Matayus 13

Gwɔrɔ-hâ mwât berê yére

(Mar 4:1-9; Luk 8:4-8)

1E tuk hining o, Yɛsu a nusu yi e lɔ, ko a wɔ̀ sangal e vwâ gworep na a basa a bemat. 2Bagyɛng bemat de ba tula hɛn bá sè bagbɔng o sizɔng. Yaga ano, a yel e dwa-nshi, a sangal, ko bemat o mwa ba sé tumal e rekwogom. 3Yɛsu a misang a yɛn pyɛ́ pyak na gwɔrɔ-há detidetu, a yang ɛn:

“Mwat hwak a nusu na a wɔ̀ bere yére. 4Jeng de a sé bere yére mo, cak ya gaba e tê gwong, ko benon ba vey, ba tɔng yɛ̄. 5Cak ya gaba e kwɔ̂n kusha, kwɔn de ha vɔk nefongol pyak wɛt. Yére mo ya tānga vungu, yaga kwɔn o ha vɔk nefongol yɛt wɛt. 6Ko jeng de gwi gwa vey e tē, gwa tá yɛ̄, ko ya hworok, yaga berinîs yɛ̄ bá kana yel yikyik e vwel wɛt. 7Cak ya gaba e kwɔ̂n serɔgɔ. Rɔgɔ mo ha ras, ko ha vo yɛ̄. 8Ko cak arɔng ya gaba e nefongol nerat, ya tɛ̀ yéneng, ko ba sɛ̀ pyɛ de ba bere zang naga (100), cak kuru batyiimin (60), na cak kuru batat (30).”

9E yɛnɛ mo, Yɛsu a yang ɛn, “Mwat de a vɔk betong, tik na yɛ a wok.”

Retîn gwɔrɔ-há mo

(Mar 4:10-12, 25; Luk 8:9-10, 18; 10:23-24)

10Bemât masâ fwôm Yɛsu ba vey na yɛ, ba rangal hɛ, “Yaga sɛ́ de hwó ha na bemat na gwɔrɔ-há arɛt?”

11Yɛsu a hanat, a yang ɛn, “A sé e yin vɛ de ba nɔng in tɔ̂k pyɛ̂ neyaàng Segwɔm Lagwi, ko a sé e yɛn wɛt. 12Yaga mwat de a vɔk pyɛ cak, ba rɔda to gwɛ̌ a yɛ, yaga na a bin vɔk yɛ shɛrɛk, ko yɛ de a vɔk pyɛ wɛt, ba rɔda sey ɛ̀ yi na yɛ kepyɛ de a vɔk. 13Pyɛ de ya tɛ̀, ma ha na yɛn na gwɔrɔ-há a yet: Yɛn e bɛrɛng, ko yɛn e di wɛt, yɛn e wokos, ko yɛn e wok kɛ be tɔk pyɛ mo wɛt. 14Yaga ano, pyɛ de Yɛshaya, zarap Dagwi, à kana ha ya sila yi na yɛn:

“ ‘Bemat vemo yɛn ê sǎ e de wokos, ko yɛn ê tɔk há mo wɛt,

yɛn ê sǎ e de bɛrɛng, ko yɛn ê di pyɛ cak wɛt.

15Yaga neyey bemat na ga tɛ́ ɛn kashalang,

yɛn a bang betong mɛn,

yɛn a to bang bayis mɛn.

Ka a sé ano wɛt, ka yɛn a yâng bɛrɛng na bayis mɛn,

yɛn a yâng wokos na betong mɛn,

yɛn a yâng tɔk tsak o e neyey mɛn,

ko yɛn a yâng doyo vɔk na Dagwi

de ê tɛ̀ ɛn tyang.’

16“Ko yin à, yin a sé vê yey pyɛng, yaga bayis min be tɔk bɛrɛng jey, ko betong min be tɔk wokos há. 17Mwin me ha a yin: Bezarap Dagwi pyak, tanga pyak e ji bemat de ba ra pyɛ de Dagwi e simo bà kana vɔk cwey dî pyɛ́ de yin e bɛrɛng, ko yɛn à di yɛ̄ wɛt, bà kana to simo be wok pyɛ́ de yin e wokos, ko yɛn à wok yɛ̄ wɛt.”

Yɛsu a nɔng cap-hâ gwɔrɔ-há mo

(Mar 4:13-20; Luk 8:11-15)

18“Wet in betong, na yin a masa cap-hâ gwɔrɔ-hâ mwât berê yére mo: 19Bemat de be wok há e ra Segwɔm Dagwi, ko yɛn a tɔk hɛ wɛt, yɛn a sé sede yére yane de ya gaba e tê gwong. Shetan, wo neves, e vey, ko e sey ɛ̀ na gap pyɛ de bá kana bere e neyey mɛn. 20Yére yane de ya gaba e ra kusha ya sé e tô bemat de be wok reha mo, ko e ji jeng o, yɛn e sey rɛ na yey pyɛng. 21Ko re tɛ̀ berinis e ji mɛn wɛt, yɛn e pɔl ɛ̀ ba wɛt. Jeng de reyɔm re vey, kɛ be hwo tak a yɛn reyɔm yaga reha mo, ko remo-remo, yɛn e to ɛn na bama. 22Yére de ya gaba e ji serɔgɔ ya sé e tô vemo de be wok reha mo, ko bɔrɔ̂k pyɛ̂ jey, na netâ yas ye vo reha mo, ko re mara wɛt. 23Ko yére de ba bere e nefongol nerat ya sé e tô bemat de be wok reha mo, ko be tɔk rɛ. Be ra mɛ̀ fwom naka, sede yére de ya tɛ̀ zang naga (100), cak kuru batyiimin (60), ko cak kuru batat (30) arɔng.”

Gwɔrɔ-há e ra behwěy e hwiri

24Yɛsu a to vey a yɛn na gwɔrɔ-há mo hak, a ye, “Segwɔm Lagwi sa sé sede ngan: Mwat hwak a wɔ̀ bere yére ryat e hwiri mɛ. 25Ko nabwalak jeng de bemat ba sê nevwa, mwât repugu mɛ a wɔ̀ bere yére behwěy e hwirî alkama mɛ mo, ko a to kyè wɛrɛ. 26Jeng de alkama mo wa ras, wa tɛ̀ bato naka, ko behwěy o arɔng ba nusu. 27Besam dâ hwiri mo ba vey na yɛ, ba ye, ‘À da, a sé e yére ryat de hwá bere e hwiri mō wɛt a? Yi e gwa kwong de behwěy ba yi ɛ̀ arɛt?’ 28A toyo a yɛn, a yang ɛn, ‘A sé e wo repugu hwak de a ra ano.’ Yɛn a to rangal hɛ, ‘Hwô simo na wot a wɔ̀ lùyu vɛ arɛt?’ 29Ko a yang ɛn, ‘Wey, yaga jeng de yin ê sè lùyu behwěy o, gyeng rɔ̌ yin ê kyě lùyu alkama mo hwak tanga vɛ. 30Tík in na mwa yɛ̄ bya ye ras e dem o sɛ̌ jeng bwal. E jeng yane, ma rɔda yâng bemât bwal o: Tānga tula hin behwěy o e ngyen, na yin a rɔgɔs vɛ bapam o bapam o, na be tɛ̀ kya e vɛ arɔng. E bama mo, toyo hin na yin a wɔ̀ yɛt alkama mo, na be bang wɛ e ji gban hom.’ ”

Gwɔrɔ-há e ra keyenêng mastat

(Mar 4:30-32; Luk 13:18-19)

31Yɛsu a to ha a yɛn gwɔrɔ-há mo hak, a ye, “Segwɔm Lagwi sa sé sede ngan: Mwat hwak a jut keyenêng mastat, ko a tus e hwiri mɛ. 32Mwa ano de ka dal bwang yére mwa de be tus na nesɛl, ko jeng de ka ras, ke dal bwang batîn berang de be tus e ji bwi. Ke tɛ́ ɛ retîn cɔgɔt; ko benon be tɔk yís na be lɔkɔs barɛngɛ mɛn e nelang o.”

Gwɔrɔ-há e ra géy-sing

(Luk 13:20-21)

33Yɛsu a to gwɛ̌ ha a yɛn gwɔrɔ-há mo gbak, a ye, “Segwɔm Lagwi sa sé sede ngan: Hwā hwak a jut géy-sing, ko a wuna wɛ na shǐ tat hê nemuk, sɛ̌ regat o mwa ra tɛ́ ɛ fugum.”

Pyɛ de ya tɛ̀ Yɛsu a ra fwom na gwɔrɔ-há

(Mar 4:33-34)

34Yɛsu a ra fwom na gwɔrɔ-há pyak na a ha a bagyɛng bemat pyɛ́ yemo mwa, ko a ha a yɛn pyɛ cak sana gwɔrɔ-há wɛt. 35A ra ano, yaga na a bin sila pyɛ de zarap Dagwi à kana ha wɔgɔ,

“Ma rɔda ra fwom na gwɔrɔ-há jeng de mê ha na yɛn,

ma rɔda ha a yɛn pyɛ́ de yà sè e lɛrɛ yimo jeng de bà yong jey.”

Yɛsu a nɔng cap-hâ gwɔrɔ-há e ra behwěy

36Yɛsu a hàla bagyɛng bemat o, ko a wɔ̀ yel e ji lɔ. Bemât masâ fwom mɛ ba wɔ̀ sɛ̀ ɛ e lɔ mo, ba yang ɛ, “Misang a wot cap-hâ gwɔrɔ-há e ra behwěy e ji hwiri.”

37Yɛsu a yang ɛn, “Yɛ mwat wane de a bere yére ryat o mo a sé Me de ma tɛ́ me mwat. 38Hwiri mo, gwɛ à jey, ko yére ryat o ya sé bemat de Dagwi e re negwɔm e ra yɛn. Behwey o vɛ à bemat de be raa gwɔ̀m cēng, wo neves, 39ko mwât repugu de a bere behwěy o, yɛ à gwɔ̀m cēng o. Jeng bwal o, yɛ à jeng yɛnɛ̂ jey, ko bemât bwal o, vɛ à betom-lagwi. 40Sede remo de be lùyu behwěy o na be tɛ̀ kya e vɛ, a rɔda ba sè tyɛng ano e jeng yɛnɛ̂ jey: 41Me de ma tɛ́ me mwat ma rɔda ba tomo betom-lagwi na be tula yi e ji segwɔm hom mwa bemat de be tɛ̀sɛ bemat be ragas banɛn tanga mwa vemo de be ragas pyɛ́ vyes. 42Yɛn a rɔda bomos hɛn e ji gwokya de gwo re sedesi, e kwɔn de yɛn a rɔda ba tosho na be roros yìn mɛn. 43Ko vemo de be ra pyɛ de Dagwi e simo yɛn a rɔda ba lolo sede gwi e ji segwɔm Da mɛn. Mwat de a vɔk betong, tik na yɛ a wok!”

Gwɔrɔ-há e ra yas de ba lɛrɛ e cap

44“Segwɔm Lagwi sa sé sede ngan: Mwat hwak a sɛ̀ yas de bá kana lɛrɛ e ji cap. Jeng de a sɛ̀ yɛ, a to bang yɛ e hwomo gbak. Ko yaga a vɔk yey pyɛng ding-ding, a kyè, a wɔ̀ row kayɛ pyɛ de a vɔk, ko a sey mɛ̀ cap yane mo.”

Gwɔrɔ-há e ra beta berat sedesi

45“Ano arɔng, Segwɔm Lagwi sa sé sede ngan: Gbɔng jik hwak a wɔ̀ jāma beta berat sedesi. 46Jeng de a sɛ̀ gwining de gwa vɔk nerat yɔ̀kyɔk, a kyè, a wɔ̀ row kayɛ pyɛ de a vɔk, ko a sey mɛ̀ gwɛ.”

Gwɔrɔ-há e ra segun

47“Segwɔm Lagwi sa to sé sede ngan: Bemât vôs betɔk behak ba bomo segun mɛn e ji gworep, ko yɛn a vos yerê betɔk detidetu. 48Jeng de segun o sa sila, bemât vôs betɔk o ba hwɔlɔ sɛ vɔk e rekwogom. Ko yɛn a sangal na be kasa betɔk berat o. Yɛn a tɛ̀sɛ berat o e ji sháp, ko ba bomos beves o. 49A rɔda ba sè tyɛng ano e jeng yɛnɛ̂ jey: Betom-lagwi ba rɔda ba nusu na be gas bemat de be ragas pyɛ́ vyes yi e vemo de be ragas pyɛ́ de Dagwi e simo. 50Yɛn a rɔda bomos hɛn e ji gwokya de gwo re sedesi, e kwɔn de yɛn a rɔda tosho na be roros yìn.”

Há e ra pyɛ́ pyas na pyɛ́ ryoso mo

51Yɛsu a rangâl bemât masâ fwom mɛ, a ye, “Yin a ga tɔk pyɛ́ yemo mwa yɛ̄ arɛt?”

Yɛn a toyo a yɛ, “Ey.”

52Ko a yang ɛn, “Hemo he dura wɔgɔ, kawɛ mwât basâ Badu de a tɛ́ ɛ mwât masâ fwom e ji Segwɔm Lagwi a sé sede dâ lɔ hwak de e paa yi e gban mɛ pyɛ́ de ya sé pyas o, mwa na yēmo de ya sé ryoso.”

Bemât Nazarɛt ba kyɛ́ ɛn Yɛsu

(Mar 6:1-6; Luk 4:16-30)

53E bama de Yɛsu a yɛnɛ hâ gwɔrɔ-há detidetu mo, a hàla kwɔn o, 54ko a toyo wɔ e repomô lɔ mɛ. E hwomo, a basa a bemat e ji duk re fongol mɛn, ko yɛn a langat hɛn, ba tē, “Mwat womo a sɛ̀ netsitsɛng nemo yi e gwa arɛt? A to sɛ̀ retô râ pyɛ̂ bes yemo yi e gwa arɛt? 55À besa! E hwêy mwât fwom cɔ́gɔt a hemo wɛt arɛt? Rezâ neng-gwɔ̂ hɛ, à Marya wɛt a, ko begwa mɛ, à Yakɔp, na Yɔsɛf, na Simɔn, tanga Yuda wɛt arɛt? 56Bepolgwo mɛ mwa ba sé na sangal e ngamo tanga wot wɛt arɛt? Ko sɛ̌ yi e gwa de a sɛ̀ pyɛ́ yemo mwa arɛt?” 57Yaga ano, yɛn a kyɛ́ ɛn hɛ.

Ko Yɛsu a yang ɛn, “Bemât mwa be nɔngɔ̂s zarap Dagwi nerey sɛ̌ bemât repomo mɛ na belɔ mɛ.” 58A ra pyɛ̂ bes pyak e hwomo wɛt, yaga yɛn a tɛ̀ gap mɛn e ra yɛ wɛt.

Currently Selected:

Matayus 13: bomBI

Highlight

Copy