MATTHEW 26

Jesu'ya Hatnanungei Wairaangkur

(Mk 14.1-2; Lk 22.1-21; Jn 11.45-53)

1 # Mt 7.28; 11.1; 13.53; 19.1. Jesu'ne heirapya yunnurchi hillouri, Ane aiyei ruishik rapnung kyun, 2#Mk 14.1-2; Lk 22.1-2; Jn 11.47-53. “Nane kmunakne, tlaini khniniyei hillouri, Ralthutpinei cha'kmai markhul leirou, heirou Thimiyei Chanapawa heiyari manyarhatnanung pithutrouwa.” 3Heirouri Suipipu uparap heirou yama upa raple pulne Suipipu upa Caiaphas'yei cheemra kartilbi murilkur, 4heirou yane Jesu'ya manbine hatnanungei munne yunrilbi wairaangkur. 5Heirou yane kyun, “Kane Ralthutpinei Puluk markhulbi khangnirouri anaksi lhou awari toumakase, nimanungri thimi rapne kaidoura yamakrou.”

Jesu'ya Bethany'ra Shirek Teipi

(Mk 14.3-9; Jn 12.1-8)

6 # Lk 7.36-38. Jesu'ya Bethany'ra, raichipobpa Simonyei cheemra, 7chamaibi louleiyeinung, napuiya napung khatne aihutra manklu shirek lhakna khangcha khat shinbine Jesuei leinara wachangkur, heirou ani heiwaya shungthutbi Aiyei lura teipikur. 8Heirou ruishik rapne muthungnarouri, yane malungkhani kyun, “Kouya tounanungei shirekya heisi maangyerkurawo? 9Heinaksi shirekya man chungne yorla toubi, heirou tuy heiwari kanring thimi rapnung yerpilanung duine lhangairou!” 10Yai kyun heiwaya Jesu'ne muwurnarou Ane yaya shun, “Nane napuiya heinung'tlim kounung lhawai lahpikurawo? Ane Keinungei toupikur lhou awari beimakne lhangai khat. 11#Khn 15.11. Kanring thimi rapri nale karyom leimalnarou, heiya nane Keiyari muphamakarou. 12#Jn 19.40. Ane Keiyei sharungra manklu shirekya shungthutbi fnalpikur awane Keiyei sharungya khi ruinanungei marshikpikura. 13Arouri, Keine nanungei yunlei touri, lhangai paolaa heiwaya tlaipangpal bi kantangrou karyoune shunthutleiyenri, ani Keinungei toupikur heiwaya ningthutyernanungei hoirou.”

Judas'ne Jesu'ya Lapa Somthumnung Yorkur

(Mk 14.10-11; Lk 22.3-6)

14 # Mk 14—16. Aiyei min Judas toubi ung ruishik khatne Suipipu upa leinara wabi, 15#Hoy 21.32; Zec 11.12. asitoubi washun, “Keine Jesu'ya naihutra yorlhaklanungri, nane keinungei koupirou?” Heirou yane lapa somthum sherthutbine anungei loumalanpikur. 16Heirouwei waiyoubi Judas'ne Jesu'ya manbi yaihutra pilhaknanungei tlakcha kheenya thiphakur.

Jesu'ne Ralthutpinei Markhul

(Mk 14.12-21; Lk 22.7-13; Jn 13.21-30)

17Phri yaomak mumtol shaibi markhulna lamkriyei tlainirou ruishik rapne Jesuei leinara wabine kngai, “Ralthutpinei Puei Luk'khang markhulnanung Nangne kaya biri koutamrou marshikyernileiyo?” 18#Mt 26.45; Jn 7.6; 12.23; 13.1; 17.1. “Nane wabi Krungkul rilra klei napawa napung khatnung asitoubine washunlaka, ‘Upawane yunlei, Keiyei kheenri hungtlungura, ngam heini Keine Keiyei ruishik raple pulne neicheemra Ralthutpinei cha'kmai markhulleise!’” toubi Jesu'ne kyun. 19#Mt 21.6; Khn 16.5-8. Heirou ruishik rapne wabi Jesuei shunmatupikur heinakrimne, yane Ralthutpina Tlainiyei cha'kmai markhulnungei bi heitamrou wamarshikkur. 20#Mk 14.17-21; Lk 22.14,21-23; Jn 13.21-30. Heirou yenrawaikur heirouri, Jesu'ne Aiyei ruishik napung chiple-khnile pulne chamainungei omkanthrinkur. 21Yane cha'kmai markhul waiyouyeinung Jesu'ne yanung kyun, “Keine nanung chimne yunpilei, naihangra napung khatne Keiya yorcharou waiyoulei.” 22Heisi tounarouri ruishik rapri beimakne lhawai lahwura, heitounei ngamrou yane waiknaine Anung loukngai, “Upawa, tanghakne kei hoirouweiko?” 23Heirou Jesu'ne yanung loukyun, “Keile pulne daarkok khatra mumtol lupmalnabi shai thimi heiwane Keiya yorrou waiyoulei. 24#Laa 41.9; Lk 24.25; 1 Co 15.3; Pao 17.2-3; Mt 18.7. Thimiyei Chanapawari Khyingei Lailikni kyunnakrim hoiyeirouhui, heiya Thimiyei Chawaya yorkur napawa heinungeiri beimakne lahnalei! Heitoubi napawa heinungeiri tlaipangra thimirung khoine loupuk'khouma'nungri duine lhangairou!” 25Thimiya yorchakur napawa Judas'ne, loukanthoubi Anung loukngai, “Upawa, neiyei kyunri keiya hoikurako?” Heirou Jesu'ne anung loumallangkur, “Neitam katyunthutkur heiwariya.”

Puei Luk'khang Markhul

(Mk 14.22-26; Lk 22.14-20; 1 Co 11.23-25)

26 # 1 Co 10.16; Mt 14.19; 15.36. Yane Puluk'khang markhulbi leiyeinung Jesu'ne mumtol heiwaya shinbine Dunpunung mathangkur, heitoubi threlchaalbi, Aiyei ruishik rapnung yerpiyeinung asitoubi kyun, “Nane awaya loubine shailak, awari Keiyei sharung.” 27Heirou Ane daarkok'khi shinbine heitoubi Dunpuya mathangkur, heitoubi yanungei malanpibine kyun. “Na nammane daarkok aya loubine monglak, 28#Heb 9.20; Mt 20.28; Mk 1.4; Hoy 24.6-8. awari Keiyei hee; Keiyei hee arou Dunpuei ranni kantomkur, thimi namyeryei borhya marthingpina'nungei fleithutkur Keiyei hee. 29Arou Keine nanungei tanghakne yunlei, Keine nale kalhonne Pawaei Krungbomra darkha yui ranya mongmalna'bongyenri, anaksi darkha yuiri hanui kallengne mongmakarou.” 30Heirouri yane Dunpuya mathangna laa khat shabine, yane Olive lhungdoura kakakur.

Peter'ne Yapimakrou Younei Ngamrou Jesu'ne Lamkrine Yunthutkur

(Mk 14.27-31; Lk 22.31-34; Jn 13.36-38)

31 # Zec 13.7; Jn 16.32. Heirouri Jesu'ne yanung kyun, “Angtu masahaknung na namyerwani Keiya lakurkhoubi trukkurchirou. Khyingei Lailikni asitoubi yunkhoulei, ‘Dunpune yaosil puya hatdurheirou, heirou yaorul heiyei yao rapne chekkurheirou.’ 32#Mt 28.7,10,16. Heiya Keine ringthutkur hillouri, nai maibongra lamkrine louchaheirou.” 33Heirou Peter'ne kanthoubi, Jesu'nung kyun, “Thimi dei namyerwani trukkurbikhi, keiri tekkhi trukkhoumakrou!” 34Heirou Jesu'ne Peter'nung loukyun, “Keine neinungei tanghakne yunpilei, touri, angtu masahakrou waapani katkhungbongnung nangne Keiya khyumbuirek ‘mumakme’ toubi yunbine Keiya yamakrou.” 35Heirouri Peter'ne loumallangkur, “Keiri Nangle himalnabikhi, Neiyatomri tekkhi lakkhoumakrou!” Heirouri ruishikrap namyernikhi heinakrimne yunkhou.

Jesu'ne Gethsemane Yekulla Shunchakur

(Mk 14.32-42; Lk 22.39-46)

36Heirouri Jesu'ne Aiyei ruishik raple pulne Gethsemane toubi ung yekul bi khatra wakur, heirou Ane yanung tlou shunkhou, “Keine bi khatrou shuncharou wayeinung nane bi arou ombi louleiniya.” 37Heitoubi Ane Peter'le Zebedee'yei chawarap napung-khniya ruilouheibi wakur. Heirouri Aiyei ukningra lhawai klah'le ukning plangkurle Anungei thimmura, 38#Jn 12.27; Heb 5.7-8. heirou Ane ya'khyumnung tlou shunkhou, “Keiyei ukningra lhawai lahkurni Keiyei malungri chaalkurnakura. Heini nane bi arou leibine Keile klah dourumpilak.” 39#Jn 18.11; Mt 20.22. Heirou Ane beicha pochutbine, thleira Aiyei mai sikhuplhakbine, Ane shunchakur, “Keiyei Pawa, Neiyei kning hoiyanungri Keiyei klahyei daarkok awari bei louwurpilaklo! Heisiya hoiyanungkhi Keiyei kning nimakne Neiyei kningya hoilaksu.” 40Heirou Ane yenkallengeinung, Aiyei ruishikrap napung khyum heiri iplhakbine loukleiya Ane hungmukur, heirou Ane Peter'nung shunkur, “Nakhyumri Keile kalhonne kheen beichakhi klah douchangmakurya kousiyabiyo? 41#Mt 6.13; Lk 11.4. Nane malhimnara damakna'nungei shunchabine kanthramlak. Naiyei lhawaineri beimakne kanthramnilei heiya naiyei sharungneri manemaklei.” 42#Jn 4.34; 5.30; 6.38. Jesu'ne hanuikhi pochutdurthubi shunchathu, “Keiyei Pawa, klahyei daarkok awaya Keine mongbongyen louthutmakrou hoiyanungri, Neiyei kningni heisi hoilakasu.” 43Ane hanuikhi yenkallengeinung, Aiyei ruishik rapne ipbi louklei chanphawurthu, heirouri yaiyei mitlung rapri tekchakhi miengchangmakura. 44Jesu'ne hanuikhi yaya lakurkhoubi, chutdurbine khyumbui tlungni hallei'nakne shunchathu. 45#Mt 26.18; Jn 12.23; 13.1; 17.1. Heitoubi Ane yenkallengbi Aiyei ruishik rapnung hungshun, “Nari asilumpha ipleihuiko? Thilak! Thimiyei Chanapawaya manbine Bomtang thimi rapbei hutra pilhakurnanungei kheenri hungtlungura. 46Kanthoulaka, kani shallakase. Thilak, Keiya yorchakur thimiri bi arou wa'tlungura!”

Jesu'ya Kman

(Mk 14.43-50; Lk 22.47-53; Jn 18.3-12)

47Ruishik chiple-khni hangrei Judas'ne bi heirou wa'tlungeinung, Jesuri tlou yunbi louklei. Heirou ale kalhonne thimi chungwane shonle-cheile shinbine, Suipipu upa raple yama upa rapne yaya heiyilthutkur. 48Miya kyor napawane thimichung rapnung shunmatukur, “Nai mankni thimiri keine maibungra mchuprou kyou napawa heiwariso. Heirouri nane Aya manlaka!” 49Heirou Judas'ne wachangurbi Jesu'nung wakyun, “Rabbi#26.49: “Aramaic rapbei minthul, ‘Upawa’ nimanung ‘Pu’ touya kyun. Minthul ari Jesu'nung tom ung.”, Neinungei kying hoiniyasu,” heirouri Aya maibungra wamachupkur. 50#Mt 20.13; 22.12. Jesu'ne loukyun, “Neiyei toukni heiwaya khrangne toulaka, keipalui!” Heirouri ya nammane wachangbi Jesu'ya churmankur, heitoubi phonkur. 51Heirouri thilak, Jesule pulne kalhonbi louklei thimi napung khatne, aiyei hut tlangthutbine aiyei shonkhumrei shonya phuithutbine, heitoubi Suipipu upaei shok khatya khnabil pangkhat shatsundakur. 52#Kan 9.6; 13.10. Heisi tounarouri Jesu'ne aya shunkur, “Neiyei shon heiwari shonkhumra ronlhakurlak; ngamri shonshin thimi rapri shon'ne hirou. 53Naiyei kningri, Keine Keiyei Pawanung shunchabi, Keiya trungpina'nungei Thangring raalluirap chiple-khni hilshunda manemakrou touneiko? 54Heiya lhou heiwari heinakne toulanungri, Khyingei Lailikni anakrim hungthukroume toubi yunthutkhou heiwari kousitoubi hungchimheirou?” 55#Lk 19.47; Jn 18.19-21. Heirouri Jesu'ne thimichung rapnung kyun, “Nane Chaylamya karhaei toukur mucha thimi khatya manrou kyounakne, Keiyakhi shonle-cheile shinbine manrou wathukkurrako? Keine tlainiser nale pulne omkanthrinbi Pukhrumna Cheemra naya marnopiyeinung naneri Keiya heikalnungri mannithumaklei. 56Heiya lhoubomrap namyerwa ari Thimkhui rapne Khyingei lailikra myethutkur heirapya chimne tlungyernanungei toukura.” Heirouri ruishikrap namyerwani Aya lakurkhoubi trukkurchi.

Jesu'ya Yama kul upa Rapbei Maibongra Unglhak

(Mk 14.53-65; Lk 22.54-55,63-71; Jn 18.13-14,19-24)

57Jesu'ya manlouheibi Suipipu upa Caiaphas'yei cheemra, Chaylamei upa raple heirou Yama kullei upa rapne kartilbi leina maibongra Jesu'ya yenruilhakur. 58Heirouri Peter'ne tlatnarei waiyoubi yenchanthungbine, Suipipu upawaei cheem yuntlangmaira wa'tlungkur. Heirou ani mangkhalla wachangbine, raallui rapbei pongra ombine kousitoubi thukrou youleiyo toubine karngeibi heithikur. 59Suipipu uparap, heirou bi heirou klei Yama kul upa rapne Jesuei doura klallei tlou rapya darphabine Aya hatdurnanungei kalthi wairangkur. 60Heiya thimirap chungwane wathukbi Aidoura klallei tlou rapya theibaangbinekhi, yane Jesu'ya klal dayerchangmakur. Hiltorouri napawa napung-khnine kanthoubi, 61#Mt 16.28; Dan 7.13; Laa 110.1. yakhuntane asitoubi kyun, “Napawa heini asitoubi yunkhou: Dunpuei Cheem heiwaya Keine thresundawurbikhi khyumnirou shabangkur manirou!”

62Heitounei Suipipu upa heiwane kanthoubi Jesu'nung tlou kngai, “Neidoura theibaangbi yunkur tlourap heiri Nangne koukhatkhi mallangnungei makurako?” 63#Mt 27.11; Jn 18.33. Heiya Jesu'ne koukhatkhi loumallangmak. Heirou hanuikhi Suipipu upani Anung shun, “Khring Dunpuei min tlangbine keine neinung tlou kantomle kalhonne ngailei. Nangri Dunpuei Chanapawa, Messiah nimakeiko?” 64#Mt 16.28; Dan 7.13; Laa 110.1. Heirou Jesu'ne loumallangkur, “Neiyei katyunthutkur heiwariya. Heiya Keine na nammanung chimya yunlei. Kheen arouwei waiyoubi Thimiyei Chanapawane Mantrang klei Dunpuei thya lhangra ombine klei heiya nane muphaeirou, heirouri Ane Thangmunrei ramei tungbine kyong loumueirou!” 65#Msh 14.6; Pao 14.14; Lev 24.16. Heisi tounarouri Suipipu upani aiyei linglik threlwurbine kyun, “Nangri Dunpuya lhou hoimakei tlouya yunleintu! Arouri kani aidoura kou tloukhatkhi ngaiduinung makkura! Ane lhou hoimakei tlou yunkur heiwari na namyernikhi mayekurla! 66Asinungri nane kousitoubi ningchalei?” 67Heirouri yane aiyei mairungra matil mthukphangbine, Aya huttumni umkur heirou hutmainikhi phitkur, heitoubi thimi rapne kngai, 68“Messiah! Neiya hei'umkur thimiri huwo, kanungei louyunthi!”

Peter'ne Jesu'ya Yapimakur

(Mk 14.66-72; Lk 22.56-62; Jn 18.15-18,25-27)

69Peter'ne yuntlangmaira ombine heileiyeinung, Suipipu upaei shok-napuiya khatpini wathukbine anung wakyun, “Nangkhi Galilee'ra Jesule kalhonne leikhouso.” 70Heiya Peter'ne thimi namyerwaei maibongra Jesu'ya khingthutni loumallangkur, “Keiri neikyun napawa heiyei ngamrou koukhatkhi mumak,” 71heitoubi ani yuntlangmai shumtrumra wathukkur. Heirou dei shok-napuiya khatpinikhi aya munarou thimi rapnung kyun, “Napawa heikhi Nazarethdei Jesule pulne leikhou thimiso!” 72Peter'ne heiroukhi hanui tlou kantombi loukyun, “Tanghakpani keiri napawa heiyari mumak!” 73Heihillou lepcha leibi bi'heirou mayungbi klei napawa rapnekhi kyun, “Tanghakpani nangkhi Jesuei hilchanthung thimi khatso. Heiya neikyun heini neitamya khingthutknaso!” 74Heirouri Peter'ne loumallangkur, “Keine tlou kantombi yunlei, keikyun awane chimmakya hoiyanungri Dunpune mupilaksu, tanghakne keiri napawa heiyari mumak!” Heisi tounarouri tallengne waapani katkhungkur, 75#Mt 26.34. heirouri Peter'ne Jesuei anungei yunthutpikur heiwaya louningthutkur, touri, “Waapani katkhungbongnung, nangne Keiya ‘mumakme’ toubine khyumbuirek yunbine Keiya yapimakrou.” Heirouri ani yuntlangmaira wathukkurbi ukningra kalthi klah'ne chapkur.

Currently Selected:

MATTHEW 26: MARIBSI

Highlight

Copy