MATTHEW 25

Nangaka Napung Chipbei Ngamrou Muloukna Yailim Tlou

1 # Lk 12.35-38; Mk 13.34. “Heitoubi Thangmunyei Krungramri anakne hoiheirou. Bongnung chaan khatrou nangaka napungchip leikhou, heirou yane shirek meishar khatsol shinbine nu'ruirou kyou napawa heiya louronanungei wathukkur. 2#Mt 7.24-27. Heirou nangaka napung phanga heirapri muheimak, heitoubi napung phanga heirapri mukhei thimi. 3Heirou muheimakpi rapneri yaiyei meishar shinlouheibi, shirekri ronungei marshikloumakne chawura. 4Heiya mukhei nangaka rapneri shirek phura ronanungei bil-bil thimni marshikloubine chakur. 5Heirouri nu'klou napawa heini masa yantrim kheenrou hungeinungri, nangaka rapne lou'omngaakeinung yen'ipnikur.”

6“Heirouri, ‘nu klou napawa heiri hungame! Nane kanthoubi aya lourolaklo!’ toubi yukpaowei'nungri masa yantrim hoiyura. 7Heirouri nangaka napungchip heini ipnarei fyoubine, ai'aiyei shirek meishar rapya manshokkur. 8Heirou muheimakpi nangaka rapne mukhei nangaka rapnung kyun, ‘Naiyei shirek heiri kanungkhi beibeicha khairillase, ngamri kaiyei meishar rapri yenmitdurame.’ 9Heitounei mukhei nangaka rapne loumallangkur, ‘Tourimakhui, shirek heiri nale-kale khairilla'nungri, nanungeikhi romakrou heirou kanungeikhi romakrou, heini nane wabine shirek yornara walolaka.’ 10#Kre 19.9. Heisi tounarouri, muheimakpi nangaka rapne shirek yornara lorou wakur; heirou yane lorou wawurhillouri, nu'klou kartlanga heiri hungtlungura. Heirou shirek kroni marshikbine louklei nangaka napung phangari kartlanga heile kalhonne nu'ruinei markhulna bira wachangkur, heitoubi cheemkharkhi louthungkur.”

11 # Lk 13.25; Mt 7.21-27. “Heihillouri nangaka napung phanga heirapne yenkallengbi, hung'ungkur, ‘Upawa, Upawa! kayakhi bei wachangyerlaklo,’ toubi yane hei'ungraokur. 12Heirouri nu'klou napawa heine yanungei loukyun, ‘Nari huwo, Keiri mumakme!’ 13#Mt 24.42; Mk 13.35; Lk 12.40. Heirou Jesu'ne asitoubi yunbi luikur, “Nane kanthramni doulak, ngamri nane kheen nimanung tlaini heiri mumaklei.”

Shok Napung khyumyei Ngamrou Yailim Tlou

(Lk 19.11-27)

14“Kheen heinungri Thangmunyei Krungramri anakrimne hoiyeirou. Bongnung chaan khatrou napawa napung khat leikhou. Ane ram deira chabongnung, aiyei cheemrei klei putchei namyerwa heiya louthikulnanung watyilkhou. 15Ane napung khat-khatdei manecha hilthungne hilmandokur: heirou thimi napung khatnungni talent phangatam pikhou; heitoubi napung khatnungri talent khintam pikhou, heirou khatnungri talent khatchatom horkhoupi. Heitoubi Ane lakkurkhoubi ram deiranung chakur. 16Heirouri talent phangatam phaloukur shok heiwane chawurbi, heirou ane lal holbine talent phangatam duine tungyerkur. 17Heitoubi talent khintamcha phathungkur shok heinikhi chawurbi, ani lal holbi talent khintam duine tungyerkur. 18Heitoubi heinaksine talent khatchatom phathungkur napawa heini shallurbi, ani thleira khur khat utbine, aiyei Cheempu heini yenkallengbongyen phorphumbine yulkhoukur.

19 # Mt 18.23. “Heihillou kheen tlani leibi, Cheempu heiwane yenkallengbine, aiyei yerpiwurkhou talent rapya Aiyei shok rapya ungmarkumbi msing kansherthikur. 20Heirou talent phangatam urloukur shok heiwane aiyei cheempuei hutra phangatam khatkhi duine malanthutpikur, ani kyun, ‘Upawa, nangne keinungei pikhouri phangatam tomchani,’ toubi ane kyun, ‘heiya thilak, keinekhi heiyei doura phangatam duine lal holthutbi tungyerla.’ 21#Lk 16.10; Mt 24.45. Heirouri Cheempuni loukyun, ‘Lhangaiya, nangri lhangai malungamkna shok khatlei! Heitoubi nangri lhoubom mandicha khatroukhi malungamknane lhou touwurla, heiniri neiya keine lhoubom tangna khatrakhi touyerrouwa. Wachanga, heitoubi Keiyei nungkngaiyei bomra yaolaka!’ 22Heirou talent khintam phaloukur shok heinikhi wachangbi kyun, ‘Upawa, nangne keinungei talent khintamcha pikhou, heiya thilak, keinekhi achaya duine khintam-khatkhi lal holthutbine tungyerla.’ 23Heirouri Cheempuni loukyun, ‘Lhangaiya, Keiyei shok nangri. Nangnekhi lhoubom mandicharou malungamknane lhou touwurnei ngamrou, arouri Keine neiyakhi lhoubom tang khatra churyerrouwa. Wachanga, heitoubi Keiyei nungwainara wayaowa!’ 24Heirou talent khatchatom phakur shok heinikhi wachangbine ‘Upawa, keine kmu, nangri beimakne klu thimi khat; nangne lung tuklhakhoumakna birakhi trunwai markum thimi, heirou nangne koulungkhi linglhakhoumakna birakhi luk thimi. 25Heitounei ngamrou keine neiya chi'kna, heingammei keine chawurbi neiyei keinungei pikhou tuy talent khatcha heiri thleira khur utbine phorphumbi khoukur. Thilak! Neiyei pikhou tuy heichari ara keine shinleihui,’ toubi loumutpi. 26‘Lhangaimakpa, lhou churnimak shok nangri!’ Cheempuni louyunkur. ‘Nangri muleintu, keine lung tuk'khoumakna birakhi aatmarkum, heirou keine lung lingkhoumakna bireikhi lukmarkum?’ 27Lhangaiya, heiyanungri, nangne keituy heiya lal marpeikhouna'rakhi loukhoukur kya, heitoubi keine yenkallengnung tuy khingdui kyaoni loumallengkhi pharou. 28Arouri, aiyei hutrei tuy heiya louthutbine chungne klei thiminung piwurlaka. 29#Mt 13.12; Mk 4.25; Lk 8.18. Ngamri thacha klei thimi rapnungri duinekhi piwurou, heitoubi yane duine pharou; heiya koukhatkhi mak thimi rapreiri, aiyei thacha klei heirapyakhi yertlengwa louthutdeirou. 30#Mt 8.12; 13.42,50; 22.13; Lk 13.28. Heinaksi koukhatkhi karsukmak shok ayari pura mehnara khingthutlaka; heirouri bi heirou ani chapbine aiyei ha chikmardebi leilakasu.”

Kluiyei Pichar

31 # Mt 16.27; 19.28. “Thimiyei Chanapawane, Krung khoine Aiyei Thangring raple kalhonne yongeinungri, heirou Ane Krungbomyei omna doura ombine leirou, 32#Ezk 34.17. heirou lim kantangei thimi rapne Aiyei maibongra namyer kartilchirou. Heirouri Yaosilpuni yaole heirou tlangle khaithutkur'nakne, Ane thimi rapya rulkhni thukne khaithutrou. 33Heirou chim thimi rapyari Ane aiyei thya lhangra khoupirou, heitoubi deiyari Aiyei thyoi lhangra khourou. 34#Lk 12.32; Mt 5.3; Kre 13.8; 17.8. Heirouri Ane aiyei thya lhangra klei thimi rapnung yunrou, ‘Keiyei Pawane phor pikur thimirap, wachangalo! Tlaipang kanretirrei waiyoubine marshikbi loukhoukur Krungbom heirou nane paallaklo. 35#Isa 58.7; Jas 1.27; 2.15-16; Heb 13.2; 2 Tm 1.16. Keine msulleinung, nane Keinungei pichakur, Keine yuihatdeinung, heirou nane Keinung yui pimongkur, Keine ram deira chabi wa'tlungnanung cheem-bi makkeinung, heirou nane Keiya cheemra lou'unglhakbine louropi. 36Keine phirul upmakne leiyeiroukhi, nane Keinungei phi hubangpikur; Keine nabine leiyeiroukhi, nane Keiya lhangaine kna-watlhou churtrungpikur; heirou Keine phatopra kulchalbi leiyeinungkhi, nane Keiya yeelthipikur.’ 37Heirouri chim thimi rapne Anung louyunrou, ‘Upawa, kani Neiya kourou msulbi kleiya munarou pichakuro, nimanung nangne yui khatne leiyeinung kani kourou neiya yuiding pimongkur? 38Kourouwei kani Neiyei tlungna cheem makne leikurya kmuwo, nimanung koutamrou Nangne phi upmakne leikurya mubi kane phi hubaangpikuro? 39Kourou Nangne nabine leiyeinung, nimanung phatopra leiyeinung kani Neiya yeelthikur kleiyo?’ 40#Mt 10.42; Mk 9.41; Heb 6.10; Par 19.17. Heirou Krung heine loumallangrou. ‘Keine nanung kyunri, nane kanring-kanwaiyei klei keiyei teinao khatnungei toupikur heiso, Keinungei toupikur!’ 41#Mk 9.48; Lk 16.23; Kre 20.10. Heirouri Ane aiyei thyoirei klei thimi rapnung yunrou, ‘Nari bi arou keipongra leimaka, Dunpuei manchokur thimi rapme nari! Bi arou leimaka, lhangaimak Satan, heirou aiyei leima#25.41: Leima: Lhangaimaknara dakur Thangring. rapnung marshikbi khoukur klui naimak meikhurra changlaka! 42Keine msulyeinung nane Keinung pichakhoumak, Keine yui hatdeinungkhi nane Keinung pimongkhoumak; 43Keine ram deira chabi tlungna cheem makne leiyeinungkhi, nane Keiya unglhakbine louropimak, Keine phikhi upmakne hakthilni leiyeinungkhi, nane Keinungei kouphi khatkhi piupkhoumak. Keine nabine leiyeinungkhi, heirou kulrilla chalphopbi leiyeinungkhi, nane Keiyari lhouhoipimak.’ 44Heirouri yane Anung loumallangrou, ‘Upawa, kane kourou Nangne msulbi kleiya, heirou yuihatbi leikurya, nimanung ram deira chabi tlungnanungei cheem makne karwaichakurya, heirou phikhi upmakne hakthilni leikurya, nimanung nabine leikuryei kheenya kourou, heirou phatopra kulchalbi leikurya mubine neiya churtrungrouwo?’ 45Heirou Krung heine yanung louyunrou, ‘Keine nanung tanghakne yunlei, nane kouroukhi kanring-kanwai khatya churtrungnimakne toukur heiwari Keiya trungpimakurnaksi.’ 46#Dan 12.2; Jn 5.29. Heirouri ya heirapri klui naimak chuiyerna bira malhetrou, heiya chim thimi rapri klui naimak-trimnaimak khringei bomra charouwa.”

Currently Selected:

MATTHEW 25: MARIBSI

Highlight

Copy