LUKAQ 7
7
Roman Phentuwe Lukhapse Tsi Tiiheato
(Mot 8.5-13)
1Jesuq raq mungmaiqse ma traho bom chongkuq lot raütiishe, apaiq ka Kaparniam na wawanto. 2Kiijaq Roman phentuwe ashi asi. Aluqkhap se ka apaiq raq kai mangchantlo. Aluqkhapse ka tsihea, tsaija chhunja. 3Phentuwe raq, Jesuq ka Kaparniam na nguta tsütsa tai raüta, aluqkhap se tsi ka mitiihea kuq walaq nguta, Jehudinok nyungwere wiijamti ka, Jesuq tiihea kai tiikito. 4Tsangshiq ka Jesuq phana kiraüta, “Arwe arka ümniiraq khrumke thektlo. 5Apaiq raq namung ara lungwii tlo. Kiimaq apaiq raq naishiq ma sinagok jam min haikuqto,” nguta tiipaiqnea heakito.
6Krai mren, Jesuq ka tsangshiq rai wawan damto. Apaiq ka jamkea tho niishe saü wanto angu niishe, kiijaq phentuwe raq akongtibi ka tiiki raüta, Jesuq ma akha tiichong kito, “Shiilang we lei, ümniika naqhun nü wakiq li. Ngi raq ümniika i jam mong na tiinga li khan ka thek mang. 7Kiimahali, ngi ka i pumsii maq ümphana kili chang kiimin thek mang. Arkha maq, ümniiraq aming li kuqlaq. Haü la i lukhapse tsi ka mihiaki. 8Ngi armin la, ngi ma ajong alabi jaqkhong na sitiikang. Kiimaq, i jaq khong niimin la, phenlabi asi. Ngi raq phenla weshi ma, ‘Kilaq,’ nguta thaü kangla, apaiq ka kitlo; ngi raq phenla weshi ma, ‘Wara,’ nguta hea hala, apaiq ka i phana watlo; ngi raq i dise ka, ‘sham laq,’ nguta thaü kangla, apaiq raq jaq ka shamtlo.”
9Jesuq raq ara tsütsa ara tairaüta, apaiq ka awang riito. Apaiq raq, ajai phanti mungmaiqse thung tlaq kra pha nü na lii raüta, “Ngi chongpha. Ngi raq arwe kamtsantsii jong akha, hum mang shaqli. Israilnok mung na dongdii min, atinkhan kamtsantsii rümti ka chhi mang shaq li!” nguta bomto.
10Krai mren, phentuwe tsasoqtibi ka siihiip we jam niishe jang wan nongto. Raüta, liiwa kiita siihiip we lukhap se tsi ka aheakai wishe chhiwato.
Manti-nyung Se Amaa Wa Tiijangto
11Kra jai maq jaqlo miili Jesuq ka Nain chela na wato. Apaiq rai ajaqshisetiim nai mungmaiqse min pahea wadamto. 12Apaiq ka chela ruk kilam na saü wan ri, maiq ma lapkaiti maiq ka kongshi chela mong maq adongho kriirai riihumto. Kra ama we ka manti-nyung se riito. Apaiq ka sekhuq laqlaq se riito. Manti-nyung rai chela wa maiq ma lapkai akidamti maiq ka pahea riito. 13Tatiwe raq manti-nyung ka chhi raüta, atsan na kai mangchan tsito. Kiimaq Jesuq raq apaiq ma, “Naqhoqkiq” nguta tlin bom damto. 14Raütiishe, apaiq ka tiisotsaq raüta, ajaq maq maiq ma tek na shamto. Kiimaq maiq ma pitibi min chapsaq achap riikito. Kiijiishe, Jesuq raq, “Norii we loi! Ngi chongpha, tiido laq, laüta chap laq!” nguta ama we kra thaüto. 15Krai mren she, ama we ka ngasaq she riito. Raüta abom asa waliishe heakito. Kiimaq Jesuq raq noriiwe ka anyung ma kiinong kuqto.
16Kra chhi raüta, tsangshiq tarü ka kai awang riito. Kiimaq ahai lam maq, “Nashiq ma shammi ajong pinthum ashi she saüto. Shiikeawe raq asenginok, nashiq ara chhiikai she saükito,” nguta tsangshiq raq Shiikeawe ka tiitsam kamto.
17Ara chongtiikai, Jesuq mangjong tsütsa arka, kra mung tlotli na, kiimaq kra tro na mung ahin sitlaq thun kiina wiita phoi li she nyam wanto.
Khamlamketi We Johan Tsasoqti Jesuq Pha Na Kito
(Mot 11.2-19)
18Johan jaqshisetiim raq arthun tsütsa ara, apaiq ma chongkiita, apaiq raq ajaqshisetiim phong wa wenai ka hea raüta, 19Tatiwe phana bom tiiwai kai tiikito. Tsangnai ka Jesuq phana kiraüta, “Ümnaq ardea sha Johan raq, maiq weshi saüho tlo nguta chongtiiwe kra, sha naishiq raq ahinti miki nguta khechang wa miraq?” nguta waito.
20Krai mren, tsangnai ka Jesuq phana saüwa raüta, “Riita Khamlamketiwe Johan raq nainai arka ümniima bom tiiwaikai tiikito: Ümnaq ardea sha, apaiq raq maiq weshi saüho tlo nguta chongtiiwe kra, sha naishiq raq kriiwe ka misaüho shaqli nguta khewan ruq chang li wa?” nguta waito.
21Kra akhing bala, Jesuq raq maiq atsi asiti ka pahea tiihea kuqto. Apaiq raq, maiq ka thup atha raq arom wan wa kiimaq maiq achuk amiiti thun pahea kra tiihea kuqto. 22Kiijiishe, apaiq raq Johan tsasoqtiwe nai kiima bom ka akha chongkuq raütiishe tiiwato, “Namnai ka Johan phana jang wan nong ronglaq. Lanta, namnai mak maq jamlai phan jaqsham kaiwa wa chhitai lan kra thun ka, apaiq ma chong wan ronglaq: makchukti riimin chhi nong tlo she; hokküti kiimin akhum she riinong tlo; thabi tsi chamchao rai tliiti thun kiimin wiita tiisii hekuq wan tlo she; ni biiti riimin maiq bom tai tlo she; maiq ka amaa wiimin tiijang wan nongtlo she; kiimaq Tsütsa Ahea kra miitsan maiqse ma chongkuq wantlo. 23Riita jurwa ngi ma kam tsantsii kra tiijom mak maq sitlaq, kriiti ma pinthum kechu jonghea!”
24Johan tsasoqtiwe nai kra wawan jai she, Jesuq raq mungmaiqse kiima bom ka akhiishe chongkuqto, Riita, namshiq ka Johan bomchong taikai nguta rumnyangkhi na kilan akhing na, apaiq ka jamkhiiwe michhiki rong i nguto tiima lan? Nyiipchhi jaq rahai raq pheram pherak tiime phe tlaq ikha liikai ngutiisha kilan? 25Namshiq ka jamlai phan liikai ngutiiwa kilan? Wujong wurii se ikha, shamhea shamjü, tiimii miikhiiq raüta sitiwe liikai ngutiisha kilan? Akha tiimiikhiiq raüta siti ka, hokhambi jam na sitlo! 26Chongrong liita, namshiq ka jamkhiiwe liikai ngutiiwa kilan? Shammi we liikai nguta? Riikhaqli. Sha, namshiq raq shammi we thaq niimin, ajong chhiki lan ngu manta. 27Ara jamkhano chongtiikang ngukla, Johan miitu Asii bomtsi na: ‘Shiikeawe raq nguto, ngi raq i tsasoqti we ka ümniima sinkhu na mitiikiha. Apaiq ka kiraüta, ümkhum chang lam kra mitanho nguta chongtlo.’ 28Jesuq raq kiijaq triichesaq hali, “Ngi chong pha. Johan ka ümchaü niitaq maiqse angu siwantaq, kra thaq na ajong pinthum. Shatmaq, juwa Shiikeawe sengi phong na, aran pinthum nguta sitlaq, kriiti ka, Johan nam ma ajong,” nguta tsangshiq ma bom ka chong kuqto.
29Krai mren, maiq tarü raq, apaiq bomchong kra taito; akhek ka phunta hitinok raq Shiikeawe asii aming kra lang wanto. Krai mren, Johan raq tsangshiq ma kham lamkuqto. 30Shatmaq, Phorisinok nai Thungtri shrinketibi raq, Johan kham lamke jaqsham kriika lang mak dea riito. Tsangshiq raq Shiikeawe aming, tsangshiq ma achongkuq kriimin lang mak riito. Kiimaq kham kiimin lam mak riito.
31Jesuq raq tsangshiq ma bom akha chongkuqto, “Riita, ija, ngi raq ümchaü pat wa maiq arka, jamlai phan mo mithaq thi ha nya? Tsangshiq arka jamlai phan mo mithap thiwan i? 32Tsangshiq arka nosere kong chiiheawea wea keathung na tiitsasiq tlaq ikha. Kongshi raq, kongshi ma, ‘Naishiq ka maiqlam poi polo shinge phaita, namshiq ka naishiq rai wiinum nea dam man! Naishiq ka, maaho manyi hoq trang phaita, namshiq ka naishiq rai majo wan dam man!’ nguta riirüm sho bomtlaq ikhli. 33Khamlamketi we Johan ka namshiq phana saühoto. Raüta, amang maq, che atsam jam min phaqsiq mak maq, achu jaü wanto. Kra chhi lanta, namshiq nga, ‘Arwe khum niika abi winji asi!’ nguta ngu lan. 34Kiimaq Maiq Se ka saüho raüta, aphaq asea chamtraq maq siwanto. Kra chhi lanta, namshiq nga, ‘Arwe ara lii rong laq! Cherop, kiimaq shakaq we kaü ara. Phunta hitinok kongti, kiimaq ashleq arbaiq wan, ashe ashi maiqse kongtiwe!’ nguta ngutlan. 35Shatmaq tiina, Shiikeawe taksma bomtsi kra juro lang tlaq, kriiti thun raq arka tengto dea nguta sap tlo.”
Jesuq ka Phorisi We Simon Jam Na
36Phorisi we ashi raq, Jesuq ka ajam na raji dung siq wa i nguta hea wanto. Jesuq ka dungsea ngato. 37Kra chela na, mephe nyung ashi asi riito. Apaiq raq, Jesuq ka Phorisi we jam na dungsiq tlo nguta tho lapto. Raüta, alabastar tsabum ashi na homseng tai ka tiimali thiihoto. Raüta kra lam wan raüta apaiq ka wato. 38Apaiq ka Jesuq jai na chapto. Raüta, amakphai ka rajun wa ikha hoqsiqto. Amakphai sa raq, Jesuq hokphi ka jobai she riito. Apaiq raq, Jesuq hokphi kra akhudap maq tiiwe tatkuqto. Raüta, anü maq shupto. Kiimaq homseng tai maq, Jesuq hokphi ka jut kuqto. 39Phorisiwe raq kra chhi raüta, “Arwe arka shammi riimak. Adü na shamti nyung kra jamkhiinok maiq wa, kiimin sapphaq mak!” nguta atsan na tiimato.
40Kiijiishe, Jesuq raq kra he raüta, “Simon, ngi raq ümniima bom poshi chongke chang asi,” nguta apaiq ma chongto.
“Shrinketiwe, chong liina,” nguta apaiq raq treto.
41Jesuq raq akhiishe phankuqto, “Man na maiq wenai raq, laopan weshi jaq wa kampho namto. Weshi raq kampho kamsii shibiingi, kiimaq weshi raq roqbiingi namto. 42Tsangnai wiita raq, kra thiitham ka thamkuq lot mak dea riito. Kriikha miishe, laopanwe raq tsangnai thiitham kha ka adü li she riibaiqto. Riita, tsangnai wenai kiiwa, ümriiti ro laopanwe kra apa milungwii?”
43“Ngi raq tiima kla, thiitham apa mapkuq tiiwe raq milungwii sham,” nguta, Simon raq treto.
“Ümniiraq ngulaü ka riikhaqli,” nguta Jesuq raq treto. 44Kra, ngu raütiishe, apaiq ka kra jechak nyung phanü na lii raüta, Simon nangnga nguto, “Riita, ümniiraq arnyung ara chhi tlaü sha? Ngi ka ümjam na wakang. Shatmaq, ümniiraq i hok he ma kham min tsümkuq maü dea. Shatmaq, arnyung raq i hok ka amakphai maq heraüta, akhudap maq tiiwe tatkuqto. 45Ümniiraq ngi ka, i theaphi na shup laüta tao maü dea. Shatmaq, arnyung riika, ngi ümjam na dü wan ri li she, i hokphi na shup raüta, ngi tao wan ka atsaq min tsaq mak. 46Ümniiraq i khu na nyat miitu olip tai min kuqmaü dea. Shatmaq, arnyung riika, i hokphi na ahom phan tai maq jutkuqto. 47Riita, ümchaü ngi raq ümniima bom poshi chongpha, tailaq. Apaiq raq ngi ma lungwii tsii ka tsaühea maq tiichhi kuqto riimak sha. Arka, apaiq ngarai ka jonghea sitaq li jiimin, diikuqto she dea nguta, tiichhike hakhi ashi she. Shatmaq, ümriiti ngarai wa atsapse li diikuqtaq, kriiti riika lungwii tsii min, atsapseli rümtlo.”
48Kra ngu raütiishe, “Ümngarai thun ka diibaiqto she,” nguta Jesuq raq jechak nyung kiima chongkuqto.
49Kra taiwi raütiishe, dungsea nga wan damti maiq ahinti raq, tsangshiq tsan mong na, “Riita, arwe arka juwa, apaiq raq ngarai dongdii min diikuq lot lili ka?” nguta tiimato.
50Shatmaq, Jesuq raq jechak nyung ma, “Ümkam tsantsii raq ümkhum ka chhii wanto she. Ümchaü sanha hansang miishe walaq,” ngutiishe chongkuqto.
Currently Selected:
LUKAQ 7: TANGSBSI
Highlight
Share
Copy
Want to have your highlights saved across all your devices? Sign up or sign in
Tangsa Naga Bible - ASII LAKDAP
Copyright © 2015 by The Bible Society of India
Used by permission. All rights reserved worldwide.
