LUKAQ 18

Manti-nyung Nai Phowe Shiiton

1Kiijiishe, Jesuq raq ajaqshisetiim ma tsangshiq ka wranaiqshe achu jaü ruq sichang kiimaq ümtiikaq ranaiq jiimin tsaiji tran ra mak nguta tsii chongkuqto. Apaiq raq kra tsii chongke bomtsi ka ara shiiton manphan armaq chong kuqto. Manphan ka ara. 2“Man na chela ashi na phowe ashi asi. Apaiq ka Shiikeawe miimin hai mak. Kiimaq maiq min weahü wiqhü sitiwe. 3Kiimaq kra chela na sii hali, manti-nyung ashi asi. Apaiq ka kra phowe pha na kiruq kiruq raüta, apaiq kha ka mipho kuq laq nguta, ‘O ngongwe le, mangchan laüta, i kha ara phokuq laq!’ nguta tiipaiqnea kiki kitlo. 4Shamtaq, rahiq luhea na saüli, kra phowe raq kra nyung kha ka phokuq mak tlin phin baiqto. Shatmaq, atiisup niishe, apaiq ka akha ngutiishe tiibotto, ‘Ngi ka Shiikeawe miimin hai mang. Kiimaq maiq miimin manto mang. 5Riikli jiimin, ara manti-nyung raq, ngi ma atinkhan she paq laq rat hotaq arka, ngi raq apaiq kha arka alüke chang she dea mirki. Apaiq raq jamlai lap chang wa, kriika mipho kuq ha. Ngi raq ara arkha ara phokuq mang la riiha jiila, apaiq raq paqlaq wan ruqruq raüta, i khu arshe mitiichhü baiq!’ ”

6Kra ngu raütiishe, Tatiwe raq bom ka akhiishe tiitho shatto, “Riita, ara phathe hea phowe ariiraq jamlai wa ngutaq, kra tairong liina. Apaiq riisin tla liikuqtaq, 7Ikhiijiika, Shiikeawe riika, asengi raq ranaiq rawa hoq raüta, achu jaü tlaq, kriiti ka tiiwongke miitu tsangshiq kha ka phokuq mak sha miraq? Apaiq raq tsangshiq ka jaqlolo maq khrum kuq mak sha miraq? 8Ngi chongpha. Apaiq raq tsangshiq tiiwongke miitu, kha ka mipho kuq. Kriika jaqlo miili she mipho kuq. Shatmaq, Maiq Se saüho tlaq akhing ranaiq na, mangjong hiq na kamtsantsii rümti maiq ka asi sha miloho?”

Phorisiwe Nai Phunta Hitiwe Shiiton

9Kiimahali, maiq ümriiti riiwa, tsangshiq maiqmii ka kechu maiqse kiimaq nanok ahinti thun ka, ngarai maiqsetiim nguta, khüphit nüphit sitlaqti ma, Jesuq raq ara shiiton manphan armaq bom ka chongkuqto. 10Apaiq raq akha chongto, “Akhing ashi na maiq wenai ka Shomjam na achu jaükai kito. Weshi ka Phorisiwe, kiimaq weshi ka phunta hitiwe.”

11“Phorisi we ka apaiq honhonse li chap raüta, ‘Shiikeawe le, ngi raq ümniima kechutum tiikang. Ngi ka sükha maiqse riimang; monglap tsii min rüm mang; lo, nanok wiitarü sitlaq ikha, maiqchak maiqse rai min sra kimang. Ngi ka ara phunta hitiwe akhiika riimang. 12Ngi raq chepat shi na, ranaiq nai ka amang maq achu jaü tiikang. Kiimaq aroq khu wa honglu ka tiikhea mang phan maq kuq tiikang,’ nguta achu jaüto.”

13“Shatmaq, phunta hitiwe ka alu niili chap raüta, ra nü niimin liimak maq, akhuk na ajaq maq tiitap raüta, ‘Shiikeawe le, ngi ara ngarai maiqse. Ngi ara mangchan kuq liidea!’ nguta achu jaüto.” 14“Riita, ngi chong pha,” nguta Jesuq raq nguto. “Phunta hiti we ka Shiikeawe raq apaiq ngarai ka diike jeshe, ajam na wawanto. Phorisiwe ka riimak. Ara jamkhano chongtiikang ngukla, maiqse liipan wa jurwa, maiqmii dea ajong nguta tiima tlaq, kriiti ka aran ma mitiija. Kiimaq, jurwa tiisaiq haiq shat maq sitlaq, kriiti ka ajong ma mitiija wan.”

Jesuq Raq Nosere Ma Shiiman Kuqto

(Mot 19.13-15; Mak 10.13-16)

15Kra akhing na maiq wiijamti raq tsangse noshii setiim ka, Jesuq phana shea wanto. Kriika, apaiq raq tsangshiq ma achu mishman kuq laq nguta shea wanto. Ajaqshi setiim raq kra chhi raüta, anyung wetiim ka ason riito. 16Shatmaq, Jesuq raq nosere ka atho na heato. Raüta, tsangshiq ma akha chongto, “Nosere ka ana ngi phana tiiwa ronglaq. Tsangshiq ka naq tiiwin rongkiq. Ara jamkhano chong tiikang ngukla, Shiikeawe Mungtan ka tsangshiq sitlaq akha siti rii. 17Ara tsan na tiitsang rong laq! Jurwa Shiikeawe Mungtan ka nonose raq taotlaq akha taomak, kriiti ka ümtiikii jiimin, Shiikeawe Mungtan na saülot mak miraq.”

Chiithe We

(Mot 19.16-30; Mak 10.17-31)

18Kra akhing na, Jehudi we wela we ashi raq Jesuq ma bom ka akha waito, “Maiqshaq Shrinketi we le, ngi raq pattup pat-sa rilung lap miitu ka jamlai jaqsham chang wa miraq?”

19Kiijiishe, Jesuq raq, “Ümniiraq ngi nangnga maiqshaq we nguta jaram wa ngutlaü?” nguta apaiq ma waito. “Maiqshaq ngutiika jumin ahü. Shiikeawe kli maiqshaq. 20Ümniiraq ara Shiikeawe aming thun arka asap haü: Arka, ‘Maiqchak maiqse rai naq srakiq; matwe ma naq jakiq; ahuk ma naq jakiq; mihü na kha naq nyankiq; ümnyung nai ümwe ka shreng laq,’ ” nguta chongtlo.

21Kriiwe raq, “Ngi ka nose ji miiphü, ara chong laü aming thun arka kunkun lang kang she,” nguta treto.

22Jesuq raq ara bomtre kra tai raüta, apaiq ma chongkuqto, “Ümniiraq phanshi ri dea sham chang asi shaq. Ümtachong hupsam ümchuwa, kra wiita asha riilaq. Laüta, kra sha kampho ka, miitsan maiqse ma phea kuq laq. Kra riihaü jiila, ümniika ramungtan na chiithe ma mija haü. Laüta wara. I jai arshe phan laq.” 23Shatmaq, kriiwe raq Jesuq bom ka tai raüta, apaiq ka atsan biwa tiichhi shat she riito. Atsan ka jamkhano bita ngukla, apaiq ka kai chiithe jong maiqse.

24Jesuq raq apaiq tsanbi wa ka chhito. Raüta akha nguto, “Chiithe maiqse raq Shiikeawe Mungtan na nyap wan ka aha pinthum! 25Kumtsong kaü ka, maichhi puse maq lea wan ka ajelin li miraq. Shatmaq, chiithe ma Shiikeawe Mungta na nyap wan ka hahea pinthum.”

26Apaiq bomchong ka nokwe raq tai raüta, “Ikhiijiika juli she wa mitiichhii wan lot?” nguta tsangshiq raq apaiq ma waito.

27Kiijiishe, Jesuq raq treto, “Maiqse raq lot mak chang jamlai wa sitlaq kriika, Shiikeawe raq milot.”

28Kiijiishe Petar raq treto, “Lii laq! Naishiq ka ümjai phan wan nguta, maiqmii jam awak thun wiita miimbaiq thü kai.”

29“Riikhaqli,” nguta Jesuq raq tsangshiq bom ka treto. “Kiimaq ngi raq chongtiikang arka tengteng. Jurwa ajam awak, achak ase, aphu ano, anyung awe thun ka baiq thü raüta, Shiikeawe Mungtan rittlaq, 30kriiti riika, Shiikeawe jaq wa ümchaü pat ara jiimin apa milap wan. Kiimaq jai na saüho tlaq pat na pattup pat-sa rilung milap wan.”

Apaiq Tsai Lam Thongtsam She Chongto

(Mot 20.17-19; Mak 10.32-34)

31Jesuq raq ajaqshisetiim roqshi ri anai ka pong ba na sheaho raüta chongto, “Tai ronglaq! Nashiq ka Jerusalem na kitiikai. Kiijaq Maiq Se miitu shammibi raq jamlai bom wa tiithai chong thütaq thun kra kunkun she miku wan. 32Apaiq ka Pongnok phan maiqse jaqkhon mong na mikuq baiq. Tsangshiq raq apaiq ka mihaihii; mishummii; kiimaq adü na tho maq mitho! 33Tsangshiq raq apaiq ka chunpo-nyam chongwai maq bunlak mitsat. Raüta, mitsat baiq. Shatmaq, ranaiqtsam jai maq, apaiq ka atra midong wan nong.”

34Shatmaq, ajaqshisetiim raq arthun bomtsi liichum ka akhiismin takmak riito. Ara liichum ka tsangshiq raq khonlot mak riito. Jesuq raq jamlai wa chongtlaq kriika, tsangshiq raq akhiismin taklot mak riito.

Jesuq Raq Poraki Makchuk We Tiiheato

(Mot 20.29-34; Mak 10.46-52)

35Kra akhing na, Jesuq ka Jeriko chela na saüho she riito. Kiijaq lamkii na maiq hiseati we makchuk we ashi asi. 36Apaiq raq nokmaiqse kong phong kra lea wan tho ka heraüta, “Arka jamlai wa?” nguta waito.

37“Najareth hiqti we Jesuq lea wan tlo,” nguta tsangshiq raq apaiq ma chongto.

38Kra tai raütiishe, apaiq ka, “Jesuq! Dawit Se loi! Ngi ara mangchan laq!” nguta gihoto.

39Maiqkong phong wa sinkhu na watibi raq apaiq ka asea riito. Kiimaq kaiqshak miili ngalaq nguta sonto. Shatmaq, apaiq ka tiihong wan wan khoti, “Dawit Se loi! Ngi ara mangchan laq!” nguta giruq li she gihoto.

40Krai mren, Jesuq min achap she riikito. Raüta, kriiwe ka apaiq khaki na shea wan ronglaq nguta thaüto. Apaiq ka Jesuq tho na saüwa jai she, Jesuq raq apaiq ma, 41“Ngi jaq wa ümniiraq jamlai jaüro wa?” nguta waito.

Kiijiishe, “Shiilang we le, i mak ara tiihea kuqlaq. Ngi raq i mak maq achhi nong rotiikang.”

42Kiijiishe, Jesuq raq, “Ikha jiila chhi nong liishe! Ümkam tsantsii maq heaki laüshe,” nguta apaiq bom ka treto.

43Krai mren, apaiq mak ka heakisaq li heakito. Kiimaq apaiq raq Shiikeawe ma kai kechutum tiitsam kam lam miishe, Jesuq jai ka phan wan damto. Mungmaiqse raq kra atsi heakai kra chhi raüta, tsangshiq tarü raq Shiikeawe ka tiitsamkamto.

Currently Selected:

LUKAQ 18: TANGSBSI

Highlight

Copy