu wesi akakana, po u Pitala akati, “Mwene, abantu bosi bakubunganiye, sona bakukufyenya.”

46Loli u Yesu akati, “Umuntu weka ampalamasya pakuti nazimanya ukuti amaka ghepamo mumwane.” 47Po umukolo yula bo ennya ukuti aghiwa, akiza akutetema, akisumba munyayo izya Yesu. Palapala pamaso pa bantu bosi akanena ichifukwa chicho akamupalamasizya, sona na mumo akapolela umwalubilolubilo. 48U Yesu akamubuzya umukolo yula akati, “Wee mwana wane ulwitiko lwako lwakupozya. Wende akiza.”

49Bo u Yesu achili akunena, intumi iya kunyumba iya songo uwa nyumba iyakwiputilamo yikiza nukumubuzya u Yayili ukuti, “Umwana wako atuleka. Choni chicho ukumutamya umumanyisi.”

50Loli u Yesu akivwa zinizi nukunena kwa Yayili ukuti, “Utakanyilaye, subila bulo, po akwiza pakupola.”

51Bo u Yesu afika panyumba pala, atakamwitikizya nayumo umuntu ukwinjila nawe munyumba mula, loli u Pitala mwene, nu Yakobo, nu Yohani, nu wise, sona nu nyina uwa mwana yula. 52Abantu bosi bakalilagha, sona bakaba ni chitima. Po u Yesu akababuzya akati, “Mutakalilaye, umwana atafuye, loli aghonite bulo utulo!”

53Bosi bakamuseka, pachifukwa chakuti bakazimanya ukuti naloli umwana yula afuye. 54Loli u Yesu akamulema panyobe nukwitizya ukuti, “Mwana wane, nyamuka!” 55Ubumi bwache bukanyokelamo, umwalubilolubilo akanyamuka. Po u Yesu akabalamula ukuti bamupe umulindu yula ivyakulya. 56Abapapi bache bakaswigha nkani, loli u Yesu akabalamula ukuti batakamubuzyepo nayumo umuntu vivyo vyabombiwa.

Currently Selected:

Luka 8: LMBNT2016

Highlight

Copy