Makekeng 19

Sinai tikiu kensikegec

1Isracelngicngac yeni Aigitabangecfunac mama kengkecmagec afo kpete harebec anec wenac imohai yombong Sinai bangeckisiu kensikegec. 2Imoc yofi kemma kensikegec, yeni Refidimbangec wama kengkecma Sinai bangeckisiu kensikema kporucamangina taigec enu guru mema tacyac anggec. Yeni tiki kiwau kpourcamanginasoc taigec enec.

3Nga Mose ye Anutu meficgeudeac tikiu enu Kebungo tiki bumaunac kpacma yofi edeec, “Ge Yacakowac amaareng yoac yofi edeyununa amma ge Isracel ngicngacareng yoac yofi dekperagiyemmebesena, 4‘Ni Aigita faka ayemmeai, imoc henggec, ni hasaukpesac#19:4 hasaukpesac imoc neng kuneng, inglesyoacfu kpara eagel. neng kpegangaac witiau tofohongunuba nearu hadau, imoc ngeni hendacdau. 5#Dser 4:20; 7:6; 14:2; 26:18; Tit 2:14 #1Pe 2:9Imocac amma yoacna negentofoho amma dzadzahacna mema kecgecdeu ngicngacareng yeneac botucfu segerengunuba neac ngicngacfocna yombong anggecde. Bangectoa bangec imoc neac. 6#Yhkp 1:6; 5:10Ngeni womonggareng eucererenna amma ngicngacareng kpetiac amma kecnembisia.’ Ge yoac imocnoc Isracelngicngac edeyunubesena.”

7Ifi deu Mose ye dzigenema mama ngicngac yeneac enarafocngina hagecdeac yoac fau kenggec Kebungo yoac dederecge ammiec, imoc sasawa edeyunudarec. 8Edeyunuu ngicngac yeni sasawango yenahafoc dendzerenggema yofi degec, “Kebungo yoac sasawa dedacde, imoc tofohodacnide.” Degec Mosengo yoacngina mema Kebuaru mekemma edeec.

Ngicngac yeni denegennira negembisia

9Anu Kebungo Mose yofi edeec, “Negennec, gegoc yoac denegeng ammira ngicngac yeni imoc negenggecdeac, ni hoeng kundung dzicnambac manau gearu habeso anduae. Ifi amba yeni ifingoc nasoya kpac yoacga negensinggema kecgecde.” Ifi deu Mose ye ngicngac yeneng yoac degec, imoc Kebu edeec.

10Edeu Kebungo monggoc yofi edeec, “Ge ngicngac yenearu kemma yofi edeyununa, ‘Yaguc nga wereckenu wambangina dzuacbisia.’ Dzuacgec ge yeni kpetiac anggecdeac desiyunubesena.

11Dzuacma efaima kecmagec wenac uameme harebec ambeso. Imoc yofiac, uameme imohai Kebungo ngicngac sasawa yeneac kicfu Sinai tikiu maude. 12#Heb 12:18-20Nga geng ine tiki yerecgema kpete mong faima yofi edeyunubesena, ‘Ngeni tikiu embauac me tiki tegiau wiac mong kpeserebauac garengemebisia. Forangoc, tembuc tembuc sasawa ngenearunac mongngo tikiac wegenahau haudeu ye homebeso. 13Mongngo imoc maringo mi kpeserebisia. Ngic me yangngo imoc kpesereudeu ye hocngo hebucgebeso me tebengo wedecbeso. Yang me ngic imoc ye mi yombong kecbeso. Trampet#19:13 Trampet imoc kpara sogac sogaiac baiha anec nga imoc ramangiwaac baihango memea. fifigec arohou negemmaguc ine tikiu naric enggecde.’ ”

Yeni efaima kpetiac amma kecbisia

14Deu Mose ye tikiunac ngicngac yenearu mau yeni wambangina dzuacgec wisickeu yeng kpetiac anggecdeac desiyunuec.

15Anu ye ngicngac yofi edeyunuec, “Ngeni uameme harebecac manau efaima kpetiac kecma ngac yeneac wegenacfu mong mi kembisia.”

16 # Yhkp 4:5 #Dser 4:11-12Anu wenac uameme kpete harebecac asoacfu piratac heiu ginggbururung heima femanu hoeng kundung dzicnambacngo mama tiki hedzidzickema feu trampettoa mong kunengngoc yombong arohou ngicngac sasawa kporucamabangecfu kecgec, yeni kengec anggec dzonongngina fedeec. 17Ifi fingeru Mosengo ngicngac yeni Anutugoc meficemegecdeac kporucamabangecfunac wangecyunuma tiki haniaac wegenahau arengyunuu nanggec. 18Nanggec Kebungo gerecborang manau Sinai tikiu maecac hosucngo tiki hafoangoc semema hosuckpengkpennu#19:18 hosuckpengkpennu Hosuc hosuckpengkpennu erede, imoc stof mong hosucsingagoc anu hosucngo imohasing kucgoc ereande. engande, ifi isoc enu tiki hafoangoc kpemindzaeyombonggema feec. 19Ifi femanu trampettoaac udumenga kunengngoc yadiyombonggeu Mose ye yoac deu Anutungo turunga ubaudumengtoagoc meremmiec.

20Anu Kebungo Sinai tiki witiau mama Mose kparu imohai enec. 21Enu yofi edeec, “Ge kemema ngicngac gorongina kpema yoac yofi edeyununa, yeni Kebu ni nenggecdeac igocemema kpae hembarackema mi erebisia. Nocac eregecdeu yenearunac homacngo homema kpac anggecde. 22Nga womonggareng neac wegenahau kengandae yeni memanganeyunubaiac yeni ifingoc kpetiac anggecdeac efaibisia.”

23Ifi deu Mosengo edeec, “Ngicngac yeni Sinai tikiu naric mi eregecde. Ge geanggaoc goronina kpema yoac yofi edenunec, ‘Tiki yerecgema kpete faima kpetiac anudeac desibesena.’ ”

24Ifi deu Kebungo yofi edeec, “Ge kemema Aharon momoc wangecna erebesera. Anu ni womonggareng nga ngicngac herebu ayemmema memanganeyunubaiac yeni igocemema kpae ferahema nearu mi erebisia.”

25Ifi deu Mose ye ngicngac yenearu kemema Kebungo deec imoc edeyunuec.

Currently Selected:

Makekeng 19: Ded

Highlight

Copy