Matayus 14

Rekû Yohana wo batisma

(Mar 6:14-29; Luk 9:7-9)

1E jeng yane, Gbɔng Gwɔ̀m Herodes a wok neha de bemat ba shara e ra Yɛsu. 2Ko a yâng bemât fwom mɛ, “Yaa kukuuk! Womo a sé e Yohana wo batisma. Ba ga to sene hɛ yi e reku! Pyɛ ma yemo de ya tɛ̀, a vɔk reto na a ra mɛ̀ pyɛ̂ bes yemo.”

3Yɛ Herodes o á kana tɛ̀, be vo Yohana, be rɔgɔs hɛ na be tɛ̀ ɛ e lɔ̂ ngyang. Retîn pyɛ de ya tɛ̀ a ra ano a ret ngan: Á kana jut hwâ gwa mɛ Filip, ko á ra weneng mɛ. Ba tâng hwā mo, à Herodyas. 4Ko Yohana a tâng Herodes, “A sé tyɛng de hwà jut hwâ gwa mō e weneng wɛt!” 5Herodes a simo na a mɔrɔ Yohana mo, ko a tele hɛ bemat, yaga yɛn a jut Yohana a sé zarap Dagwi.

6Sede tûk tɔ̂ Herodes ha doyo, hwông Herodyas a rɛ̌ a bemat de ba rini hɛn, ko rɛ́ɛ mo ha pɛngɛ a Herodes yey sizɔng. 7Yaga ano, a ha a hwong o na sira wɔgɔ, a rɔda nɔng ɛ kayɛ pyɛ de e simo.

8Hwong o a wɔ́ na neng mɛ, na a rangal hɛ pyɛ de ê ye. Ano kwong, a toyo a gbɔng gwɔ̀m na há, a ye, “Nɔng me e ngamo ratô Yohana wo batisma e bworo!”

9Yêy gbɔng gwɔ̀m o ya lashe hɛ; ko yaga sira de a ga kana ra e nuyêl bekɛnɛt mɛ, a nɔng nu be nɔ̂ng hwong o pyɛ de a ra won o. 10Ko a tɛ̀ be wɔ̀ tùt ratô Yohana e lɔ̂ ngyang o. 11Ba vey na rɛ e ji bworo, ba nɔ̂ng hwong o, ko hwong o a wɔ̀ nɔ̂ng neng mɛ.

12Bemât masâ fwôm Yohana ba wɔ́, ba jut rebek mɛ, ko yɛn a wɔ̀ lɛrɛ rɛ. E bama mo, yɛn a wɔ̀ ha a Yɛsu pyɛ de ya té.

Yɛsu a nɔ̂ng beras gu batungun pyɛ́

(Mar 6:30-44; Luk 9:10-17; Yoh 6:1-14)

13Sede Yɛsu a wok pyɛ de ya ga té na Yohana, a hàla kwɔn o e dwa-nshi, a kyè vɔk e kwɔn de vit a mwat, yɛ nju mɛ zɔng. Jeng de bemat ba wok ano, ba halsa bapomo mɛn, ko ba raa hɛ e bol. 14Yɛsu a wul gura gworo, ko a gyirik yi e dwa-nshi mo. Jeng de a di gbɔng regyɛng bemat, a wok nemwishish mɛn, ko a tɛ̀sɛ bemât serɔ mɛn tyang.

15Sede nahywegelek na vey, bemât masâ fwom mɛ ba vey na yɛ, ba yang ɛ, “Di, gwi gwa ga kyè, ko kwɔn hemo ha sé vit à mwat. Tɛ̀ bemat o e gwong, yaga na yɛn a kyè vɔk e nebapomo, na yɛn a wɔ̀ sey a bato mɛn pyɛ̂ re.”

16Ko Yɛsu a toyo a yɛn, a ye, “A sé gbing-gbing na yɛn a kyè wɛt. Yin pyɛ min, nɔng in hɛn pyɛ cak na be re.”

17Yɛn a yang ɛ, “Kéy kàa! Pyɛ de wot a vɔk e ngamo ya sé bāgat kpam-tuk batungun na betɔk beba zɔng!”

18A yang ɛn, “Vey in na vɛ e ngamo na me.” 19Ko a tɛ̀ bemat o be sangal e ra sɔng. Ano arɔng, a jut bagat kpam-tuk vane batungun tanga betɔk beba, a tɛ̀ bayis mɛ vɔk e lagwi, ko a feng a Dagwi yaga pyɛ́ mo. A hwo kwɔrɔs bagat o, a nɔ̂ng bemât masâ fwom mɛ, ko bemat mɛ ba gas a bemat o vɛ arɔng. 20Yɛn mwa ba re, ba siris. Bwang o gwa pɔl, ko bemât masâ fwom mɛ mo ba to sila sháp kuru na yɛ bya (12) na cɛ́k o de ya pɔl. 21Nepyak bemat de ba re pyɛ́ mo na sé sede gu batungun (5,000); beras zɔng a vane, sana tɛ̀ beha na nèy.

Yɛsu a kyè e ra tɛ̂t nshi

(Mar 6:45-52; Yoh 6:15-21)

22E bama mo, Yɛsu a tɛ̀ bemât masâ fwom mɛ gbing-gbing be yel e dwa-nshi, na be ka kyè e nuyel mɛ vɔk e gura gworo, ko yɛ a ka tɛ̀ bemat e gwong. 23E bama de a ga tɛ̀ ɛn e gwong, yɛ nju mɛ a tút vɔk e raku, na a wɔ̀ ra won. Jeng de nawiri na vey, yɛ a rɔngɔl e hwomo nju mɛ, 24ko dwa-nshi mo wa ga kana kyè yikyik yi e rekwogom. Bagung nshi bá sè tak a yɛn tyɔng wɛt, yaga gul gwa gangas hɛn na bama.

25E rwa hwol gasi, a sé kyè wɔ na yɛn, e kyè e ra tɛ̂t nshi. 26Ko jeng de bemât masâ fwom mɛ ba di ɛ, a sé kyè e ra tɛ̂t nshi, yɛn a ye lot sizɔng, yɛn a ye, “A sé e wovuvwel!” Ko yɛn a dak sekun yaga bengyip.

27Yɛsu a vɛ̌ hanat na yɛn, a yang ɛn, “Vɔk in yey ting! A sé me. Yin wok bengyip wɛt!”

28Ko Bitrus a toyo a yɛ, a ye, “À Darwey, ka sede a sé hwo wɛ, yang me, me vey na hwo e ra tɛ̂t nshi mo.”

29Yɛsu a yang ɛ, “Vey!” Bitrus a gyirik yi e dwa-nshi mo, ko a hwo kyè e ra tɛ̂t nshi vɔk na Yɛsu. 30Ko jeng de a di gul de gwa pɛsɛl na gap, a tɛ̀ bengyip, ko a hwo kyè wɔ̀ ye pyɔp. A tɛ̀ sekun, a ye, “À Darwey, sey me!”

31Remo-remo, Yɛsu a nára a yɛ vwɔ mɛ, a kaba hɛ, ko a yang ɛ, “À hwo de hwà tɛ̀ gap mō mwa e ra me wɛt! Yaga sɛ́ de hwà tó yey arɛt?”

32Sede yɛn a yel e dwa-nshi mo, gul o gwa ye ting. 33Ko vemo de ba sé e ji dwa mo ba re a yɛ fongol, ba tē, “Mwin, hwà sé Hwey Dagwi!”

Yɛsu a tɛ̀sɛ bemât serɔ e Gɛnɛsarɛt tyang

(Mar 6:53-56)

34Sede yɛn a ye dɔ, yɛn a gyirik e Gɛnɛsarɛt. 35E hwomo, bemât kwɔn o ba tɔk Yɛsu, ko yɛn a tomsal na há mo vɔk e yɛnɛ̂ sevwel o mwa. Ko bemat ba vɛ̀sɛ a yɛ na mwa vemo de ba ro ɛn. 36Yɛn a ra won na yɛ, ka a tik vê serɔ mo be ra nû gworugu mɛ zɔng. Ko mwa vemo de ba ra gwɛ, ba tɛ̀ tyang.

Currently Selected:

Matayus 14: bomBI

Highlight

Copy