LUKAQ 9

Akiimwetiim Roqshi Ri Wenai Trahokai Tiikito

(Mot 10.5-15; Mak 6.7-13)

1Jesuq raq akiimwetiim roqshi ri wenai ka adam na heato. Raüta, tsangshiq ma ningkun nai arang kuqto. Kra ningkun kuqtaq kriika, tsangshiq raq shotsai winji kra jobaiq raüta, atsi asiti thun kra tiiheake miitu kuqto. 2Raütiishe, apaiq raq tsangshiq ka, Shiikeawe Mungtan bom tra hokekai thaüto. Kiimaq atsi asititi thun kra tiiheake kai miitu tiikito. 3Tsangshiq ka wanhiq na tiikaiho ma, akha tsii chongkuqto, “Wanhiq khum lam chrit chiikha kiimin naqho rongkiq. Nyeakii kiimin naq thiho rongkiq. Thongkhiiq kiimin naq wiho rongkiq. Kampho ka rongho ra mak. Samtong jong achan kiimin lamho ra mak. 4Ju ta jam no namshiq ka tao tlaq, chela ahin na miwa wan han shaq wiiwii, kra jam kiijiili jap rong laq. 5Ümra chelati riiwa, namshiq ka tao mak, kra chelati miika, namshiq hokphi wa botkhulai kra anaü riibaiq thü lanta wawan ronglaq. Kriika tsangshiq ma honlam bomchong kethü she miraq.”

6Krai mren, ajaqshisetiim ka kihoto. Raüta maiqhiq shong thun ümchuwa sitaq kiijaq tiikham raüta kito. Raüta, Tsütsa Ahea kra chongkuq wan wan, trahokuq wanto. Kiimaq maiq atsi asiti thun ka barap wa tiihea kuqto.

Herod Ka Amao Riito

(Mot 14.1-12; Mak 6.14-29)

7Gelili wanghupti we Herod raq arthun awang chang jaqsham wantaq tsütsa ara taito. Kra tai raüta, apaiq ka kai amao riito. Apaiq ka jamkhano maota ngukla, maiq wiijamti ngiika Khamlamketiwe Johan ka ama wa dong wanto nguta riichongto. 8Kiimaq maiq wiijamti raq hali ka, Elija ka saükito nguta riichongtlo. Kiimaq maiq wiijamti raq hali ka, man na pat wa, shammibi phong wa weshi kra powato nguta riichongtlo. 9Kra tai raüta, Herod raq, “Riita, ngi riili, Johan khupo ka tiichum baiq kang. Riita, arthun tsaki rat tlaq arka, ju wiita? Apaiq ka juwa?” nguta nanok ma waito. Kiimaq apaiq raq Jesuq rai sham ka riichhi lap hajaq nguta, tsinngin shatmaq sito.

Maiq Hingbiingi Ma Tiiphaqsiqto

(Mot 14.13-21; Mak 6.30-44; Joh 6.1-14)

10Kiimwebi thun ka trahokai rii maq jang wan raütiishe, Jesuq ma tsangshiq raq ümtinkhan wa jaqsham wantaq, kra tsütsa ka tiitai kuqto. Apaiq raq tsangshiq ka, apaiq rai shea raüta, Bethsaida chela niishe kihoto. 11Nokmaiqse phong raq, apaiq ka saü wato nguta tai raüta, tsangshiq raq apaiq jai ka phan wanto. Apaiq raq tsangshiq ka aheawiq maq taoto. Raüta, tsangshiq ma Shiikeawe Mungtan tsütsa kra chongkuqto. Kiimaq atsiti thun kra tiihea kuqto.

12Rashe nyap wan kra chhi raüta, ajaqshisetiim roqshi ri wenai ka apaiq phana kito. Raüta, “Mungmaiqse phong kriika atiiwa she riilaq. Tsangshiq ka ara binjü na maiqhiq shong thun sitlaq nai ara binjü tro na, wakjam ram asi kiina wa raüta, tü adung she mirit phaqsiq wanlaq. Kiimaq tsangshiq jap chang kra mirit wan laq. Ara nashiq tiiborai tiikai ba arka, rum-nyangkhi ba,” nguta apaiq ma chongto.

13Kiijiishe, Jesuq raq tsangshiq ma, “Namshiq riiriiwe khoti, tsangshiq ma phanshi ra tiiphaqsiq rongliina,” nguta nguto.

Kiijiishe, tsangshiq raq, “Riita, nashiq jaq niika winsii phubiingi, kiimaq ngiq shin phuse nai anai laqlaqseli. Ümniiriika, naishiq raq maiq achu kong ara miitu phaq asea rikekai chang ngutiisha tiima tlaü?” nguta treto. 14(Kiijaq maiq phong ka maiqwere lamlamli dongdii hingbiingi tin riito.)

Kiijiishe, Jesuq raq ajaqshisetiim ka thaüto, “Mungmaiqse phong kriika, kongshi na roqbiingi ngi maq tiinga ronglaq.”

15Krai mren she, ajaqshisetiim raq mungmaiqse phong kra alen alen niishe tiingato. Kra tiinga lot jai she, 16Jesuq raq winsii phubiingi nai ngiq shin phuse nai anai kriika, ajaq na shamto. Raüta, ra nü na liito. Kiimaq kra miitu, Shiikeawe ma kechu tumto. Raüta, winsii phu thun ka tiiphanto. Kiimaq aphan ka ajaqshisetiim miishe nokwe ma tiiphea kuqto. 17Krai mren, tsangshiq tarü raq, wok phetak chaq phaqsiqto. Kiimaq ajaqshisetiim raq, phaqsea bung atiichong kriika riichom kiita, tamlii roqshi ri anai mali riito.

Petar Raq Jesuq Ka Khristo Nguta Phoqto

(Mot 16.13-19; Mak 8.27-29)

18Ranaiqshi Jesuq ka achu jaürea riito. Kiijaq ajaqshisetiim ka apaiq phana wato. Kiijiishe, “Mungmaiqse raq ngi ka ju nguto ngu tla?” nguta apaiq raq tsangshiq ma waito.

19Tsangshiq raq treto, “Maiq wiijamti raq, ümniika Khamlamketiwe Johan,” nguta ngutlo. Kiimaq, “Wiijamti raq hali ka, ümniika Elija nguta ngutlo. Kiimaq wiijamti ngiijaq, ümniika man na rathup rapha pat wa, shammibi phong kiiwa weshi powato nguta ngutlo.”

20Kiijiishe, “Riita, namshiq riiha?” nguta tsangshiq ma waito. “Namshiq raq ngi ka ju nguto ngutlan?” nguta Jesuq raq tsangshiq ma waito.

Kiijiishe, Petar raq, “Ümniika Shiikeawe raq atiiki Khristo,” nguta treto.

Apaiq Chamchao Nai Apaiq Tsailam Chongto

(Mot 16.20-28; Mak 8.30—9.1)

21Kiijiishe, Jesuq raq tsangshiq ma, kra bomtsi ka maiq ahinti jumiimin tiitai ra mak nguta, tsangshiq ma aming atsin miishe chongkuqto. 22Kiimaq, apaiq raq tsangshiq ma akhri chongkuqto, “Maiq Se ka pinthum chamchao chang dongdii. Kiimaq welabi raq nai ramwe jongbi raq, kiimaq Thungtri shrinketibi raq shleq baiq chang dongdii. Apaiq ka atsea mirbaiq. Shatmaq, apaiq ka ranaiqtsam ngo jai maq, atra hali mitiidong wan nong.”

23Kiimaq apaiq raq tsangshiq tarü ma chongkuqto, “Ashi ra raq ngi rai wadam lungwii tlaq jiila, apaiq raq maiqmii khum ka alaq riibaiq ra tlo. Raüta, maiqmii pumsongkham kra ranaiqtek piwan shat maq wawan ra tlo. Raüta, I jai phan phan wa chang. 24Ara jamkhano chongtiikang ngukla, jurwa maiqmii rilung ka tiichhii wanla nguta tiima tlaq, kriiti raq, arilung ka atiimo mirbaiq. Shatmaq, jurwa arilung ka ngi miitu tiimo baiq tlaq, kriiti rilung ka atiichhii mirkuq wan. 25Riita, maiq ashi ra raq, mangjong tlotli ka milap ngu i na. Shatmaq, arilung ka mitiimo baiq, lo tiichhii wan lot mak miraq ngu i na. Kra ngu haü jiika, apaiq ma jamlai liip wa midong? Jamliip min ahü! 26Juwa ngi ma kiimaq ara i bomtsi shrinkuq tiikang arma, ajiasi riitlaq jiika, kriiti miika, Maiq Se kiimin apaiq, khushü ngao kiimaq Awe khushü ngao chhainyii liliim, kiimaq asii rasetiim khushü ngao kra ho raüta saüho tlaq akhing ranaiq na, kriiti ma ajiasi mirwan. 27Ngi raq chongtiikang arka tengteng. Maiq wiijamti ümchaü arjaq asi. Tsangshiq ka Shiikeawe Mungtan kra chhithü hü wiiwii, tsai mak miraq.”

Jesuq Khumklai

(Mot 17.1-8; Mak 9.2-8)

28Arthun ara chongke wan jai maq chepat shitin jai miishe, Jesuq raq apaiq rai Petar, Johan kiimaq Jakob kra shea raüta, hiqlam ashi na achu jaü wa wawanto. 29Apaiq ka achü jaürea liipan niili, atheaphi kriika klaisaq klai kito. Adü na asam khea kriika chhaihea langlang, maklüp jaqlüp she chhairaito. 30Kra maklii liipan niili, dongchhaq maiq ka wenai jongri she saükito. Tsangnai ka Jesuq rai bom riichong rea riito. Kra maiqwe nai kriika Mosheq nai Elija. 31Tsangnai sham ka ramungtan wa rilung chhainyii sham. Tsangnai ka Jesuq rai, apaiq raq jaqlo miili she, Jerusalem na tsai raüta, Shiikeawe kiimung jaqsham shiiku piwan chang kra miitu bom riichong. 32Petar nai akongtitiim ka akon makaiq riilaq kito. Shatmaq, tsangshiq ka akon maq samki raüta liito. Raüta, kiijaq Jesuq sham chhainyii rai tlaq, kiimaq apaiq rai chap dam tlaq maiq wenai sham chhainyii rai tlaq kra chhito. 33Kra maiq wenai ka Jesuq pha wa awa wan, atiido wan she kiijaq, Petar raq apaiq ma chongto, “Tatiwe, nashiq ümchaü arjaq chakai arka pinthum kopan jonghea! Naishiq raq tiipsetiim atsam mihaikai. Ashi ka ümniirii, ashi ka Mosheq rii, kiimaq ashi ka Elija rii.” (Apaiq raq arka jamlai ngo wa bom tlaq kriimin, hemak lam miili bomto.)

34Apaiq ka abom miiqshmiiq liipan kiijii niili, phumda ashi satkisaq raüta, tsangshiq tarü ka pangsaq pang wanto. Phumda raq tsangshiq ka phongho kiita, ajaqshisetiim ka akiinyii rai riito. 35Kiijiishe, phumda mong wa maiq bom ashi raq akha chongto, “Arka I Se. Ngi raq apaiq ka tingsang atsea arwan ha. Namshiq raq apaiq bom ka tai ronglaq!”

36Maiq bom kra tsaqkai ri liikiita, kiijiika Jesuq laqlaqseli she riito. Ajaqshisetiim raq ara tsangshiq raq jamlai wa chhi taitaq thun tsütsa arka, kra liipan bala nanok ahinti ma chong mak, kaiqshakli thüto.

Abi Winji Raq Arom Wan No Ashi Tiiheato

(Mot 17.14-18; Mak 9.14-27)

37Kriimaq napjai ranaiq angu niishe, Jesuq nai ajaqshisetiim wetsam ka hiqlam maq sathoto. Kiimaq tsangshiq saükai ri, maiqkong jonghea ashi ka Jesuq phana wato. 38Kra maiqphong mong kiiwa, maiq weshi raq akha siito, “Shrinketiwe le! Ngi ümniima tiipaiqnea tiikang, i se seshi laqlaqse ara mangchanlaq. 39Tha raq no ka tiidong chhaq chhaq miili jok wantlo. Raüta, tiimok miichaq tiihaü baiqtlo. Anü maq atho shiiwum dong wala, tha raq apaiq ka kai tiichamchao tlo. Athaq min thaq mak phan maq tiichamchao tlo! 40Ngi raq ümjaqshi- setiim ma, tha ka jokuq ronglaq nguta tiipaiqnea wan kang. Shatmaq, tsangshiq riimin jokuqlot mak dea!”

41Kiijiishe, Jesuq raq treto, “O kamasham ahünok le. Maiqjiq angi nola nok le. Akhiiwiqwiq! Ngi ka namshiq rai ümtinkhan na saüli wa misi wan ha? Lata namshiq homa kra miho wan ha?” Kra ngu raütiishe, apaiq raq awe ka, “Ümse ka ana i phana shea wan laq,” nguta heato.

42No ka Jesuq pha nü na awarai liipan kiijii niili, abi winji raq apaiq ka tiimalaq hiq na liiq baiqto. Jesuq raq tha ka jobaiqto. Raüta, no thatsi kra tiihea kuqto. Raütiishe, awe jaq na kiinong kuqto. 43Mungmaiqse wiita raq, kra Shiikeawe ningkun jonghea jaqsham kra chhi raüta, pinthum awang riito.

Apaiq Tsailam Thongshi Ri Chongnongto

(Mot 17.22-23; Mak 9.30-32)

Mungmaiqse phong kriika, Jesuq raq phanrap phanrii amao chang jaqsham tlaq kra thun ka chhi raüta, awang athang rai liipan bala niili, Jesuq raq ajaqshisetiim ma, 44“Ara ümchaü ngi raq namshiq ma jamlai bom wa chongkuq tiikang arka, namshiq raq tsan na tiitsang dada lanta, shaq ronglaq! Maiq Se ka ümchaü maiqjaq khon mong niishe mikuq baiq,” nguta chongkuqto. 45Shatmaq, ajaqshisetiim raq kra chongkuqtlaq bomtsi liichum ka sapmak dea. Kra liichum ka apaü raüta athü. Kriikha maq, tsangshiq raq taklot mak dea riito. Kiimaq tsangshiq raq Jesuq ma tiitsang wainong kiimin khu mak, ahai riito.

Juwa Ajong Pinthum?

(Mot 18.1-5; Mak 9.33-37)

46Ajaqshisetiim liipan na, juwa ajong pinthum nya nguta bom riiwai raüta, tsangshiq ka arkhii riito. 47Tsangshiq tsan mong na jamlai wa tiima tlaq, kriika Jesuq raq asap. Kriikha miishe, apaiq raq nonose ashi ka apaiq tho na tiichapto. 48Raüta tsangshiq ma chongto, “Liirong laq, jurwa ara nonose ara, i mang na tao tlaq, kriika ngi tao tlo. Kiimaq jurwa, ngi tao tlaq, kriika ngi tiikaiti we kra tao taitlo. Ara jamkhano akha chongtiikang ngukla, namtsam phong na, juwa aran pinthum nguta sitlan, kriika wiitarü thaq na ajong pinthum.”

Namshiq Ngeng Makti Ka Namkongti

(Mak 9.38-40)

49Johan raq Jesuq ma chongto, “Shrawe, naishiq raq maiq weshi ümmang na tha jobaiq rea chhi kai. Kiimaq naishiq raq apaiq ka atiiwin riikai. Jamkhano ngukla, apaiq ka nashiq kongti ri riimak.”

50Kiijiishe “Naq tiiwin rongkiq,” nguta Jesuq raq apaiq nai akongtitiim ma chongkuqto. “Ara jamkhano chongtiikang ngukla, jurwa namshiq ngeng mak, kriika namshiq kongti.”

Samarianok Hiqti Raq Jesuq Taomak

51Jesuq ka ramungtan na shea wan ma akhing ka ajeli she riito. Kriikha maq, apaiq raq atsan na khekham maq, Jerusalem chela nü niishe kihoto. 52Krai mren, apaiq raq lamjap hochang kra tiijeho miitu, apaiq ma sinkhu na bom chong hoti maiq tiikito. Kra bom chong hoti kriika Samarianok hiq ashi na tiikiho lito. 53Shatmaq, kra hiqshongti raq Jesuq ka tao mak riito. Kriika tsangshiq raq apaiq ka Jerusalem nü na leahoti nguta asap kha maq, tao mak riito. 54Ajaqshisetiim phong wa, Jakob nai Johan raq ara chhi raüta, “Tatiwe, naishiq raq ramungtan wa watu hea laita, tsangshiq ka tiikhiim chaq baiq phai?” nguta tsangnai raq Jesuq ma waito.

55Kiijiishe, Jesuq raq tsangnai phanü na lii raüta sonto. 56Kra miishe, Jesuq nai ajaqshisetiim tarü ka maiqhiq shong ahin niishe lamjap wawanto.

Jesuq Jaiphan Wan Nguta Danti

(Mot 8.19-22)

57Tsangshiq ka wanhiq na kai lam na akai rai she riito. Kiijaq, maiq weshi raq, Jesuq ma, “Ümniika ümriiba niiwa ki tlaü, kiijaq saüli, ngi min mikhum damha,” nguta chongto.

58Kiijiishe, Jesuq raq abom ka, “Miikakoi miika abum chang asha asi. Kiimaq peshap wushi sitlaq kra miimin, achhü ka asi. Shatmaq, Maiq Se miika, rawa mak tiichuk chang wuchüse ikha dongdii min jam ahü.”

59Kiimahali, apaiq raq maiq weshi ma, “Ümniika i jai phan laq,” nguta chongto.

Shatmaq, kriiwe raq, “Tatiwe, ngi ka kongkhu jam na kipha shaq. Lata, i we ma ka saiqsam kipha,” nguta bom ka treto.

60Kiijiishe, Jesuq raq, “Ama ka wenyi na amati raq milap laq. Ümniika asak rilung lapro tlaü jiila, i jai phan laq. Laüta, Shiikeawe Mungtan tsütsa kra, maiqse angu ma chongkuq laq,” nguta treto.

61Kiimahali, maiq weshi raq, “Tatiwe, ngi raq ümjai miphan kang. Shatmaq, kongkhu na, i jamti rai kiim riiphea bom kra chongkuq ki pha shaq,” nguta apaiq ma chongto.

62Kiijiishe, “Jurwa phu maq wak ka thu pha tlaq, shatmaq, nithe lam maq, jai nü niili liikiki rangra rai tlaq, kiikhiiti ka Shiikeawe mungtan na thiihü,” nguta Jesuq raq apaiq ma nguto.

Currently Selected:

LUKAQ 9: TANGSBSI

Highlight

Copy