LUKAQ 16

Khonglaq Cherewe

1Jesuq raq ajaqshisetiim ma ara manphan arhali chongkuqto, “Man na maiq chiithe weshi asi riito. Apaiq piikii kra liike wanti ajaqshi se weshi asi. Riita, chiithe we kriima, nanok raq achere we raq, apaiq piikii kriika atiisum riitlo nguta tsütsa ka tiitaito. 2Kra tai raütiishe, apaiq raq achere we ka hea raüta chongto, ‘Ümniiraq i piikii ka atiisum riitlaü nguta, ngi ma nanok raq chong tlaq ara tengtaq riimak sha? Ümchaü min, ümniiraq, i tsiiq i nyam ümchuwa sitlaq kra, ngi ma kunli weake ra tlo. Ümniika ümchaü, i chere we ma jalot maü she.’ 3Kra tai raütiishe, ajaqshi se raq atsan na akha tiimato, ‘Ai, i tijong we raq, ngi arka, ara i jaqsham arwa atiinga she mirbaiq. Ngi arka jamkhiishe wa mijaha? Ngi raq miina, shamla kaitsa wak jaqsham kriika shamlot mang miraq. Kiimaq maiq hisiq lata siwan miika, jeasi tsiri. 4Ümchaü ka ngi raq phanshi mo klo chang! Arka akha klo ha jaq ahea miraq. Ngi ka ara chere ngachang arwa tiisat baiq jai niimin, ngi ma khrumketi maiq kongti kiimti ka sishat miraq.’ ”

5“Kra tiima wantaq krai mren, apaiq raq maiq ümchu riiwa atijong we ma thiitham kechang asiti thun kriishe, wiita weshi shi miishe riichom hea wanto. Raütiishe, apaiq raq aphati we kiima akha waito, ‘Ümniiraq i tijong we ma thiitham ka ümchu kechang wa asi?’ 6‘Olip petsi tsai pükhaü shishi kechang asi,’ nguta treto. ‘Arjaq ara ümmang na raüpot shiila akha raütu. Arjaq nga laüta, jaqlo thiitham ka pükhaü roqbiingi kechang li she nguta waiqlaq.’ 7Raütiishe, apaiq raq weshi miishe hali bom ka wai nongto, ‘Riita, ümniiraq ha, thiitham ka ümchu kechang wa?’ Kriiwe raq, ‘Tsam tii hingshi kechang asi,’ nguta treto. ‘Arjaq ara ümmang na thiitham shiila raüpot akha raütu ara. Tsam ka tii shitiichat li she nguta waiqlaq,’ nguta chere we raq treto.”

8“Ara jaqtsak chere we khonglaq arka, atijong we raq chhi raüta, ashom rarea li she riito. Ara jamkhano shomrata ngukla, ara mangjong hiq na mangjong maiqse ngutlaq kriika, rawii maiqsetiim sitlaq, kra thaq na, tsangshiq ka mangjong hiq rilung lamphan niika, asap atsin wiq khonglaq hea siisaq sitlo.”

9Kra ngu raüta, Jesuq raq abom ka akha chongkuqto, “Arkha maq tiina, ngi raq chongtiikang ara: Mangjong hiq wa tsiiq nai nyam armaq athuk atsom jaqsham lanta, namshiq maiqmii miitu, kongti kiimtibi ka lap ronglaq. Krai mren, ümtiikiiwa, ara namtsiiq tum thun kra athum she mirki, kra akhing na, namshiq ka pattup pat-sa jam niishe mitao wan. 10Jurwa jaqsham ka aranse li jiimin, tsapkapkap maq sham tlaq, kriiti riika, ajong jaqsham raü min, tsapkapkap maq misham. Jurwa jaqsham ka aranse sham tlaq akhing na, ajaq ka tiitsak tlaq, kriiti miika, ajong jaq tiisham raü jiimin, ajaq ka mitiitsak. 11Riita, ija, namshiq ka ara mangjong hiq wa tsiiq nai nyam ara santla, tsapkapkap maq sham man riitlan jiika, tengman tlaq wenyi tsiiq nai nyam kriika, namshiq ma jamkho mitiisham? 12Kiimaq, namshiq ka maiq tsiiq maiq nyam rüm tlan akhing na santla, tsapkap man jiika, namshiq rii she sitlaq tsiiq nai nyam kriika, namshiq ma jamkhiishe wa mitrüm kom wan?”

13“Jaqshise ngutlaq kra riika, atijong wenai ka rüm lot mak. Apaiq raq weshi ka ashulii miraq. Kiimaq weshi ka alungwii miraq. Apaiq raq weshi ka atsaihai miraq. Kiimaq weshi ka ashreng miraq. Ümniiraq, Shiikeawe nai tsiiq ka adam na ümkhiiriita jiimin shomnoq lot maü.”

Jesuq Bomtsi

(Mot 11.12-13; 5.31-32; Mak 10.11-12)

14Phorisinok raq ara traho bomchong ara taiwi raüta, tsangshiq ka khüphit nüphit wa li she, Jesuq ka shummiito. Jamkhano ngukla, tsangshiq ka kampho ma süram heanok. 15Kriikha maq, Jesuq raq tsangshiq ma nguto, “Namshiq ka maiqse makki na athuk atsom maiqse ikha tiichan ne lanta sitlan. Shatmaq, namtsan tsii kriika, Shiikeawe raq asap. Jamkhano ngukla, maiqse raq jamlai wa pinthum ara phan nguta shreng tlaq, kriika Shiikeawe makki na thiihü.”

16“Riita, Mosheq Thungtri nai shammibi lakdap na waiqtaq tri raü thun kriika, Khamlamketi we Johan pat na saüli li, maiqse raq lang wan raüta siwanto. Kra jai miishe ka, maiqse ma Shiikeawe Mungtan Tsütsa Ahea kriishe tiitai chongkuq kuqtlo. Kiimaq maiqse angu pumsiitek raq, Shiikeawe wokhong na shang wan tlo haijaq nguta, riishii riipan she warai wan tlo. 17Shatmaq tiina, ara ra nai hiq sitlaq arka, athenkai ma aje lin li min miraq. Shatmaq, Thungtri bomtsi na jamlai wa chong tlaq kriika, akhiise khubinlo tin dongdii kiimin poiki mak phan.”

18“Jurwa achak ka miim raüta, nyung nye she lamho tlaq, kriika sipe jawan ngarai tangtlo. Kiimaq jurwa junshu nyung kra romtlaq, kriiwe riimin sipe jawan ngarai tang wan tlo ngushat.”

Chiithe We Nai Lajaras

19“Man na maiq weshi ka chiithe pinthum riito. Apaiq ka athii atsin pinthum miirii maq tiimiikhiiq raüta sito. Kiimaq wranaiqshe chamtraq tiipao tiipii raüta sito. 20Kiimahali, maiq weshi ka miitsan pinthum riito. Apaiq mang ka Lajaras. Akhum ka ami atsi tam li riito. Apaiq ka anok raq chiithe we jamkea kilam da na shea thü wan tlo. 21Kriika, apaiq raq chiithe we sea phan hiq na araü baiq kiiwa mirchom siq laq nguta tiinga wan tlo. Apaiq phana ka hi kong kiimin wa raü raüta, akhum wa apaiq mitsai thun kra mesiqtlo.”

22Ranaiqshi kra miitsan we ka tsaikito. Raüta, rasetiim raq apaiq ka ramungtan na shea wanto. Raüta, Abraham ma jaqtsi nü niishe tiinga wanto. Raüta, apaiq ka ramungtan na phaqsea poi jonghea kra lomdam she nga wanto. Kiimahali, ranaiqshi ka kra chiithe we kriimin atsai hali riikito. Raüta, ama ka alap riito. 23Riita, apaiq ka wamungtan na tiiki baiqto. Kriijaq apaiq ka pinthum chamchao siwanto. Apaiq raq ra nü na liito. Raüta Abraham ka ratsan ramong nyang na nga raü chhito. Kiimaq, Lajaras ka Abraham tho na nga raü chhito. 24Kra chhi raütiishe, apaiq raq Abraham ma chongto, ‘I we Abraham le! Ngi ma mangchan laq. Laüta, Lajaras ka ana tiikilaq. Ajaqshi se ka kham na tiipum raüta, i tili ara kham maq phanshi ra saq tiikaiq kuq ki raüjaq ahea miraq. Ngi ara walü mong niishe, achong min lot mang she chamchao wankang!’

25“Kiijiishe, Abraham raq treto, ‘I se le, tsan na tiitsang laq. Ümrilung na ümniimiika phanrap phanrii chamtraq ake wan kun she. Kiimaq, Lajaras ka pinthum abi chamchao riihum raütli, arilung ka lea wanto. Shatmaq, ümchaü ka apaiq arjaq, chojong chise miishe sitlo. Kiimaq ümniika chamchao walü mong niishe khiimtlaü. 26Kra thaq niimin, ümchaü nashiq liipan niika thiikho tsaühea asi. Krai mren, ashi ra raq, anü naishiq re maq riita, namshiq re na jinho li roraü jiimin, jinho lot mak she. Kiimahali, ümnaq sitlaü reko kiimaq, ana naishiq sitiikai reko nü na, maiq ashi raq raq jin wan la nguta dan raü jiimin, jin wan lot mak she.’ 27Kiijiishe, chiithe we raq Abraham ma akha chongto, ‘Ikhiijiila, i we le, ngi raq ümniima tiipaiqnea tiikang. Lajaras ka i nyungwe jam na tiikilaq. 28Kriijaq i phu i notiim webiingi dea asi. Apaiq ka kiraüta, tsangshiq ka ara chamchao walü mong na dea wan mak chang miitu, tsii michong kuq kilaq. Tsangshiq siika mimi, atsai wan jai na, ara chamchao wamungtan na khiim wan mak chang miitu michong kuqki laq.’ ”

29“Kiijiishe, Abraham raq treto, ‘Ümphu ümnotiim ma tsii chongketi ka, Mosheq nai shammibi raq awaiq thü, Asii bomtsi asi. Ümphu ümnotiim raq tsangshiq bomchong kra tai chang.’ 30Kiijiishe, chiithe we raq treto, ‘I we Abraham le, kra lamlamse ka hong mak! Shatmaq, maiq weshi ra, ama wiishe dong wan raüta, tsangshiq phana ki raüta tsii chongkuq ki raü jiika, tsangshiq ka ngarai mong wa tsantsii miklai wan.’ 31Shatmaq, Abraham raq treto, ‘Tsangshiq raq Mosheq nai shammibi bomchong kra lang mak jiika, maiq ama wa ashi ra dong wan raüta chongkuqki raü jiimin, tsangshiq tsantsii ka klai mak dongdii miraq.’ ”

Currently Selected:

LUKAQ 16: TANGSBSI

Highlight

Copy