MATTHEW 24

Jesu'ne Jerusalem Pukhrumna Cheem Maangrou Younei Ngamrou Yunthutkhou

(Mk 13.1-2; Lk 21.5-6)

1Heirouri Jesu'ne shaalrou waiyouyeinung, Aiyei ruishik rapne heichanphabi, heirou Anung Pukhrumna Cheem heiwaya shunmandokur. 2#Mt 26.61; 27.39-40; Lk 19.44; Jn 2.19; Kre 8.12; Isa 13.10; Ezk 32.7; Jol 2.10-11; Zec 1.15. “Moi chimleime,” toubi Ane yanung loukyun, “Keine nanung tanghakne kyunri, Cheem heiyei thlungrap heiwari nungkhatnuiri damakne khatle-khat karthorilbi kleiri nane kouniroukhi muphamakarou.”

Klah-knang Heirou Mrim-knang

(Mk 13.3-13; Lk 21.7-19)

3 # Lk 17.20; Mt 13.30,39,40; 28.20; 16.27; Dan 7.13; Kre 1.7; Zec 12.10-14. Heirou Jesu'ne Olive lhungdoura ombine louleiyeinung, Aiyei ruishik rapne munne kabi tlou kngai, “Kanungei bei yunpilaklo, lhourap awari kounang thukrouweiyo? Heitoubi Neiyei yongrou waiyounei kheenri kounaksi mu'kna hoirouyoulei? Heitoubi tlaipang chaan aya luiwairouri kounaksi hoirouyoulei?” 4Heirou Jesu'ne loumallangpi, “Nane mukheine leilak, heirou mine naya thi'msityermak. 5Thimi chungne Keiminra, ‘Keiri Messiahme!’ toubine yunkarsabi hungthukeirou. Heitoubi yane thimi chungwaya lam tamungyerheirou. 6#Kre 6.3-8,12-17; Isa 19.2. Nane naknareikhi heirou tlatnareikhi raalpao mayekphaeirou, heinungri naiyei ukningra plangmakneya. Koungameiyo toulanungri, heinaksi raalpao rapri thukbeirou, heiya heinakpini tlaipang luinanungei lhouthukri nimakhui. 7Heirou ram khatle-ramkhat kngal thukrou, Krungkul khatne krungkul khatdei doura raal dabi kardourou. Heirouri purvi-purchamkhi, kna'sakhi pulrou, heitoubi bi kantangrou linglang khngakhi thukrou. 8Lhouthuk namyerwa heiri naopuktir manshan kna'naklei. 9#Mt 10.17-18,22; Jn 15.18; 16.2. Heirouri yane naya manbine, klah-mrimni marhotbi, heirou hatnungei miyei hutra pithutdeirou. Keiyei ngamrou thimi nammane naya machinheirou. 10Thimi namyerwani yaiyei uklumya malummurbi, yane khatle-khat yorcharillou, heirou khatle-khat machinrilheirou. 11Heirouri klallei paocha thimi chungwane hungthukbine, heirou yane thimi chungne lam tamungyerheirou. 12Heinakei lhangaimak lhou rapya karyouyerbi, thimi rapbei malungshiril heiri trimheirou. 13#Mt 10.22; Kre 2.7. Heiya huhuni kluiyei kheen hungphane kanthrambi doukur thimi rapri kalpi pharou. 14Heirou Dunpuei Krung'rammei lhangai paolaa heiri tlaipang karyoune chaibi wa'tlungyerrou heitoubi thimi rapbei mitni muthungeirou. Heirouri tlaipang kluiyei chaan hungrouwa.”

Chi'knaei Klah-knang

(Mk 13.14-23; Lk 21.20-24)

15 # Dan 9.27; 11.31; 12.11. “Nane mueirou, touri Thimkhui Danielni yunthutkhou heinakne ‘chi'knaei klah-knang chaan’ hungeirou. Heitoubi khyingei bira mayungeirou (Awari pa'kmu thimi rapne mulhaklaksu.) 16Heirouri Judea ramrei thimi rapne lhungdoura trukbanglakasu. 17#Lk 17.31. Cheembung dourei klei thimi heini yongchumbi aicheemrei putcheiya markummakneyasu. 18Loutlaira lhouchurbi klei napawa heinikhi hanui kallengbi aiyei linglik hungloumakneyasu. 19#Lk 23.29. Heinakei kheenrou nao-urbi sha'khrit napuiya raple heirou naodou pombi klei rapnungkhi kounakei klah hoirouwo! 20Nane heinaksirei trukchananungei kheen heiwari Phalbinung, nimanung Mathrilna tlainirou thukmaknanungei Dunpunung shunchalak! 21#Dan 12.1; Jol 2.2. Ngamri tlaipang kanretirrei waiyoubi, angtuei chaan phane heinaksi klah-knangri tekkhi thuk'khoumakhui. Heinaksi mrim-knang heiwari hanui kallengne thukkhoumarou. 22Heiya Dunpune tlainirap heiri mshing kanthrityerla; Ane heinakrim kanthrityermaka'nungri hunikhi ringchangmakrou. Aiyei khalthutkur thimi rapnung'tlimri kousiya hoiyanungkhi, Dunpune heinakei tlaini rapya kanthrityer'heirou. 23Heirouri, thimi hukounak khatne neinungei, ‘Thilak, Messiahri bi arou leileime! Nimanung Ari hora leileime!’ toubi yunlanungri, aiyei kyun heiwarou nangne malungampimak. 24Koungameiyo toulanungri, toukarsa Messiah heitoubi toukarsa Thimkhuirap hungthukheirou; heirou yane Dunpuei khalthutkur thimi rapyakhi malhimna'nungei kngakei lhourap kounak, heirou mine toumanemak lhou rapya touheirou. 25Ningpilak! Lhourap heiya hungthuk'bongnung Keine nanungei yunthutkhoupila. 26#Lk 17.22-24; Kre 1.7. Nimanung, thimi rapne nanung asitoubi yunlanungri, ‘Thilak, A heiri ramthingra pothutdura!’ - heiyanungkhi bi'heirou nane wapimak; nimanung yane asitoubi yunrou, ‘Thilak, A heiri bi arou munne yulbi leilei!’ - heisi yunlanungkhi yaiyei tlouya malungampimak. 27Thimiyei Chanapawane yongeinungri, nungthoura kulkung lhang'rouweine kulrel phane tliplai alnaksine hoirou. 28#Lk 17.37; Job 39.30. Kouweiyo toulanungri Khi'lhung dana bi kantangrou langteya kar'umrou.”

Thimiyei Chanapawaei Yongrou Kyou

(Mk 13.24-27; Lk 21.25-38)

29“Heinaksi klah-mrim tlaini rapya luikur hillouri, kinnikhi katmehrou, tanglakhi almakrou, sorwakhi nungthourei yendarouwa, heirouri thangwanrei klei mantrang namyerwa heikhi kanthingeirou. 30Heirouri nungthoura Thimiyei Chanapawaei shakrungkhi muyerrou, heirou tlaipang dourei klei thimi rapne Thimiyei Chanapawane ramei doura tungbine mantrangle heirou thang'alle kalhonne kyong loumulanungri kanrelni chapchieirou. 31#1 Co 15.52; 1 Th 4.16; Isa 27.13; Zec 9.14. Pengkulkhi yuk'khungeirou, heitoubi Ane Aiyei Thangring rapya tlaipang kulkung-kulrel, khalu-khate wa'tlungni malhetbi, heirou yane tlaipang mnak lhang'khat'rouweine mnak lhang'khatrei Dunpuei khalthutkur thimi rapya markumheirou.”

Khyudhei Trung Khatrei Mulouheinung Yailim Tlou

(Mk 13.28-31; Lk 21.29-33)

32“Khyudhei trung khatrouwei nane mulouheilak. Khyudban rapne heimchidthutbi heengna heibowanungri, manthral hungame toubi nane loukmu. 33Heinakrimne, nane lhourap namyerwa hungthukkur loumuyeinung kheen heiri yennakkame touri nane loumulak, heirou Ari yongrou marshikkura. 34#Mt 16.28. Keine nanung tanghakne yunpilei, nane ningthutlak touri angtu chaanyei thimi rapne hichibongnung lhourap namyerwa heiri thukheirou. 35#Mt 5.18; Lk 16.17. Thangmun heitoubi tlaipangpal namyerwa maangkurkhi kya, heiya Keiyei yunthutkur ari tloulhang khatkhi maangmakrou.”

Tlaini Heitoubi Kheen Heiri Hunikhi Mumak

(Mk 13.32-37; Lk 17.26-30,34-36)

36 # Pao 1.6-7. “Heiyanungkhi, thimi hukhatnekhi kounirou, nimanung koukheenrou hoirouwo touri mumaklei-Thangmunra klei Thangring rapnekhi, heirou Chanapawa'nekhi heiyei kheen, nimanung tlaini heiwaya mumaklei; heiya Pawa'tomni kmu. 37#Lk 17.26-27; Kan 6.5-8; 7.6-24. Thimiyei Chanapawane yongeinungri Noahyei chaanrou thukkurkhou heinakrimne hoirou. 38Noahyei chaanrou, yuitangni dumbongnung thimi rapne chamalip-mongmalipbi leikhou, Noah'ne malira polhakur tlainirou phane thimi rapne nu'klou-shal dunnei lhou rapya toubine houklumni tulpungei lhouya toubine leikhou; 39heiya yuitangni yaya katmartlao'bongyen heinakei lhou rapya hukhatnekhi ningthutkhoumak. Heinakrimne Thimiyei Chanapawane yongei kheenroukhi hungthukeirou. 40#Lk 17.34-35. Heinangri thimi napung-khnine loutlaira lhou churkanthrinbi leirou; napung khatyari loubangeirou, heirou khatyari lakurkhourou. 41Napuiya napung-khnine cha shu'kalhakbine leirou, napung khatyari loubaangrou, heitoubi khatyari lakurkhourou. 42#Mk 13.35; Lk 12.40; Mt 25.13. Heiyanungri nane mukheine kanthrambi loungaklak, ngamri naiyei Puni kounakei tlainirou yongrouwo touri nane mumak. 43#1 Th 5.2; Kre 3.3; 16.15; 2 Pt 3.10. Cheempu heini kouninung mucha thimine mucharou wachangleiyo toubi mulanungri, ani iplhakmakne mitringni leibi mucha thimi heini kouniroukhi aiyei cheemra wachangbine umbaibi koukhatkhi mulouheikur manemakrou, touri nanekhi mulei. 44Heiyanungri, nanekhi kheenserrou marshikbi leiyalo, ngamri nane marshikmakne leiyeinung Thimiyei Chanapawane yongkurkhi kya.”

Malungamkna Heirou Malungamnamak Shok

(Lk 12.41-48)

45 # Mt 25.21,23. “Heiyanungri, huni malungamkna heirou mukhei shok hoilei? A heiri Cheempuni aiyei shok rapnung kheen chani picha-pi'kmaiyei lhou touyernanung watyilkur lhousillanak. 46Heinakei shok heiri Puni cheemra kallengeinung heinak lhangaiyei lhouya churbi louklei hungmulanungri, kounak hakrao hoirou! 47Keine tanghakne nanung yunpilei, heinaksi shok heiyari Puei cheemrei klei putchei namyerwaya thikulnanungei lhousilla hoiyerpirou. 48Heiya a heiri lhangaimak shok hoiyanungri, aiyei cheempuri kallengtlengmakrou toubine aitamtom yunbi leiyurou, 49#Lk 21.34. heirou ani aiyei shok palui deirapya umphit toubine louleirou, heirou ani chamalip-mongmalipbi klei thimi raple kalhonne leiyurou. 50Heirouri ani ningchamakne louleiyeinung Cheempu heini tallengne kallengeirou. 51#Mt 8.12; 13.42,50; 25.30; Lk 13.28. Heirouri Cheempu heini shok heiya hunghulthutrou, heirou toukarsa thimi raple kalhonne khouwurou, heirou ani yale pulne leibine aiyei ha chikmardebi chapni leirou.”

Currently Selected:

MATTHEW 24: MARIBSI

Highlight

Copy