LUKAQ 3

Khamlamketiwe Johan Traho

(Mot 3.1-12; Mak 1.1-8; Joh 1.19-28)

1Kra akhing ka, Roman Hokham we Tiberias raq Hokham jawan li maq, wiiroqshi ri wiibiingi she riito. Pontias Pilat ka Judia wang na Wanghupti we riito. Herod ka Gelili hong na hokham riito. Kiimaq ano Philip ka Iturea nai Trakhonitis hong lang wanti riito. Lisanias ka Abilene hong langti riito. 2Kiimaq Annas nai Kaiaphas ka ramwe jong jati riito. Kra akhing na, Shiikeawe raq apaiq bomtsi ka Jekeria se Johan, kumtsaiphii na sitiwe kriima chongkuqtlo. 3Kriikha maq, Johan raq Jordan rai reko binjü thun wiita hamli na, khumshkhum maq, nokmaiqse ma, Shiikeawe bomtsi ka akha tra hokuqto, “Namshiq tsantsii klaitlo ronglaq. Lanta, kham ka lamtlo ronglaq. Namshiq tsantsii klai han jiila, Shiikeawe raq namshiq ngarai kra midii kuq.” 4Arka, Shammiwe Isaia lakdap na waiqthü taq kra phan phan she hong wanto. Kiijaq akha waiqthüto:

“Kumtsaiphii binjü na maiq ashi ra raq agilülü riim tlo:

‘Tatiwe kai ma lam ka tanholi laq;

Apaiq kai ma lam ka liitatat tanholi laq!

5Jükhü hiqwii thun ka wiita tiima phongholi laq.

Ku akin angu thun ka wiita tri soqho li laq.

Lamkong lamnong thun kra liitatat she tanho laq.

Kiimaq lam abibi ka wiita tiinyea soqholi laq.

6Maiqse angu kunli raq,

Shiikeawe Tiichhii Wan jaqsham kra michhi wan!’ ”

7Krai mren, mungmaiqse ka akong ada maq, Johan phana kham tlamkai kito. Johan raq tsangshiq ka akha sonto, “Paüsang nyiqlase kong loi! Namshiq khuthaq na Shiikeawe tsankhiq walü tu saü wan tlaq kriiwa, rakhütsiri maq kham lam lan tli, mihang wanlot han ngutiisha tiima tlan? 8Namshiq raq, ngarai tsantsii ka klai kai she dea nguta, namshiq jaqsham maq, atsi ango kra tiichhi kuq ronglaq. Namshiq liipan na, ‘Nashiq ka Abraham lai ala. Nashiq ka Asii maiqsetiim,’ ngutiika, naq tiishom ra rongkiq. Ngi chongpha. Tai ronglaq. Shiikeawe raq ara longkaü thun arwiili, Abraham lai ala kra mitiidong lot! 9Ümchaü, mang kaü ka, pe tsihü chong thun kra arang chong maq daq baiq miitu, tiijeje thü tlo. Atsi ahea tsikuq mak pechong thun kra, wiita tiikham raüta, adaq she mirbaiq. Raüta, wa na michaq baiq.”

10Kra traho bomchong kra tai raütiishe, nokmaiqse raq apaiq ma waito, “Riita, ikhiijiika, Shiikeawe tsan kra tiihea wan miitu, naishiq riika jamlai phan shamhea kaiwa jaqsham chang she wa miraq?”

11Kiijiishe, apaiq raq tsangshiq bom ka treto, “Ju jaq niiwa, samtong anai asi, kriiti raq samtong ashi min ahüti miitsan maiqse kiima, samtong ashi kra kuq ronglaq. Kiimaq ju wa wok phetak tak sitlan, kriiti raq miitsan maiqse amang ale maq sitlaqti kriima, tü adung ka kran kuq lanta si ronglaq.”

12Kiimaq, phunta hitinok wa, maiq wiijamti ka apaiq phana kham lamkai kito. Kiimaq tsangshiq raq apaiq ma waito, “Riita, shra we le, naishiq riiha, jamlai phan jaqsham chang wa miraq?”

13Kiijiishe, “Phunta ka ümchu hiwan chang wa, kra thaq na achan ka naqhi rongkiq she,” nguta apaiq raq tsangshiq ma chongkuqto.

14Kiimahali, phenlanok wiijamti riimin apaiq ma waito, “Riita, shra we le, naishiq ha? Naishiq riika jamlai phan jaqsham chang wa miraq?”

Kiijiishe Apaiq raq tsangshiq ma chongkuqto, “Namshiq raq ju jaq wiimin, ningkun ningkaq maq, kampho ka naq siq rongkiq. Kiimaq, kha ahü na, maiq ka naq shra rongkiq. Namshiq maiqmii laqkhaq kra phaqsiq lantli si ronglaq.”

15Kra akhing na, Johan traho bom chongke kra tai raüta, mungmaiqse thun kriika, tsangshiq tsanchhii wa hunhun she riito. Kiimaq pinthum maiqkam sia chang jaqsham michhi rong i she nguta, phaq tiitsii ni tiitsii miishe kheto. Kra akhing na, mungmaiqse raq, Johan kriiwa Khristo nguta tiimato. 16Kriikha niishe, Johan raq tsangshiq ma bom ka akha tiitsang chongkuq nongto, “Ngi raq namshiq ka kham miili lamkuq tiikang. Shatmaq, ngi thaq na, maiq ajong ashi saüho tlo she. Ngi ka apaiq hokpa raü kra shatketi we dise khan min thek mang. Apaiq raq namshiq ka Asii Wenyi nai wa miishe kham milam kuq. 17Apaiq ka ümchaü, akhing na wankhü kaü doshat miishe khetlo. Kriimaq, tsam achhii chhii thun kriika wiita ajap mirbaiq. Raüta, tsam awongsiisii thun kriika, tum akhiiq mong niishe samhea wiq maq misaiq sam. Kiimaq tsam achhii chhii thun kriika, pattup pat-sa matki mak phan walü nyai rai wan tlaq kiijiishe miphong chaq baiq.”

18Ara chong tiikai akha, Johan raq nokmaiqse ma Tsütsa Ahea ka phanrap phanrii maq shiiton raüta chongkuqto. Kiimaq tsangshiq tsantsii ka ngarai lam phan kiiwa, klai tlo ronglaq nguta chong kuqto. 19Shatmaq, Johan raq Wanghupti we Herod kriika ason riito. Apaiq ka jamkhano sonta ngukla, apaiq raq anochhi-nyung Herodias kra romphaqto. Kiimaq apaiq raq abi ngarai pahea tang wantaq kriikha na sonto. 20Shatmaq, kra thaq niimin tiinanpot, abi pinthum she ka, Herod raq Johan ka lap raüta, phaqtek mong niishe shaq baiqto.

Jesuq Raq Kham Lamto

(Mot 3.13-17; Mak 1.9-11)

21Kra akhing na nokmaiqse thun tarü raq, khamlam wan lot jai she, Jesuq riimin kham ka lam wanto. Apaiq raq khamlam akhing na achu jaüto. Apaiq achu jaürea akhing na, ramungtan ka atlin riikito. 22Kiimaq, Asii Wenyi ka apaiq khuthaq na, haütaü kaü ikha satkito. Kiimaq kra akhing na ramungtan wa maiq bom ashi ka akha saüto, “Ümniika I Se shaq. Ngi ka ümniima pinthum khoqriiq tiikang.”

Jesuq Weraü

(Mot 1.1-17)

23Jesuq raq apaiq traho jaqsham phaho akhing na, apaiq rawii ka wiiroqtsam tin she riito. Apaiq ka nanok raq, Joseph se nguta tiima wanto. Joseph ka Heli se. 24Heli ka Matthat se. Matthat ka Lewi se. Lewi ka Melki se. Melki ka Jannai se. Jannai ka Joseph se. 25Joseph ka Mattathias se. Mattathias ka Amos se. Amos ka Nahum se. Nahum ka Esli se. Esli ka Naggai se. 26Naggai ka Maath se. Maath ka Mattathias se. Mattathias ka Semein se. Semein ka Josekh se. Josekh ka Joda se. 27Joda ka Joanam se. Joanam ka Rhesa se. Rhesa ka Jerubbabel se. Jerubbabel ka Shealtiel se. Shealtiel ka Neri se. 28Neri ka Melkhi se. Melkhi ka Adi se. Adi ka Kosam se. Kosam ka Elmadam se. Elmadam ka Er se. 29Er ka Joshua se. Joshua ka Eliejar se. Eliejar ka Jorim se. Jorim ka Matthat se. Matthat ka Lewi se. 30Lewi ka Simeon se. Simeon ka Juda se. Juda ka Joseph se. Joseph ka Jonam se. Jonam ka Eliakim se. 31Eliakim ka Melea se. Melea ka Menna se. Menna ka Mattatha se. Mattatha ka Nathan se. Nathan ka Dawit se. 32Dawit ka Jessi se. Jessi Obed se. Obed ka Boaj se. Boaj ka Salmon se. Salmon ka Nashon se. 33Nashon ka Amminadab se. Amminadab ka Admin se. Admin ka Arni se. Arni ka Hejron se. Hejron ka Perej se. Perej ka Juda se. 34Juda ka Jakob se. Jakob ka Isak se. Isak ka Abraham se. Abraham ka Tera se. Tera ka Nahor se. 35Nahor ka Serug se. Serug ka Reu se. Reu ka Peleg se. Peleg ka Ebar se. Ebar ka Shela se. 36Shela ka Kainan se. Kainan ka Arphajad se. Arphajad ka Shem se. Shem ka Nowaq se. Nowaq ka Lamekh se. 37Lamekh ka Methusela se. Methusela ka Enokh se. Enokh ka Jared se. Jared ka Mahalaleel se. Mahalaleel ka Kenan se. 38Kenan ka Enosh se. Enosh ka Seth se. Seth ka Adam se. Adam ka Shiikeawe se.

Currently Selected:

LUKAQ 3: TANGSBSI

Highlight

Copy