MATTHEW 23

Jesu'ne Chaylamyei uparap Heirou Lhangai Karsa Thimi Rapbei Lhangaimakya Mutpikur

(Mk 12.38-39; Lk 11.43,46; 20.45-46)

1Heirouri Jesu'ne thimichung raple heirou Aiyei ruishik rapnung shun: 2#1 Kr 8.13; Laa 26.8. “Chaylamei upa raple, Lhangai karsa thimi rapri Moses'yei Chaylam rapya mallengthutnei maniri yaihutra klei. 3Heine nari lhou kantangrou yaiyei shunya hilthungne lhou tourou da; heiyanungkhi nari yane toubi klei heinakrimne toukarsanungri yamakrou, ngamri yane shunmatubi klei lhou heiwaya yari hilthungne lhou toumaklei. 4#Lk 11.46; Pao 15.10. Yane thimi rapbei namkal doura urchangmaknung put kharitya pobaangpilei, heiya yaneri heinak put kharityari yai hutmayung'niyakhi heithirbi urtrungpinimaklei. 5#Mt 6.1; Hoy 13.9; Khn 6.8; Mt 9.20. Yane lhou namyerya mine mulaksu toubine kanyerne toulei. Yane khyingei tlou lhangai rapya mayethutbi yai machalra heirou yai hutbangra manyarchabi klei heiwaya thilak, heitoubi yaiyei tangkni heirapyakhi nane thilak! Heirou yaiyei linglik rapkhi chulne manyarbi klei rapyakhi thilak! 6#Mk 12.38-39; Lk 20.46; 14.7-11; 11.43. Heirou yarapri yama markhulna birakhi omna bi lhangaiyatom thipharou, heitoubi Pukhrumna Cheemrakhi omna choune kandangnaratom omkni; 7yari keithil tlailamra ramphane thimi rapne yayari tangne rikrai-khrumyerkni, heitoubi yayari ‘upathral’ toubine miya ungyerkni. 8#Jas 3.1. Heiya nayari ‘Upawa’ toubine ungyermak, ngamri nari khatle-khat teinaowathil, heitoubi naiyei ‘Upawa’ heiri khat leileihui. 9Heirou tlaipangdou arouri thimi hukhatyakhi ‘Pawa’ toubi ungrilmak, ngamri naiyei Pawari khattom Thangmunra leileihui. 10Mi hukhatnekhi nayari ‘Ruipipu’ toubikhi ungyermak, ngamri naiyei Ruipipu heiri Messiah tomngei. 11#Mt 20.26; Mk 9.35; 10.43; Lk 9.48; 22.26. Heitoubi naihangra nam'rouwei tangdui thimi heiwane naiyei shok hoirouda. 12Hukhatne tang thimi hoiniyanungri, aitamne ukning khnim thimi hoirou da, heirou thimi hukhatne ukning khnim thimi hoiyanungri, ayari duine tang thimi hoiyerrou.”

Jesu'ne Lhangai Karsa Rapya Manchokur

(Mk 12.40; Lk 11.39-42,44,52; 20.47)

13“Chaylamyei uparap heirou Lhangai karsa thimirap nanungri kounakei lhawai lahknaei lhou hoikurawo! Nari thimi rapne thiyeinung, naiyei mairung heini Thangmun Krungrammei cheemkharya hang rotphopkurnak hoiyura, heirou nahakni bi'heirou kachangri manemaklei, heitoubi bi heirou changrou marshik thimi rapyakhi nane changyermaklei! 14Lhangai karsarap heirou Chaylamyei uparap nanungri kounakei lhawai lahknaei lhou hoirouweiyo! Ngamri nane trulmei rapbei cheem-kei rapkhi mulouheichila, heirou nane shunchayeinungkhi toukarsabine, mini naya mulaksu tounakrimne shaangni shunchalei. Ngam heini nanungei nam'rouwei lahduiyerrou! 15Chaylamyei uparap heirou Lhangai karsa thimirap, nanungri klahyei shakrung hoilei! Nane yui nlaakyakhi yenralbi, heirou ram kantangroukhi karyoune yenkarwaichabi, thimi napung khatyatom ukning hungkyer; heitoubi nane aya ukning hungyerkur hillouri, nane khnui thukne aya khiya ramra changyerrou waiyouwura! 16#Isa 66.1; Mt 5.33-37; 15.14. Mitdeowei lamrui thimirap, nanungri klahyei shakrung hoipilei! Naneri ‘mi hukhatne Pukhrumna Cheemya mintlangbine tlou kantomlanungri, heiwane anungei koukhi klu nimak; heiya ani Pukhrumna Cheemmei sina heiwaya mintlangbine tlou kantomlanungri, anungeiri heiwane duine lulei’ toubine shunmatulei. 17#Hoy 30.29. Mitdeo thimirap, nanungri kouni klu hoilei, sina heiwariyo, nimanung sinaya hyingkyer Dunpuya khrumna Cheem heiwari, kouni klu hoilei? 18Nane asitoubikhi shunmatulei, ‘thimi hukhatne khrahpalya mintlangbine tlou kantomlei, heiya aiyei tlou kantom heiwari klu hoimaklei, heiya khrahpal dourei makatkur khrumna put anchum heiwaya mintlanglanungri, anungeiri heiwane duine klu hoilei,’ 19Nari kounakei mitdeokurawo! Nanungri kouni klu hoirou? Khrumna put anchum heiwariyo, nimanung khrumna put anchumya hyingkyer khrahpal heiwari? 20Heiyanungri, thimi napung-khnine tlou kantomrilleinung, khrahpalya mintlangbi kantomlanungri, ani khrahpalkhi, heitoubi heiyei dourei khrumna put heikhi, namyerwaya mintlangbi tlou kantomnaksi; 21heirou ani tlou kantomyeinung Pukhrumna cheemya mintlangkur heiri, Cheem heiwaei rilwairei klei Dunpuyakhi mintlangnakrim hoilei; 22thimi khatne Thangmunya mintlangbine tlou kantomlanungri, ani Dunpuei omna heirou heiyei dourei ombi klei heiwayakhi mintlangbi kantomkura. 23#Lk 11.42; Lev 27.30; Mic 6.8. Chaylamyei uparap, heirou Lhangai karsarap, nanungri kounakei klahyei shakrungya hoikureiyo! Toukarsa thimi rapnungkhi klahyei shakrung hoipilei! Nane muiknam heilungrap, hof lungle jira lung rapya siruk macha'rouwei chiptamri Dunpunung makatbi leilei, heiya Chaylamyei lungkhoi shunmatupirap heiyari nane tlou khoine loupimaklei, touri, chimle kringpikhei heirou ukning khyingri nanungei tekchakhi maklei. Nane deideiya chanthungmakanungkhi anak rapri chanthungrou da. 24Mitdeowei lamkrui thimirap! Naneri naiyei cha'kmai putrei wachukur traan rapyari louhuilei, heiya rahuiyari nane madulchokthulei! 25#Lk 11.39-41; Mk 7.4. Chaylamyei uparap, Lhangai karsa thimirap heirou toukarsa thimirap, nanungri beimakne lahpilei! Naneri naiyei mongna keple, chana-maina tleipang rapya baorari rsilmathailei, heiya rilwairari naitam thi'msitrilbine leilei, heirou marhotrilbi kleini thimlei. 26Mitdeo Lhangai karsa thimirap! Nane naiyei rilwairei mardunya marthingyerrilak, heiyanungri baoreikhi heimarthingrouri leiyura! 27#Pao 23.3. Chaylamyei uparap, Lhangai karsarap, heirou Toukarsa thimirap! Nanungei'tlim beimakne lahpilei! Nari khngoune mansambaangkur lhankhman nakrimlei, baorari thilanung lhangai, heiya rilwairari thimi thru taarle, heirou chul'khrotkur thru'khrongni thimkur heinakrimlei. 28#Lk 11.44; Laa 5.9. Heinaksine nane thimi napung kantangei maibongrari thiyeinung baora lhangai, heiya naiyei ukrillari toukarsani heirou borhni thimlei.”

Tlou Chuiyernei Ngamrou Jesu'ne Lamkrine Yunthutkhou

(Lk 11.47-51)

29 # Pao 7.51-53. “Chaylamyei uparap, Lhangai karsarap, heirou Toukarsa thimirap! Nanung'tlim beimakne lahpilei! Naneri Thimkhui rapbei lhan rapya, heirou min chakhou thimi rapya ningthutnanung bunkhou thlung rapya lhangaine mansambaangbi khouthulei; 30heitoubi nane kyun, ‘kani bongei kai patar rapbei chaanrou loupaalkhoula'nungri, yane Thimkhui rapya marhotbi hatkurnakri kari toukhoumakrou! 31Heini nai mshanekhi asinungri bongei Thimkhui rapya marhotbi hatkur naiyei patar rapbei yu-chame toubi ya'kni leilei!’ 32Heiyanungri, nai patar rapbei yunthutkhou heirapya heisi yentouheibine luilhaklak! 33#Mt 3.7; Lk 3.7. Nari frullei yu-cha rapme! Nane koutoubi khiya rammei meikhurya marshikbi khoukur heirouwei kartleirouwo? 34#Lk 11.49-51; 2 Ch 36.15-16. #Mt 10.17,23. Ngam heini Keine nanungei yunpilei touri, Keine nanungei Thimkhui raple, mukhei thimirap, heirou upa rapya yenmalhetrou; heitoubi nane ya thayari hatdurou; heitoubi thayari heeng-karbakra manyarhatrou; heirou thayari nane Pukhrumna Cheemwaira umphitkhi tourou, heirou yultlai khatrouwei-khatra hulfletchabi loukhourou. 35#Kan 4.8; 2 Ch 24.20-21; Heb 11.4; Zec 1.1. Heirou dongwairouri, koukhi muheimakne thimi hatkur rapbei klal heiwari naidoura nammane daheirou, koukhi klal mak Abelya hatkur heirouweine Berachiahyei chanapawa Zechariahya nane Pukhrumna cheemle Khrahpallei tlakra hatkur heikhi naidoura daheirou. 36#Mt 10.23; 16.28; 24.34. Keine kallengne nanung yunlei, heinak thimi hatdurnei chuiyerkurrap heiwari angtuei chaanyei thimirap naidoura dachirou!”

Jesu'ne Jerusalemya Thrilthibi Malungshipi

(Lk 13.34-35)

37“Jerusalem, Jerusalem! Nangne Thimkhui rapya hatkur, heirou Dunpuei paocha thimi rapya yenmalhetnaroukhi nane thlungne khinghatdurpi! Keine nayari waapuini aiyei waashun rapya shadaakra ophopbine khoupinakne, Keiyei hutni naya rkolpinanung lhangaine markumpi! Heiya naneri Keiya rkolyermaklei! 38#1 Kr 9.7; Jer 22.5. Heini thilak, naiyei Pukhrumna Cheem heiwari asinung Keine khingmatraibi hangwalni horkhourouwa. 39#Mt 21.9; Laa 118.26. Asinung waiyoubi, Keine nanung yunpilei, nane asitoubi yunbongyen Keiyari muphamakrou touri - Puei minra hungbi klei Aya Dunpune phor pilaksu.”

Currently Selected:

MATTHEW 23: MARIBSI

Highlight

Copy