Makekeng 21

Enactofoc tofoho yeneac dederecgeyoac

1Ge dedesiyoac yomoc dekperagiyemmena imoc modacyombonggebisia. 2#Sese 25:39-46Ge hebiraiongic mong wanacngicga anudeac dzongo bummenadeu ye geac enac tofohoma ua mekecmanu kifa siks wisickebeso. Nga kifa kpete sewen imohai ge yoara desima suena kemma mingina kpac kecma yengenaoc kekeha garenggema kecbeso. 3Amma ye tembuc haecfu tembucngoc faina kembeso. Nga enemagoc haocfu imoc enemagoc momoc faiyuruna witicngira kpac kemma kecbesera. 4Me kunengango ngac mong miu naroangmedac meyunuec isoc yeni ine kunengaac wanacareng kecmagec ngic tembuha faina witiha kpac amma kemma kecbeso.

5Nga wanacngicngo ine yofi deudeu, ‘Ni kunenna nga enemmedacfocna heresongogoc hoangyunuma kecduaeac witicna kpac kecbadeac mi kembade.’ 6Ifi deudeu kunengango Anutuac kicfu fau nambeso. Nga naguu me nagu sangoyau fau nammanu kunengango kedzaha aiengbisicngo kpesaribeso, ifi ammiu yeac wanacngic hombananga yombong amma nasosoc kecbeso.

7Anu ngic mong ye naroangango wanacngac minginagoc kefudeac negensima dzo kirecgeu sueu kenudeu minginango ye wanacngac tosea yeni isoc mi fau kemma yengenaoc kekeha garenggema kecbeso. 8Kunengango ye yengena enema isoc mekecma yeac modzea tiu ine ye yengenaoc kekeha garenggeudeac negemma arengfora yeni yeac dzo turunga monggoc meremmibisia. Ye ngicareng bangec monnunac yenearu bumaac faudeac sing mong mi fede nocac ye yeac yoac deec imoc mi modarec. 9Me medahaac enema anudeac deude isoc ye yengena naroangfora faka ayemmeande ifi isoc yombong ammikecbeso. 10Nga ngac mong torokpema meudeu ine warac memea ye yaka nga ngakpikporuc amma eweenengfakau sebia mi segeremibeso. 11Wiac harebec imoc mi ammiudeu ine fau ngacngo turung mong mi kpoumiude. Ye eng wau witiha kpac kemma kecbeso.

Ngickpekpe yeneac kpaeyoac

12 # Sese 24:17 Ngic mongngo ngic mong kpehomeu ye kopocsicac turunga dema yengena ifingoc homecfu faibesonga. 13#Bki 35:10-34; Dser 19:1-13; Yos 20:1-9Me Anutungo negemmanu ngic mong wegenac hau ogeango obohoma kpeu homeudeu ine neng bangec mong derecgegemba, ngickpekpengic ye worama kemma ihai kecbeso. 14Me ngic mongngo ngic monggac herebu negemma kicmesufu ammima kpehomema kemma aratanaac hoannu nanudeu ye sifu mendanggema meickebeso. Ngic imoc ye homebeso.

15Amma ngenearunac mongngo nonggomanghora yuruudeu ye homecfu faibesonga.

16 # Dser 24:7 Ngenearunac mongngo ngic me ngac mong hamangec mema sueu dzo kirecgeudeu me ye yengena mariu tacmanungoc meficgegecdeu, ngic ifia homecfu faibesonga.

17 # Sese 20:9; Mat 15:4; Mrk 7:10 Mong ye nonggomanghora sowecyuruudeu, ye homecfu faibesonga.

18Ngic yeni yoacngina engemmama anu mongngo ngicogea hocngo me mari gbung gbungngo heu mi homema eng fefeu fekecma 19me ye monggoc ngereema ngadeau kemema yasuu kengkefudeu ngic kpeec, imoc ye turunga kpac kecbeso. Amma ye ogeac uanaso memanganeecac dzo sifu mima bummebeso. Anu ye garenggegec ngereeudeac ua mema kecdae, yeneac uabung momoc faibeso.

20Ngic mong ye yengena wanacareng mong yasungo kpema kpe anu homeudeu kpehomeecac memeting yearu fingecbeso. 21Nga wanacngic me ngacngo wenac mocgu me yohockang torokpema kefudeu ye ine ngic yeac turunga mi kpoubeso. Ye yengena dzongo wanacareng bummeecac wabesonga.

22Nga ngic yeni ewema kecma mongngo ngac heregoc mong kpeu sabac nasoya mi ammanu heremanaunac fingeru ngac ye hafei dzoic mong mi fingecmiudeu yofi ambesonga, desi desingicngo yoac isinggeu ngacac eweango bung deude, imoc merang ngac kpeec yeng turunga dzo imoc mibeso. 23Nga yearu ebic mong ngade fingerudeu ine imocac turunga ngic imoc ye homebeso. 24#Sese 24:19-20; Dser 19:21; Mat 5:38Kicac turunga kicngoc, enacac turunga enacngoc, mariac turunga maringoc, haniac turunga haningoc. 25Gerecngo ohoude imocac turunga gerecngoc, kpegec sebia yadiudeac turunga sebiyadingoc, kubecac turunga kubecngoc.

26Ngic mongngo wanacngiha me ngaha kiwau kpema kiwa kpepisickeudeu ye kiwaac amma yoara desima fau kemma yengenaoc kekeha garenggema kecbeso. 27Me yeng wanacngiha me ngaha kpeu yeac enara mong hemoronggeu maudeu ine enaraac amma yoara desima fau kemma yengenaoc kekeha garenggema kecbeso.

Yangngo ngic heihomeude, imocac dederecgeyoac

28Anu burumakangiwa mongngo ngic me ngac mong baihango heiu homeudeu burumaka imoc hocngo heihomema fusia mi nebesonga. Nga burumaka mingina yeac turunggac mi demibisia. 29Nga burumakangiwa ye baihango warac ngic ifingoc yenerekecma ubia ammanu yeni mingina mengerema garenggeudeac goroyoac edegec yeng wama mi garenggemanu ngic me ngac mong monggoc heihomeu ine burumaka imoc hocngo heihomema mingina momoc homecfu faibesonga. 30Me dzongo kekeha bummeudeac demigec ye yeneng kekehaac turunga dzo kpetea degecde, imocacsoc faibeso. 31Me ngic monggac naroang me medac mong heihomeudeu ine singyoac imocngoc modacbisia. 32Nga ngic monggac wanacngic me ngac heihomeudeu ine burumakangiwaac minginango wanacareng mingina ye shekeldzo#21:32 shekeldzo Shekelkpete 30 ebiha imoc 342 gram, imoc navy bisket kononginagoc harebecac ebic isoc ande. silwango memea teti#21:32 teti 30 mibeso. Nga burumaka imoc ine hocngo heihomebesonga.

33Nga ngic mongngo bangecfu dokuteng tapea meickema wau eng nanudeu me dokuteng gboria mema mi semeu burumakangiwa me donggi mongngo imohai kemeudeu 34teng minginango turunga meremma yang mingina dzo mibeso nga yang homemea, imoc ine teng minginaac ambeso.

35Nga ngic monggac burumakangiwango monggac burumakangiwa heihomeudeu ine burumakangiwa gbori kefude imoc suema dzo mema socfungoc mendzicma mebesera. Nga burumakangiwa homemea, imoc houma ifingoc mendzicbesera. 36Me burumakangiwa mong gori goria minginango haniaya ifi bic negemmaguc sifu wama odau mi faiecfu ine burumakangiwa homemeaac turunga burumakangiwangoc ambeso. Nga homemea imoc ine minginaac ambeso.

Currently Selected:

Makekeng 21: Ded

Highlight

Copy