LUKAQ 13

Tsii Klai Ronglaq, Riimakla Atsai Mirhan

1Kra akhing na maiq wiijamti ka kiijaq asi riito. Tsangshiq raq Gelili hiqti maiq wiijamti ka Shomjam na Shiikeawe ma nyamse honglu takerea wa, Pilat raq tsat baiqto. Kra tsütsa ka tsangshiq raq Jesuq ma tiitaito. 2Kiijiishe, Jesuq raq tsangshiq ma bom ka akhiishe chongkuqto, “Riita, namshiq raq, akha tsai lam riihum wantaq arka, tsangshiq ka Gelili hongti tarü khu thaq na ngarai jonghea tang wanti kha maq akha sho lam na kihoto ngutiisha tiima tlan? 3Riimak! Kriika ümtiikiimin riimak! Ngi chongpha. Namshiq min maiqmii ngarai ka tiidii man riihan jiila, tsangshiq jai niisii mikiho nong han. 4Riita, Silom wa maiq roqshi ri tiichat, kongmong chong raq pat raüta tsaitaq kriiha? Namshiq nga tsangshiq ka, Jerusalem na siti mungmaiqse thaq na ngarai homa jonghea hotibi kha maq tsangshiq ka kiikha tsaito ngutiisha tiima tlan? 5Riimak! Kiikha ka riimak! Ngi chong pha. Namshiq min maiqmii ngarai ka tiidii man riihan jiila, tsangshiq jai na sii hali sho lam na, khoshi na mikiho nong han.”

Tsimak Phupmup Chong Shiiton

6Kiijiishe Jesuq raq tsangshiq ma ara bom shiiton manphan ara chongkuqto, “Akhing ashi na maiq weshi raq spiqtsi ro ashi chhito. Kra sonruk mong na phupmup chong min asi riito. Apaiq ka phupmup tsi kra pansea kai kito. Shatmaq poshi min ahü, tsimak. 7Kriikha miishe sonruk kheti we ka thaüto, ‘Liilaq, ngi wiitsam she ara chong wa atsi pansea kai nguta liiki tiikang. Shatmaq, ngi raq atsi poshi min pansiq mang. Adaq li she riibaiq laq. Arka jam hiq tiibi miiwa mili siq?’ 8Shatmaq, sonruk kheti we raq apaiq bom ka treto, ‘Shiilang we, ümchaü ka wiishi miitu kiikhiili lilaq. Ngi raq achong tro na hiq ka thu lata, hiq tiipü changtiq miphong kang. 9Kra chhintsii jai she rawii atsi ahea tsikuq raü jiikla, tiibomhü she! Kiimaq tsikuq mak li riishatshat jiika, ümniiraq atiidaq baiq mimai she.’ ”

Akü Nyung Niitiitsak Ranaiq Tiiheato

10Asii Niitiitsak ranaiq shi akhing na, Jesuq ka sinagok na traho bom chongke rea riito. 11Maiqnyung ashi kiimin kiijaq asi riito. Apaiq ka thabi winji raq akaq, wiiroqshi ri wiitiichat she atsi chamchaoti nyung. Arairii ka akong kaiwi she. Kriikha maq, apaiq ka maiqhea ikha rusansan chap raüta, khumlot mak. 12Jesuq raq apaiq ka chhi raüta, “Maiqnyung loi, ümthatsi kharü ka adiikewi she!” nguta apaiq ma chongto. 13Krai mren, apaiq raq ajaq ka atsiti nyung dü na shamto. Kiimaq atsi ka heasaq, tliitat heakito. Kiimaq apaiq raq Shiikeawe kiishe tiitsam kamto.

14Shatmaq, kra chhi raüta sinagok wa maiqla we ka, Jesuq raq Asii Niitiitsak ranaiq atsi asi tiihea kuqtlo nguta akhiq riito. Kra ningkhan, apaiq raq nokwe ka akha sonto, “Namshiq ma jaqsham miitu ka liipan shi na rahiq ka ratrok asi. Namshiq raq jaqsham chang ka, ara ratrok liipan na walanta, atsi asi ka tiihea walili rong laq. Shatmaq, Asii Niitiitsak ranaiq niika, atsi asi tiihea ka ra mak!”

15Kra tai raütiishe, Tatiwe raq apaiq bom ka akhiishe treto, “Namshiq ara mongnam nok! Namshiq raq Niitiitsak ranaiq na maiqmii minsaü lo, kumtoq lo ka aban chang tiip wa diiho lanta, atsam tiiphaq kai rum na banki tlan. 16Riita, ümchaü ara Abraham lai maiqnyung ashi, Thawe raq wiiroqshi ri wiitiichat kharü maq kha raüta tiichamchao wanto. Apaiq kra tiq sha, Asii Niitiitsak ranaiq na kharü mong wa tiidong ra mak ngutlan?” 17Apaiq bom tre ka tai raüta, apaiq ngengtibi ka ajiasi riito. Shatmaq, apaiq raq kai awang chang jaqshamtlaq kra chhi raüta, nokmaiqse angu thun kriika, kai chochito.

Jücha Lai Maq Shiiton

(Mot 13.31-32; Mak 4.30-32)

18Kra bom jai she, Jesuq raq nokmaiqse ma akha waito, “Shiikeawe Mungtan ngutlaq kriika jam khiiwa? Kriika ngi raq jamlai phan mo mishtonha? 19Kriika akha. Arka maiq weshi raq jücha lai ka wak na wanki tlaq ikha. Jücha cham ka jong wan raüta, achong ka ajong wiq she jong wan tlo. Raüta, jücha chong kü ako thun kiijaq, wushi setiim riimin, achü haitlo.”

Pi Maq Shiiton

(Mot 13.33)

20Jangshi ri hali, Jesuq raq bom ka nokmaiqse ma akha chongkuq nongto, “Shiikeawe Mungtan ngutlaq kriika jamlai phan mo mishtonha? 21Kriika akha. Arka, jechak nyung ashi raq, tok roqblai wongwin ka wankhü na phong raüta, pi maq sho tlaq ikha. Pi maq showan jai, kra wongwin ka, winsii miishe jakitlo.”

Lamtsase

(Mot 7.13-14,21-23)

22Jesuq ka chela rap na nai hiqshong rap thun na, khumshkhum maq wawan raüta, tra hoke khum wanto. Apaiq ka Jerusalem nü na kaiho lam maq, nokwe ma traho bom chongkuqto. 23Maiq weshi raq, “Shiilang we, riita, maiq ka atsap ko li dea sha mitiichhii wan?” nguta apaiq ma waito.

Kiijiishe, Jesuq raq treto, 24“Namshiq ka kilü aranse kiimaq wawan miitu, kai shiikut ronglaq. Jamkhano ngukla, maiq pahea raq kra kilü lam maq jam mong na wawan hai jiilei nguta mitsin ngin. Shatmaq, jam mong na nyap wan lot mak miraq. 25Jamchongti we ka tiido raüta, kilü ka ashaq she mirbaiq. Kiijiishe, namshiq ka kilam da na chap lanta, kilü na mibuk han. Kiimaq akha mingu han, ‘Shiilang we le, naishiq ma kilü dikuq laq!’ Shatmaq, apaiq raq namshiq ma, ‘Ngi raq namshiq ka ümba wa awa han wa sapmang!’ nguta mitre. 26Kiijiishe namshiq raq mitre han, ‘Naishiq ka ümniirai phaqshi seashi maq siwan kai ihata. Ümniiraq naishiq chela na traho bom chongkuq laü ihata!’ 27Shatmaq, apaiq raq namshiq bom ka, ‘Ngi raq namshiq ka jamba wa awa han wa sapmang. Ngi tho wa namshiq ka tiibin tlo ronglaq. Namshiq wiitarü ka abi maiq setiim siisaq!’ nguta mitre. 28Kiijaq, namshiq ka namrong namwi kra tiichit watrang liishe mihoq phaq han. Namshiq raq kiijaq, Abraham, Isak kiimaq Jakob kiimaq shammibi thun tarü, Shiikeawe mungtan na michhi han. Kiimaq namshiq maiqmii riiwe kriika, kinphai na mishang baiq. 29Pongmung maiqse thun ka, shedong shenyap kiimaq shekhu shemai mung thun wa saü wan raüta, Shiikeawe Mungtan na phaqsea Poi kra lomdam misi wan. 30Kra akhing na, ümchaü juwa jai na watiikai ngutlaq ti ka phukhu welabi ma mija wan. Kiimaq ümchaü juwa sinkhu na lamsheati anguti ka aran ma mija wan.”

Jerusalem Ma Jesuq Roriitsii

(Mot 23.37-39)

31Kra akhing na Phorisinok wiijamti ka, Jesuq phana wa raüta, “Ümniika Gelili wa ümchiim jintlo laq. Herod raq ümniika atsea baiq tantlo,” nguta apaiq ma chongto.

32Kiijiishe, Jesuq raq, “Warong laq. Lanta kra miikakoi kaü kiima, ara bomtsi ara chongwa rongkiq: ‘Ngi raq thupkaü thawe thun wiita jobaiq tiikang. Kiimaq maiqse atsi asiti thun ka tiihea kuq tiikang. I jaqsham ka tlot wan ma ümchaü ka naphea jihea li she,’ nguta tsangshiq bom ka treto. 33Jaqsham tlot miitu, ngi ka ara napnai jihea liipan na, Jerusalem na misaü wan ha shaq wiiwii, khum wan ruq li mirha. Shammi ngutlaq kriika, Jerusalem niitiq dongdii tsai chang. Kriikha maq, tungkam lam jam na tsea baiq kriika thek mak.

34“O, Jerusalem le, Jerusalem le! Ümniiraq shammibi thun ka pahea tsatbaiq laü. Shiikeawe raq ümphana tsütsa chong kai tsasoqti atiiki thun kra ümniiraq tsatbaiq laü! Ngi raq ümtinkhan wa, ümsengi thun kra wukaü raq asetiim wowan tlaq ikha, i wokhong na wowan pha nguta shiikut wan kang. Shatmaq, ümniiraq ngi ma tiiwo maü riilaü! 35Riita, ümchaü sanha, namshiq Shomjam ka Shiikeawe raq, amiim she mirbaiq. Ngi raq chongtiikang arka tengteng. Namshiq raq, ‘Shiikeawe le, Tatiwe mang na juwa kitlaq, kriiwe kiidea shiiman laq,’ nguta ngu man wiiwii, namshiq raq i sham ka chhi she mirhan!”

Currently Selected:

LUKAQ 13: TANGSBSI

Highlight

Copy