MATTHEW 10

Paokazat Tharāda Khani

(Mk 3.13-19; Lk 6.12-16)

1 # Mk 6.7; 3.16-19; Lk 9.1; 6.14-16; Ots 1.13. Jishuna awui sākhangatha̱ tharāda khani chili hokhui kala makathar manglā kashamshok khavai kala kazātyur ayāyāva̱ kala kazāt saikora raimi khavai pangshap mi. 2Paokazat tharāda khaniwui amingbing chi hina, kharena, Peterla kaho Simon, kala agato Andrew; Zebedeewui naomayara James eina agato John; 3Philip eina Bartholomew; Thomas eina khāshinā khaloka Matthew; Alphaeuswui naomayara James kala Thaddaeus; 4yurli leikashe Simon kala Jishuli yankasaia Judas Iscariot.

Tharāda Khanili Kachiho

(Mk 6.7-13; Lk 9.1-6)

5 # Lk 9.52; Joh 4.9; Ots 8.5; 25. Jishuna tharāda khani chili ningmida shivāta: “Gentilebingwuili mavālu, kala Samarianaowui keinungli mazangalu, 6#Mat 15.24; 10.23. kha shimān kahai Israel shimkhurwui yaonaobing chili vātha̱lu. 7#Lk 9.2; 10.9-11; Mat 4.17. Kala nathumna khavāvāli pao hāshokta ‘Kazing wungram chi nganaihaira’ da hānglu. 8Kakazābingli raimilu, kathebingli ringngasaklu, phārrei kakazābingli tharmilu, kameobing kashamshokmilu. Nathumna aman mamila samkaphangna, chithada aman makhuila milu. 9#Mk 6.8-11; Lk 9.3-5; 10.4-12; 22.35-36. Nathumwui lupākhaoli sināla, lupāla, pheisāla makhuiphungalu. 10#1 Cor 9.14; 1 Tim 5.18. Nathumwui kha̱ram khavāli paidula, phahon khanila, pheihopla, khāmshuila makhuiphungalu; kaja ot kasā mi china awui kashakazā samphang ngayia.

11“Nathumna keinungli nilala, kha̱li nilala akazang apam chili khipāli zunngayikhala kaji phākhuilu kala chiwui eina mazatranglakha eina tangda nathum ashiwuili pamlu. 12Nathumna shim chili vāzangkhaleoda sālamtui ahānglu. 13Shimkhur china mareojeohaiakha nathumwui sokhami chi ashiwui vang ngasāranu. Kha chi mathaakha nathumwui sokhami chi nathumli latungranu. 14#Ots 13.51. Kala nathumli khipānakha marāzang ngasakngaiakha kala nathumwui tui manganāsangmiakha, shim lah keinung chiwui eina zatkathui tharan nathumwui pheiwui chifa chi kathangtāhailu. 15#Mat 11.24; Lk 10.12; Jud 7; 2 Pet 2.6. Ina nathumli kachangkhat kahāngna, bichar sāthanghon Sodom eina Gomarrahwui mibingli bichar kasāliva chikathā keinungwui mibingli bichar kasāna sakmeira.

Rārāda Khalei Rekkakharek

(Mk 13.9-13; Lk 21.12-17)

16 # Lk 10.3; Hao 3.1; Rom 16.19. “Nganālu! Ina nathumli ramfawui ngachaili yao thada kachihona. Chiwui vang eina nathumna phara̱wui thada themlu kala nāsha̱wui khanim thada nimlu. 17#Mk 13.9-13; Lk 12.11-12; 21.12-19; Joh 16.2. Mibingli ngasharlak eina yanglu, kaja nathumli athumna hanga̱shimli hokāra kala athumwui synagogueli sājei eina ngaphitra, 18#Ots 25.24-26. khamungabing, awungabing kala Gentilebingwui mangāli iwui mingli shākhi sākhavai nathumli khamungabing kala awungabingwui mangāli shimenvāra. 19Nathumli tukkhavā tharan kathada matuira lah khi hangra kajiwui vang malungmaringalu; kaja nathumna khi matuirakhala kaji chi pung chichang chili nathumli hāngmira. 20#Joh 16.7-11. Kaja matuiki kaji chi na maningmana, kha nathumwui Avāwui Manglāna nali matui ngasakki kajina.

21 # Mat 10.35-36; Lk 12.52-53. “Achināna achināli, avāva̱na anaogarāli shaothat khavai khuivāmira. Anao ngarāna ava̱ avāli mamayāmada athumli shaothat ngasakra. 22#Joh 15.18; Mat 24.9. I wui vang eina nathumli mi saikorana yangkharingra. Kha khanao eina tangda khāngkashapa china kahui samphangra. 23#Mat 16.27; 1 Thes 4.17. Athumna nathumli keinung akhali rekakharek chitharan khangatei akhali yāmvālu; kaja Ina nathumli kachangkhat eina kahāngna, miwui Naomayarana marāranglakha eina tangda nathumna Israel keinung saikorali sākikaji ot masākuprangsāra.

24 # Lk 6.40; Joh 13.16; 15.20. “Sākhangatha̱ khipākhana awui ojāli mareimeimana lah arao khipākhana awui akhavāli mareimeimana. 25#Mat 9.34; 12.24; Mk 3.22; Lk 11.15; 2 Wung 1.2. Sākhangatha̱ china awui ojāwui thada kala araona awui akhavāwui thada ningli kapen chi shapa. Athumna shimva̱ chili Beelzebul hoakha shimkhurwui mi kateibingli kayākha zakshimeikharda horakhala?

Khipāli Ngacheerakhala

(Lk 12.2-7)

26 # Lk 12.2-9. #Mk 4.22; Lk 8.17; Eph 5.13. “Chiwui vang eina athumli mangacheealu; kaja maphongshokmara da faror kahai khikha maleimana, lah matheiki kaji ngathum kahai khikha maleimana. 27Ina nathumli tangkhamangli kahāng chi phongshar eina kahorli hānglu kala nathumna shākhui kahai chi shimtung eina vaomalāntālu. 28#Heb 10.31. Phasāli sāthatshaplaga manglāli masāthatkharar athumli mangacheealu. Kha kazeiramli phasā eina manglā khanini sāshimānmikashapa Vareli ngacheelu. 29Konghi khanili pheisā akha eina mayormalā? Chithālala nathumwui Avāwui kaphaning mazangla konghi akhala ngaleili matātungmana. 30Kha nathumliva nathumwui kuisam eina tangda shānhaida khaleina. 31#Mat 12.12. Chiwui vang eina mangacheealu, konghi kachungkhali nathum aman sakmeikhara.

Hāngkaphat kala Kahat

(Lk 12.8-9)

32 # Mk 8.38; Lk 9.26; Phon 3.5; 2 Tim 2.12. “Kachikathāna ili mibingwui mangāli phongshar eina mayaakha kazingramli khalei iwui Avāwui mangāli inala ali mayāmira; 33kha ili mibingwui mangāli kahata chili inala kazingramli khalei iwui Avāwui mangāli ali hatra.

Chingri kahai Maningla Raighai

(Lk 12.51-53; 14.26-27)

34 # Lk 12.51-53; Mat 10.21; Mk 13.12; Mic 7.6. “Ina okathuili chingri kahai khuirā khavai kharāna da maphaningalu; I chingri kahai maningla raighai khuirā khavai kharāna. 35Kaja anaomayarana avāva̱li kala anaongalāva̱na ava̱va̱li, arihāva̱na aniva̱li mamayā ngarok khavai kharāna; 36kala mi akhawui yangshimeikap kaje chi shimkhurwui mi ngasāra.

37 # Lk 14.25-27; 17.33; 9.23-24; Mat 16.24-25; Mk 8.34-35; Joh 12.25. “Ili lāngmeida ava̱ lah avāli leishikhameia a chi iwui vang makanāmana; kala ili lāngmeida anaomayara, lah anaongalāva̱li leishikhamei a chila iwui vang makanāmana; 38kachikathāna awui krush makhuiphungla iwui thishurakha a iwui vang makanāmana. 39Kachikathāna awui mirin mashimān khavai saakha shimānra; kha mashivāmla iwui vang eina mirin mikashapa china ringra.

Sāmanbing

(Mk 9.41)

40 # Lk 10.16; Joh 13.20; Gal 4.14; Mk 9.37; Mat 18.5; Lk 9.48. “Nathumli zang khangasaka china ilila zang ngasaka, kala ili zangkhangasaka a china ili kashirāta ali zangngasaka. 41Marān akhali a marānna kajiwui vang zangkhangasaka a china marānwui sāman chi samphangra; khangaronga chili khangaronga mina kajiwui vang zangkhangasaka a china khangarongwui sāman samphangrumra. 42#Mk 9.41; Mat 25.40. Kachikathāna iwui sākhangatha̱bingwui ngachaili teomeikap kaje akhali iwui sākhangatha̱na kajiwui vang tara̱ khamakui kapkhamāngla mimangakha, ina nathumli kachangkhat kahāngna, kachilikha awui sāman chi mashimānlakmara.”

Currently Selected:

MATTHEW 10: TANGBSI

Highlight

Copy