Makekeng 20

Anutungo nonoyoac yemmeec

1Anutungo yoac yomoc sasawa deec.

2“Neng Kebu geac Anutu. Ni Aigitabangecfunac wangecguyai. Aigita yeneng wanac meguma ua ebirau faigugec ama imohacnac wangecguyai.

3Ge ni hoannukecma nemuonga nga anutu hania hania mi hoangyunukecbesena. 4#Mke 34:17; Sese 19:4; 26:1; Dser 4:15-18; 27:15Wi kurumennu wiac fekende me imocac bageau bangecfu me dokuu me emu bangec manau wiac fekende imocac nemuonga mong me onga mong geanggaoc mema mi hoanggekecbesena. 5#Mke 34:6-7; Bki 14:18; Dser 7:9-10Ge imoc yeni mi ngonducneyemmebesena amma yeneac enac mi tofohobesena. Nocac ni Kebu geac Anutu, ni ngicngacfocna heresongogoc hoangyunukecduaeac yeneac keracmangang kpetiac amba herenau gerec dzede. Mong ye ni ubango ukunuudeu manggac yeneac kopocsic imocac turunga naroangmedac esangabofocngina fingecenggecdesoc arenga harebec nga neackpac kpouyemmebade. 6Nga mong ye heresongogoc hoannuma dedeseriyoacna tofohoudeu fingecsahe tauseng nga tauseng fingecenggecdesoc, yenigoc yoac dzegeai imoc modackecbade nga modacma kecbesandua.

7 # Sese 19:12 Ge Kebu Anutuga yeac kpac eng sicsauc mi kpacbesena. Imoc yofiac ngicngac yeni yeac kpac eng sicsauc kpacandae ye kopocsicnginaac turunga mi waude.

8 # Mke 16:23-30; 31:12-14 Ge tacnegenggac wenac segerema kpetiac mekecna kpetiac anudeac negenna febeso. 9#Mke 23:12; 31:15; 34:21; 35:2; Sese 23:3Imoc yofiac, ge wenac uameme siks ua mema uaga sasawa medacbesena. 10Nga wenac kpete sewen imoc Kebu Anutuga yeac tacnegennaso. Ge nga naroangmedacfocga nga enactofoc tofohofocga ngic me ngac yeni nga burumakafocga amma ngic kuricngo amagau kecdae ngeni naso imohai ua mong mi mebisia. 11#Fing 2:1-3; Mke 31:17Kebu ye wenac uameme siks ua mema kurumenga kurumenga nga bangec nga kondung amma wiac yeneac manau fekendacdae imoc meficgedarec nga wenac kpete sewen imohai tacnegenec. Imocac Kebungo tacnegenggac wenac kenehema segerema kpetiac annideac desiec.

12 # Dser 27:16; Mat 15:4; 19:19; Mrk 7:10; 10:19; Ruk 18:20; Efs 6:2-3 Anutungo bangec gemma faiguude, imohai naso herea kechereenadeac nonggomanghocga seseheyurubesena.

13 # Fing 9:6; Sese 24:17; Mat 5:21; 19:18; Mrk 10:19; Ruk 18:20; Rom 13:9; Yak 2:11 Ge ngicngac mi yunuhomebesena.

14 # Sese 20:10; Mat 5:27; 19:18; Mrk 10:19; Ruk 18:20; Rom 13:9; Yak 2:11 Ge eweenengfaka femanu ferahama serofaka mi ambesena.

15 # Sese 19:11; Mat 19:18; Mrk 10:19; Ruk 18:20; Rom 13:9 Ge wiac hamangec mi mebesena.

16 # Mke 23:1; Mat 19:18; Mrk 10:19; Ruk 18:20 Ge ngic me ngac gegoc wegenac kecde ye enacfu faifai mi ammibesena.

17 # Rom 7:7; 13:9 Ge yeac ama hemma imoc hensongo mi ambesena. Ge ngic yeac enema hemma ye hensongo mi ammibesena, me yeac enactofoc tofohongiha me enactofoc tofohongaha hensongo mi ammibesena. Amma ge burumakangiwa me donggi me wiara hania hania yenemma imoc hensongo mong mi ambesena.”

Geng yoac edenunubesena

18 # Heb 12:18-19 Anu ngicngac yeni sasawa ginggbururung, piratac nga trampet udumeng heima feu negemma henggec tiki hosuc kpeu wiac imoc sasawa hennegeng amma kengec kuneng yunuu dzonongngina fedeu monggoc kpesikehema nanggec. 19Namma Mose yofi edegec, “Geng yoac edenununa negembisina. Kecma homebinggac Anutungo ine yoac mong mi edenunubeso.”

20Ifi degec Mosengo ngicngac yofi edeyunuec, “Mi kengecngunuu, ngeni Anutuac damungunuu kopocsic mi meficgegecdeac ye haniangina hennegeng anudeac ngenearu hadac.” 21Ifi deu ngicngac yeni tihereema nammagec Anutungo hoeng kundung dzicnambac imocac manau taru Mose ye imohai kenec.

22Kenu yofi edeec, “Ge Isracelngicngac yofi edeyununa, ‘Ni kurumennunac yoac ngenigoc deba madacdac imoc ngeni ngenaoc hennegeng andau. 23Ngeni ni hoannukecma anutu dema nemuonga silwa me golngo memea mi meyunuma hoangyunukecbisia. Amma anutu dema nemuonga golngo memea imoc mi mebisia.

24Nga arata menennade imoc bangecngo mema imocac witiau sesega hafoangoc dzeudeac fainade nga ruaesesega hafoangoc ngenahafoc neandaemoc amma ramaburumakagedangga ohonembesena. Neng amabangec mong ihai me ihai kpacna negensima afenunadeac degembade, imohai gearu hama kenecgubade. 25#Dser 27:5-7; Yos 8:31Nga ge arata mong hocngo menennadeac negemma ine hoc dzake dzakea aiengngo memea imocngo mi mebesena. Ge hoc aiengngo kpeserenadeu ge imoc ammina kpetiac mi anude. 26Nga ge neac aratau enna senggangga mi hembauac tire tima#20:26 tire tima Arata tireagoc mi megecdeac yoac edeyunuec. mi embesena.’

Currently Selected:

Makekeng 20: Ded

Highlight

Copy