LUKAQ 12

Mongnam Tsii Pi Thop Ma Tiihaishat ronglaq

(Mot 10.26-27)

1Mungmaiqse ka ahing amun adam na maiq thaq niili maiq riiphongrai wanto. Kra akhing na Jesuq raq ajaqshisetiim ma tsii chongke akha chongkuqto, “Phorisinok mongnam tsantsii rüm tlaq kra raq, maiqse tsantsii ka ahea rümti kiimin pi maq asho ikha, abi lam na tiinyam sho wan tlo. Kra tsangshiq pi thop raq namshiq hon atsii ka nyam mak chang miitu, namshiq ka maiqmii honkamshat maq si rong laq. 2Mongnam tsii maq, maiqse raq jamlai wa apang raüta thü tlaq, kriika alin she mirbaiq wan. Kiimaq maiqse raq jamlai wa ahukse maq, tsan mong na tiima tlaq, kriika maiq tarü riishe misap wan. 3Krai mren, namshiq raq jamlai wa ahukse maq riichong tlan, kriika ranaiq shethungpii niishe mirchong. Kiimaq namshiq raq tapmong nyang maq, riishap riishaü lanta jamlai bom wa riichong wan lan kriika, rinkinku maq chap raütiishe mirüm wan.”

Shiikeawe Ma Hai Rong Laq

(Mot 10.28-31)

4“Kongtitiim le, ngi chongpha, tai ronglaq. Hanngam khum tsea baiq jai maq, wenyi rilung tsatbaiq wanlot makti miika, naqhai rongkiq. 5Namshiq ka ju ma hai chang wa kriika ngi chongpha, taironglaq. Namshiq ka Shiikeawe miili hai chang. Shiikeawe riika, han-ngam khum kra tsea baiq lot jai min, wenyi rilung kra wamungtan na michaq baiq. Ara i bomchong arma kam ronglaq. Namshiq ka Shiikeawe miili hai chang!

6“Riita, maiqse raq wuraichaqsetiim biingi kriika, poisa anai miili riiri thü tlaq riimak sha? Shatmaq, ara chongtiikai akho asho setiim, wushi setiim ara dongdii min, Shiikeawe raq ashise kra dongdii min laqthaq mak phan. 7Riita, Shiikeawe riika, namshiq khubin lo thun kra dongdii min wiita weaje siisaq. Riita ara chong tiikai arai mren, Shiikeawe maklii na, namshiq rilung thü kriika athii tsinhea. Kriikha maq, namshiq ka naqhai rongkiq. Wuraichaq kong pahea kra thaq na, namshiq rilung thii ka tsinhea!

Reraüshi Sha Rewe Wa?

(Mot 10.32-33; 12.32; 10.19-20)

8“Ngi raq chongtiikang arka tengteng. Jurwa nokwe man na, apaiq ka i sengi nguta tantan maq sitlaq, kriiti miika Maiq Se riimin, rasetiim man na apaiq ka i sengi nguta hakhi mikuq wan. 9Shatmaq, jurwa apaiq ka Maiq Se kra sengi riimak nguta, nokwe man na ngi ka tiishaü tlaq, kriiti ka Maiq Se riimin, rasetiim man na apaiq ka asengi riimak nguta atiishaü mirwan.

10“Jurwa Maiq Se ma angeng bom bom tlaq, kra ngarai ka adiike wan mimai. Shatmaq, jurwa Asii Wenyi ma ngeng raüta, riikhiq ashut bom tlaq, kra ngarai ka diikuq mak miraq.

11“Ümtiikiiwa namshiq ka sinagok thun niilo, riimak la honyung hokhambi rung na lo, tiichap raüta, kha mipho, kra ranaiq akhing na, namshiq khum tiichhii miitu bom ka jamkhii chong chang wa nguta, tiima lanta naq chapa rongkiq. 12Kra akhing na, namshiq raq jamlai bom chong chang wa kriika, Asii Wenyi raq namshiq ma atlang mirkuq.”

Angi Chiithewe Shiiton

13Maiq weshi raq nokwe phong mong maq, Jesuq ma chongto, “Shrinketiwe le, i phu ma chongkuq laq, i we raq akuqthü tachong hupsam kriika, ngi miiri miphea kuq laq.”

14Kiijiishe, Jesuq raq abom ka treto, “I phuno we le, namnai liipan na tachong kha phoke ma, lo kra pheake miitu lo, ngi ma arang ka juro kuqta?” 15Kra ngu raütiishe, Jesuq raq tsangshiq tarü ma akha chongkuqto, “Sükha ramho kharü mong na dea man chang miitu, honkamshat maq si rong laq. Ara jamkhano chongtiikang ngukla, riikhaqli maiqse rilung ngutlaq kriika, ajaq na tsiiq anyam rüm tlaq, kra lamlam li ka riimak. Apaiq ka ümtinkhan chiithe we li jiimin ümriilaq.”

16Kra ngu raütiishe, Jesuq raq tsangshiq ma ara shiiton manphan ara phan kuqto, “Man na maiq chiithewe weshi asi riito. Awak ajam chamtraq asi. Wak wa tsam min pahea lapto. 17Apaiq ka awintsi miishe, akha nguta atsan mong na tiishomrato, ‘Ümchaü kla, i tsam ara thü chang dongdii min, tsamtiip min ahü she. Jam niishe wa misaiq samhea? 18Akhiitiq mikloha,’ nguta apaiq nai apaiq ka tiingoto. ‘Ngi raq i tsamtiip arka asiiq mirbaiqha. Lata, tsamtiip ka ajong linlin she, tiip nye ashi she mihaiha. Lata, i tü i tsam thun kiimaq i hup i sam thun arka, tiip nye niishe mithüha.’ 19Kra lot latiishe, ‘Kopan ajongwe le! Ümchaü sanha, phanrap ong laü she. Ümchaü kla, che nyang dungsea, chamtraq tiipong tiipii laütli she peo silaq!’ nguta tiishomrasiqto. 20Shatmaq, Shiikeawe raq apaiq ma, ‘Ei, angi we loi! Athi rawa li, ümmiisaq ka mithumki ngo ka sapphaq maü. Riita ümnaq tsai jai, ümtsiiq tum kriika jurshe wa miphesiq?’ ”

21Kiimaq Jesuq raq bom ka akha shatto, “Ara chong tiikang akhiisii maiq juwa han-ngam niili rongboq win tlaq, shatmaq, Shiikeawe maklii na, miitsan sitlaq, kriiti thun ka athum mirki.”

Shiikeawe Ma Kamlaq

(Mot 6.25-34)

22Kra chongkuq lot raütiishe, Jesuq raq ajaqshisetiim ma akha chongkuqto, “Arkha maq tiina, ngi raq namshiq ma chongkuq tiipha ara. Atra maq siwan miitu, dungjada ra tlaq kra nai khum tiikhe chang khu akhea ra tlaq kra miitu, namshiq ka naq chapa rongkiq. 23Maiqse ma rilung tsitsü kriika, tsam jada thaq na atsin. Kiimaq maiqse ma khum sitlaq kriika, khuchü kheani thaq na ara. 24Khala kong ka liirong laq. Tsangshiq raq minshiiq mak. Tsangshiq tsamtiip min ahü. Tsangshiq tsamtum min ahü. Tsangshiq ka Shiikeawe raq dung tlo! Namshiq rilung ka wushi rilung thaq na athii tsinhea! 25Riita, namtsam phong wa weshi ra raq, akha chapa lanta rilung ka alu lin misi lot han sha? 26Riita, ija, namshiq raq ara akhiise armin hamhe wanlot man jiika, ahin miitu ka, jaram wa chapasiq tlan? 27Liimanta, rum na pepü wiihii kra jamkho jonglutla? Tsangshiq raq minshiiq mak, lo, khu akhea min taq sam mak. Shatmaq, ngi chong pha. Hokham we Solomon ka, atsiiq anyam ama chamtraq maq siti we riito. Shatmaq, apaiq miirii khu akhea thun kriika, ara chong tiikai pepü wiihü tsom tlaq, atinkhan ka tsom mak. 28Ara rum wa sangphii tiipü tlaq arka Shiikeawe raq ahata. Ara sangphii arka ümchaü asi anap ka ahü she. Wa na achaq baiqkun she miraq. Riita arthaq na apaiq raq namshiq ma apa khu akhea tiisam kuq mak sha miraq? Namshiq kamasham ka jamkhiiwa tran tlan!

29“Riita ara chong tiikang arai mren, namshiq ka jamlai wa miphaq siq rong i nguta, naq chapa rongkiq. 30(Ara jamkhano chong tiikang ngukla, ara mangjong hiq wa thatsang maiqse angu kli tiina, wranaiqshe, arthun ara miitu chapa siq tlaq.) Namshiq ma arthun arka ra tlo nguta, nam We raq asap. 31Kriikha maq, namshiq ka, Shiikeawe Mungtan miituli tiima tsantsii ka atsi maq thü lanta sironglaq. Kiimaq apaiq raq namshiq ma arthun arka mikuq dongdii.

Ramungtan Na Chiithe

(Mot 6.19-21)

32“Namshiq ka atsapse li jiimin, naqhai rongkiq. Nam We raq chochikhiq maq, namshiq ma Mungtan ka mikuq. 33Namshiq tachong wiira thun ka wiita sha lanta, kra sha kampho kra miitsan miijan maiqse ma kuq rong laq. Namshiq la kriika thenki mak chang phan kampho tek kra, tiije rong laq. Lanta, namshiq ka Ramungtan na chiithe ma jawan miitu tiije rong laq. Kiijaq tsiiq anyam ka wiihiiki mak miraq. Kiimaq ahuk arot min ahü she miraq. Kiimaq sap achhü riimin phaq mak miraq. 34Ara jamkhano chongtiikang ngukla, ümtsiiq tum ka ümbano sitlaq, kriijaq ümtsan tsii kiimin misi.

Atijong We Saüwa Kheshatti

35“Miirii ka sam lanta nai lemtem ka tlü shatmaq, kheshat khewan ronglaq. 36Ajaqshisetiim raq atijongwe ka maiqlam poi lom rü maq saüwa khetlaq ikha kherong laq. Tsangshiq ka khekham maq si raü jiika, apaiq ka jam na saüwa raüta, kilü na buk raüjaq tsangshiq raq apaiq ma kilü ka dikuq saq midi kuq. 37Kopan jonghea miraq, ajaqshisetiim phong wa ümriiti wa tsangtijong we ka jangki tlaq akhing na, apaiq ka asam, kiimaq tiijeshat miloho! Ngi chongpha. Apaiq raq asamtong ka chhut raüta, tsangshiq ka atiinga miraq. Raüta, apaiq raq tsangshiq ma aheawiq maq tü adung thun kra mitiiphaqsiq. 38Atijongwe ka rawa thung niilo, rawü ho niilo saüki tlaq akhing na, tsangshiq phong wa, ümriiti thun wa tiijeshat loho tlaq, kriiti thun miika pinthum chochi chang miraq! 39Kiimaq namshiq raq asap han, jamchongti we raq ahuk saüwa akhing ka sapshat ngu raü jiika, ajam ka ahuk ma tiihuk mak miraq. 40Krai mren, namshiq riimin la, tiijeshat maq kherong laq. Ara jamkhano chong tiikang ngukla, Maiq Se ka, namshiq raq apaiq ka alo saüho mak sham nguta, tiima tlan akhing bala misaüki.”

Maiqshaq Jaqshi Jaronglaq

(Mot 24.45-51)

41Kiijiishe, “Tatiwe, riita ara bom shiiton chong tlaü arka naishiq miitu min sha, shea joli na nanok wiitarü miitu wa chong tlaü?” nguta Petar raq waito.

42Kiijiishe, Tatiwe raq treto, “Ngi chongpha, maiqshaq nai setsii jaqshi ka akha miraq. Apaiq miika atijong we raq, apaiq wanhiq kaiho ma ajam ka mitiikhethü. Atijongwe raq apaiq ma ajaqshisetiim abi sitlaq kiima tü adung ka akhing khaqkhaq na tiiphaq siq laq nguta michong thü. 43Kra jaqshise ka atijong we saükai akhing na, apaiq ka tsapkapkap ajaqsham rea loho raü jiila, apaiq ka pinthum mikhoqriiq wan! 44Riita riikhaqli ngi chongpha. Atijong we raq kra jaqshise ma, apaiq jamkun na tachong hupsam ümchuwa sitlaq thun kra liiwan miitu arang she mikuq. 45Shatmaq, ara ajaqshi se ariiraq, atsan mong na atijong we ka alo jangho mak sham nguta mitiima. Raüta, apaiq raq jaqshisetiim abiti thun jechakre maiqwere sitlaq kra mitsat son. Kiimaq apaiq ka cherop tsampii wali she mingi. 46Raüta, apaiq ka akha shonbii rai tlaq bala niili, atijong we ka apaiq raq alo saüho mak miraq nguta atiima bala, apaiq raq sapmak shon niili misaüki. Raüta, atijongwe raq apaiq ka bunlak buncha chum raüta, apaiq ka thatsang maiqse rai khoshi na mitiidea baiq.”

47“Atijong we raq apaiq ma jamlai jaqsham achong wa, kra sapshat shat taü miimin, kra jaqsham tiije mak maq haisea wanti jaqshise kriika, atijong we raq amo tsihea mitiiho. 48Shatmaq, atijong we raq jamlai jaqsham achong wa, kra sapmak kha maq, ajiq aphiq mosham mosham sham wanti we jaqshise kra riimin, mo ka miho. Shatmaq, apaiq raq mo ka achü linlin li miho. Riita, ju miiwa arang apa kuq taq, kriiti raq momin apa miho. Kiimaq ju miiwa arang ka atsap lin li kuqtaq, kriiti riika momin achhü linlin li miho.”

Jesuq Mang Na Maiq Mitiikho Wan

(Mot 10.34-36)

49“Ngi ka mangjong hiq na wa chaq kai kikang. Kiimaq ngi raq tsin ngin tiikang, ara wa arka nyai jam she ngu raü jaq nguta tiima tiikang! 50Ngi raq khamlam wan chang asi shaqli. Kiimaq ara khamlam akhing ara milia wan ha shaq wiiwii, ngi ka kai chapa tsi raq atsai sichang li. 51Namshiq raq ngi ka, mangjong hiq na mung tiitsingkai aki ngutiisha tiima tlan? Riimak. Mung tiitsing kai akiha ka riimak. Shatmaq, atriiphea kai kikang. 52Ümchaü ara miiphat she, maiqta ashi na maiq biingi sitlaq kiiwa, atsam raq anai ka mingeng wan. Kiimaq anai raq atsam ka mingeng wan. 53Awetiim raq asetiim ka mingeng wan. Kiimaq asetiim raq awetiim ka mingeng wan. Anyungtiim raq ase jechaksetiim ka mingeng wan. Kiimaq ase jechaksetiim raq anyungtiim ka mingeng wan. Anyai-chhitiim raq anam-nyungtiim ka mingeng wan. Kiimaq anam-nyungtiim raq anyai-chhitiim ka mingeng wan.”

Akhing Sap Chang

(Mot 16.2-3)

54Raütiishe, Jesuq raq mungmaiqse thung tlaq kiima min akha chongkuqto, “Namshiq raq ümtiikiiwa phumda ka shenyap nü maq awa rai chhi tlan, kra chhihan jiila chongsaqli, o rashe mijun nguta ngutlan. Krai mren, ra ka juntlo. 55Kiimahali, namshiq raq hiqmai nü maq rahai wan michhihan. Kra chhihan jiila, o arka ra milam nguta ngutlan. Krai mren, ra ka lamtlo. 56Mongnam nok loi! Namshiq raq ra na liilan tli, rajun ramai tsang kriika shü tlan. Riita, ümchaü pat akhing rahiq jipi ara liichum ka jamkhii riito sap man?”

Tsan Riibi Ka Aram Riiwan Ronglaq

(Mot 5.25-26)

57“Namshiq maiqmii miitu ahea awa jaqsham chang sitlaq kriika jamkhii riito sap man? 58Ashi ra raq ümniika phowebi rung na shokki kiiphaü la, apaiq rai kongkhu riihum liina. Laüta, ümnaq shokti we krai rung na misaüho shaq niili, ari aram rong laq. Kra ram maü haü la, ümrewe raq, ümniika phowebi jaq na mikuq. Kiimaq phowebi riishe ka peta jaq niishe mikuqki. Kiimaq peta raq ümniika phaqtek mong niishe mishaq baiq. 59Ngi chongpha. Phowebi raq kha pho wantaq kra, poisa ashi min tiichong maü maq, tiisiirai ümkha kra dok maü wiiwii, ümniika phaqtek mong niili she misi haü.”

Currently Selected:

LUKAQ 12: TANGSBSI

Highlight

Copy