LUKAQ 14

Niitiitsak Ranaiq Atsiwe Tiiheakuq Nongto

1Jangshi hali Asii Niitiitsak ranaiq na, Jesuq ka Phorisi we maiqla weshi jam na dungsea wa wawanto. Kiijaq jamtati bi nai akongtibi raq, Jesuq raq jamlai phan jaq wa sham jiiq nguta kai shri ra liishat riito. 2Kra liipan niili maiq weshi, ahok nai ajaq ka achhang ajong, ashong ashe tsi, tsibi raq chamchao rai tlaq we, kriika Jesuq phana wato. 3Kiijiishe, “Riita, nashiq Thungtri na Asii Niitiitsak ranaiq na, maiq atsi asiti tiiheake ka mai tlo ngutiisha chongtla, sha tiiheake ra mak ngutiiwa chongtla?” nguta Jesuq raq Thungtri shrinketibi nai Phorisinok ma waito.

4Shatmaq, kra tai raüta, tsangshiq ka kaiqshak li riito. Kiijiishe, Jesuq raq atsiti we thatsi ka tiihea kuqto. Raütiishe, apaiq ka ajam niishe tiiwa baiqto. 5Kra lot raütiishe, “Riita, namshiq phong wa weshi ra, namse ngu i na lo, riimak la, nam minsaü pongwe kra lo ngu i na, kra Asii Niitiitsak ranaiq na khappong mong na dea wa raü jiiha? Asii Niitiitsak ranaiq li jiimin, namshiq ka taülaükhiq kilanta, khappong mong wa midoki han riimak sha?” nguta apaiq raq tsangshiq ma waito.

6Shatmaq, tsangshiq raq apaiq bom ka trelot mak riito.

Aranse Ma Ja Nai Wanwe Shiililii

7Jesuq raq wanwe wiijamtibi raq shiilangbi ngachang ahea hea kriijaq nga riichhin rai ka chhito. Kra chhi raüta, apaiq raq ara shiiton bomtsi ara tsangshiq ma phankuqto: 8“Maiq weshi ra raq, ümniika maiqlam poi na heakiiphaü la, shiilang ngachang niika naq ngakiq. Jursap, ümnaq nam ma, ajong akimiikiim ahinti min ahea wan asi lo riila. 9Kiimaq namwan chongti we, namnai tiiheati we kra ümtho na kiraüta akha ngu kai chang lo dongki, ‘Phuno we le, riita, ara ngachang arka, apaiq ma likuq laq.’ Kra ngu raü jiika, ümniiraq kai jea ngaü chang mirki. Kiimaq ümniika maiq nyungwe nosebi ngachang, rintsii na lo, riimak la, shok anok niishe ngakai chang midongki. 10Kra rii na khoti, ümniika ümtiikiiwa tiihea tlaq, kiitiikaq kilaüta, akha rintsii na lo, shok anok niilo kiijaq ngaki kiq. Kriiwiika, ümwanti we raq, ‘Phuno we loi, ümniika ana shiilangbi ngachang ahea na ngawakiq,’ nguta mihia wan. Ara ngu raüka, nokwe tarü man na, ümkhushü ka mijong. 11Ara jamkhano chongtiikang ngukla, jurwa maiqmii ka ajong ala nguta tiima tlaq, kriiti ka aran se ma mitiija baiq. Kiimaq juwa, maiqmii ka tiisaiq haiq shat maq sitlaq, kriiti ka ajong ma mitiija wan.”

12Kra chongkuq lot raütiishe, Jesuq raq awanti we nangnga nguto, “Ümniiraq ümtiikiiwa ranap dung lo, raji dung lo, maiq ma tiiphaqsiq tlaü, kra akhing na, ümkong ümkiimtibi lo, ümphu ümnobi lo, ümniima jamtap rinti lo, chiithe maiqsetiim, jamthaq jamkiqti lo, kriika naq tiihea wankiq. Ara jamkhano chongtiikang ngukla, tsangshiq raq hali ümniika tiihea nong raüta, mitiiphaqsiq nong. Ümniiraq tsangshiq ma jamlai wa kuq laü, kriika tsangshiq raq ümniima atham asong mirkuq nong. 13Ara chongtiikang arkha maq, ümniiraq ümtiikiiwa phaq asea poi klo tlaü akhing na, miitsan miijan, kiimaq makchuk jaqküti thun kra tiihea lili riilaq. 14Kiimaq kra riihaü jiika, ümniima kechu jonghea miraq. Ara jamkhano chongtiikang ngukla, tsangshiq riika ümniima thamsong kuq lot mak she miraq. Shatmaq, kechu maiqse thun ka ama wa dong wan tlaq ranaiq akhing na, Shiikeawe riishetiq ümniima misong kuq.”

Phaqsea Poi Ajong Klo Akhing

(Mot 22.1-10)

15Kriijaq phaqsea lomdam ngatlaq phong wa, maiq weshi raq ara bom shiiton kra tai raüta, apaiq raq, “Shiikeawe Mungtan na phaqsea poi ajong klo wan tlaq kiijaq lom wan damtibi ma pinthum kechu jonghea miraq!” nguta Jesuq bom ka treto.

16Kiijiishe, Jesuq raq apaiq ma ara manphan shiiton ara hali chongkuqto, “Akhing ashi na maiq weshi raq, phaqsea poi jonghea ashi kloto. Kriijaq maiq pahea tiiheato. 17Ümtiikiiwa phaqsea poi aranaiq she saütaq, apaiq raq ajaqshi se ka tiiki raüta, maiq wanwe ümchu miiwa wanhea raüpot pheakuqtaq, kriiti thun ma, ‘Warong riishe lii. Phanrap ka ümchaü aje she!’ nguta tsütsa ka tiichongki nongto. 18Shatmaq, tsangshiq tarü raq, ashi maq riita ashi raq, khühü lamhü niili she tiinyan shan howito. Aphati we raq, ajaqshi se ma, ‘Ngi raq wak phu bashi se rikang. Kra liikai chang akhek rakito. Ngi ka walap mang nguto nguta chong wan liijo,’ nguta bom ka treto. 19Kiimahali, maiq weshi raq hali ka, ‘Ngi raq minsaü pang biingi rirat kang. Ümchaü ngi ka armaq nithe shrinkai chang she. Ngi ka walap mang nguto nguta chong wan liijo,’ nguta ajaqshi se bom ka treto. 20Kiimaq, maiq weshi raq hali ka, ‘Ngi ka ümchaütiq maiq lamkang. Arkha maq, ngi ka walap mang,’ nguta ajaqshi se bom ka treto.”

21“Krai mren, ajaqshi se ka atijong we phana jang wan raüta, atijong we ma arthun tsütsa ara chong wanto. Kra tai raüta, atijong we ka kai walü wa ikhiishe khiqto. Raütiishe, apaiq raq ajaqshise ka, ‘Kilaq, juju. Chela mong na, tungkii lamkii na, shok anok ba thun kiina kilaq. Laüta, kiijaq maiq sitlaq kra phong wa, miitsan miijan maiqse, akü ashiiti, makchuk jaqmiiti thun kra ana sheaki kiq,’ nguta thaü nongto. 22Krai mren, ajaqshi se raq jaqlo liipan niili atijong we aming kra phan phan, maiq thun kra heakito. Raüta, ‘Tijong we loi, ümniiraq jamlai wa thaü laü, irka lot kang she. Shatmaq, ümchaü min, wanwe ngachang ka abinli wiqli ahata,’ nguta atijong we ma bom ka chong nongto. 23Krai mren hali, atijong we raq ajaqshi se ka thaü nongto, ‘Kilaq, maiqhiq shong walam kiina, nai tung alam angu thun kriijaq, kiimaq wak ajam thun kiina kilaq. Laüta, maiq thun ka ana ahea wan nguli riilaq. Ara i jam ara tuptup tiimali riichang. 24Ngi chongpha, tailaq, wanhea raüpot pheake wanjebi thun phong kra wiika, ara ngi raq poi ajong klo phaqsea tiije wan kang arka jurmin, phaqsiq lumak she miraq!’ ”

Jesuq Jaqshise Ma Jawan Thü

(Mot 10.37-38)

25Jangshi akhing hali, maiqkong ka pahea pahea, Jesuq rai adam na awa rai riito. Kra akhing na, Jesuq raq tsangshiq pha nü na lii raüta, tsangshiq ma akha nguto, 26“Juwa i jaqshi ma jawan ro tlaq, kriiti raq ngi ka anyung nai awe, achak nai asetiim, aphu nai anotiim, ashea nyungtiim, kiimaq apaiq khum thaq niimin, ngi ka apa lungwii mak jiila, apaiq ka i jaqshise ma jawanlot mak. 27Jurwa maiqmii pumsongkham ka Pishat maq i jai phan phan wamak, kriiti ka i jaqshise ma jalot mak.”

28“Bom shiiton ngu i, namshiq phong wa maiq weshi ra raq, jam ajong wiq kaü ashi mihai ha nguta tiima tlaq jiika, kra jam hai ma kampho ka asi sha ahü wa, kra kongkhu na sürii chang miraq. 29Apaiq raq kiikha mikhu na sürii mak maq, jaqsham kra phaho raü jiila, ümkhiimiiwa jam ka hailot mak dea, thaq baiq raüla, nanok raq kra chhi raüta, apaiq ka minaikü siq. 30‘Arwe raq ajam ka hai phato shatmaq, hailot mak dea tsaqkito!’ nguta maiq raq minaikü.”

31“Bom shiiton ngu i, hokham weshi raq, aphenlabi ka hing roqshi rümti we raq, hokham weshi hali, aphenlabi hingroq nai rümti we kra rai riikhat kai miika, rechap phaho ma arewe ka mikhat lot sha, khatlot mak wa miraq, kra kongkhu na misürii wan. 32Raüta, apaiq raq tanglot mak chang jiika, kiimwebi sinkhu na tiiki raüta, kriiwe ka alu wiili she atong riiho raüta, wehea ma riija miitu bom mitiichong ho. 33Ikiikhiisii hali, namshiq phong wa juli jiimin, maiqmii raq jamlai wa rümtlan, kra thumthum miimthü man wiiwii, i jaqshise ma jawanlot man.”

Amiinu Ahü Shum

(Mot 5.13; Mak 9.50)

34“Shum ka asumwiq phan. Shatmaq shum ka, asum she khoiki raüka, jamkhiishe wa mitiisum nong. 35Kriika wak na hiq tiipü miitu phong baiq kai miimin taimak. Kriika araü baiq kai chang li she miraq. Ikhiijiila, juwa ni asi, kriiti raq ara bom chong ara tiitsang tai rong laq!”

Currently Selected:

LUKAQ 14: TANGSBSI

Highlight

Copy