LUKAQ 2

Jesuq Rawüchhi

(Mot 1.18-25)

1Kiitincho ji, Roman Hokhamwe Agastas raq apaiq jaqkhong na mung ümchuwa sitlaq, kriiwa maiq ka wea miitu aming kuqto. 2Ara apha shaq shaq mung maiqse wea wantaq akhing na, Koirinias ka Siria wang na Wanghupti we riito. 3Kra aming kuqtaq krai mren, mungnyung mungse tarü raq, maiqmiimii chela na, maiqmii mang tiiwaiqkai kihoto.

4Kiimaq, Joseph ka Gelili wang na Najareth chela maq, Judia wang na Bethlehem chela Dawit rawüchhi chang hiq na kihoto. Joseph ka Dawit saüse phan kha maq, kiijaq kihoto. 5Apaiq ka tsang-nyung ma nguta awaiwi she Meriq rai, tsangnai mang tiiwaiqkai Bethlehem na kihoto. Kra akhing na Meriq ka wiihan. 6Kiimaq tsangnai ka Bethlehem na bala niili, nowüchhi akhing rahiq ka saüto. 7Meriq raq ase chhikhu se ka humto. Apaiq raq noshii ka no napkhea maq jobto. Raüta minsaü tsam thiike chang long pinkhü na tiikonto. Kiitiikaq tsangshiq jap miitu wanjaptiip na khok ka bin mak, ahü.

Sku Rümtibi Nai Rasetiim

8Kra akhing na, sku rümtikong maiq wiijamti ka, kra binjü na, tsangshiq skukong kra rüm, rum na ajap asi. 9Tatiwe rase ashi ka tsangshiq pha na satkito. Raüta Tatiwe ngao chhainyii ka tsangshiq thaq na achhai anyii lito. Kra chhi raüta, tsangshiq ka kai ahairai nai atiirai riito. 10Shatmaq, rase raq tsangshiq ma chongto, “Namshiq ka naqhai rongkiq! Ngi ka namshiq ma, tsütsa ahea pinthum kra tiitaikekai kikang. Ara tsütsa arka Israilnok tarü ma, chochi chang jonghea. 11Ümchaü rawa, Dawit chela na namshiq Chhiiti we, Tati Khristo chiito. 12Riita ara chongtiikang tsütsa arka, tengto dea nguta namshiq raq tiitsang chang ka ara: Namshiq raq noshii ka, no napchang khea maq jop raüta, minsaü pinkhü na tiikon raü michhi wa han.”

13Kra ngori li she, tiihanghiiq miili, rase krai, ramungtan na rasekong phenlabi ka, ahing amun chhito. Kiimaq, tsangshiq raq Shiikeawe ka shomnoq trang akha shinge sia taito:

14“Sanseng ramungtan na Shiikeawe khushü mijong laq,

apaiq raq lungwiitlaq asengibi,

mangjong hiq na siti ma hansang mirlaq!”

15Riita, kra rasetiim thun ka, tsangshiq pha wa, ramungtan na jang wan jai she, “Lo, nashiq ka Bethlehem na kirongpha. Laita, Tatiwe raq chongtaq ara, liiwa rong i,” nguta sku rümtise kong liipan na riichongto.

16Krai mren, tsangshiq ka taülaü khiq she, Bethlehem na wawanto. Raüta, Meriq nai Joseph ka humto. Kiimaq, noshii ka minsaü pin na weraü dea chhi wato. 17Sku rümti kong raq, no ka chhiwa raüta, Meriq nai Joseph ma rasetiim raq tsangshiq ma, no ka miitu jamlai bom wa chongkuqtaq, kra tsütsa ka tsangshiq ma tiitai kuqto. 18Sku rümti kong raq, tsütsa chongkuqtaq kra tai wantibi thun maiq tarü raq amao riito. 19Meriq raq arthun bomtsi chongtaq thun ara tai raüta, apaiq raq pinthum atsan mong na, rashi hiqwea tiimato. 20Kiimaq, sku rümtise kong kriika, rase raq tsangshiq ma achongkuq bomtsi kra phanphan, phanrap kuwan kra chhi raüta tsangshiq ka kai Shiikeawe shomra watrang lam maq, ashi ange liishe, tsangshiq hai chang wakjam ram kiina jang wan nongto.

Jesuq Athohan Poi

21Nowüchhi jai maq chepat shi siraüta no ma athohan poi kra kloto. No mang ka, rase raq anyung wok na mipo shaq na chongtaq, kra phanphan Jesuq nguta mangto.

Jesuq Ka Shomjam Maq Kiinong Kuqto

22Joseph nai Meriq ma, Mosheq Thungtri maq no khum kra tiisii wan poi klo akhing rahiq she saüto. Kriikha miishe, tsangnai raq no ka, Tatiwe ma kiinongke miitu, Jerusalem na boqhoto. 23Arka, Tatiwe Tri na, “Rawü chhikhu maiqwe se angu khumtek kriika, Tatiwe ma kiinongke chang,” nguta chongtaq kra phanphan kloto. 24Kiimaq, tsangnai raq Tatiwe Thungtri na chongtlaq kra phanphan sii hali, haütaü kaü anai riimak la, paro aresenai anai kriimin lamho raüta, honglu na kekai nguta kito.

25Kra akhing na, Jerusalem na siti maiq weshi, amang Simeon nguta asi. Apaiq ka Shiikeawe lam phan na, tsapsaü kapse maq siwanti, kiimaq kechu maiqse ashi. Kiimaq, apaiq ka Shiikeawe raq Israilnok kra chhii kai akhing rahiq kra saütlo haü jiilei nguta, maklii khamthii maq khewantiwe riito. Kra akhing na Asii Wenyi ka akhum na ama riito. 26Kiimaq, apaiq miika, Shiikeawe raq kiq akhamkuq Tatiwe Khristo saüho tlaq, kriiwe sham kra chhithü hü maq, apaiq ka tsai mak miraq nguta, Asii Wenyi raq apaiq tsan mong na, tiitsang dada achongke wishe dongdii. 27Krai mren, Simeon ka Asii Wenyi raq shun shea raüta, Shomjam mong na wato. Riita, ija, anyung nai awe raq, noshii Jesuq ka Thungtri ramram shiiku, Shiikeawe ma kiinongke Shomjam mong na boq wanto. 28Kiijiishe, Simeon raq no ka ajaq na do raüta, Shiikeawe ma akha kechu tumto:

29“Tatiwe le, ümchaü sanha,

ümkiqkham min tiihong laü she.

Ümjaqshi se arma,

hansang maq wawan miitu,

kiim riiphea jaqkhaq raüli she tiipa kuqlaq,

30Ümniiraq tiichhii wan lam ka tankuq laü she.

Arka ümchaü i mak maq chhi kang she.

31Ümniiraq apaiq ka,

mangjong maiqse makki na shong laü she.

32Apaiq ka Pongnok phan maiqse ma,

Ümrawü li tiichhike wanti,

Apaiq ka ümsenginok Israil mung ma,

ümkhushü jonglu kra tiichhike wanti.”

33Simeon riisham bomchong kra, noshii nyungwe raq tai raüta, tsangnai ka kai amao riito. 34Simeon raq tsangtsam ma ramram achu shiiman kuqto. Raüta, anyung Meriq ma chongto, “Ara no arka, Shiikeawe raq ashong. Apaiq lümaq, Shiikeawe raq Israilnok phan pahea mishthen baiq. Kiimaq apaiq lümaq hali, Israilnok phan, pahea mitiichhii kuq. Apaiq ka Shiikeawe raq ashong wan miithii ajong ashi. Maiq pahea raq, apaiq angeng mirwan. 35Kiimaq, apaiq raq tsangshiq tiima tsantsii apaü raüta, thü tlaq kra thun ka, wiita alin mirbaiq. Kiimaq, ümtsan mong niimin, tsanbi hosi tsi wa kriika, jasai maq ashuk ikha mitsi.”

36-37Kiijaq wikaü nyung ashi, kiikaiq shammi nyung min asi riito. Apaiq mang ka Ana. Awe ka Phanuel. Ashar weraü wa. Apaiq ka manti-nyung, wiiroqtiichat ri wiiblai she sito. Apaiq ka tsangwe rai wiimiishi li silapto. Apaiq ka Shomjam na Shiikeawe shomnoqkai nungpaq mak phan. Apaiq ka ranaiq rawa, Shiikeawe shomnoq wanli, amang maq siraüta pahea achu jaü tiikoli sito. 38Kra akhing bala riikhaqli, apaiq ka Shomjam na saükito. Raüta, noshii miitu, Shiikeawe ma kechu tumto. Kiimaq, Jerusalem ka Shiikeawe raq maiqjaq khon mong wa mitiichhii kuq nguta kamwan raüta khe wanti ma, noshii rilung manphan kra chongkuqto.

Najareth Na Jang Wan Nongto

39Joseph nai Meriq raq Tatiwe Thungtri jaqsham lot raütiishe, tsangshiq hiq shong, Gelili wang na Najareth chela na hali jang wan nongto. 40No ka aheawiq kumchipo ikha ajong alu, ahong ala she chhanchhi jonglu wanto. Apaiq ka pinthum taksma maiqse ashi. Kiimaq Shiikeawe achu shiiman ka apaiq khum na asho awo sito.

Nono Jesuq Shomjam Na

41Rawiitek, Jesuq nyungwe ka Jerusalem na Tiichhii Wan Poi lomkai kitlo. 42Jesuq ka nose, arawii ka wiiroqshi ri wiinai maiq she riito. Kra rawii min, wiihinjaq kitlaq kiikha, tsangshiq ka poi lomkai Jerusalem na kihoto. 43Poi ka thumjai she, anyungwe ka tsangshiq hiq na jang wan nong wawanto. Shatmaq, nono Jesuq ka Jerusalem niili tiijai kito. Anyungwe raq, kra tho ka hemak dea riito. 44Tsangnai raq tiima ka, no kla nokwe rai kongshkong watlo ahiq nguta tiimato. Raüta, tsangnai ka ranaiq shetang waruq wawanto. Raütiishe, tsangnai raq no ka tanyang senobi nai kongtibi liipan niishe ritto. 45Shatmaq, tsangnai raq no ka hum mak dea riito. Raütiishe, tsangnai ka Jerusalem na, apaiq ritkai jangho nongto. 46Ranaiqtsam ngoja niishe, tsangnai raq no ka Shomjam mong na, Jehudinok shrabi rai nga raüta, tsangshiq bomchong kra tai nai, apaiq raq tsangshiq ma bom wai rea she lohoto. 47Apaiq raq tsangshiq bom tre kriika, pinthum asap atsin wiq maq, tre tlaq kra tai raüta, tsangshiq ka kai amao riito. 48Anyungwe ka, apaiq rai riihum raütiishe, kai awang riito. Kiimaq anyung raq, apaiq ma, “I se le, ümniiraq ümwe nainai ka akha jam nguto trang ra wan laü? Ümwe nainai ka tsanhü wokhü maq, ümnaq rit kai kiinyii kai,” nguta anyung raq apaiq rai bomto.

49Kiijiishe Apaiq raq, “Riita namnai raq ngi ka jaram rit rea wa? Namnai raq, ngi ka i We jam na sichang nguta, sapman sha?” nguta tsangnai bom ka treto. 50Shatmaq, tsangnai raq apaiq bom ka takmak dea riito.

51Riita, Jesuq ka anyungwe rai, Najareth hiq na hali jang wan damto. Raüta apaiq ka anyungwe wokhong na phaqchii nichii maq sito. Anyung raq arthun bomtsi lea wantaq arka, atsan mong na tiitsang dada maq shiwea wan raüta shaqthüto. 52Jesuq ka akhum nyea dang dang hea, kiimaq phaqchi lam na taksma maiqse ashi ma jawan raüta, jonglu wanto. Apaiq ka Shiikeawe lungwii wokhong maq nai maiqse lungwii wokhong maq, aheawiq se chhanchhi jonglu wanto.

Currently Selected:

LUKAQ 2: TANGSBSI

Highlight

Copy