LUKAQ 15

1Riita, ranaiqshi ka phunta hitinok maiq pahea kiimaq ashleq arbaiq maiq ahinti thun ka, Jesuq phana apaiq bom chong kra taiwa riitamto. 2Kra chhi raüta, Phorisinok nai Thungtri shrinketibi raq, “Arwe raq ashleq arbaiq maiq thun ka taotlo! Kiimaq tsangshiq rai phaqshi seashi hai nga dam tlo!” nguta bot nyan trangto. 3Kra tai raütiishe, Jesuq raq tsangshiq ma ara shiiton manphan ara phan kuqto:

4“Riita, bom shiiton i, namshiq phong wa maiq weshi skuse kong ka shishi asi. Kra phong kiiwa ashi ka rum na amii mirki. Raü jiila, apaiq raq jamlai wa miraq? Apaiq raq roqtiikaü ri tiikaü ka nyiipjaq phaq tiihai thü raüta, amo riikitaq se kra hum mak wiiwii, mirit ki. 5Riita, ümtiikiiwa apaiq raq kra skuse ka hum jiiq, apaiq ka kai chojong chise she, skuse ka aphaq lam na pisaq raüta miboq wan. 6Raüta, apaiq ka ajam na mishea wan. Raütiishe, apaiq raq akong akiimti bi nai apaiq jamthoti bi kra hea raüta, ‘Ngi ka ara i skuse, amo arki wa hum lata kai khoqriiq tiikang. Nashiq wiitarü adam na chochi rong i!’ nguta tsangshiq ma michong. 7Ara chongtiikang akhiisii hali, ramungtan niika, ngarai tiidii ra mak kechu maiqse nguta tiima raüta, maiq roqtiikaü ri tiikaü sitlaq kra thaq na, maiq weshi ngarai maiqse tsantsii klai tlaq kra chhi raüta, apa michochi.”

Atiimo Araq Kamsii

8“Riita, kiimahali, bom shiiton ngu i. Jechak nyung ashi jaq niika kampho kamsii roqshi asi miraq. Kriiwa, kamsii ashi ka atiimo miraq. Raüla, apaiq raq jamlai wa miraq? Apaiq raq lem ka mitiinii. Raüta, ajam tapmong thun kra achhü miraq. Raüta kra kamsii kra mihum shaq wiiwii, tiitho tiipha, shokchhum nochhum she mirit. 9Raüta, apaiq raq ümtiikiiwa kra kamsii kra hum jiiq, raüla, apaiq raq akongti nyungre nai ajamthoti nyungre ka adam na hea raüta, ‘Ngi ka kai khoqriiq tiikang. Ara i kampho sii ara amo arki wa hum kang. Ümchaü min, nashiq tarü adam na chochi rong i!’ nguta michong. 10Ngi chongpha, tai ronglaq, ikhiisii hali, Shiikeawe rasetiim kiimin, ngarai maiqse ashi raq tsantsii klai raü la, kai michochi!”

Amo Arki Se

11Jesuq raq bom ka akha phanchan kuqto, “Akhing ashi na, maiqwe weshi asi. Ase nai ka wenai. 12Ranaiq shi, anoweti raq awe jaq wa apaiq rii tachong hupsam sitlaq kra, ‘I we le, ngi ma ngi la tachong hupsam ümnaq tsai jaitiq lap chang sitlaq kriika, ngi ma ümchaü li pheakuq laq,’ nguta awe jaq wa jaüto. Krai mren, awe raq apaiq tachong hupsam kriika, ase nai liipan na pheakuqto. 13Kra pheake jai maq jaqlo miili, anowe raq apaiq la hup asam kra asha riito. Raüta, kra sha kampho ka hoho raüta, apaiq ka wanhiq na kihoto. Raüta, apaiq ka maiq mung ashi luhea na tre hoto. Raüta, kra mung na akampho kiimin pili piilii, tuwan piiwan shaphaqto. 14Apaiq raq ajaq na ümchuwa sitlaq kra thum thum shaphaq baiqto. Kra jiishe, kra mung ka hamli na, ram jonghea dongto. Kiimaq apaiq jaq niika jam min ahü, siirai she riito. 15Kriikha miishe, apaiq ka kra mungti, maiq weshi jam na ningchang tham phaq kai kihoto. Kriiwe riishe, apaiq ka awaq kong kra rümkai miitu wak niishe tiikito. 16Apaiq raq atsan mong na tiima ka, waqkong dung chang waqtsam cherongtsi kiiwa ashi ra raq siinai ikuq nya, i ramtsi ara atiitsaq ha chang nguta, rangransiqto. Shatmaq, apaiq miika jurmin, aphaq sia chang phan ka kuqphaq mak riito. 17Atiisup niishe, apaiq tsii ka samto. Raütiishe, apaiq nai apaiq ka akha nguta tiibotto, ‘Ai, i we jaqshisetiim ümchuwa sitlaq thun kriika, tsangshiq wok phetaktak, aphaq asea li lot mak sitlo. Shatmiitiq, ngi ara nangnga, arjaq ram raq haü lata, tsai tiikang nya! 18Ngi arka arwa tiido wan lata, i we phana li she mijang wan nong ha. Lata, i we nangnga, i we le, ngi raq Shiikeawe man na nai ümman na, ngarai jonghea tang wankang. 19Ngi arka ümchaü sanha, ümse nguta ngo ka thek mang she. Ümjaqshisetiim jamkho rüm tlaü kiikhiili she rümlaq,’ nguta minguha nguta atsan na tiimato. 20Kra tiima wantaq krai mren, apaiq ka kra mung wa tiido wan raüta, awe phaniishe jang wanto.”

“Apaiq ka jam maq luhea na awarai niili, awe raq apaiq ka chhito. Ase ka chhi raüta, awe tsan na ase miitu, kai mangchan tsito. Krai mren, awe ka juju kiraüta, ase ka akhuk na pomsaq pomhotlii riito. Raüta, ase theaphi na shupto. 21Kiijiishe, ase raq, ‘I we le,’ nguta bomto. ‘Ngi raq Shiikeawe man na nai ümman na, ngarai jonghea tang kang. Ngi ka ümchaü ümse nguta ngo ka thek mang she,’ nguta awe rai bomto. 22Shatmaq, awe raq ajaqshisetiim ka hea raüta, ‘Kotsi!’ nguta apaiq raq thaüto. ‘Samtong ahea pinthum ira lamwa rongkiq. Lanta, tiisam kuq ronglaq. Ajaq na jaqtop ri tiipa kuq ronglaq. Ahok na hokpa ri tiipa kuq ronglaq. 23Lanta, ahan aphin pinthumti minsaü pongse ira, taki rongkiq. Laita, nashiq tarü chojong chise maq poi laita peo rong i! 24Ara jamkhano chongtiikang ngukla, ara i se arka, atsai arki wa, ümchaü ka atra she; apaiq ka amo arki wa, ümchaü ka hum kai she,’ nguta awe raq ajaqshisetiim ka thaüto. Krai mren, poi ka klo raüta peokhiq chochi wanto.

25“Kra bala ka, ase aphu we kriika wak na tamii riito. Apaiq ka wak wa lam maq, jamkea niishe saü wan raüta, jam na paimin toro tsü wa trang nai maiq wiinum wa trang kriishe taito. 26Kra tai raütiishe, apaiq raq jaqshisetiim phong wa weshi hea raüta, ‘Jam na jamlai wa rüriiq rai tla?’ nguta waito. 27Kiijiishe, jaqshise raq, ‘Ümno ka jam na jang wato,’ nguta treto. ‘Kiimaq ümno ka khu asang maq jam na saü wantaq kha maq, ümwe raq ahan aphin pinthum, minsaü pongse ira tato,’ nguta jaqshise raq aphu bom ka treto.

28“Kra tai raütiishe, aphu we ka kai atsan khiqto. Kriikha maq, apaiq ka jam niimin düwa mak she tiingan kito. Kra chhi raütiishe, awe ka kinphai na dongki raütiishe, ase ka tlin heakito. 29Shatmaq, apaiq raq awe bom ka akha treto, ‘Liilaq, ümchaü ümchu rawii she wa lea wantaq, ngi ka ümwokhong na, ümdise ikha jaqsham wan kang. Kiimaq, ngi raq ümbom ka poshi min tlea mang maq sitiikang. Shatmaq, ümniiraq ngi miika jamlai phan wa kuqlaü? Ngi ma ümniiraq, i kongti rai adam na poi lata peo phaq sia miitu, chhechhi se ashi dongdii min kuqmaü shaqli! 30Shatmaq, ara ümse ariiraq, ümtsiiq ümnyam chong thun kra wiita, mephe nyungre rai sethoq ja lam maq, raü baiqlot raütiishe, apaiq ka jam na jang wan kiiphaü tiitiq sha, ümniiraq ahan aphin pinthum minsaü pongse kra takuq laü!’ 31Kiijiishe, awe raq, ‘I se loi,’ nguta ase bom ka treto. ‘Ümniika wranaiqshe ngi rai adam na, jam mong kun na tsailam jilam. Kiimaq, ngi raq jamlai wa tsiiqchong nyamchong rüm tiikang thun kriika, ümniila siisaq. 32Shatmaq, ümchaü akhing akha ahea ranaiq arka, nashiq raq khoqriiq shishiiq maq, poi ka klo chang. Ara jamkhano chongtiikang ngukla, ümno ka ama arki wa, ümchaü ka atra she. Apaiq ka amo arki wa, ümchaü ka hum kai she.’ ”

Currently Selected:

LUKAQ 15: TANGSBSI

Highlight

Copy