Matayus 12

Rángal e ra Tuk Shábat

(Mar 2:23-28; Luk 6:1-5)

1E jeng yane, Yɛsu á sè kwey e hwirî alkama. Tuk hane mo há sè Tuk Shábat. Bemât masâ fwom mɛ ba wok vyong, ko ba hwo kwɔrɔs batô alkama mo, ba re yéneng o. 2Sede BeFarisi ba di ano, ba yâng Yɛsu, “Di, bemât masâ fwom mō ba sé ra pyɛ de Badu mot ba ro na be ra Tuk Shábat.”

3Yɛsu a toyo a yɛn, a yang ɛn, “Yin a ga basa pyɛ de Gbɔng Gwɔ̀m Davit à kana ra jeng de yɛ tanga bemat mɛ yɛn à wok vyong wɛt arɛt? 4À yel e ji duk Dagwi, à re kpam-tuk de bà nása e nuyêl Dagwi, ko à to gas a bemat de bà sè tanga yɛ, mwa ano de Badu mot ba ro mwat hwak nà re wɛ sɛ̌ bepiris zɔng. 5Kɛ yin a ga to basa e bwok-basa Badu Mose wɛt arɛt? Kahɛ Tuk Shábat bepiris e Gbɔng Duk Re Fongol yɛn e gyilsit redu de ra sé e ra Tuk Shábat. Ko mwa ano, a sé a yɛn buru wɛt. 6Ma sé ha a yin, mwat hwak a sé e ngamo de a dal Gbɔng Duk Re Fongol na nerey. 7Bà jɛk e Bwok-basa Dagwi wɔgɔ, ‘A sé e toshô reyɔm de me simo yi na yin, ko e nɔrɔ̂ yas de be yɛt vɔk na Dagwi wɛt.’ Ka yin a yâng tɔk cap-hâ há hemo, ka yin a yâng gang bemat de ba ga buru wɛt na shɔt wɛt. 8Yaga Me de ma tɛ́ me mwat ma vɔk reto e ra Tuk Shábat.”

Mwat de vwɔ mɛ gwa gyɔt

(Mar 3:1-6; Luk 6:6-11)

9Yɛsu a hàla kwɔn hane mo, ko a wɔ̀ yel e duk re fongol mɛn. 10Mwat hwak a sé e hwomo de vwɔ mɛ gwa gyɔt. Bemat behak ba simo na be sɛ̀ pyɛ cak e ra Yɛsu, na be wɔ̂ kun mɛ. Yaga ano, yɛn a rangal hɛ, ba ye, “Badu mot ba simo a wot na be tɛ̀ mwât serɔ tyang e Tuk Shábat arɛt?”

11Yɛsu a yang ɛn, “Ka sede hwak e ji min a vɔk tyimit, ko ya gaba e ji revɔng e Tuk Shábat, mwat o a rɔda nára vwɔ, a kaba yɛ, na a pat yɛ e jey wɛt arɛt? 12Ko mwat a dal vyel pyɛng na nerey zang pyak! Yaga ano, Badu mot ba simo a wot na wot a ra pyɛ ryat e Tuk Shábat.” 13Ano a yâng mwat o, “Nára vwɔ mō.”

A nára gwɛ, ko gwa to tɛ̀ gyat tyɛng sede gwot. 14Ko BeFarisi ba nusu, ba hwo jāma begwong de bê wey na Yɛsu.

Mwât fwom de Dagwi a ga kasa

15Jeng de Yɛsu a wok pyɛ de BeFarisi ba yong ɛ̀, a hàla kwɔn o. Bemat pyak ba raa hɛ, ko a tɛ̀ vê serɔ mwa tyang, 16ko a nɔng ɛn nu, a ye, “Yin kwon ha a bemat mwat de me ma sé wɛt.” 17A ra ano, yaga na be bin sila mɛ̀ pyɛ de Dagwi à kana ha e nû Yɛshaya, zarap mɛ wɔgɔ,

18“Di, mwât fwom hom a womo de ma ga kasa,

womo de ma tɛ̀ yey na yɛ, ko yey hom ya pɛngɛ na yɛ.

Ma rɔda nɔng ɛ Gabik hom,

ko yɛ a rɔda ha a mwa yére bemat jey, me gas shɔt e tē.

19A rɔda jāma há wɛt, kɛ a tá lwɛ́lɛ arɔng wɛt;

vit a mwat de a rɔda wok fwɔ mɛ e nehyok.

20A rɔda kwɔrɔ mapak de wa ye net wɛt,

ko a rɔda rimi kywa-kya de wa vey bagât ku wɛt.

A rɔda ra ano, sɛ̌ bemât mwa ba sey gâs shɔt hom.

21Ko mwa yére bemat jey ya rɔda sɛt yey e ra yɛ.”

Yɛsu na Baal-Zɛbul

(Mar 3:20-30; Luk 11:14-23; 12:10)

22E bama mo, bemat behak bá vey a Yɛsu na mwat hwak de á sè bwók, ko á to sè kpey yaga á vɔk ceng. Yɛsu a tɛ̀ ɛ tyang, ko mwat o a tɔk ha, a bɛrɛng jey arɔng. 23A sé a bemât mwa de ba sé e hwomo kpɔrɔk, ko yɛn a ye, “Kɛ̀ e yɛ de a sé Hwey Davit bɛ?”

24Sede BeFarisi ba wok ano, yɛn a ye, “A sé e Baal-Zɛbul, gwɔ̀m cēng zɔng de e nɔngɔ̂s mwat womo reto na a paa mɛ̀ cēng!”

25Sede remo de Yɛsu a tɔk báre mɛn, a yang ɛn, “Kasɛ̌ sevwel de sa gas ɛ na se tó como na tô sɛ sa rɔda lashe hɛ. Ko kahɛ pomo kɛ lɔ de ha gas ɛ na he ra repugu na tô hɛ ha rɔda gaba. 26Ko ka sede Shetan a yâng tɔk pat tó mɛ, a yâng sé tó como na tó mɛ a wane. Yi e rɛ̌ de segwɔm mɛ sê tumal arɛt? 27Ko ka sede me paa cēng na retô Baal-Zɛbul, ko bemât raa min ɛ̄, be paa yɛ̄ na retô wà arɛt? Di, pyɛ de bemât raa min o be ra ye dura tsɛng-tsɛng, yin a ga buru. 28Ko sede remo de me paa cēng na retô Gabik Dagwi, ko hane he dura, Dagwi a ga hwo re negwɔm e ra yin.

29“Vit a mwat de ê tɔk yel e lɔ mwât gap na a hashe pyɛ́ mɛ, sɛ̌ a tānga rɔgɔs mwât gap o e ngyen. E bama mo, ê tɔk hashe pyɛ́ mɛ.

30“Kawɛ mwat de a sé nwang me wɛt a kyɛ́ ɛ me; ko yɛ womo de e sɛlɛ me e de tulâ pyɛ́ wɛt e shara yɛ̄. 31Yaga ano, ma sé ha a yin, Dagwi ê tɔk hàla a bemat yére banɛ̂n mwa de yɛn e ragas, na mwa yére há ves de be ha e ra yɛ. Ko a rɔda hàla a mwat de a ha há ves e ra Gabik Jɛrɛ wɛt. 32Dagwi ê to tɔk hàla a kawɛ mwat de a ha há ves e ra Me de ma tɛ́ me mwat, ko a rɔda hàla a mwat de a ha há ves e ra Gabik Jɛrɛ wɛt, kɛ e jeng yemo kɛ e jeng de ye kyè vey arɔng.”

Be tɔk cɔgɔt yi e nèy de ye tɔs

(Luk 6:43-45)

33“Ka sede cɔgɔt ya sé ryat, nèy o nê sè nerat, ko ka sede cɔgɔt o ya sé vyes, nèy o nê sè neves arɔng. Yaga be tɔk cɔgɔt yi e nèy de ye tɔs. 34À yin bègàbak! Yi e rɛ̌ de yin e tɔk ha pyɛ́ ryat, a remo de yin a sé beves arɛt? Yaga pyɛ́ de mwat e ha na nu, e yɛ̄ de ye sila yey mɛ. 35Mwat rwat e ha pyɛ́ ryat yi e pyɛ́ ryat de ya sé e yey mɛ, ko mwat vwes e ha pyɛ́ vyes yi e pyɛ́ vyes de ya sé e yey mɛ arɔng.

36“Ma sé ha a yin, tuk de Dagwi a rɔda ba ra shɔt, ba rɔda ba rangâl kawɛ mwat e ra pyɛ de ya tɛ̀ a ha kahɛ há hê kpɛɛ de á kana ha. 37A sé e neha mō nɛ de ba rɔda ba ra a hwo mɛ̀ shɔt: E nɛ de na rɔda ba tɛ̀ be hàla hwo washak kɛ be gang o na shɔt.”

Bemat ba simo Yɛsu a dura a yɛn pyɛ bes cak

(Mar 8:11-12; Luk 11:29-32)

38Behak e ji bemât basâ Badu na BeFarisi ba yâng Yɛsu, “À Mwat Basa, wot e simo wot a di pyɛ bes cak yi na hwo.”

39Ko Yɛsu a toyo a yɛn, a ye, “Bemât jeng yemo ba sé beves, ko be kyɛ́ ɛn nà raa Dagwi! Yin e simo be dura a yin pyɛ bes cak a? Wey! Pyɛ bes de ba rɔda dura a yin yɛ, à yè Yona, zarap Dagwi. 40Sede remo de Yona à ra pɔlɔ tat, gwi na turuk, e ji jîm gwogbɔng gwotɔk, ano arɔng Me de ma tɛ́ me mwat ma rɔda ra pɔlɔ tat, gwi na turuk, e nɛ̂n vwel. 41Tuk de Dagwi a rɔda ba ra shɔt, bemât Nineve yɛn a rɔda ba sogo tanga bemât jeng yemo, ko yɛn a rɔda ba tɛ̀ kun mɛn, yaga bemât Nineve mo bà kana doyo yi e banɛn mɛn jeng de yɛn à wok Yona à shara hâ Dagwi. Ko di in, mwat hwak a sé e ngamo de a dal Yona mo na nerey. 42Tuk shɔt o arɔng, hwā de à sè gbɔng gwɔ̀m e rwa batin a rɔda ba sogo tanga bemât jeng yemo, ko a rɔda ba tɛ̀ kun mɛn, yaga à kyě gwɔsɔ yi e yɛnɛ̂ jey, na a wokos neha tɔ́k ne Sɔlɔmɔn. Ko di in, mwat hwak a sé e ngamo de a dal Sɔlɔmɔn o na nerey.”

Ceng de ya to toyo

(Luk 11:24-26)

43“Jeng de ceng ya ga nusu yi e ji mwat, ya sé kyě kyè e nedem nehwogot na ye jāma kwɔn de yê pɔng ɛ̀, ko ye sɛ̀ kwɔn o wɛt. 44Ko ye yâng tô yɛ, ‘Mê to me vɔk e lɔ hom de ma ga kana yi ɛ̀.’ Ko jeng de ye wɔ, ye sɛ̀ lɔ mo, vit à pyɛ cak e ji mo, ba ga yishing hɛ haalal, ko ba ga to yong hɛ mwa gyat. 45Ye to kyè, ko ye wɔ̀ vey na cēng o cak tyaama de ya dal yɛ̀ na neves, ko ye yel na ye sangal e hwomo. E yɛnɛ mo, negwɔn sangâl mwat o ne dal ne mɛsɛng o na neves. Pyɛ ma yemo de yê té na bemat beves vê jeng yemo.”

Nêng Yɛsu na begwa mɛ

(Mar 3:31-35; Luk 8:19-21)

46Sede Yɛsu á sè rɔ̌ ha na regyɛng bemat o, neng mɛ na begwa mɛ ba hwo pom, ba tumal e majêy lɔ mo, yɛn a sé simo na yɛn a ha na yɛ. 47Yaga ano, mwat hwak de a sé e hwomo a ha a yɛ, “Di, neng mō na begwa mō ba sé e tumal e majey, yɛn e simo be ha na hwo.”

48Yɛsu a toyo a mwat o, a yang ɛ, “E wà, à neng hom ɛ? E beva, à begwa hom arɛt?” 49Ko a nára vwɔ mɛ wɔ na bemât masâ fwom mɛ, a ye, “Di, neng hom na begwa hom a vemo! 50Kawɛ mwat de e ra pyɛ de Da hom de a sé e ji lagwi e simo, e yɛ wɛ de a sé gwa hom na neng hom arɔng.”

Currently Selected:

Matayus 12: bomBI

Highlight

Copy