LUKAQ 17

Ngarai

(Mot 18.6-7,21-22; Mak 9.42)

1Jesuq raq ajaqshisetiim ma chongto, “Maiqse tiithap tha chang ngarai thiikho kriika, jamkhiiriita jiimin misi dongdii. Shatmaq, kra thiikho the wanti ma pinthum phiiptsi chang asi! 2Apaiq raq ara nyungwe nosere phong arwa, ashi ra ka ngarai thiikho na tiithap baiq nam miika, apaiq riiwe kra khoti, adangkong na longkaü jonghea ashi paq kuq raüta, sammoktra chum mong na tiidea baiq riiwe khoti ahea lin miraq. 3Kra ningkhan, namshiq ka namtsii lamshat maq sirong laq!”

“Krai mren, ümphu ümno raq ümniima ajiq klo raüla, ason riilaq. Kiimaq apaiq raq shutkang dea nguta mra tiidii raüla, apaiq mra ka adii riikuq lili riilaq. 4Apaiq raq ümniima jang miishi ashut klo raüta, ashut aweatek ümpha na wa raüta, ‘Ngi dea shutkang,’ nguta mra tiidii raüla, apaiq mra ka diikuq lili riilaq.”

Kamtsantsii

5Kiijiishe, kiimwebi raq Tatiwe ma, “Naishiq kamtsantsii ara atiima riikuq laq,” nguta chongto.

6Kiijiishe, Tatiwe raq treto, “Namshiq kamtsantsii ka jücha raise tin li jiimin, kam lanta namshiq raq ara manjong chong arma, ‘Ümrang chong maq tiiba wan laq. Laüta sammoktra jü mong na cham wan laq!’ nguta thaü han jiila mitai.”

Jaqshise Ashi Minshiiq

7“Bom shiiton ngu i, namshiq phong wa weshi ra raq, maiqmii jaqshise ashi mirüm han. Riita, apaiq ka wak jaqsham rü maq, riimak la, sku rüm rü maq, jam na misaü wa ngu i. Jam niishe saü raü jiila, ümniiraq apaiq ka tü atsam ka phaqsiq tlo laq, ngutiisha mithaü haü? 8Riimak. Kiikhiika thaümaü! Kra la na, ümniiraq apaiq ka akha mithaü haü, ‘Ngi ma dung ka tsoq laq. Laüta, ngi dungsea bala, i tho na nga laüta khelaq. Ngi sea lot jai shetiq, ümniiraq dung ka silaq!’ 9Riita, ija, ajaqshise ashi raq atijong we bom taito ngutiika, apaiq ma kechutum kechang misi sha? 10Namshiq kiimin ara jaqshise akhiisii li sitlan. Namshiq ma jamlai jaqsham achong wa, kra sham lot jai, ‘Naishiq ka miinan maiqjaq shisetiim li. Naishiq riika maiqmii minshiiq jamlai wa sitlaq, kriili sham tiikai. Maiq raq kechu tumke wan min thek mai,’ ” ngutli namshiq raq bom ka tre chang.

Jesuq Raq Atsiti Weroqshi Tiiheato

11Jesuq ka Jerusalem nü na kaiho she riito. Apaiq ka Gelili nai Samaria wang hiq rai binjü lam maq kihoto. 12Apaiq ka maiq hiqshong ashi na asaü wan she riito. Kriijaq apaiq rai maiq weroqshi thabi tsiti ka riihum kito. Tsangshiq ka phanshi alu lin lin niili chapkito. 13Raüta, “Jesuq le! Chaü le! Naishiq ara mangchan laq!” nguta gitrangto.

14Kiijiishe, Jesuq raq tsangshiq ka chhi raüta, tsangshiq ma akha chongkuqto, “Warong laq. Lanta, ramwebi ma namkhum ka tlii warongkiq.”

Krai mren, tsangshiq ka ramwebi pha na wa wawanto. Tsangshiq ka lam na awa rai bala liipan niili, tsangshiq thatsi ka heakito. 15Tsangshiq phong wa weshi raq, apaiq thatsi ka heakito she nguta sap raütiishe, apaiq ka asii lülü lam maq, Shiikeawe shom waliishe, jai na jangki nongto. 16Raüta, apaiq ka Jesuq jini chong na bumki tlii riito. Kiimaq, Jesuq ma pinthum kechu tumto. Apaiq ka Samaria we. 17Kiijiishe, Jesuq raq apaiq ma waito, “Maiq weroqshi thatsi tiihea kuq wantaq riimak sha. Riita, tsangshiq maiq wetiikaü thun kiiha ümbano? 18Riita, Shiikeawe ma kechutum wanti we ka ara pongmungti we arli sha?” 19Kra ngu raütiishe, Jesuq raq apaiq ma, “Tiidolaq. Laüta walaq. Ümkam tsantsii maq hea wan laü she,” nguta chongkuqto.

Shiikeawe Mungtan Saüho

(Mot 24.23-28,37-41)

20Kra akhing na, Phorisinok wiijamti raq Jesuq ma Shiikeawe Mungtan ka ümtin cho niishetiq wa misaüho nguta waito. Kiijiishe Jesuq raq tsangshiq bom ka akha treto, “Shiikeawe Mungtan saüho kriika, mak maq ra shra ka riimak. 21Jurmin, ‘Lii laq, Maiq Se ka arjiishe saükito ahata!’ Lo, ‘Lii laq, Maiq Se ka kriijaq she saükito ahata!’ ngutiika ngu mak. Ara jamkhano chongtiikang ngukla, Shiikeawe mungtan ka namshiq khum na sitlo.”

22Kra ngu raütiishe apaiq raq ajaqshisetiim ma, bom ka akha chongkuqto, “Akhing misaü wan, namshiq raq Maiq Se khushü ngao, achhai anyii liliim wahea la kra liisea ro nguta, namshiq ka mitsin ngin wan han. Shatmaq, namshiq raq chhilu man mirhan. 23Namshiq ma akha chongketi maiq min asi miraq, ‘Lii laq. Maiq Se ka i niikiijaq.’ Lo ‘Lii laq. Maiq Se ka arjaq ahata!’ Shatmaq, akha chongketi jai ka naqphan rongkiq. 24Rachhai ralüp wa raq, ra ka siimko maq riita, siimko na saüli liliim chhai rai tlaq ikha, Maiq Se saükai akhing niimin, mangjong hiq ara hamli na, ali aliim she, mililiim wan. Kiimaq mangjong maiqse tarü raq, apaiq ka michhi wan. 25Shatmaq, apha na apaiq ka pinthum chamchao litkot walü mong maq lea wan chang miraq. Kiimaq ümchaü pat wa maiqse raq, apaiq ka ashleq mirbaiq wan. 26Nowaq pat na jamkho siwantaq, kiikhiisii hali, Maiq Se saükai akhing niimin misi wan. 27Maiqse angu wiitarü ka, che nyang dungsea peo wali riito. Kiimaq jechak maiqwe ka arlam arwa tlungwii seali riito. Nowaq ka lai mong na dü wan jai, jülüm wan ranaiq na saüli, mangjong maiqse ka peo siqto. Raüta, mangjong maiqse ka tiimiqchup jiim wanto. 28Kiimaq kra akhing ka Lot pat na jamkho, kiikhiisii hali misaü wan. Maiqse angu wiitarü ka che nyang dungsea, piikii pealea, ashati asha, ariti ari li she misi wan. Kiimaq tüchhi tsamjang wa, ashong anga kiimung seali siwanto. 29Lot raq Sodom hiq wa achiim jin wan ri li she, Shiikeawe raq rawang win wa walü nai nyiimwin wa ka tiisat raüta, mungmaiqse ka wiita tiimiqchup tiijiim baiq wanto. 30Ikiikhiisii hali, Maiq Se saükai akhing ranaiq niimin micha wan.”

31“Kra ranaiq na juwa ajam wukhu na anga bala cha rai jiiq, apaiq raq ahuk asam kra jam mong wa lamki la nguta ajam mong na nyap wa ka maimak. Kiimahali, kra akhing na, juwa wak jam na cha rai jiiq, apaiq raq ajam na wa nguta dan wan ka ra mak she. 32Lot tanyung manphan ira tsan na tiitsang shat rong liijo! 33Jurwa maiqmii miisaq ka tiichhii wan la nguta tiima tlaq, kriiti raq atiimo mirbaiq wan. Jurwa maiqmii miisaq ka tiimo wan tlaq, kriiti ka atiichhii mirwan. 34Ngi chongpha. Kra rawa maiq ka anai changdü ashi na akon miraq. Kriiwa ashi ka ashea mirwan. Kiimaq ashi ka abaiq mirthü. 35Jechak nyung nai ka adam na tsamthaü rea miraq. Kiiwa nyungshi ka ashea mirwan. Shatmaq, ashi ka abaiq rea mirthü. 36Maiq wenai ka wakjam na, jaqsham rea miraq. Kiiwa weshi ka ashea mirwan. Shamtaq weshi ka abaiq rea mirthü.”

37Kra tai raütiishe, “Tatiwe kriika ümbano miraq?” nguta ajaqshisetiim raq apaiq ma bom ka waito. Kiijiishe, “Maiq ma ka ümbano wetlaq, kiijaq langtang kong ka mirtam,” nguta Jesuq raq tsangshiq bom ka treto.

Currently Selected:

LUKAQ 17: TANGSBSI

Highlight

Copy