LUKAQ 8

Jesuq Rai Khumdamti Jechakre

1Kra jai maq heashi siraüta, Jesuq ka khumshkhum maq, chela thun nai hiqshong thun kiina wawanto. Raüta, Shiikeawe Mungtan Tsütsa Ahea kra chongkuq wanto. Apaiq rai ajaqshisetiim roqshi ri anai kiimin wadamto. 2Kiimaq, jechakre min wiijamti wadamto. Tsangshiq ka abi winji raq arom wan wa atiiheakuq kiimaq atsi asi wa atiiheakuq wanti thun riito. Tsangshiq ka arthun ara riito: Meriq (apaiq ka Makdalen hiqti). Apaiq khum wa abi winji ka miishi jobaiqto. 3Kiimaq Herod rung na jaqshamti siihiip we Chuja tanyung Joana, kiimaq Susana thun kra riito. Kiimaq jechakre pahea ahinti, Jesuq nai ajaqshisetiim ka tsangshiq tsiiq anyam maq khrum kewan damtibi thun kra wadamto.

Tsamlai Wantiwe Shiiton

(Mot 13.1-9; Mak 4.1-9)

4Kra akhing na nokmaiqse phong ka riijang wantlii maq, Jesuq phana, chela rap wa awa rai thun kriishe saü rai wanto. Kiimaq Jesuq raq mung maiqse phong ka pahea she riitam rai wantaq kra chhi raüta, tsangshiq ma ara manphan armaq traho bomtsi she chongkuqto:

5“Akhing ashi na, maiq weshi raq wak na tsamlai wankai nguta kihoto. Apaiq raq tsamlai ka wak na wanto. Apaiq raq kra wan tlaq kriiwa tsamlai wiijam ka lam na rokto. Kriika maiq raq hok miili nibaiqto. Kiimaq wushi riili she tsunsiqto. 6Kiimaq tsamlai wiijam ka longrong hea wa na rokto. Kriika acham ka chamto. Shatmaq, hiqngam ka api se li kha maq, hiq trap chang khampü ka ahü. Kriikha maq, tsamcham setiim ka rakii raq chaq baiq raüta ashin riikito. 7Kiimahali tsamlai wiijam ka kiimko rang babaiqhü ba na rokto. Krai mren kiimko rang ka song wan raüta, tsamcham thun ka wiita tiijong lap mak miili she kaqbaiqto. Raüta tsam ka dong manki mak she mokito. 8Shatmaq, tsamlai wiijam ka hiqngam na rokto. Krai mren, tsam cham ka aheawiq jong lu wanto. Raüta, tsam ka aheawiq dong man wanto. Raüta tsamnyam nyam nyamshi niili tsamrai ka rai shishi dong manto.”

Ara chongkuq raütiishe, Jesuq raq abom ka akha shatto, “Juwa ni asi, kriiti raq tiitsang tai ronglaq!”

Jam Nguto Manphan Maq Chongkuqta?

(Mot 13.10-17; Mak 4.10-12)

9Ajaqshisetiim raq Jesuq ma ara manphan liichum ka jamlai wa nguta waito. 10Kiimaq apaiq raq treto, “Shiikeawe Mungtan na apaü raüta athü kra sap miitu tak wan tsii ka namshiq miili kuqto. Maiq nanok ahinti miika, manphan miili chongkuqtlo. Kriika tsangshiq raq ümtinkhan li lii raü min, chhi mak miraq. Kiimaq tsangshiq raq ümtinkhan li tai raü min, tak mak miraq.”

Jesuq Raq Manphan Liichum Chongkuqto

(Mot 13.18-23; Mak 4.13-20)

11“Riita, manphan liichum ka ara: Tsamlai ka Shiikeawe bomtsi. 12Tsamlai lamjong na arokti ka ara; Kriika maiq ümriiti riiwa Shiikeawe bomtsi ka tai tlo; shatmaq tsangshiq raq Shiikeawe ma kam raüta tiichhii wan jiiq nguta, Thawe raq Shiikeawe bomtsi achongkuq kra, tsangshiq tsan mong wa akhot riibaiq tlo. Raüta tsangshiq ka Shiikeawe bomtsi ma tiikam mak, tangta baiq tlo. Raüta tsangshiq ka tiichhii wan lot mak she riitlo. 13Tsamlai longrong hiawia na arokti ka ara. Maiq ümriiti riiwa Shiikeawe bomtsi ka tai raüta, chochikhiq maq lang tlo. Shatmaq, tsangshiq tsan na arang ka atsaü maq cham mak dea. Tsangshiq kam- tsantsii ka jaqlose miitu li sitlo. Krai mren, maitai chamchao akhing saü tlaq ranaiq na, tsangshiq kamtsantsii ka achhan riiwan tlo. Kriiti ka tsamlai longrong hiawia na arokti maq shiiton tlo. 14Tsamlai wiijam kiimko rang babaiqhü ba na arokti ka ara. Maiq ümriiti riiwa Shiikeawe bomtsi ka taitlo. Shamtaq, mangjong han-ngam miitu chapa tlaq kriiraq, kiimaq tsiiq nai nyam ma ranphan tlaq kiimaq mangjong han-ngam peo lam phan tiima tsantsii kriiraq kaqhotlo. Raüta, tsangshiq kamtsantsii ka tsingo mak bikitlo. Kriiti ka tsamlai shuk cham mong na arokti maq shiiton tlo. 15Tsamlai hiqngam ba na arokti ka ara. Maiq ümriiti riiwa, Shiikeawe bomtsi ka tai raüta, tsan mong na tiitsang dada maq rümtlaq, raüta thaq mak phan maq lang tlaq kra chongtlo. Raüta, atsi ango ka dong mantlo.”

Lem Ka Atli Miitu

(Mot 4.21-25)

16“Jurmin lem ka tiinyai raüta, taükok miika pang baiq mak. Kiimaq, changdü takiq niimin tobaiq mak. Kra rii na, lem ka atochang na mito. Krai mren, maiq jam mong na nyap wati ma walü li hea la miraq.”

17“Jamlai wa apaü raüta thü tlaq, kriika kinphai na mitiidong lambaiq. Kiimaq jamlai wa apang raüta thü tlaq, kriika ahum mir wan. Kiimaq walüli na ra shra she michhi.”

18“Kriikha maq, namshiq ka kai honlam shat maq tiitsang tai ronglaq. Ara jamkhano chongtiikang ngukla, ju jaq niiwa phanshi ra se asi, kriiti miika abiri apa mitiitsuq kuq wan nong. Shatmaq, ju jaq niiwa jam min ahü, kriiti jaq wiika, ajaq na chonkhi laqli se rümtiikang nguta tiima tlaq, kriimin anyea mirho nong.”

Jesuq Ma Anyung Nai Anotiim

(Mot 12.46-50; Mak 3.31-35)

19Jesuq ma anyung nai anotiim ka apaiq phana kito. Shatmaq, nokmaiqse ka riiphongki raüta, tsangshiq ka apaiq rai riihum lap mak dea riito. 20Maiq ashi ra raq, Jesuq ma chongto, “Ümnyung nai ümnotiim ka kinphai na ümniikhe nguta chaprai tlo. Kiimaq tsangshiq raq ümnaq ritrat tlo.”

21Kiijiishe, Jesuq raq tsangshiq tarü ma chongto, “I nyung nai i notiim ka, jurwa Shiikeawe bomtsi ka tai tlaq, raüta lang tlaq, kriiti thun kata, ngi ma i nyung nai i notiim,” nguta apaiq raq tsangshiq bom ka treto.

Jesuq Raq Rathaiq Tiitsaqto

(Mot 8.23-27; Mak 4.35-41)

22Ranaiqshi, Jesuq ka ajaqshisetiim rai lai ashi na ngato. Apaiq raq tsangshiq ma, “Nashiq ka Thamchum konü reko kiina warong pha,” nguta thaüto. Krai mren, tsangshiq ka wawanto. 23Tsangshiq ka jü jin wan awa rai riito. Jesuq ka akon riilaq kito. Kra akhing na, tiihanghiiq miili, rathaiq rahai wanto. Rathaiq raq kham ka brak shaq wanto. Kriikha maq, khamtso bat tlaq kriiraq lai ka kham maq tiimarat wanto. Kriikha maq, tsangshiq ka jü na thap wan nam nam ikhiishe riito. 24Kiijiishe ajaqshisetiim ka Jesuq phana wa raüta, “Tatiwe, Tatiwe! Nashiq ka khlaq wankai!” nguta Jesuq ka akon wa tiisam wato.

Kiijiishe, Jesuq ka tiidopot raüta, rathaiq nai jütso hengrai tlaq kriima aming kuqto. Krai mren, rathaiq nai khamtso ka sangsaq sangkito. 25Kra raütiishe, apaiq raq ajaqshisetiim ka, “Namshiq kamtsantsii ka ümbano?” nguta sonto.

Shatmaq, tsangshiq ka kra chhi raüta, kai awangrai li riito. Kiimaq akiinyii rai riito. Kiimaq tsangshiq liipan na, “Riita arwe arka juwa nya? Apaiq raq rathaiq rahai wa tlaq kra nai khamtso blun tlaq kra miimin aming kuq tlo!” nguta tsangshiq liipan na riibomto.

Jesuq Raq Tha Raq Arom Wan We Tiiheato

(Mot 8.28-34; Mak 5.1-20)

26Jesuq nai ajaqshisetiim ka Gerasa hong nü na jiiq wanto. Gerasa hiq ka Gelili hong na Gelili Thamchum reko na riito. 27Jesuq ka takii na satkai ri, maiq weshi kra chela na siti, abi winji raq arom wan we rai riihumto. Kriiwe ka luhea she kheahü maq sito. Kiimaq jam niimin simak maq, malap chang longsha thun kiiniili sitlo. 28Apaiq raq Jesuq ka chhi raüta, tiihong raüta siito. Raüta apaiq ka Jesuq jichong na bumki tlii raüta hali agi asii lam maq, “Ratsan ramong nyang na siti Shiikeawe Se le! Ümniiraq ngi ka jamkhii riihowa dam holaü? Ngi ümniima tiipaiqnea tiikang, ngi ka naq tsat baiqkiq!” nguta hoqto. 29Apaiq raq ara ngutaq arka, Jesuq raq kriiwe khum na abi winji sitlaq kriima, dongho tlo laq nguta ajo wishe kha maq nguto. Apaiq ka tha raq jang pahea rom wan lili riitlo. Ümtiikiiwa apaiq ka abi winji riishe rom wan tlaq, kra akhing niika, maiq raq ahok ajaq thun kra jinraü maq kha raüta thü raü jiimin, jinraü thun kra pantham panthit li pan baiq raüta, apaiq ka abi winji raq kumtsaiphii binjü kiina lüho lili riitlo.

30Jesuq raq apaiq ma, “Ümmang ka juwa?” nguta waito.

“I mang ka Lejion” nguta, apaiq raq Jesuq bom ka treto. Ara jamkhano nguta ngukla, apaiq dü na siti abi winji kong ka pahea shang wa raüta sitlo. 31Abi winji kong raq, Jesuq ma tsangshiq ka wulum mung na naq tiikikiq nguta tiipaiqneato.

32Kra tho na jora hiqkam na, atsam phaq haisea waqkong ka pahea asi riito. Abi winji kong raq, Jesuq ma tsangshiq ka waqkong khum na shang wan miitu aming jaüto. Jesuq raq tsangshiq ka tiiwato. 33Tsangshiq ka maiqwe khum kriiwa dongho raütiishe, waqkong khum niishe shang wanto. Raüta, waqkong ka hutjok, raqkam maq thamchum mong niishe lüwan raüta, tsuq wanto. Raüta, thamchum mong na tiithap baiqto.

34Kiijiishe waqkong rümtibi raq, waqkong thamchum mong na thap wan ka chhito. Kra chhi raütiishe, tsangshiq ka taülaü khiq chela kiina ju raüta, kra tsütsa ka nokwe ma tiitai chongkuqto. Kiimaq hiqshong thun na chongkuq wanto. 35Krai mren, mungmaiqse ka pinrang raüta, jamlai mra wa pinta nguta liikito. Kiimaq tsangshiq ka Jesuq phana saüto. Raüta liikiita, akhum wa tha jobaiq wantiiwe kriika, Jesuq jichong na, khea sam raüta, kiimaq asung atsii ka tsangrakrak hea she nga raü chhihoto. Kiimaq tsangshiq ka, kra chhi raüta akiinyii rai nai, ahai riito. 36Kriiwe atsi tiihea kuqtaq kra chhi wantibi raq, mungmaiqse kitaq kiima, kriiwe thatsi ka jamkho tiihea kuqta, kra tsütsa ka tsangshiq ma chongkuqto. 37Kiijiishe, mungmaiqse kra hong wa kiraitiiti thun raq, Jesuq ma apaiq ka ahin na wawan raüjaq ahea nguta chongto. Ara jamkhano chongta ngukla, tsangshiq ka kai aphiip ajiip kiinyiito. Kriikha maq, Jesuq ka lai na maq maiqhiq ahin nü niishe wawan nongto. 38Maiqwe, akhum wa tha jobaiqtiiwe raq, “Ngi ka ümniirai wadam pha,” nguta Jesuq ma tiipaiq neato.

Shatmaq, Jesuq raq apaiq ma akha tsii chongkuq raüta tiiwato, 39“Ümjam na jang wanlaq. Laüta, Shiikeawe raq ümniima jamlai phan wa shamkuqtaq kra nanok ma chongkuqlaq.”

Krai mren, kriiwe ka chela na wa raüta, Jesuq raq apaiq ma jamlai phan wa shamkuqtaq kriishe nanok ma phanchan chongkuq wanto.

Jairas Se Nai Atsiti Nyung

(Mot 9.18-26; Mak 5.21-43)

40Jesuq ka konü Tham reko niishe saü wan kiita, mungmaiqse raq apaiq ka taoto. Jamkhano ngukla, tsangshiq ka apaiq saüwa tlo haü jaq nguta, kheshat dongdii riito. 41Kra akhing na, maiq weshi, amang min Jairas nguta kriiwe ka saükito. Apaiq ka kiijaq siti sinagok na jaqshamti maiqla weshi. Apaiq ka Jesuq jichong na bumsaq raüta, tsangjam na wa i nguta tiipaiqneato. 42Apaiq raq akha tiipaiqneataq kriika, ase, jechakse, seshi laqlaqse, wiiroqshi ri wiinai maiq kriika, tsihea langlang, tsaija chhunja riito. Kriikha maq apaiq ka tiipaiq neato.

Krai mren, Jesuq ka apaiq rai wadam akhum she riito. Kra akhing na mungmaiqse ka apaiq trotam na riitsap riikhat riiphong rai wanto. 43Kra maiqphong mong na, wiiroqshi ri wiinai she, tiijaidong tsi raq chamchao raiti, jechak nyung ashi min asi riito. Krii nyung raq ajaq na kampho lakshii ümchuwa sitlaq kriika taktot maq ma wiita sumto. Shatmaq, apaiq thatsi kriika jurmin tiihea kuqlot mak riito. 44Apaiq ka maiqphong mong maq, Jesuq jai kiina wato. Raüta, Jesuq samtong jong ni na ajaq maq shamsaq shamto. Krai mren, atiijai dong tsi kiimin heakisaq heakito. 45Kiijiishe Jesuq raq, “I dü na juro sham lan?” nguta waito.

Kra tai raüta tarü raq sapmai nguta treto. Kiimaq Petar raq, “Shrawe maiq phong raq ümniika trotam maq tiichop wantaq ahata,” nguta nguto.

46Shatmaq, Jesuq raq, “Ashi ra raq i dü na jaq maq shamto. Ngi raq i dü wa ningkun kaiho asap ha,” nguta bom ka treto. 47Kiijiishe, Jechak nyung raq, apaiq ka sapto she nguta heto. Kriikha miishe, apaiq ka atiikhai rokrok wa raüta, Jesuq jichong na bumsaq riito. Raüta, nokwe tarü man na, apaiq raq Jesuq dü na ajaq maq jaram wa shamtaq, kiimaq kra shamtaq krai mren, apaiq thatsi ka jamkho heakisaq li heataq, kriishe tiitai chongkuqto. 48Kiijiishe, Jesuq raq, “I se lei, ümkam tsantsii maq heaki laü. Khu asang miishe siwan laq!” nguta apaiq ma chongkuqto.

49Jesuq raq ara bom chongke rea liipan na, maiqla we jam wa tsütsa tiitai kai maiq weshi aki kriishe saükito. Raüta, “Ümse ka ahü she. Shrinketiwe kiimin jaram she wa mipaq laq haü,” nguta apaiq raq, Jairas ma tsütsa ka chongto.

50Shatmaq, Jesuq raq kra tsütsa bom chong kra tai raüta, “Naq haikiq, kamtsantsii li rüm laq. Ümse ka asam mirwa nong,” nguta Jairas ma a chongto.

51Krai mren, Jesuq ka Jairas jam na saü wan raütiishe, apaiq rai Petar, Johan kiimaq Jakob, kiimaq jechakse nyungwe kli, tapmong na shea wanto. Nanok ahinti thun kriika, jumin tapmong niika tiiwa mak riito. 52Kiijaq, maiq thungtaq thun kriika, maaho manyi trang riito. Jesuq raq, “Naqhoq rongkiq. No ka tsai mak. Apaiq ka akon jali!” nguta tsangshiq ma chongkuqto.

53Kra taiwi raüta, tsangshiq raq apaiq ka ashummii riito. Tsangshiq raq, no ka tsaikito she nguta asap kha maq, apaiq ka shummiito. 54Shatmaq, Jesuq raq no ka ajaq maq sham raüta, “I se le, tiido laq!” nguta heato. 55Krai mren, no tsitsü ka sam wan saqli riito. Raüta, tiidopot riito. Kiimaq Jesuq raq tsangshiq ma, no ma phanshi ra tiiphaqsiq ronglaq ngutiishe thaüto. 56Tsangse ka ama wa sam wan kra chhi raüta, anyungwe ka kai awang riito. Shatmaq, Jesuq raq kra amao chang jaqsham tsütsa ka, nanok ahinti ma chong wan ra mak nguta, tsangshiq ma kiqthang bom aming kuqto.

Currently Selected:

LUKAQ 8: TANGSBSI

Highlight

Copy