Matayus 10

Betom Yɛsu kuru na vɛ beba

(Mar 6:7; 3:13-19; Luk 9:1; 6:12-16)

1Yɛsu a yishi bemât masâ fwom mɛ kuru na vɛ beba vey na yɛ, ko a nɔng ɛn reto na be paa cēng yi e bemat, na be tɔk tɛ̀ kayɛ yerê serɔ tyang na mwa pyɛ́ de ye tak a bemat reyɔm arɔng. 2Bazâ betom mɛ kuru na vɛ beba ma vemo: Wo mɛsɛng o, à Simɔn, de ba to tang ɛ, à Bitrus, tanga gwa mɛ Andarawus, na Yakɔp tanga gwa mɛ Yohana, nèy Zɛbɛdayus, 3na Filip, na Bartɔlɔmayus, na Tomas, na Matayus, mwât serês dyâm yeles na pyɛ́, na Yakɔp Alfayus, na Tadayus, 4na Simɔn, de á sè e yong ɛ na a dul sevwel mɛ, tanga Yuda Iskaryot, de a row Yɛsu e yɛnɛ mo.

Yɛsu a tomo betom mɛ

(Mar 6:7-13; Luk 9:1-6)

5Yɛn vemo kuru na vɛ beba mo, Yɛsu a tomo hɛn, ko a nɔng ɛn nu e ra pyɛ́ yemo ngan, a yang ɛn, “Yin kwon wɔ e bavwêl yére dyuk, kɛ yin yel e repomo rehak rê BeSamariya wɛt. 6Kyè in wɔ na BeIsrayɛl de ba sé sede vyēl de ya ga vusa hɛ. 7Jeng de yin a sé kyě kyè, shara hin reha remo: ‘Jeng de Dagwi e lagwi a rɔda hwo re negwɔm e ra jey ya ga vey bagat.’ 8Tɛ̀sɛ hin bemât serɔ tyang, sensa hin vemo de ba ga kushu, tɛ̀sɛ hin bekparong tyang, paa in cēng yi e bemat arɔng. Yin a sey reto remo e nɔrɔ, ko rá in fwom na rɛ e nɔrɔ arɔng. 9Yin kwon vɔk dyām e berabak min wɛt, kɛ ya sé dyam shinang, kɛ dyam pyɛng, kɛ dyam zwey ayi. 10Yin kwon jut malâ won yaga kwɛngɛl min, kɛ yin a to gwɛ̌ gworugu gwohwak wɛt, kɛ yin vɔk bekpatak kɛ gwele arɔng wɛt. Yaga a jam na be nɔ̂ng mwât fwom pyɛ de e simo.

11“E karɛ repomo kɛ kerepomo de yin ê yel ɛ̀, jāma hin mwat de ê wok há min, yi ano, a vey na a sey in e lɔ mɛ. Sangal hin e lɔ mo sɛ̌ jeng de yin e to ba hàla pomo mo. 12Sede yin ê yel e lɔ mo, yē in, ‘Tik na Dagwi a tɛ̀ bemât lɔ hemo be sangal tyang!’ 13Sede bemât lɔ mo ba sey in, tik na té show hê netyang o hê nàra e ra yɛn. Ka ano wɛt, ko tik na he to toyo vey na yin. 14Ka sede mwat hwak a sey in wɛt, kɛ a wet betong na neha min arɔng wɛt, ko pagat hin búm de gwa dyɛng e bol min e jeng de yin a hàla lɔ mo kɛ repomo mo. 15Mwin me ha a yin: Tuk de Dagwi a rɔda ba ra shɔt, ê ba tosho reyɔ̂m bemât Sɔdɔm na Gɔmɔra a dal toshô reyɔm mɛ na bemât repomo rane mo.”

Reyɔm de re kyè vey

(Mar 13:9-13; Luk 12:11-12; 21:12-17)

16“Wok in! Ma sé tomo hin sede tyīmit e tê bebwá Yaga ano, vɔk in netsitsɛng sede begwɔ̄m, ko sè in hywɛ sede bebɔp. 17Tē in naka na bemat! Yɛn a rɔda nára hin e vɔ bemât shɔt, ko ba rɔda dak in na zining e beduk re fongol. 18Ko yaga yin a sé bemât raa hom, yɛn a rɔda wɔ na yin e nuyêl begwɔmna na begbɔng begwɔ̀m. E hwomo, yin a rɔda nɔ̂ng bemat tanga bemât yére dyuk nuha e ra Yɛgɛt Yat. 19Ko jeng de yɛn a rɔda nára hin e vɔ mɛn, yin kwon sap pyɛ de yin a rɔda ha, kɛ gwong de yin ê dul mɛ̀ bato min wɛt. Sede jeng o ya vey, ba rɔda nɔng in pyɛ de yin a rɔda ha. 20Yaga a sé e yin de yin ê ba ha wɛt, ko a sé e Gabîk Da min de hê ha yi na yin.

21“Gwà a rɔda ba nára gwa mɛ, na be mɔrɔ hɛ, ko da a rɔda ba ra tyɛng ano na hwey mɛ. Nèy na rɔda ba doyo e ra beda na beneng mɛn, ko nê ba tɛ̀ be mɔbɔs hɛn. 22Kawɛ mwat a rɔda ba bɛɛ hin ves, yaga yin e raa me. Ko ba rɔda ba sey mwat de a niri vɔk e yɛnɛ mo. 23Ka sede ba hwo tak a yin reyɔm e repomo remo, ko tele hin vɔk e repomo rehak. Mwin me ha a yin: Yin a rɔda yɛnɛ gwɔsɔ̂ mwa bapomô BeIsrayɛl wɛt gyam na Me de ma tɛ́ me mwat me vey.

24“Mwat de be masa a yɛ pyɛ a dal mwat de e basa a yɛ wɛt, ko sam a dal dalɔ mɛ arɔng wɛt. 25Tik na a vey a mwat de be masa a yɛ, na a tɛ́ ɛ sede mwat de e basa a yɛ mo, ko sam sede dalɔ mɛ arɔng. Sede remo de be tâng dâ lɔ mo, à Baal-Zɛbul, ko bê yila belɔ mɛ na baza de ba dal ano na neves!”

Mwat de bê wok bengyip mɛ

(Luk 12:2-7)

26“Yaga ano, yin kwon wok bengyip bemat wɛt. Vit a pyɛ de ba ga kana bang, de ba rɔda ba wunta yɛ, ko vit a pyɛ de ya sé ye neyaang, de ba rɔda ba tɔk yɛ. 27Pyɛ́ de me ha a yin e lwīl, to há in yɛ̄ e kwɔ̂n negbey, ko pyɛ́ de ba ga ha a yin show-show, mok in yɛ̄ e rahwol. 28Yin kwon wok bengyip bemat de be mɔrɔ rebêk mwat, ko yɛn e tɔk mɔrɔ gabik mɛ wɛt. Wok in bengyip Dagwi, yɛ de a vɔk retô wey na rebek, mwa na gabik e kwɔ̂n kya. 29Be rɛsɛl nenon tyǐ neba e nû kobo gwining wɛt arɛt? Ko mwa ano, vit a kining de kê gaba e vwel sana simô Da min. 30Dagwi a ga basa nepyak setot e ratô kawɛ e ji min. 31Yaga ano, yin kwon wok bengyip wɛt; yin a dal nenon tyǐ pyak na nerey!”

Dura tɔ̂k Kristi e nuyêl bemat

(Luk 12:8-9)

32“Kawɛ mwat de e dura wɛshɛrɛk e nuyêl bemat wɔgɔ, a tɔk me, ko me arɔng ma rɔda ba dura wɛshɛrɛk e nuyêl Da hom de a sé e ji lagwi wɔgɔ, ma tɔk ɛ. 33Ko kawɛ mwat de e tono e nuyêl bemat wɔgɔ, a tɔk me wɛt, me arɔng ma rɔda ba tono hɛ e nuyêl Da hom de a sé e lagwi.”

Yɛsu a vey na sangâl netyang wɛt ko na wal e negya

(Luk 12:51-53; 14:26-27; 17:33)

34“Yin kwon bare wɛt wɔgɔ, ma vey na me tɛ̀ bemât jey be sangal tyang na bemɛn. Wey, a sé e sangâl netyang de ma vey mɛ̀ wɛt, ko a sé e wal e negya. 35Ma vey, yaga na me tɛ̀ mwat a ra repugu na da mɛ, na hwong a ra repugu na neng mɛ, na gwel a ra repugu na dekwop mɛ arɔng. 36Ko belɔ̂ mwat ba rɔda sè vê repugu mɛ.

37“Kawɛ mwat de a tɛ̀ yey na da mɛ kɛ neng mɛ a dal tɛ̂ yey mɛ na me a vey na a sè nwang wɛt. Ko kawɛ mwat de a tɛ̀ yey na hwêy wen kɛ hwêy hwong mɛ a dal tɛ̂ yey mɛ na me a vey na a sè nwang me wɛt. 38Kawɛ mwat de e jut cɔ́gɔt-kak mɛ na a raa me wɛt a vey na a sè nwang me wɛt. 39Kawɛ mwat de e simo na a sey neken mɛ a rɔda bidɛ nɛ, ko kawɛ mwat de a ye waa a neken mɛ, yaga e raa me, a rɔda sey nɛ.”

Sɛ̂ pyɔlɔ

(Mar 9:41; Luk 10:16)

40“Kawɛ mwat de a sey in, a sé e me de yɛ a sey, ko kawɛ mwat de a sey me a sey womo de a tomo me arɔng. 41Kawɛ mwat de a sey zarap Dagwi, yaga mwat o a sé zarap Dagwi, a rɔda sɛ̀ pyɔlɔ yê zarap Dagwi. Ko kawɛ mwat de a sey mwat rwat, yaga mwat o a sé rwat, a rɔda sɛ̀ pyɔlɔ yê mwat rwat arɔng. 42Kawɛ mwat de e nɔ̂ng hwak e ji vê bamâ mwa e ji bemât raa hom nshî sɔ nesurum, yaga yɛ a sé mwât raa hom, mwin me ha a yin, a rɔda ba bidɛ pyɔlɔ mɛ wɛt!”

Currently Selected:

Matayus 10: bomBI

Highlight

Copy