Matayus 11

Yohana wo batisma a tomo bemat vɔk na Yɛsu

(Luk 7:18-23)

1E bama de Yɛsu a yɛnɛ misang a bemât masâ fwom mɛ kuru na vɛ beba pyɛ́ yane, a kyè yi e hwomo na a wɔ̀ basa, na a to wɔ̀ shara Yɛgɛt Yat e bapomo de ba sé bagat na kwɔn hane mo.

2Yohana wo batisma de á sè e lɔ̂ ngyang a wok pyɛ́ de Kristi á sè ra mo, ko a tomo bemât masâ fwom mɛ wɔ́ e hwomo, 3na be rangal hɛ, “E hwo wɛ à mwat de ba ha, e kyè vey, kɛ wot e gyeng mwat o hwak arɛt?”

4Yɛsu a toyo a yɛn, a yang ɛn, “Tō in vɔk na Yohana, na yin a wɔ̀ ha a yɛ pyɛ́ de yin e wokos na yēmo de yin e bɛrɛng wɔgɔ: 5Bebók be tɔk bɛrɛng jey, ko bemat nà bol be tɔk kyè; ba sé tɛ̀ bekparong tyang, ko bekpey be tɔk wok há; ba sé sensa vemo de ba ga kushu, ko ba sé basa a bepɛng Yɛgɛt Yat. 6Wo yey pyɛng à womo de a ye bugurɛk yaga me wɛt!”

Yɛsu a ha e ra Yohana wo batisma

(Luk 7:24-35; 16:16)

7Sede bemât masâ fwôm Yohana bá sè kyè wɛrɛn, ko Yɛsu a hwo ha na bagyɛng bemat e ra Yohana mo, a ye, “Sɛ́ de yin á simo na yin a di jeng de yin á wɔ́ na Yohana e tê hey ɛ? Yin á wɔ̀ di gwohwěy de gul gwo pɛsɛl gwɛ a? 8Ko e sɛ́ kwong de yin á wɔ̀ di arɛt? E mwat de a tɔrɔ hɛ na yɔ̀m yat a? Wey, vemo de be tɔrɔ hɛn ano, be sɛsɛm hɛn e nelɔ begbɔng begwɔ̀m! 9Há a me hin, e sɛ́ de yin á wɔ̀ di arɛt? Yin á wɔ̀ di zarap Dagwi a? Ey mwin, me ha a yin, yin á di mwat de a dal zarap Dagwi. 10Yohana wɛ à mwat o de bà jɛk e ra yɛ e Bwok-basa Dagwi wɔgɔ,

“ ‘Di, tom hom à womo; ma sé tomo hɛ e nuyel mō,

na a yong gwong yaga hwo.’

11“Mwin me ha a yin: Vit a mwat de ba tɔ ɛ e jey yemo de a dal Yohana wo batisma na nerey. Ko mwa ano, mwat de a dal na nesɛl mwa e ji Segwɔm Lagwi a dal ɛ na nerey. 12E jeng de Yohana á ha reha mɛ, Dagwi á hwo re negwɔm e ra jey. Ko vey e remo, bemât repugû segwɔm o be jāma na be dul bemat na retek nà yel e ji segwɔm o. 13Vey e jeng Yohana mo, bwok-basa Badu Mose tanga mwa bezarap Dagwi bà kana ha e ra segwɔm o. 14Ko ka sede yin e simo na yin a sey reha mɛn o, Yohana mo a sé Eliya de bà kana ha e ra yɛ wɔgɔ, a rɔda vey. 15Mwat de a vɔk betong, tik na yɛ a wok!

16“Ma rɔda tyɛngrɛ bemât jeng yemo na sɛ́ arɛt? Yɛn a sé tyɛng na nèy de na sé sangal e nekwɔn rɛsɛl pyɛ́, ko be yila bemɛn, be tē,

17“ ‘Wot a pɛsɛl a yin jū, ko yin a rɛ̌ wɛt;

wot a ra lɛlɛ sesin, ko yin a lashe yey min wɛt.’

18“Di, Yohana a ga vey, a tik rê pyɛ́, ko a to tik sɔ̂ nshî anap, ko bemat be tē, ‘A vɔk ceng!’ 19Ko di, Me de ma tɛ́ me mwat ma vey, ma sé re na sɔ, ko bemat be tē, ‘Di, mwât serwéy na mwât sefeng de a sé sâ bemât serês dyâm yeles na pyɛ́ tanga bemât negwɔn neves behak!’ Ko mwa ano, tomong de be yi na netsitsɛ̂ng Dagwi be dura, netsitsɛng o na sé mwin.”

Gawey e ra bapomo de bemat o ba sey tsak o wɛt

(Luk 10:13-15)

20E bama mo, Yɛsu a hwo ra a bapomo de a ga ra bwarwêy pyɛ̂ bes mɛ e ji vɛ nu, yaga bemat o ba ga doyo yi e banɛn mɛn wɛt, a ye, 21“Yaa kukuuk! Gawey e ra hwo, à Kɔrasin! Gawey e ra hwo, à Bet-Saida! Ka sede ba yâng ra pyɛ̂ bes yemo e bapomô Tur na Sidɔn de ma ra e ji min, ka yimo bemat o ba ga yâng sangal e cɛ̂k rugu, na be tɛ̀sɛ fongol pwɛ̀ng e bato mɛn, na be dura, yɛn a ga doyo yi e banɛn mɛn! 22Mwin me ha a yin: Tuk de Dagwi a rɔda ba ra shɔt, a rɔda ba tosho reyɔ̂m bapomô Tur na Sidɔn a dal toshô reyɔm mɛ na yin. 23Ko hwo, à Kafarnahum à! Hwó bare, ba rɔda jut o vɔk e lagwi arɛt? Wey! Ba rɔda ba bomo hwo e ji kwɔ̂n kya! Ka sede ba yâng ra pyɛ̂ bes de bá kana ra e ji mō e repomô Sɔdɔm, ka repomo mo ra yâng nàra vey e yunung. 24Mwin me ha a yin: Tuk de Dagwi a rɔda ba ra shɔt, a rɔda ba tosho reyɔ̂m repomô Sɔdɔm a dal toshô reyɔm mɛ na hwo!”

A sé e Yɛsu zɔng de a tɔk Da mɛ

(Luk 10:21-22)

25E jeng o, Yɛsu a ye, “À Da, hwo de hwà sé Darwêy lagwi na jey! Ma feng a hwo, yaga hwà ga lɛrɛ a bemât netsitsɛng na bemât tɔ́k pyɛ́ yemo, ko hwà ga wunta a vemo de ba vɔk tɔ́k wɛt yɛ̄. 26Ey, ma feng a hwo, à Da, hwà ra ano, yaga a sé simo mō, na pyɛ de hwà di ya jam.

27“Da hom a ga tɛ̀ pyɛ̂ mwa e vɔ hom. Vit a mwat de a tɔk Hwey o sɛ̌ Dâ hɛ zɔng, ko vit a mwat de a tɔk Da mo sɛ̌ Hwey o zɔng tanga vemo de Hwey o ha simo na he dura a yɛn Da mo.”

Vemo de ba sé gbɛrɛk bê sɛ̀ pɔngɔ

28“Vey in na me, mwa hin de yin a sé gbɛrɛk, ko pyɛ́ min ya dal in dirik; mê nɔng in pɔngɔ. 29Wuna hin na me, na me dura a yin gwong, na yin a masa yi na me, yaga ma sé hywɛ, ko me dyɛng to hom naka, ko yin a rɔda sɛ̀ pɔngɔ yaga neyey min. 30Yaga gwong de me simo yin a kwey ɛ̀ gwa sé gbang wɛt, ko swesêk vɔk berɔndɔng de me tɛ̀ e ra yin gwa sé begelek.”

Currently Selected:

Matayus 11: bomBI

Highlight

Copy