LUKAQ 4
4
Jesuq Ka Tha Raq Maitaito
(Mot 4.1-11; Mak 1.12-13)
1Jesuq ka Jordan rai maq akhum na Asii Wenyi raq ama jang wanto. Kiimaq apaiq ka Asii Wenyi raq kumtsaiphii binjü niishe sheahoto. 2Kiijaq Thawe raq apaiq ka raroqblai maitaito. Kra liipan bala, apaiq ka jam min phaqsiq mak, amang maq sito. Kriikha maq, kra maitai akhing thum jai na, apaiq ka aramtsi riito.
3Kriikha maq, Thawe raq apaiq ma, “Riita, ümniika Shiikeawe Se dea jiika, ara longpo thun arka winsii ma tiija liina.”
4Kiijiishe, Jesuq raq, “Asii lakdap na, ‘Maiqse ka winsii lamlamse phaqsiq raütli atra si mak,’ ” nguta chongtlo.
5Kiijiishe Thawe raq apaiq ka hiq bashi diiluwiq ba kiiniishe shea wanto. Raüta, maklii liipan niili, mangjong hiq wa maiqmung thun kra apaiq miishe tiichhi kuqto. 6Raüta, “Ngi raq arthun maiq mung jonglu sitlaq ara, nai kiijaq tsiiq nai nyam tum ümtinkhan wa sitlaq kra, ümniiraq phaqsea miitu, arang ka ümniimiishe mikuq kang,” nguta Thawe raq apaiq ma chongto. “Arthun arka, i jaq na akekun siisaq she. Kiimaq ngi raq ümriiti ma kewan wa lungwii tiikang, kriiti ma mikiinong kuqha. 7Riita, ümchaü min, ümniiraq ngi ara shomnoq haü jiika, arthun arka ümniirii she miraq,” nguta Thawe raq apaiq ka maitaito.
8Kiijiishe, Jesuq raq treto, “Asii bomtsi na akha chongtlo, ‘Tati Shiikeawe kli üm Shiikeawe. Apaiq kli shomnoq wan lili riilaq!’ ”
9Kiijiishe Thawe raq apaiq ka Jerusalem niishe shea wanto. Raüta, Shomjam wukhu diilu pinthum ba kiina tiichap raüta, apaiq ma chongto, “Riita, ümniika Shiikeawe Se dea jiika, ara wukhupong armaq, hiq na dea wan liina. 10Ara jamkhano chongtiikang ngukla, Asii bomtsi na, ‘Shiikeawe raq rasetiim tiiki raüta, ümniika mitiichhii kuq,’ nguta chongtlo. 11Kiimaq, Asii bomtsi na, ‘Ümhok ümjaq ka longkaü thaq na tiibuk rai jiiq nguta, tsangshiq raq ümniika, jaq maq kamho saqli mikamho,’ ngutiimin chongtlo.”
12Kiijiishe, Jesuq raq treto, “Asii bomtsi na, ‘Üm Tati Shiikeawe ka tamlamlam maq naq maitaikiq’ ” nguta chongtlo.
13Krai mren, Thawe raq Jesuq ka, phanrap phanrii maq maitai lot raütiishe, heashi miitu apaiq ka teithü raütiishe, Thawe ka ahin niishe kihoto.
Jesuq Jaqsham Ka Gelili Maq Phahoto
(Mot 4.12-17; Mak 1.14-15)
14Kra akhing na, Jesuq ka Gelili hong na jang wan nongto. Kiimaq apaiq khum na Asii Wenyi ningkun ka ama riito. Apaiq tsütsa ka, kra binjü tlotli niishe nyam wanto. 15Apaiq raq sinagok thun na khum raüta, bom chongke tra hokuqto. Kiimaq apaiq ka nokmaiqse tarü raq shomrato.
Najarethti Raq Jesuq Taomak
(Mot 13.53-58; Mak 6.1-6)
16Kra akhing na, Jesuq ka apaiq jonglu wan chang hiqshong Najareth hiq na wato. Raüta, Asii Niitiitsak ranaiq na, apaiq ka rahin jaq kitlaq kiikha, sinagok na kito. Raüta, apaiq ka Asii bomtsi phat chapto. 17Kiimaq apaiq ma, shammi Isaia lakdap ka lamkuqto. Apaiq raq lakdam kom ka tlii lin raüta, ara bomtsi ara phatto,
18“Tatiwe Wenyi ka i khum na asi.
Ara jamkhano chongtiikang ngukla,
apaiq raq ngi ka,
miitsan miijan maiqse ma,
tsütsa ahea chongke miitu shongto.
Apaiq raq ngi ka kharü mong na siti ma,
kharü diike tsütsa chongke kai tiikito.
Di ama ikha chamchao maiqse sitlaq,
kriiti ka dokda kai tiikito.
19Kiimaq Tati raq asengi chhii wan rahiq akhing ka,
saüto she nguta chong kai tiikito.”
20Jesuq raq lakdam kom ka, akom riinong raüta, sinagok liidamti we jaq na hali jang kuq nongto. Kiimaq, apaiq ka anga riito. Kiimaq, sinagok na ngati thun maiq wiitarü raq, tsangshiq maklii ka apaiq phanü na tsangrakrak maq siisaq liito. 21Apaiq raq tsangshiq ma, “Ara Asii bomtsi phat kai arka, ümchaü ranaiq namshiq makki niishe kuwato,” nguta tsangshiq ma tra hokuqto.
22Apaiq traho bom chongke kra tai raüta, tsangshiq tarü raq tsan na washasha maq taito. Kiimaq tsangshiq tsan heali chhaq riito. Kiimaq apaiq raq jan jang jang hea maq bomchong kewan kra tai raüta, tsangshiq ka, kai amao riito. Kiimaq tsangshiq liipan na, “Riita, notsam, apaiq arka Joseph se riimak shiiraq?” nguta riiwaito.
23Kiijiishe apaiq raq, “Ngi raq sapshat, namshiq raq, ngi ka ara bomtsi armaq mikhettot han, ‘Taktot we, ümthatsi ka kongkhu tiihea liishaq,’ nguta mishipoq han. Kiimaq, namshiq raq, ngi nangnga, Kaparniam na awang chang jaqsham wankang kra, ara i hiqshong ajiimin sham nonglaq nguta mingu han.” 24Kra bom raütiishe Jesuq raq tsangshiq ma, “Shammi ngutlaq kriika, ahiqshongti raq tao mak,” ngutiishe tsangshiq ma chongkuqto.
25Kra ngu raütiishe Jesuq raq tsangshiq ma akha chongkuqto, “Ngi chongpha, taironglaq: Shammi we Elija pat na, Israilnok mung na manti-nyungre ka pahea riito. Kra pat na wiitsam ri wiithiq ka, ra ka akhiismin jun mak dongdii, rarin dongto. Kriikha maq, Israil mung tlotli na henghea pinthum ramdongto. 26Shatmaq, kra ramdong bala Shiikeawe raq Elija ka Israilnok mungti pha na tiiwa mak dea. Shatmaq, apaiq ka Sidon hong na, Jarephath chela na siti manti-nyung ashi phana tiiwato. 27Kiimahali, shammi we Elisha pat niimin, Israilnok mung na, thabi tsisiti chamchao maiqse ka pahea asi riito. Shatmaq, tsangshiq phong wa, juwe thatsi min tiihea kuq mak dea riito. Shatmaq, Siria mungti Naaman thatsi kli tiihea kuqto.”
28Jesuq raq tsangshiq ma ara traho bom chongkuqtaq kriika, kiijaq sinagok na ngati nokmaiqse thun raq, apaiq bom shiitontlaq kra tai raüta, kriika tsangshiq nangnga shiitontlo ngutiishe takto. Kriikha maq tsangshiq ka, amok dungdung she, khiqtrangto. 29Raüta, tsangshiq ka tiido rang raüta, tsangshiq raq Jesuq ka chela mong maq chiiphai na saüli, wiithu wiiliiq miishe johoto. Kiimaq, tsangshiq chela te chang hiqlam khupong ba kiiniishe shea wanto. Raüta, tsangshiq raq apaiq ka longraq kam kriimaq tiidea liiq baiq lai nguta danto. 30Shatmaq, apaiq ka maiq phong riitsap khat rai wantlaq kra mong miili, tantan maq ahin nü niishe kihoto.
Jesuq Raq Tha Raq Arom Wan We Tiiheato
(Mak 1.21-28)
31Kra miishe, Jesuq ka Gelili wang na, Kaparniam chela kiiniishe wawanto. Raüta, Asii Niitiitsak ranaiq na, sinagok maq nokmaiqse ma tra hokuqto. 32Apaiq raq tsangshiq ma, arang ajong ho raüta bom chongke wan kra chhi raüta, tsangshiq ka kai awang riito. 33Kra akhing na, sinagok na maiqwe ashi ka thabi raq arom wan asi. Apaiq ka hong raüta, agi lülü gihoto. 34Apaiq ka, “Ai! Najarethti Jesuq le. Ümniiraq naishiq ka jamkhii riiho she wa tan tlaü? Ümniika naishiq tsea wa sha walaü? Ümniika juwa ngi raq asap ha! Ümniika Shiikeawe raq atiiki Asii kiimwe!” nguta gihoto.
35Jesuq raq ashe tha winji ka, “Kaiq laq, laüta, arwe khum wa dongho tlo laq!” nguta jobaiqto. Kiijiishe Tha raq kriiwe ka hiq na tiikülam she, tsangshiq tarü makki na liiq baito. Raüta, tha ka apaiq khum kiiwiishe donghoto. Shatmaq, tha raq apaiq ka tiimitsi mak dea.
36Kra tha jobaiq jaqsham kra chhi raüta, nokmaiqse ka kai awang riito. Kiimaq tsangshiq liipan na, “Apaiq bomtsi arka aheng pinthum! Apaiq raq arang aheng nai ningkun ajong maq, thupbi thati winji kong thun kiimin tiidoq mra jobaiqtlo!” nguta riibomto. 37Krai mren, Jesuq tsütsa ka kra binjü na, shokrap norii niishe nyam wanto.
Jesuq Raq Atsiti Pahea Tiiheato
(Mot 8.14-17; Mak 1.29-34)
38Jesuq ka kra sinagok maq tiido wan raüta, Simon jam niishe wawanto. Simon nyaichhi ka tsidong, tsihea riito. Kiimaq tsangshiq raq Jesuq ma, apaiq ka atsi nguta chongto. 39Kiijiishe, apaiq ka wa raüta, atsiti nyung changdü tho na chapto. Raüta, atsi tha ka jobaiqto. Krai mren, atsi ka tiidoqra heasaq li heakito. Kiimaq, apaiq ka tiidopot raüta, tsangshiq ma tashong wachaq keshe tiimeshi hoto.
40Raji rashe nyap jai niishe, nokmaiqse raq akong akiimtibi, phan phan thuptsi thatsi chamchao maiqse thun kriika, Jesuq phaniishe sheahoto. Krai mren, apaiq raq tsangshiq tarü khum na, ajaq maq sham raüta, tarü thatsi ka tiihea kuqto. 41Abi winji thun kiimin, “Ümniika Shiikeawe Se!” nguta, agi asii wa trang la, maiq pahea khum wa, dongho raüta, pongpin riipin pintrangto.
Jesuq raq abi winji kong ka, tiiki miilaq asea riito. Kiimaq tsangshiq ma, bom ka poshi min tiibom mak riito. Apaiq raq tsangshiq ka jamkhano tiibom mak ngukla, tsangshiq raq apaiq ka Khristo nguta asap. Kriikha maq apaiq raq tsangshiq ka tiibom mak.
Jesuq Raq Sinagok Maq Trahoto
(Mak 1.35-39)
42Ranap rawükhang niishe, Jesuq ka kra chela maq, maiq akaiqkaiq ba niishe wawanto. Shatmaq, nokmaiqse thun ka, apaiq rit she riishun nyiim wanto. Raüta, tsangshiq raq apaiq ka hum jai she, apaiq ka ahin na naqkiho kiq nguta tiiwinto. 43Shatmaq, apaiq raq tsangshiq ma akha chongkuqto, “Ngi raq, Shiikeawe mungtan Tsütsa Ahea kra, chela ahin niimin chongke chang dongdii. Ara jamkhano chongtiikang ngukla, Shiikeawe raq ngi ka ara jaqsham ara miitu tiikito.”
44Krai mren, apaiq raq sinagok thun wiita na kiraüta, Judia mung tlotli na trahokuqto.
Currently Selected:
LUKAQ 4: TANGSBSI
Highlight
Share
Copy
Want to have your highlights saved across all your devices? Sign up or sign in
Tangsa Naga Bible - ASII LAKDAP
Copyright © 2015 by The Bible Society of India
Used by permission. All rights reserved worldwide.
