LUKAQ 5

Apha Wan Jaqshisetiim Shiikapto

(Mot 4.18-22; Mak 1.16-20)

1Ranaiqshi Jesuq ka Genesareth Thamchum kii na chap raü riito. Kra akhing na mung maiqse pahea ka apaiq phana Shiikeawe bomtsi tai wa, akong ada maq, riitsap riikhat warai wanto. 2Kiijaq apaiq raq lai thamkii na tat raüta athü anai asi chhito. Kra lai wiinai ka, ngiq lamtinok raq takii na atat thü. Tsangshiq ka kham na chiiq jong kaü thun kra heria riito. 3Lai ashi kriika, Simon lai riito. Jesuq ka Simon laiti kiina nga wato. Raüta, apaiq ma lai ka kham mong linlin kiina thu wan laq nguta thaüto. Kiijiishe Jesuq ka lai na nga wa raütiishe, mungmaiqse thungtlaq kiima trahokuqto.

4Apaiq raq mungmaiqse ma trahokuq lot raütiishe, “Lai ka phanshi kham atsaü linlin kiiniishe jiiq wan laq. Laüta, ümkongtitiim namtsam raq ngiq ka khup ronglaq,” nguta Simon ka thaüto.

5Kiijiishe, Simon raq, “Shrinketi we, naishiq ka rawa minru ngiq khup niisiq kai. Shatmaq, ralang khampüse dongdii min pan mak. Li jiimin, ümbom tre khup tlang pha,” nguta apaiq bom ka treto. 6Kra bom raütiishe, tsangshiq raq lai ka kham mong na jiiq wan raüta ngiq ka khupto. Kiimaq ngiq ka pahea, chiiq thun kra tiichaiki nam nam lapto. 7Kriikha maq, tsangtsam kongtibi, lai ashi na ngati kriimin tsangshiq ka khrum warong ra nguta jaq maq jap raüta, heato. Krai mren, tsangshiq kongtibi thun kriimin, lai maq waraüta, tsangshiq lai anai ri na ngiq ka tuptup lamdamto. Ngiq raq tsangshiq lai anai kra marai wan raüta, lai kriimin, jü mong na sang wan nam nam ikhiishe riito. 8Simon Petar raq, kra chhi raüta, Jesuq jichong na bumki raütiishe, “Tatiwe le, ümniika i tho wa tiijin tlo laq! Ngi arka ngarai maiq!” nguta Jesuq ma chongto.

9Apaiq nai akongtitiim thun raq kra ngiq phong achan ana pahea laprat raüta, tsangshiq ka kai awang riito. 10Simon kongtibi, Jebedi se nai Jakob nai Johan min, kai wangto. Kiijiishe, Jesuq raq Simon ma, “Ümniika naqhaikiq. Ümchaü ara miiphat she, ümniiraq maiq she mikhup haü,” nguta chongkuqto.

11Krai mren she, tsangshiq raq lai wiinai ka, takii niishe tatthüto. Raüta, phanrap ta awii thun ka kiijaq miimthü raütiishe, Jesuq jai phan phan she wawan damto.

Jesuq Raq Atsi We Tiiheato

(Mot 8.1-4; Mak 1.40-45)

12Akhing ashi na, Jesuq ka chela ashi na riito. Kiijaq maiq weshi ka rampun tsi raq, kai chamchao. Kra atsiti we raq Jesuq ka chhi raüta, Jesuq miki na bumki tlii maq, “Shiilang we lei, ümniiraq thapthi haü jiila, i thatsi arka mitiisii kuqlot haü!” nguta tiipaiqneato.

13Kiijiishe, Jesuq raq ajaq ka tiipii saq raüta, adü na jaq maq sham lam maq, “Ngi raq tiiheake rotiikang. Ümchaü min thatsi ka siikikiq!” nguta treto. Krai mren, kriiwe rampun tsi ka, tiidoqra heasaq heakito. 14Jesuq raq apaiq ma, “Ara ümthatsi heakitaq arka, maiq ahinti ju miimin naq chongkiq. Shatmaq, ramwe we phana leaphok walaq. Laüta, ümkhum kra tiichhi wakiq. Apaiq raq ümkhum ka milii laq. Apaiq raq lii jai she, maiq tarü man na, ümkhum ka Asii she dea nguta tiichhi kewan hakhi, Mosheq Thungtri maq honglu she kuq laq,” nguta apaiq ma aming kuqto.

15Shatmaq, Jesuq tsaki tsütsa kriika, kra hong binjü na barap binrii niishe nyam wanto. Kiimaq mungmaiqse pahea raq, apaiq traho bomchong kra tai miitu nai tsangshiq thatsi kra tiiheakai nguta, apaiq phana kirai wanto. 16Shatmaq, apaiq ka maiq akaiq kaiq ba na, apaiq honhonse kiholili raüta, achu jaüto.

Jesuq Raq Han Amaa We Tiiheato

(Mot 9.1-8; Mak 2.1-12)

17Ranaiqshi akhing na, Jesuq ka traho bom chongke rea riito. Kiijaq maiq wiijamti Phorisinok nai Thungtri shrinketibi min asi riito. Tsangshiq ka Gelili wang chelatek wa kiimaq Judia wang wa, kiimaq Jerusalem wa awarai riito. Maiq atsi asiti kra tiiheake miitu, Tatiwe ningkun ka Jesuq khum na asho awo asi riito. 18Maiq wiijamti raq, maiq weshi, ahan ama arki we kra, damsii na pihoto. Kiimaq tsangshiq raq apaiq ka jam mong na pi wan raüta, Jesuq khaki na tiibum wa nguta wato. 19Shatmaq, maiq phong ka pahea riitsap khat rai kha maq, tsangshiq raq apaiq ka, Jesuq phana shea wan lot mak dea. Kra kha miishe, tsangshiq raq arewe ka wukhu niishe pi wanto. Raüta, wukhu ka tiipu linto. Raüta, wukhu pu miishe, wiidamsiitam maq, maiq phong mong na, Jesuq khaki niishe arewe ka tiisatto. 20Jesuq raq tsangshiq kamtsantsii jong kra chhi raüta, atsiti we kiima, “Phuno we le, ümngarai ka diibaiqto she!” nguta nguto.

21Kra tai raütiishe, Thungri shrinketibi nai Phorisinok ka, “Riita, arwe arka juwa, akha apii riikhiq bomtlaq ara! Ngarai diiketi ka Shiikeawe li khata!” nguta tsangshiq maiqmii liipan na riibomto.

22Kra tai raütiishe, Jesuq raq tsangshiq tsan mong na jamlai wa tiimatlaq, kra kunli asap. Kriikha miishe, apaiq raq tsangshiq ma, “Riita, namtsan mong na akhiika jaram wa tiima tlan? 23Riita, ‘Ümngarai thun kra diibaiqto she,’ nguta ngo sha aje lin, sha, ‘Tiidolaq, laüta khumlaq,’ nguta ngo wa ajelin? 24Riita, Maiq Se raq ara mangjong maiqse ma ngarai diike wan arang ho tlo nguta namshiq ma hakhi tiichhi kuqpha,” nguta tsangshiq ma chongkuqto. Kra ngu raütiishe, apaiq raq ahan ama we kiima, “Ngi Maiq Se raq aming kuqtiikang. Tiidolaq. Laüta chaplaq. Kiimaq ümdamsii ka pilaq. Laüta ümjam na walaq!” nguta apaiq ka thaüto.

25Krai mren, kra atsi we ka tsangshiq tarü makki na, tiidopot riito. Raüta, apaiq bum chang damsii kra pisaq raüta, Shiikeawe tiitsam kam wa liishe, ajam na kokkok wawanto. 26Kra chhi raütiishe, tsangshiq tarü ka, kai awang riiwanto. Tsangshiq ka ahai lam maq, “Ümchaü ranaiq nashiq raq, ara awang chang jaqsham jonghea ashi chhi kai!” ngutiishe Shiikeawe ka tiitsamkamto.

Jesuq Raq Lewi Heato

(Mot 9.9-13; Mak 2.13-17)

27Arjai maq, Jesuq ka chii phai na kihoto. Raüta, phunta hiti we amang min, Lewi nguta krai riihumto. Apaiq ka phunta hichang tiip na nga raü riito. Jesuq raq apaiq ka, “I jai phan laq,” nguta heato. 28Krai mren, Lewi ka tiidopot riito. Raüta, apaiq hupsam phanrap ka kiijiili miimthü raüta, Jesuq jai she phan wanto.

29Raütiishe, Lewi raq ajam maq, Jesuq miitu phaqsea ajong ashi kloto. Kra dungsea lomwa damti phong liipan na, phunta hitinok nai nanok ahinti maiq pahea asi riito. 30Phorisinok phong wa maiq wiijamti nai Thungtri shrinketi nok tsangshiq kongtibi raq, Jesuq jaqshisetiim ma, “Namshiq ka jam nguto, phunta hitibi nai ahin anun phan ashleq arbaiqti rai, takshi pinshi maq phaqsiq dam tlan?” nguta bottsaüto.

31Kiijiishe, Jesuq raq treto, “Ju wa hansang sitlaq, kriiti miika shammi ka ra mak. Shatmaq, ju wa atsi, kriiti miika shammi ra tlo! 32Ngi ka lüsaü wase sitlaq kriiti ngarai diike kai akiha ka riimak. Shatmaq, anun phan nai ashleq arbaiq maiqse sitlaq, kriiti ngarai diike kai akiha.”

Amang Maq Siwan Raüta Achu jaü

(Mot 9.14-17; Mak 2.18-22)

33Maiq wiijamti raq Jesuq ma chongto, “Johan jaqshisetiim riika akhing khing na, amang maq siraüta, achu jaütlo. Kiimaq Phorisinok jaqshisetiim riimin kiikhiisii hali lang wantlo. Shatmaq, ümjaqshisetiim riika, chamtraq wok phetaktak miili sitlo.”

34Kiijiishe, Jesuq raq treto, “Namshiq riika, junlamti we ngashat na, kherüsea lomdamti wanwe nga tlaq kriika, amang maq sichang ngutiisha tiima tlan? Riimak! Kiikhiika riimak! 35Shatmaq, akhing ashi she misaü wan, junlamti we kriika, tsangshiq phong wa, ahin niishe mishea wan. Kra akhing niishetiq, tsangshiq ka amang maq siraüta, achu jaü chang she miraq.”

36Jesuq raq tsangshiq ma ara bom shiiton armin hali phan kuq nongto: “Jurmin samtong jong anye wa phushi kra chai raüta, samtong chü niika tiidiim mak. Kriika, apaiq raq samtong jong nye kra atu na chaibaiq miili mijaki. Kra khea nye phu kriika, khea achü thaq kiina tiidiim raüla, ram mak miraq. 37Kiimaq hali, jurmin che nye ka, ngamkhü chü tsabum niika thü mak. Kiikha thü raüla, che nye kra ka awürai raüta, tsabum kra mitiithen baiq. Kiimaq che kiimin awii li mirki. 38Kra rii na, che nye kriika ngamkhü nye tsabum na thü chang! 39Kiimaq, jurmin che chü nyang jai na, che nye kriika nyang romak she. Apaiq raq, ‘Che chü ardea asum,’ nguta mingu.”

Currently Selected:

LUKAQ 5: TANGSBSI

Highlight

Copy