MATTHEW 11

John Ra̱hikmewui eina Kharā Paomebing

(Lk 7.18-35)

1 # Mat 7.28; 13.53; 19.1; 26.1. Jishuna awui sākhangatha̱ tharāda khanili hāngchitheihailaga, ana athumwui keinungbingli tamchithei khavai kala pao hāshok khavai apam chiwui eina zatthuwa.

2 # Lk 7.18-35. Chitharan Johnna phātopli leilakha Khristawui otsak saikora kashā eina awui sākhangatha̱ kaikhali chihovada 3#Mk 1.7-8; Hab 2.3; Joh 11.27. athumna ali hānga, “Rāki kajipā chi nala jika ithumna khangatei akhali ngaraifarakhala?”

4Chieina Jishuna athumli ngahānkai, “Ungulu, kala nathumna shākahai kala theikahai chi Johnli unghānglu: 5#Isa 35.5-6; 61.1; Lk 4.18-19. mik khangapeobingna kathei samphanga, phei katekbing zatpaihaira, phārrei kakazābing tharhaira, khangakhokbing shāpaihaira, kathebingli ringngasakhaira kala kathai kachāmbingli paokaphā hāshokmihaira. 6Ili ningkhamaong makhalei a chi sokhamina.”

7Johnwui sākhangatha̱bing zatcham kahai eina Jishuna yarui chili Johnwui maramli matui, “Nathumna lamhāngli khavā chi khi yangkhuikida khavākhala? Titina phanung phankhavā chilā? 8Chi maningakha khi yangkhui khavai khavākhala? Khamanaka kachon khangavaia mili yangkhavailā? Chikathā khangavaia athum chi awungawui shimli pama. 9#Mat 14.5; 21.26; Lk 1.76. Chithākha khiwui vang khavākhala? Marānli yangkhui khavailā? Mha, marānlina, kha ina hāngga, marānli mataikhameiana. 10#Mal 3.1; Mk 1.2. Hithada kapihaikasa chi awui ponglina: ‘Yanglu, ina iwui paome nali rimeida chihora, ana nawui shongfa rida ngarānmira. 11Ina nathumli kachangkhat kahāngna, sha̱naona kapharāwui ngachaili John Ra̱hikmeli reikhamei khipākha mashoklakrangli; chithālala kazing wungramli teomeikap kaje china ali reimei. 12#Lk 16.16. John Ra̱hikmewui thot eina thuida aja rāshungda kazing wungram hi rotmarātlak eina rāshuma kala rotkhamarātwui mibingna pangshap eina yuikhui khavai sai. 13Kaja Johnwui atam eina tangda marānbing saikora kala ainna wungramwui pongli marānhairasai. 14#Mal 4.5; Mat 17.10-13; Joh 1.21; Lk 1.17. Nathumna chi khuisangngaiakha a hi rāra da phongmi kahai Elijah china. 15#Mat 13.9,43; Mk 4.23; Phon 13.9; 2.7. Shākhui khavai khanā kakā a china shākhuiranu!”

16 # Lk 7.31-35. “Kha mithot hili ina khi eina chānjamsikhala? Hiya naoshinaobingna leihngapha̱li pamlaga athumwui ngasotnaobingli ngavao khangarok kathana. 17‘Ithumna nathumwui vang sipa̱ khongmilala; nathumna pheichak machakmana, ithumna thishamlaa sālala; nathumna machapmana.’ 18Kaja Johnna maphāshak maphazāmana, kala athumna ‘Ali kameo zanga’ ji; 19miwui Naomayarana phāshak-phazai, kala athumna, ‘Yanglu, a morkahaka, khamalipa kala khāshinā khalokabing eina morei kaphungbingwui ngasotnaona’ da matui. Chithālala thangmei chi chiwui otsak eina theikhuiya.”

Mashitkasang Keinungbing

(Lk 10.13-15)

20 # Lk 10.13-15. Chiwui thili Jishuna matakhak kahai ot tarākha sākahai keinungbing china moreiwui eina ning mangateila ningmaongtong kahaiwui vang ana saklak eina kahara; 21“Chorazin, nali ringkashi ngasāranu! Bethsaida, nali ringkashi ngasāranu! Nathumwui lungli hakkhamahā ot sākahai chi Tyre eina Sidonli sāsāsi kaje athumna borāshi ngavailaga hotla teida achā ningngateihairara. 22Kha ina nathumli kahāngna, bichar sāthanghon Varena Tyre eina Sidonli kasāliva nathumli sakmeida bichar sāra. 23Kala He Capernaum, nali kazing kāzokta masot mimaraola? Naliva kazeiram tāshungda ngakhuntāra. Kaja nali hakkhamahā ot sāmi kahai chi Sodomli sāsāsi kaje keinung chi aja rāshungda leisāra. 24#Mat 10.15; Lk 10.12. Kha ina nathumli kahāngna, Sodomli bichar kasāliva nathumli sakmeida bichar sāra.”

Rāngasāmkhuilu

(Lk 10.21-22)

25 # Lk 10.21-22. #1 Cor 1.26-29. Atam chili Jishuna phongshoka, “Ina nali ningshili Avā, kazing eina ngaleiwui Proho, khiwui vangkhala kaja nana otbing hi thangkhamei kala katheiabingwui eina thummihailaga angangnaobingli chitheimi, 26mha, Avā, chikatha chi nawui lukhamashanwui kaphaningna.

27 # Joh 3.35; 5.20; 13.3; 7.29; 10.15; 17.25; Mat 28.18. “Ishāvāna ili ot saikora horsangmihaira. Avā maningla Anaomayarali khipānakha matheimana, kala anaomayarana kala ana theingasakngaida kapangkakhuiabing maningla khipānakha Avāli matheimana.

28“Iwuili rālu, kachota kala otphun kharit kaphungbing saikora; ina nathumli ngasāmkhui ngasakra. 29#Joh 13.15; Phil 2.5; 1 Pet 2.21; Jer 6.16. Iwui kashai hieina phunglu kala iwui eina tamkhuilu; kaja iya malungkhanima, wuklung tākui kahaiana, kala nathumna ngasāmkakhui samphangra. 30Kaja iwui kashaiva phungpailaka kala iwui otphun ngavenglaka.”

Currently Selected:

MATTHEW 11: TANGBSI

Highlight

Copy