MATTHEW 22

Nu'klou Chak Khangnei Ngamyei Yailim Tlou

(Lk 14.15-24)

1Jesu'ne thimi rapnung yunmatueinung hanuikhi yailim tloune yunthu. 2“Thangmunyei Krungramri anaksi. Bongnung chaan khatrou Krung khat leikhou. Ane Aiyei chanapawaei nu lounarou chak khangnanungei marshikkur. 3#Mt 21.34. Heirouri Ane aiyei shok rapya watyilbi, marngeina bira wachangnanungei thimi rapya unglhakyerkur, heiya thimirap hukhatnekhi bi'heirou wachangnimak. 4Heitounei ngamrou Ane aiyei shok deirapya shunmatubi hanui paochilbine thimi rapya ungmarkumkur. ‘Keine yama kulya picha-pimainanungei marshikbine khouwurla; Keiyei halpa rapya, marnam manklu halshun rapya kambine, nammane marshikbi khouchila. Ngam heini thimi namyerwani nu ruinei cha'kmai marshikna bira wachangpiyalo!’ 5Heiya ungkur thimi rapne koukhi tloukhoine loupimakur, heirou yaiyai nalnaiyei lhoura chawurchiya; napung khatri aiyei yekulranung chakur, thimi napung khatri aiyei putchei yorrou toubi chakur, 6heitoubi deirapri cheempuei malhetkur shok rapya loumanbine yaya louhatdurpi. 7Heitounei ngamrou Krung heiri kalthi malungkhawurbi, Ane aiyei raallui rapya malhetbi, aiyei shok rapya loumanbi hatkur thimi rapya wahatkur, heitoubi yaiyei khokul rapkhi mei shulhakur. 8Heitounei Ane aiyei shok rapya ungmallengbine yanung kyun, ‘Keiyei mou-lounei chaak-khaangnungei heiri namyerwa marshikthutchila, heiya thimi rapya unglhakbinekhi yane koukhi tloukhoine loupimakura. 9Heini asinungri nane wabi khullamra klei thimirap namyerwaya karthangeimkhei unglhaklaka.’ 10#Mt 13.47. Heisi tounarouri shok rapne lamtangra wathukbine, heirou karwaicha thimirap namyerwaya karthangeimkhei yane cha'kmai marshiknara lhangai rapkhi, heirou lhangaimak rapyakhi unglhakkur; heirouri Yama markhulna cheemtang heiwari thimini bil thimkur. 11Krung heini wachangbi markhulbi klei yamakul rapya thikulkur, heirou Ane, thimi napung khatne yama markhulnara nu'louwei shambkhi kansammakne wakyao heiya munarou Ane kyun, 12#Mt 20.13; 26.50. ‘Keipalui, nangri kousitounei nu'lounei yama markhulnara shambkhi kansammakne wakyaowo?’ toubi Krungni anung loukngai. Heirouri napawa heiri koutlou khatkhi mallangmakur. 13#Mt 8.12; 13.42,50; 24.51; 25.30; Lk 13.2. Heirou Krung heini aiyei shok rapnung shunkur, ‘Napawa aya hutkhi-hokhi phonlaka heitoubi mehnara khingthutlaka, heirouri a heini bi heirou ha chikmardebi chapbine leirouwa.’ ” 14Heirou Jesu'ne asitoubi yunbi luilhakur, “Thimi chungne ungpikur, heiya khalthutyeinungri thimi tharemcha hoilei.”

Khulrui Kanei Ngamrou Tlou Kngai

(Mk 12.13-17; Lk 20.20-26)

15 # Mk 3.6; 8.15. Heirou Lhangai karsa thimi rapne shallurbi, heirou yane Jesu'ya mannanungei mreitounei tloune kngai. 16Heirouri yaiyei ruishikrap thale, Herodei thimi rapya heiyilbine Anungei tlou wakngai, “Upawa, kani mulei touri Nangri chimmei tlouyatom kyun. Heitoubi nangne thimi rapnung Dunpuei kning heiyei ngamrou chimya shunpilei, heitoubi Nangri tlaipang thimiyei sharungyakhi, heirou tang-mandikhi thimaklei. 17Heini kanungei yunpilak, Nangne kousitoubi ningchalei? touri, kani Rome Krungnung khulrui katpibaangnarou kaiyei chaylamra karharou kousi leilei? Nimanung kaiyei khulrui pimakserouko?” 18Jesu'ne yai lhangaimaknara dayernanungei marshikbi tlou kngai heiwaya loumuwurbi, heirou Ane loukyun, “Lhangai karsa thimi rapme nari! Nane Keiya kounungei chaangra dayernanungei tlouya kngaiyo? 19Naiyei khulrui pinanungei tuychui heiri Keinungei mutpilak!” Heirou yane tuychui heiya Anungei mutpikur, 20heirouri Ane yanung kngai, “Tuychui arou huiyei min mayelei, huiyei runglha yekbine leilei?” 21#Rom 13.7. “Rome Krungei minle heirou aiyei runglha yaolei,” toubi yane loumallangkur. Heitounei Jesu'ne yanung kyun, “Heiyanungri lhangaiya, nane Rome Krungnungei naiyei khulrui pibomthuk heiwari anungei pilaka, heirou Dunpunungei pibomthuk heiwari Dunpunung pilaka.” 22Heirou yane heiya mayeknarouri beimakne ngakur; heirouri Aya horkhoubi shaalkur.

Khirouwei Ringthutnei Ngamrou Tlou Kngai

(Mk 12.18-27; Lk 10.27-40)

23 # Pao 4.1-2; 23.6-10. Tlaini heirou Sadducee rapne Jesu'nung wabi, thimi rapne hiwurnarei ringthutmakrou toubi yane Anung wakyun. 24#Khn 25.5. “Upawa, Mosesni asitoubi yunkhoulei touri, chanaokhi pomkhoumak napawa napung khatne hiwurnarou, heirou aiyei nu heini trulmei khoine leithungnarou aiyei naowa rapne trulmei heiwiya louthungbine, hikur upawaei yu-cha hoinanung chanao pukthung. 25Asinungri napawa heiyei teinao napung-eni klei. Heirouri upawa heini nu loukhoubi chanaokhi tlakhoumakne hiyura, heitounei aiyei nu heiya aiyei naowanung horkhoupikur. 26Ainaowa khintamtlung heiwanungkhi heinakrim thukkur, heirou ainaowa khyumtam tlung heiwanungkhi heinakne thukkurthu, heirouri aiyei naodongwa phane heinakrimne thukkura. 27Hiltorouri, napuiya heiwikhi hiyura. 28Arouri hikur thimi rapne katringthut tlainirouri, napuiya heiri huiyei nu hoirou? Ngamri yai teinaorap nammane napuiya heiwiya yainu hoinawurkhou.” 29Jesu'ne yanung loukyun, “Nai khalkur heiri beimakne chimmakura! Ngamri nane Khyingei Pu'tlou rapyakhi heirou Dunpuei mantrangyakhi mumaklei. 30Touri, hikur thimi rapne ringthutdeinungri, yari Thangringnak hoirou, heitoubi yane kouniroukhi nu'klou-shaldun toukhi naimakrou. 31Asinung nane hikur thimi rapbei ringthutnei ngamrou pathimakhuiko? 32#Hoy 3.6. Touri, ‘Keiri Abrahamei Dunpu, Isaackei Dunpu, heitoubi Jacobeikhi Dunpume.’ A heiri khi Dunpu nimak, heiya khringei Dunpu,” toubi Ane kyun. 33#Mt 7.28. Heirou thimi rapne Aiyei heitoubi kyunya mayeknarouri kalthi ngakur.

Tangdui Chaytlou

(Mk 12.28-34; Lk 10.25-28; 20.39-40)

34Jesu'ne Sadducee rapya kou tloukhi yunyermakne toudongurla tounei pao heiwari Lhangai karsa thimi rapne mayeklhaknarouri, yane kartilkur, 35#Lk 7.30; 11.45; 14.3. heitoubi yaihangrei Chaylamyei upa napung khatne, Jesu'ya yaiyei changra dayernanungei tlouya kngai, 36“Upawa, Chaylam rapbei hangra tangdui chaytlouri kouriyo?” 37#Khn 6.5. Heirou Jesu'ne anung louyunpi, “Neiyei ukning-solung kyaoni, heirou neiyei lhawaikhi kyaoni naiyei Pu Dunpu ya malungshilak. 38Awari nam'rouwei tangdui, heirou lungkhoi Chaytlou. 39#Lev 19.18; Mt 19.19; Gal 5.14; Rom 13.9; Jas 2.8. Heirou khintam tlung lungkhoi Chaytlouri asi toulei. ‘Nangle cheemlhun khoi thimi rapya neitamya malungshi nakne malungshilak.’ 40Moses'yei Chaylam namyerle heirou thimkhui rapbei shunmatupikhou namyerwa heiri Chaytlou tangdui khintam awaei doura kanthrumna khoi.”

Messiahyei Ngamrou Tlou Kngai

(Mk 12.35-37; Lk 20.41-44)

41Lhangai karsa thimirap thane kartilbi louleinarou Jesu'ne yanung kngai, 42“Nane Messiah'yei ngamrou kousitoubi ningchalei? A heiri huwei yu-cha?” “A heiri David'yei yu-cha shullamrei yenraan thimi,” toubi yane loumallang. 43Heirou Jesu'ne kngai, “Heiyanungri koutounei Lhawai Khyingni David'ya shunbi Aya ‘Pu’ toubi ungyerkurro? Davidni asitoubi yunlei, 44#Laa 110.1; Pao 2.34-35; Heb 1.13; 10.13. ‘Puni kaiyei Pu Dunpu nung shun. Keile karhoukril thimi rapya neiyei ho daakra tatphopyerbongyen Nangri Keiyei thya lhangra lou'ommalo.’ 45Heiyanungri Davidni Aya ‘Pu’ toubi unglanungri, Messiah heiri koutoubi David'yei yu-cha hoirouwo?” 46#Mk 12.43; Lk 20.40. Heirouri hukhatnekhi Jesuei tlou kngai heiwari mallangchangmakura, heirou tlaini heinirou waiyoubi Anung hukhatnekhi koutlou khatkhi ngaichangmakura.

Currently Selected:

MATTHEW 22: MARIBSI

Highlight

Copy