LUKAQ 6

Jesuq Ka Asii Niitiitsak Ranaiq Rümti

(Mot 12.1-8; Mak 2.23-28)

1Jesuq ka Asii Niitiitsak ranaiq na ajaqshisetiim rai tsamrü lam maq alea wan awarai riito. Ajaqshisetiim raq akhum lam maq tsam nyam ka toq raüta, tsangshiq jaqphi na notphaqto. 2Kra chhi raüta, Phorisinok wiijamti raq, “Nashiq Thungtri na Asii Niitiitsak ranaiq na jaqsham maimak, apii nguta chongtlo. Shatmaq, namshiq raq jaq ka jaram wa sham tlan?” nguta tsangshiq ma waito.

3Kiijiishe, Jesuq raq tsangshiq bom ka treto, “Namshiq raq asii lakdap wa phat man dea sha riilan, Dawit nai akongtitiim raq tsangshiq ramtsi na jamlai wa riiwanta? 4Apaiq ka Shiikeawe jam mong na wato. Raüta, honglu na akuq winsii thop kra lam raüta phaqto. Kiimaq akongtitiim miimin kuqto. Riikhaqli nashiq Thungtri miika, kra winsii ka maiq ahinti raq phaqsea mai mak, apii. Kra winsii ka ramwebi riili phaqsea chang.”

5Kra tru chongkuq raütiishe, Jesuq raq, “Maiq Se ka Asii Niitiitsak ranaiq Rümtiwe,” nguta bom ka shatto.

Jesuq Raq Ajaq Amaa Arkiwe Tiiheato

(Mot 12.9-14; Mak 3.1-6)

6Jangshi Asii Niitiitsak ranaiq akhing na hali, Jesuq ka sinagok na waraüta trahoto. Kiijaq maiq weshi, ajaq jaqtsi nüti ka ama arki we min nga raü asi riito. 7Kiijaq, Thungtri shrinketi maiq wiijamti kiimaq Phorisinok phong wa wiijamti min asi riito. Tsangshiq raq, Jesuq ka tiishut haijaq nguta, lampu rit khekham maq kheto. Kriikha maq, tsangshiq ka Jesuq raq Asii Niitiitsak ranaiq na atsi asiti ka mitiihea kuq sha tiihea kuq mak wa riijiiq nguta khekham maq liito. 8Shatmaq, Jesuq riika tsangshiq tsan mong na jamlai wa tiima tlaq kriika, akhon wishe. Kriikha maq, apaiq raq atsi we ka, “Tiidolaq, laüta ana nokwe khaki na chapwa kiq,” nguta heato. Krai mren, atsi we ka tiidopot raüta, kiijaq chap wato. 9Kiijiishe Jesuq raq tsangshiq ma chongto, “Ngi raq namshiq ma bom poshi waipha: Riita, nashiq Thungtri na Asii Niitiitsak ranaiq na jamlai jaqsham chang ngutiiwa chongtla? Akhrumke chang ngutiisha chong tla, sha ashthen baiq chang ngutiiwa chong tla? Maiqse miisaq ka atan riichang ngutiisha chong tla, sha maiqse miisaq ka atiichhun riichang ngutiiwa chong tla?” 10Kra ngu raütiishe, apaiq raq tsangshiq ka tro tri liito. Raütiishe, apaiq raq atsi we ma, “Ümjaq ka tlii laq,” nguta thaüto. Krai mren, apaiq raq ajaq ka tliisaq riito. Kiimaq, ajaq tsi kiimin, tiidoqra heasaq, nyeajok she heakito.

11Kra chhi raütiishe, tsangshiq ka walüwa ikhiishe khiq trangto. Kiimaq, tsangshiq liipan na, Jesuq ka tsangshiq thiikho na jamkhii tiithap chang wa miraq nguta, bom ka riichongto.

Akiimwetiim Roqshi Ri Wenai Shiikapto

(Mot 10.1-4; Mak 3.13-19)

12Kiitincho ji, ranaiq shi, Jesuq ka hiqlam ashi na, achu jaüwa wawanto. Kiimaq apaiq ka rawa minru Shiikeawe jaq wa achu jaüto. 13Anap ranap niishe, apaiq raq ajaqshisetiim ka apaiq tho na triitam riichom heato. Raüta, tsangshiq phong wa roqshi ri wenai ka kiimwebi miitu shiikapto. 14Tsangshiq ka arthun ara: Simon (Apaiq raq kriiwe ka Petar nguta mangto), kiimaq ano Andru; Kiimaq Jakob nai Johan, Philip nai Bartholomi. 15Kiimaq Mothiq nai Thomas; Alphias se Jakob kiimaq Simon (mung ma tsan tiitsiti we). 16Kiimaq Jakob se Judas, kiimaq Judas Iskariot, Jesuq shaphaqti we thun kra shongto.

Jesuq Raq Atsiti Pahea Tiiheato

(Mot 4.23-25)

17Jesuq ka hiqlam maq, akiimwetiim rai satki raüta, hiq thung ba na, ajaqshisetiim pahea rai chapto. Maiq mungnyung mungse, Judia wang tlotli wa, kiimaq Jerusalem wa, kiimaq Tajar nai Sidon hong na khamjong kii na atei chela thun wa awa rai thun ka kiijaq thungto. 18Tsangshiq ka Jesuq traho bomchong kra taiwa nai tsangshiq thuptsi thatsi thun kra tiiheawa nguta waraito. Kra maiqphong waraitaq kiijaq, abi winji raq arom wanti min maiq ka asi riito. Kiimaq tsangshiq thatsi kiimin wiita tiihea kuqto. 19Jesuq khum na ningkun ka jonghea asi. Kriikha maq, maiq tarü raq tsangshiq thatsi kra tiihea miitu, apaiq dii na jaq maq sham shiichaqto. Krai mren, Jesuq khum wa adong ningkun raq, apaiq dii na jaq maq shamti thun thatsi ka wiita tiihea kuqto.

Kechu Lam Nai Chamchao Lam

(Mot 5.1-12)

20Jesuq raq ajaqshisetiim pha nü na lii raüta chongto,

“Namshiq miitsan maiqse ma chochi;

Shiikeawe Mungtn ka namshiq rii!”

21“Namshiq juwa ümchaü ramtsi kriiti ma chochi;

namshiq phetak she mirhan!

“Namshiq juwa ümchaü aho riitlan;

namshiq ka anai anai she mirhan!”

22“Namshiq ka ma chochi jonghea, ümtiikiiwa maiq raq namshiq ka Maiq Se miitu angeng miraq, kiimaq ashleq mirbaiq. Kiimaq ashummii miraq, kiimaq namshiq ka abi nguta mingu! 23Kra akhing ka saüwa raüla, namshiq ka chochikhiq maq, wiinum shewa li she rong laq! Ara jamkhano chongtiikai ngukla, namshiq miitu Shiikeawe raq mungtan na poksi jonghea tiije thüli tlo. Arka ümchaütiq riimak tiina. Tsangtitiim riimin la, shammibi ka akhiisii tiichamchao wanto.

24“Shatmaq, ümchaü juwa chiithe lüwa nguta sitlanti ma,

phiiptsi chang jonghea asi.

Namshiq ka ümchaü chamtraq peo lanta sitlan!”

25“Ümchaü arong awin nguta sitlanti ma,

phiiptsi chang jonghea.

Namshiq ka songtsi ramtsi riili she micham chao wan han!

“Ümchaü juwa naihü hihe maq sitlanti ma,

phiiptsi chang jonghea.

Namshiq ka maaho manyi li she michamchao wan han!”

26“Ümchaü nokwe raq maiqshaq dea nguta shomra tlaqti ma,

phiiptsi chang jonghea.

Tsangtitiim riimin la arot shammibi ka,

akhiisii shomra siq wanto.

Wesang Raliiti Ma Mangchan Tsii

(Mot 5.38-48; 7.12)

27“Shatmaq, ümchaü namshiq arjaq i bomchong taiwanti ma chongkuq pha: Namshiq ka wesang ralii ma mang wanti ka lungwii ronglaq. Namshiq ngeng wanti ma, phanrap aheali klokuq ronglaq. 28Namshiq ma manson kiqsü maq siwanti kiima, ramli ramkuq ronglaq. Namshiq haihiiti ma, achuli jaükuq ronglaq. 29Ashi ra raq, üm theaphi na riisiiq tsat kiiphan la, theako kri chiimkuq laq. Ümsamtong jong ka nyeaho kiiphaü la, ümsamtong ranti kiimin chhut kuq laq. 30Ümjaq wa jurwa phanshi ra jaü tlaq, kriiti ma kuqlaq. Ashi ra raq ümjaq wa phanshi ra nyeaho kiiphaü la, kriika naq jaü kikiq she. 31Nanok raq namshiq ma, jamlai klo raü jiiwa, namshiq raq lungwii tlan, kra nanok ma klo kuq ronglaq.”

32“Namshiq lungwiiti kli lungwii han jiika, achu shiiman ka jam tham li she wa milap han? Shiikeawe lamphan sapmakti riimin la, tsangshiq lungwiiti ka lungwii tlo! 33Kiimaq, namshiq ma ahea shamketi miili, ahea shamkuq han jiika, jam tham li wa achu shiiman milap han? Shiikeawe lamphan sapmakti riimin la, kiikhiisii shamkuqtlo! 34Kiimaq ümriiti riiwa, namshiq ma mitham kuqlot, kriiti miili tiinam kuq han jiika, jam tham li wa achu shiiman ka milap han? Shiikeawe lamphan sapmakti riimin la, kiikhiisii atham lap chang ka tiinam kuqtlo! 35Riimak! Kiikhiika riimak! Namshiq ma wesang raliiti ka mangchan ronglaq. Kiimaq shamhea kaiwa kli shamkuq ronglaq. Tiinam kuq ronglaq, shatmaq atham jaü ka, naq tiima rongkiq. Namshiq akha sihan jiitiq, poksi jonghea milap han. Kiimaq, namshiq ka Ajong Shiikeawe setiim ma mija han. Ara jamkhano chong tiikang ngukla, apaiq riika kechutum sap makti nai abi maiqse tarü ma, maklii ashi maq mangchantlo. 36Nam We Shiikeawe ka mangchan kaü. Krai mren, namshiq min mangchan rüm lanta si ronglaq.”

Maiq Ka Naqsetsiiqkiq

(Mot 7.1-5)

37“Nanok naqsetsiiq rongkiq. Shiikeawe raq namshiq ka shin mak miraq. Nanok ka naq tiishut phit rongkiq. Shiikeawe raq namshiq tiishut phit mak miraq. Nanok mra ka adii riikuq ronglaq. Shiikeawe raq namshiq mra kiimin midii kuq. 38Jaq achü maq, nanok ma kuq ronglaq. Shiikeawe raq namshiq ma mikuq. Ngi chongpha, Shiikeawe raq namshiq ma, asho awo athap raüta mikuq. Namshiq raq nanok ma kene na jamkho thapthi tlan, kra phan phan Shiikeawe raq namshiq ma mithap thikuq.”

39Kiimaq, Jesuq raq tsangshiq ma ara manphan maq shiiton chongkuqto: “Makchuk we raq makchuk we ka shealot mak. Shea raüla, tsangnai wiita khobok na midia wan. 40Chongmang se kriika, shrawe thaq na ajong riimak. Shatmaq, ümtiikiiwa apaiq raq lak tlang kra ong wan jiiq, kra jai maq shetiq, apaiq kiimin shra we kiikhiishe mija wan lot.”

41“Ümniiraq ümphuno we mak na sinchiise kriika jaram wa liirat tlaü? Shatmaq, ümmakpo na pepan kaü tiihap raü kra riiwe ka chhi maü? 42Ümniiraq ümphuno we ma, ‘Phuno we, ümmak na sinchiise asi kra lamkuq pha,’ ngutiika jamkho ngutlaü? Shatmaq, ümmak na pepan kaü tiihap raü kra riiwe ka chhi maü? Ümniika mongnam! Apha na ümmak wa, pepan kaü tiihap tlaq kra kongkhu lambaiq laq. Kra lot jai shetiq, ümniiraq ümphuno we mak wa, sinchü kra khangriri hea she michhi haü. Kiimaq milam kuq lot haü.”

Petsi Ahea Nai Tsibi

(Mot 7.16-20; 12.33-35)

43“Achong ahea riika tsibi ka tsimak. Kiimaq, achong abi riika atsi ahea ka tsimak. 44Petsi chong ka, chonghea sha chongbi wa kriika, atsi maq tiisap tlo. Namshiq raq phupmup tsi ka, kiida raü tsung wiika pan man. Lo, spiqtsi ka kiimko chong wiika pan man. 45Maiqshaqti riika, atsan mong na tiima tsantsii ahea rüm tlo, kiiwa athuk atsom bomtsi siisaq li bom tlo. Maiq abiti riika, atsan mong na tiima tsantsii abi rüm tlaq, kiiwa abom asa niimin, abi ati siisaq li bom tlo. Ara jamkhano chongtiikang ngukla, tsan mong na jamlai wa rümtlaq, kriika anübok maq bom tlo.”

Jamhaiti Wenai

(Mot 7.24-27)

46“Namshiq raq ngi nangnga, ‘Tatiwe, Tatiwe,’ ngutiika jaram li wa hearat tlan, ngi raq namshiq ma jamlai bomtsi wa chongkuq tiikang, kra riiwe ka lang man? 47Jurwa i phana wa raüta, i bomchong ara tiitsang tai tlaq, raüta lang tlaq; ngi chongpha kriiti ka akha miraq. 48Maiq weshi raq, ajam ka longkaü wat raüta, kham chong thun kra shongto. Raüta, ajam ka haito. Apaiq ka kriiwe kiikha miraq. Akhing ashi na, rajun henghea junto. Raüta, jüchhang kham raq ajam ka kai hut wan nam nam she thaü wanto. Shatmaq, ajam ka akhiismin tiimeshi mak. Ara jamkhano ngangtaq ngukla, apaiq raq kham chong thun ka, longkaü wat raüta shongto. 49Shatmaq, jurwa i bomchong ara tai raüta, lang mak sitlaq, kriiti ka maiq weshi raq, ajam kham chong thun ka, longkaü wat raüta shong mak maq, haitaq jam kiikha miraq. Akhing ashi na, jüchhang wa saü wanto. Raüta, apaiq jam ka, tiisii rai, phiiptsi jiiptsi, jüchhang wa riishe hutbaiqtaq kiikha miraq!”

Currently Selected:

LUKAQ 6: TANGSBSI

Highlight

Copy