LUKAQ 10

Ajaqshisetiim Roqmiishi Ri Wenai Trahokai Tiikito

1Arjai maq hali, Tatiwe raq ajaqshisetiim roqmiishi ri wenai kra tseato. Raüta wenai nai maq, apaiq kai chang chela thun nai maiqhiq shong thun kiina, apaiq ma sinkhu na trahokai tiikito. 2Apaiq raq tsangshiq ma chongto, “Tsamman rü ajut chang wak ka jonghea. Shatmaq, tsamjut miitu maiq ningchangti ka atsapse. Arkha maq, wakchongtiwe jaq wa achu jaü ronglaq, apaiq raq awak wa tsam kra jut miitu, maiq ningchangti ka apapa mitiiki laq. 3Kirong laq! Ngi raq namshiq ka skuse kong aransetiim ka, shekong phong na tiikai ikha tiiki tiikang. 4Kampho lo, thongkhiiq lo, hokpa lo, thun ka jam min naqho rongkiq. Lamkampii maq, maiq rai min mo riibom naq riibom rongkiq. 5Namshiq ka juta jam no dü tlan, kra jamti ma adü wan lam maq, ‘Arjamti ma hansang mirlaq,’ nguta bom rong laq. 6Kra jam ka wandü jam jiila, namshiq ramram ka tsangshiq ma misi laq. Riimak jiila, namshiq ramkok ka ajang li riiwan ronglaq. 7Tsangshiq raq namshiq ma jamlai wa tiiphaqsiq jiiq, kra phaqsiq lanta, maiqmii wanti jam niili si ronglaq. Ara jamkhano chongtiikang ngukla, minshiiqti jaq maq dungja da ka moki mak. Jamshi maq adü jamshi maq asat ka naq riirongkiq. 8Namshiq ka ümtiikiiwa chela ashi na kitlan, kiimaq ümriiti riiwa namshiq ka aheawiq maq tao tlaq, raüta namshiq ma jamlai phan phaq asea wa shonglum kuq tlaq, kra namshiq raq aphaq asea wan nguli rong laq. 9Lanta, kra chela na maiq atsi asiti sitlaq kra tiihea kuq ronglaq. Lanta tsangshiq ma, ‘Shiikeawe Mungtan ka namshiq thoniishe,’ nguta chongkuq ronglaq. 10Shatmaq, namshiq ka ümtiikiiwa chela ashi na kitlan, shatmaq, tsangshiq raq namshiq ka tao mak riitlaq, raüla chiiheawea wea na khum lanta akha sonthü ronglaq, 11‘Liirong laq, naishiq hokphi na akop botkhulai ara dongdii min, jai nü na naübaiq thü tiikai. Arka namshiq ma manson miishe mija wan. Shiikeawe Mungtan ka namshiq thoniishe saükito!’ 12Ngi raq chongtiikang arka tengteng: Shiikeawe raq Phangthum Khapho Ranaiq na, ara chelati thaq na, Sodom chelati ma mangchan ka phanshi apa lin mitiichhi kuq!

Jesuq Ma Kam Mak Chela Thun

(Mot 11.20-24)

13“O Khorajin chelati le! Namshiq ma pinthum phiiptsi chang asi! O Bethsaida chelati le, namshiq ma pinthum phiiptsi chang asi! Ngi raq namshiq makki na, awang chang jaqsham ümtinkhan wa shamkuq kang thun kriika, Tajar chela nai Sidon chela na shamkuq wan kang ngu haü jiika, tsangshiq ka manniiphü, ngarai tiidii wan, makphai khüshang mihoq siq wan wa! 14Shiikeawe raq Phangthum Khapho Ranaiq na, namshiq thaq na Tajar nai Sidon chelati ma mangchan ka apa lin mitiichhi kuq! 15Kiimahali, namshiq Kaparniam chelati le! Riita, namshiq sha ramungtan na dü wanti ngukai! Ngi chongpha. Namshiq ka wamungtan niishe mitiidea baiq!”

16Jesuq raq ajaqshisetiim ma bom ka akha chongkuqto, “Jurwa namshiq bom tai tlaq; kriika i bom tai tlo. Jurwa namshiq tao mak; kriika ngi armin tao mak. Kiimaq jurwa ngi tao mak; kriika ngi tiikaitiwe kriimin tao mak.”

Roqmiishi Ri Wenai Traho Rü Maq Jangto

17Ajaqshisetiim roqmiishi ri wenai trahokai tiikitaq kriika, pinthum chojong chise miishe jang wanto. Raüta, “Tatiwe! naishiq raq ümmang na aming kuqkaita, shotsai winji thun wiita raq, naishiq aming ka taito!” nguta tsangshiq raq apaiq ma chongto.

18Kiijiishe, Jesuq raq tsangshiq bom ka treto, “Ngi raq Thawe ka ramungtan wa rachhai wa ikha adea wan chhikang. 19Taironglaq! Ngi raq namshiq ma arang akekun she. Namshiq raq paüsang nyiqla thun ka hok maq nishishi mirhan. Kiimaq Thawe ningkun wiita mitang han. Namshiq ka jamlai riimin tiishophi lot mak miraq. 20Riita, shotsai winji raq namshiq aming ka taitlo ngutiika, naq chochi rongkiq. Shatmaq, kra thaq na kao raüta, namshiq mang ka ramungtan niishe waiqthüto nguta kra miitu chochi ronglaq.”

Jesuq Chochito

(Mot 11.25-27; 13.16-17)

21Kra akhing na, Jesuq khum na Asii Wenyi ka ama riito. Krai mren, apaiq ka kai chochito. Kiimaq apaiq ka akha achu jaü bomto, “Iwe lei, ra nai hiq Rümtiwe lei! Ngi raq ümniima pinthum kechutum tiikang. Ümniiraq phaqchi maiqse nai asap atsinti maiqse miika, arthun arka apaü riiwan tlaü. Shatmaq, jam min saptsin makti ma, ümniiraq arthun ara tiichhi kuq tlaü. Ngohea dea, i we lei, ümniiraq tiima tlaü kra phan phan she dea hongtha wanto. 22“I We raq ngi ma phanrap ake kun she. Awe tlea raüta, Ase ka juwa, kriika maiq ahinti jurmin sapmak. Kiimaq Ase ka lea raüta nai Ase raq tsea raüta ümriitimo tiichhikuq tlaq, kriiti lea raüta, Awe ka juwa kriika maiq ahinti jurmin sapmak.” 23Kra bomlot jai she, Jesuq ka ajaqshisetiim rai tsangshiq honhon na, ajaqshisetiim ma akha chongkuqto, “Namshiq ka pinthum wiikiim! Namshiq kiimsi kha maq, arthun ara chhi tai tlan! 24Ngi chongpha, shammibi pahea raq nai hokhambi pahea raq, ümchaü namshiq raq jamlai wa chhi tlan ara kai chhi wanro. Shatmaq, chhi wan lot mak dea. Kiimaq ümchaü namshiq raq jamlai wa tai tlan, kra tai wanro. Shatmaq, tsangshiq raq tai wan lap mak dea.”

Samariawe Shiiton

25Kiimahali, Thungtri shrinketiwe ashi raq, Jesuq ka tiishut ma nguta, “Shrinketiwe, ngi raq pattup pat-sa tsitsü lap miitu ka, jamlai phan jaqsham chang wa miraq?” nguta waito.

26Kiijiishe, Jesuq raq treto, “Asii bomtsi na jamlai wa chongtla? Kra ümniiraq jamkho tak tlaü?”

27Kiijiishe, “‘Tati Shiikeawe ka ümtsan ümmong wiita maq, ümtsaiji wiita maq, ümningkun wiita maq, kiimaq ümkhu tsai wiita maq lungwii laq.’ Kiimaq ‘Ümniiraq ümkhum ka jamkho lungwii tlaü, kiikhiisii hali ümjam thoti chiiti kiimin lungwii laq,’ ” nguta chongtlo, nguta kriiwe raq Jesuq bom ka treto.

28Jesuq raq treto, “Riikhaqli. Ara chong tlaü ara klolaq. Haü la, pattup pat-sa tsitsü ka milap haü.”

29Shatmaq, Thungtri shrinketi we raq, apaiq ra lap ma bom ka akha waito, “Riita, i jamthoti ka juwa?”

30Kiijiishe, Jesuq raq treto, “Akhing ashi na maiq weshi ka, Jerusalem chela maq, Jeriko chela nü na kaiho, lam na akai rai riito. Apaiq ka lam wa thiimeaq raq thümto. Raüta, akhu akhea thun ka wiita chhut hoto. Kiimaq apaiq ka ninta tsatto. Raüta, ama makaiq tiibum baiqthüto. 31Riita, jamcha ra wa riila, ramwe we ashi kiimin, kra lam maq sii hali akai rai chato. Shatmaq, apaiq raq ashowe ka chhi raüta, shüpsaq konü lamkii nü maq leahoto. 32Kiikhiisii hali Lewi weshi kiimin saühoto. Kriiwe riimin ashowe ka alü riithü raütli, konü lamsiim nü maq shüpsaq leahoto. 33Kiimahali, Samariawe kiimin kra lam maq sii hali wanhiq kai saühoto. Apaiq raq ashowe ka chhito. Krai mren, atsan na kai mangchan tsito. 34Apaiq raq ashowe dü na, jaq maq phiim shiimshiim raüta, tel nai che maq ami atsi thun kra jut jü phum kuqto. Raüta, ajop riikuqto. Raütiishe, ashowe ka apaiq ngaho chang nyamse kaü thaq na tiingahoto. Raüta, wanjap chang jam na sheahoto. Kiijaq ashowe ka shiililiito. 35Kiimaq anap miishe, apaiq raq akhiiq wa kampho kamsii siinai ka lam raüta, wanjaptiip jamchongtiwe ma kuqto. Kra kelam maq, ‘Apaiq ka shiili laq,’ nguta chongto. ‘Kiimaq ngi ümtiikiiwa arlam maq jang wan tiikang, kiitiikaq shetiq, ümniiraq apaiq shiili lii miitu kampho ümchuwa misum haü, kra michat kuq kang,’ ” nguta bom ka chong kuq thü raüta, apaiq ka kihoto.

36Raütiishe, Jesuq raq abom ka akha shatto, “Riita, ikha jiila, thiimeaq raq atiishowe kriima, apaiq jamthoti we ma ja raüta, apaiq khrumketiwe ka ümriiti wa?”

37Kiijiishe, Thungtri shrinketiwe raq, “Apaiq ma khrumke wantiwe kra,” nguta treto.

Kiijiishe, Jesuq raq treto, “Ikhiijiika, ümniimin walaq. Laüta, kiikhiisii shamlaq.”

Jesuq Ka Martha Nai Meriq Jam Na Kito

38Jesuq nai ajaqshisetiim ka tsangshiq wanhiq kai lam maq, hiqshong ashi niishe saühoto. Kiijaq maiq nyungshi, amang ka Martha kra raq tsangshiq jam na Jesuq ka taoto. 39Kra nyung ma ano nyungshi asi riito. Amang ka Meriq. Apaiq ka Jesuq jichong na nga raüta, apaiq bomchong kra taito. 40Martha ka jam mintsa jaqsham niili moraito. Kiimaq, mintsa tiima raüta, atsu atsa riito. Kriikha maq, apaiq ka kiraüta, Jesuq ma akha chongto, “Tatiwe, ümniiraq chhi maü sha, i no raq jam jaqsham wiita ka ngi miili kiinong kuqto? Apaiq ma chongkuq laq, ngi rai jaqsham mikhrum dam laq!”

41Kiijiishe, Tatiwe raq apaiq ma treto, “Martha, Martha, ümniika phanrap phanrii tiima laüta, acha apa kiimaq tsaihü jihü sitlaü. 42Shatmaq, ümniima phanshi dea ra tlo. Meriq riika, riikhaqli phan tsea wanto. Kiimaq arka apaiq jaq wa, jurmin nyeaho lot mak she miraq.”

Currently Selected:

LUKAQ 10: TANGSBSI

Highlight

Copy