LUKAQ 11

Achu Jaü Tsiichong

(Mot 6.9-13; 7.7-11)

1Ranaiq shi Jesuq ka bashi na achu jaü rea riito. Apaiq raq achü jaülot jai she, ajaqshisetiim phong wa ashi raq, “Tatiwe le, Johan raq ajaqshisetiim ma achu jaü shrinkuqtaq kiikha, naishiq miimin shrinkuq laq,” nguta apaiq ma chongto.

2Kiijiishe Jesuq raq tsangshiq ma akha chongkuqto, “Namshiq raq ümtiikiiwa achu jaü tlan akhing na, akha jaü ronglaq:

‘I We lei:

Ümmang asii kli mishreng laq;

Ümmungtan ka misaülaq.

3Naishiq ma ratlaq ranaiqtek dungjada ka kuqlaq.

4Naishiq ngarai thun ka diikuq laq,

Naishiq ma ashut kloti mra kiimin,

naishiq raq diikuqtiikai.

Kiimaq naishiq ma maitai jonghea

naq tiisaüki.’ ”

5Kiimaq, Jesuq raq ajaqshisetiim ma chongto, “Bom shiiton ngu i, namtsam phong wa weshi ra ka, rawa thung na, namkongtiwe jam na mikihan. Lanta, apaiq ma, ‘Phunowe ngi ma winsii thoptsam tiinam kuq laq. 6I kongtiwe ashi wanhiq maq awa saü wato. Apaiq ma tiiphaq sia chang, i jaq na jam min ahü!’ 7Riita, bom shiiton, kra tai raüta, ümkongtiwe raq, atap mong maq akha mitre ngu i na, ‘Ngi naqpaq laq kiq! Rongkhü kilü thun min wiita ashaq wishe. Kiimaq ngi min, i setiim rai chang na akon wa wishe. Ngi ka tiido lot mang she.’ 8Tengtlo kriika. Shatmaq, ümniika apaiq kongtiwe kha maq, akon maq tiidoki raüta, winsii kuqro makli jiimin, ümniiraq jeasi maü maq, jaüruq jaüruq jaürat tlaü kriikha miishe, apaiq ka akon wa tiidoki raüta, ümniima jamlai phan wa ra tlaq, kriithun ka wiita milam kuq.

9“Riita, ara namshiq ma chongtiikai arai mren, jaü ronglaq; milap han. Rit ronglaq; mihum han. Kilü na buk ronglaq; namshiq ma kilü ka midi kuq. 10Ara jamkhano chongtiikang ngukla, jurwa jaütlaq, kra raq milap. Kiimaq jurwa rit tlaq; kriiti raq mihum. Kiimaq kilü na jurwa buk tlaq; kriiti ma kilü ka midi kuq. 11Namshiq phong wa awere raq, namse raq ngiq jaü raü jaq, paüse ka mikuq han sha? 12Lo, namse raq wutai jaü raü jaq, phangkaü ka mikuq han sha? 13Namshiq ka maiqbi ngikhi kong. Kra taü maq santla, namshiq raq namsetiim ma, ahea awa phan kene chang ka asap han. Ikhiijiika, ramungtan na siti Awejong jaq wa jaü tlaqti miika, Asii Wenyi ka ümtinkhan showo she wa kuq wan jiiq riila!”

Jesuq Ka Beljebul Kongti Nguta Shrato

(Mot 12.22-30; Mak 3.20-27)

14Maiq weshi ka nütang tha raq rom wanto. Jesuq ka kriiwe khum wa tha ka jobaiq rea riito. Tha ka jobaiq kiita, maiqwe ka abom asa wa liishe heakito. Kra chhi raüta mungmaiqse ka kai wangto. 15Shatmaq, maiq wiijamti raq, “Arka tha ningpongwe Beljebul raq, apaiq ma ningkun kuq raüta jobaiqtlo,” nguta apaiq ma bomnam bomto.

16Kiimaq, maiq ahinti raq hali ka, Jesuq ka tsangshiq thiikho na tiithap haijaq nguta tiima raüta, apaiq ka Shiikeawe riidea atiiki jiila, apaiq raq awang chang jaqsham ka sham raüta nokwe ma tiichhike ra nguta tairaito. 17Shatmiitiq, Jesuq riika tsangshiq tsan mong na jamlai wa tiima tlaq kra akhon kun she. Kriikha maq, apaiq raq tsangshiq ma akha chongkuqto, “Ümriimungti wa maiqmii wela jawan rang raüta, riikungta tlaq, kra mung ka athen mirki. Kiimaq, juta jam niiwa, tatso wiinyi wali sitlaq, kriita jamkun ka athen mirki. 18Riita, ara chong tiikang arai mren, Thawe hokhambi liipan na, maiqmii mungtan miitu riichhin, tatso wiinyi siwan raü jiika, Thawe mungtan ka jamkho mijong? Ngi raq tha jobaiq tiikang arka, Thawe hokham Beljebul ningkun maq jobaiq tiikang nguta, namshiq raq ngi ma bomnam nyan tlan. 19Riita, ngi raq akha jobaiq tiikang jiika, namshiq sengibi thun riika, jamlai ningkun miishe wa jobaiq tla? Namshiq sengibi riili, namshiq ka ajiq dea bom tlan nguta tiichhikuq tlo! 20Riimak! Tha kong ka ngi raq Shiikeawe ningkun maq jobaiq tiikang. Kiimaq ara tha jobaiq tiikang jaqsham arka, Shiikeawe Mungtan ka namshiq tho niishe saükito nguta namshiq ma tiichhi kuqtlo.

21“Maiq kuila jong weshi raq, ako, aliq, aliiq thun kra wishat maq, apaiq jamkun kra khe wan shat raüka, apaiq tachong wiira hupsam thun kriika, tiiwong shat miraq. 22Shatmaq, apaiq thaq na kuila ajong weshi kriishe misaü. Raüta kongkhu wiiwe kra mikhat. Raüta, mitang. Rekhat tang jai she, apaiq raq sepat lope tsiiq ümchuwa lap wantaq, kra thun kriika, arphea she mirwan.

23“Juwa ngi rai pong mak, kriiti ka ngi ngengti. Juwa ngi rai skukong ka riichom dam mak, kriiti riika, atiipin li riibaiq tlo.”

Tha Ka Jai Na Jangwa Nongtlo

(Mot 12.43-45)

24“Ümtiikiiwa abi winji ka maiqkhum wa jobaiq tlaq, kra raüla, kra winji ka, rumnyangkhi na khu akham min ahü, shinram shinriiq binjü na, asi anga chang ritkai kiho tlo. Shatmaq, kiijaq apaiq raq asi chang hum mak she raüla, ‘Ai, ngi arka, man niiwa ngi sichang jamchü i jiili jang wan nong lata misi wa,’ nguta apaiq nai apaiq ka mitiingo. 25Krai mren, apaiq ka sichang chü jam kiina mijang wan nong. Raüta, kra jam ka siirairai hea, rong awii min chhii rea je she michhi wa. 26Kiijiishe, apaiq ka kiho nong raüta, apaiq nam ma abi winji miishi kra sheaki raütiishe, kriiwe khum niishe misi wan. Kra jai niishe ka, kriiwe rilung ka kongkhuji na kra nam miimin, naolaq, tiibitaq diikiq tiidearok, achong chang ahü she miraq.”

Riikhaqli Chochi

27Jesuq raq ara bom chongke kra tai raüta, nokwe phong mong na chapti, jechaknyung ashi raq Jesuq ma, “Ümnaq boqpum wanti ümnyung miika pinthum kopan jonghea!” nguta bomdamto.

28Kiijiishe, Jesuq raq, “Kra nam miika, jurwa Shiikeawe bomtsi ka tai raüta lang tlaq, kriiti ma kopan jonghea miraq!” nguta apaiq bom ka treto.

Awang Chang Jaqsham Ra Nguta Shiichutto

(Mot 12.38-42)

29Nokmaiqse ka apaiq tro na riitsap riikhat riitam rai wanto. Kra akhing na, Jesuq raq nguto, “Ümchaü pat wa maiq arka abi pinthum! Tsangshiq raq awang chang jaqsham ka tiichhi kewan ra nguta shiichuttlo. Shatmaq, Shammi Jona rilung na awangchang mra pintaq kriili tiina mitiichhi kuq. 30Shammi Jona rilung jaqsham ka Ninewi mungti ma, Shiikeawe miithii shongke hakhi ashi. Kiikhiisii hali, Maiq Se kriimin, ümchaü pat wa mung maiqse arma, Shiikeawe raq miithii ashong ashi. 31Phangthum Khapho Ranaiq na, Sheba mung wa Hokham nyung kra chap raüta, ümchaü pat wa mungmaiqse ara mishra wan. Ara jamkhano ngukla, apaiq ka ratsüko tsangmung maq wa raüta, Solomon taksma bomchong kra taiwa wato. Shatmaq, ümchaü ngi chongpha, ümchaü arjaq sitlaq arka, Solomon thaq niimin ajong we. 32Phangthum Khapho Ranaiq na Ninewi mungti ka chap raüta, namshiq ka mishra wan. Ara jamkhano chongtiikang ngukla, tsangshiq ka Jona raq trahokuq wan kiita, kra tai raüta, tsangshiq mra thun kra tiidii wanto. Shatmaq, ümchaü ngi raq namshiq ma chongtiikang arka tengteng. Ümchaü namshiq makki na sitlaq we kriika Jona thaq niimin ajong!”

Maiqkhum Miitu Rawü Li

(Mot 5.15; 6.22-23)

33“Jurmin lem ka tiinyai raüta, paü mak. Lo, lemtem ka taükok maq hong mak. Kra rii na, lemtem ka lem tochang na mito. Krai mren, maiq jam mong na wati ma, walüli asi miraq. 34Nam makpo kriika namkhum na lemtem ikha. Nam makpo ahea ngu raü ka, namkhum na walü li asi miraq. Shatmaq, nam makpo ka abi she riiki raüla, namkhum na ranyaq tangtang she mirki. 35Ara chong tiikang arkha maq, namkhum wa walüli sitlaq kriika, ranyaq ma naq tiija rongkiq. 36Riita, ara chongtiikai akha, ümkhum ka wiipumtam na, walü li ka liliim tlaq jiika, ashok ano thun niimin ranyaq mak miraq. Kra ngu haü jiika, wiipumtam na walüli wa li she miraq. Kriika lemtem ashi ka ümkhum thaq na achhai anyii liliim tlaq ikha miraq.”

Jesuq Raq Thungtri Shrabi Nai Phorisinok Tiishutto

(Mot 23.1-36; Mak 12.38-40)

37Jesuq raq trahoke lot jai she, Phorisiwe raq Jesuq ka dung tiisea ma nguta tsangjam na shea wanto. Krai mren, Jesuq ka apaiq rai wawan damto. Raüta, dungsea ngato. 38Jesuq raq ajaq ka thungtri riikhaqli maq hewan mak miili, dungsea rea kra chhi raüta, Phorisiwe ka ahang rai riito. 39Kriikha miishe, Tatiwe raq apaiq ma akha chongkuqto, “Namshiq Phorisinok riika, namshiq kok alaq nai tak apin thun kriika, akii thun kriika siirai rai hea hetse tlan. Shatmaq, namtsan mong niika, ramok rachhai wa trangli sitlan. Kiimaq abi ati tiima tsantsii riili ama sitlan. 40Anginok loi! Shiikeawe riika akii thun tiiqlo wantaq kriika, among thun kriika tiiqlo mak dea ngutiisha tiima tlan? 41Shatmaq, namshiq kok alaq mong na nai winpin mong na jamlai wa sitlaq, kra thun kriika miitsan miijan maiqse ma kuq ronglaq. Kra riihan jiila, phanrap ka namshiq miitu apii ashan chang ngutiimin ahü she, siirairai she miraq.”

42“Namshiq Phorisinok ma pinthum phiiptsi chang asi! Namshiq raq Shiikeawe ma aroq khu wa honglu ka jurai liirai süse tapan jaq thun kra, kiimaq weashaü tiihom phaq chang sang asong jaq thun kra kuq tlan. Shatmaq, tri raü sham kriika shiiting rai man riitlan. Kiimaq Shiikeawe ma lungwii tsantsii ka thü wan man, shishe tlan. Arthun ahata, akhek jaqsham ka. Ara tiitsuq miishetiq abi jaqsham chongtiikai thun kra sham han chang wa.

43“Namshiq Phorisinok ma pinthum phiiptsi chang asi! Namshiq riika, sinagok thun na nyungwere ngachang pong na arai thü kiijaq ngawa kli riichhin tlan. Kiimaq chiiheawea wea maq, maiq raq somra wan tlaq kli rit tlan. 44Namshiq ma pinthum phiiptsi chang asi! Namshiq ka maiq malap chang ma chiim raükhu ma athü ikha sitlan. Maiq akhumti raq, hemak lam maq, maiq ma chiim niratki raüta, akhum ka tiishe tlaq ikha sitlan.”

45Kra tai raüta, Thungtri shrinketibi phong wa weshi raq, “Shrinketi we, ümniiraq ara ngutlaü arka, naishiq min shummii dam tlaü!” nguta Jesuq ma nguto.

46Kiijiishe, Jesuq raq treto, “Namshiq Thungtri shrinketibi miimin pinthum phiiptsi chang asi! Namshiq raq nokwe ma alanglot chang riimak tri raütu thun kra tiiho tlan. Kiimaq namshiq maiqmii riika, kra thun tri lang holai tiichhiike wan ka tsin man. 47Namshiq ma pinthum phiiptsi chang asi! Namtitiim raq atsatbaiq shammibi ma lapkho na namshiq raq asap ada maraükhu ka hai tlan. 48Krai mren, namshiq ka tsangshiq raq matkii thun shong wantaq kra chhiti saqse hakhi kewantibi nguta sitlan. Tsangshiq riika shammibi thun ka tsatbaiqto. Namshiq riika tsangshiq maraükhu thun kra haihun tlan. Namshiq ka kra matkii thun kra sham wantibi dea. 49Riita akha maq tiina, Shiikeawe Taksma raq chongtaq, ‘Ngi raq tsangshiq phana shammi bi nai tsasoqtibi mitiikiha. Tsangshiq raq wiijam ka atsea mirbaiq. Kiimaq wiijam ka atiichamchao mirwan.’ 50Ara chong tlaq arkha maq, ümchaü pat wa maiq thun arka, ra nai hiq tiiq wanli maq pha wan raüta, ümchaü pat na saüli, shammibi tsatbaiq wantaq thun kra mat kha na, Shiikeawe raq tsangshiq ka mitiichamchao wan! 51Abel tsatbaiq wantaq kriimaq pha wan raüta, aluchiim nai Asii khok liipan na Jekeria tsat baiq wantaq, kra thun mat kha na, tsangshiq ka mitiichamchao wan. Ngi raq chongtiikang arka tengteng. Ümchaü pat wa maiq thun arka, arthun kha arjaq mitiichamchao wan!

52“Namshiq Thungtri shrinketibi ma pinthum phiiptsi chang asi! Namshiq raq Shiikeawe tiima tsantsii khon chang phaqchi kilü diwan chang sapi tu ka thü baiq lan. Namshiq maiqmii kiimin nyap wa man. Kiimaq nanok awa roti kiimin, tiiwa man maq tangta baiq tlan!”

53Jesuq ka kiiwa tiido wan jai she, Thungtri shrinketibi nai Phorisinok raq apaiq ka achaq awaq maq longliiqto. Kiimaq phanrap khuthaq na seng raüta, tsangshiq raq apaiq ma bom ka sidi waisoto. 54Tsangshiq raq apaiq ka, tsangshiq thiikho na tiithap haijaq, kiimaq phanshi ra na kiq tiishut hai jaq nguta khettot siqto.

Currently Selected:

LUKAQ 11: TANGSBSI

Highlight

Copy