LUKAQ 1

Bomphaho

1Lungwii Phuno Ajongwe Theophilas: Maiq pahea raq, ara na mung na, maiq wang chang jaqsham jonghea ong wan tlii maq sham wantaq kra, nai mra jonghea pin wantaq, kra manphan ka, tiitho tiipha sidi raüta, waiq miitu, shiikut chaqto. 2Tsangshiq raq waiq wantaq kriika, nashiq ma chongkuqtaq, manphan kriili. Kra manphan ka, Phungmaiqse ka jamkho parai wanta, kra manphan, apha wan ranaiq miiphü, arang chong maq tiichap tlii maq, jujuro maiqmii mak maq chhi wantaq, raüta kra tsütsa ka nashiq ma trahokuq wan wan, phanchan chongkuqtaq, kriiwa riichom raüta, waiqto. 3Mungtu we le, riita, ija, ngi raq ara manphan arka, apha maq tiichap wan lata, atiisup na saüli tiitho tiipha sidi wan kang she. Lata, aheawiq, bomkhu bommai thun kra, tri tsi wan latiishe, arka ümniima ahea miraq nguta waiq tiikang. 4Riita, ija, ngi raq ara waiq tiikang arka, ümniima achongkuq wan tengteng bomtsi kriika, ümniiraq raüchong maq pha raüta, raütsii na saüli kunli misap laq nguta waiq tiikang.

Khamlamketi We Johan Wüchhi Tsütsa Tiitaito

5Herod ka Judia wang na hokham riito. Ramwe mang ka Jekeria. Apaiq ka Ramwe Abija lai. Tsang-nyung mang ka Elijabeth. Apaiq kiimin ramwe phan sii. 6Tsangnai wiita ka Shiikeawe maklii na kechu maiqse sii riito. Tsangnai ka Tatiwe tri raütu nai aming thun kra, kunkun lang raüta siti maiqta ashi. 7Tsangnai ka sehü. Tsangnyung nai Jekeria ka kaüja kiija she.

8Ranaiqshi, Jekeria ka apaiq la ramwe jaqsham, Shomjam na Shiikeawe ma hongluke rea. 9Ramwebi raq lang tlaq tri maq, lang lii kiita, kra ranaiq na Shiikeawe ma honglu homseng ka aluchiim na chaq jaqsham kriika, Jekeria mang na, lang raq thaüto. Krai mren, apaiq ka Tatiwe Shomjam mong na honglu kra chaq wa nguta nyap wato 10Apaiq ka jam mong na honglu chaq shon, nokwe ka kinphai maq achu jaü ngato.

11Shiikeawe raq atiiki rase ashi ka, apaiq phana kito. Apaiq raq rase ka aluchiim maq jaqtsi nü na chap raü chhito. 12Jekeria raq rase kra chhi raüta, apaiq ka atsan chhiiwa la, ahai riito. 13Shamtaq, rase raq apaiq ma chongto, “Naq haikiq Jekeria le! Shiikeawe raq ümnaq achu jaü ka treto she. Kiimaq ümjamti nyung Elijabeth raq ase ashi she mihum. Ümniiraq no ka Johan nguta mang laq. 14No ka hum wan jai, ümniika achong lot maü pinthum mironshon haü. Kiimaq khoqriiq shishiiq michochi haü. Kiimaq nanok pahea ümniirai michochi dam! 15Apaiq ka Tatiwe man na ajong pinthum miraq. Apaiq riika che nyang min maimak. Apaiq ka rawü chhi wanli miili, akhum na Asii Wenyi ka ama maq misi wan. 16Kiimaq apaiq raq, Israilnok mung maiqse pahea, Tati Shiikeawe wokhong na mitiijang shea wan nong. 17Apaiq ka Tatiwe ma sinkhu na miki. Shammi Elija ikha apaiq ka kamasham na, achaq awaq miraq. Apaiq raq tapin aki, siwe sise ka ashram mirkuq wan. Apaiq raq lamjiq na akihotibi maiqse thun kra, tingting lamphan na hali mitrap ru shea wan nong. Apaiq raq Shiikeawe sengi ka Shiikeawe puk na nyap wan miitu, tsangshiq tsantsii kra mitiinin ja wan.”

18Kra tairaütiishe, “Riita, ara chongtlaü tsütsa arka miteng wan dea nguta, ngi riika jamkho misap ha? Nainai ri, wikaü tikii she,” nguta Jekeria raq rase bom ka treto.

19Kiijiishe, rase raq treto, “Ngi ka Gebriel. Ngi ka Shiikeawe man na ngati we. Apaiq raq ara tsütsa ahea ara, ümniima tiichong kai tiikito. 20Shatmaq, ümniiraq i tsütsa arma kam maü. Arka akhing riikhaqli na mihong wan. Ümniiraq kam maü arkha maq, ümchaü sanha, ümnü ka atang she mirki. Ümniika i kiqkham ara miku shaq wiiwii, bomhü miili she misi haü.”

21Kra liipan bala, Shomjam kinphai na thungti nokwe thun riika, Jekeria ka Shomjam mong wa dong kai kra khe, athe ange she riito. Kiimaq, tsangshiq raq apaiq ka Shomjam mong na luhea jamto khing watiinya nguta, tiimakhiq she riito. 22Apaiq ka jam mong maq dongki raüta sanha, tsangshiq rai ka riibom lot mak she riito. Kra chhi raüta, apaiq ka Shiikeawe rai riihumto sham nguta tsangshiq raq takto. Apaiq ka abom dong mak she kha maq, nokwe miika, ajaq maq thi nam raütli she bom ka chongkuqto.

23Shomjam na apaiq ramwe jaqsham kra lot raütiishe, apaiq ka ajam niishe wawanto. 24Kra jai maq, tsang-nyung Elijabeth ka wiihan she riito. Kiimaq jipi lübiingi na saüli, apaiq ka jam niili she ngato. 25Apaiq raq, “Ümchaü atiisup niishe, Tatiwe raq ngi ara khrum kuqto,” nguta apaiq ka kai khoqriiqto. “Ngi ka kharii ahü nyung nguta ümtinkhan wa, atiijeasi siq wan ha wa, ümchaü sanha, ngi ka kopan jonghea nyung miishe tiija kuqto!” nguta khoqriiqto.

Jesuq Rawüchhi Tiitaito

26Elijabeth ka wiihan jipi lü trok asi wanwi niishe, Shiikeawe raq rase Gebriel ka Gelili wang na Najareth hiq na tiikito. 27Apaiq ka junsang se, amang min Meriq nguta kriima, tsütsa ashi chongke kai nguta kito. Meriq ka Joseph ma tiiwa ma nguta, awaiwi she riito. Joseph ka Hokham Dawit weraü phan wa. 28Rase ka apaiq phana kiraüta chongto, “Ümniika hansang miishe silaq! Tatiwe ka ümniirai asi! Kiimaq apaiq raq ümniima shiiman jonghea kuqto she!”

29Rase raq achong tsütsa bomtsi kra tairaüta, Meriq ka kai awang riito. Kiimaq rase raq chongtaq kriika, jamlai ngo wiinya nguta amao riito. 30Kiijiishe hali, rase raq apaiq ma bom ka akha tru chongkuq nongto, “Meriq le, ümniika naq haikiq; Shiikeawe raq ümniika kai mangchantlo. 31Ümniika ümchaü sanha, wiihan she mija haü. Kiimaq ümse ka maiqwe se michii haü. Kiimaq ümse mang ka Jesuq nguta mimang haü. 32Apaiq ka ajong pinthum miraq. Kiimaq Ajong Shiikeawe Se nguta mingu. Tati Shiikeawe raq apaiq ka, ati Dawit Hokham kiikha hokham ma mishong. 33Kiimaq apaiq ka, ati tipai Jakob saüsetiim thaq na, pattup pat-sa hokham we miishe mija wan. Apaiq hokham jaqsham kriika, ümtiikiimin thumki mak phan she miraq!” nguta rase raq apaiq ma chongkuqto.

34Kiijiishe, Meriq raq rase bom ka tre nongto, “Riita, ngi ka junrii se shaqli. Maiq ma santla miwaha shaqli. Riita, ngi ka noshii nyung ma jamkho mija ha?”

35Kiijiishe, rase raq abom ka tre nongto, “Asii Wenyi ka ümkhum na miki. Raüta, Shiikeawe ningkun ka ümhan na mishang. Krai mren, Asii no kriika, Shiikeawe Se nguta mingu. 36Ümniiraq asap haü, nanok raq ümnyino nyung Elijabeth ka laihü nyung nguta tiima wanto. Kiimaq, apaiq ka wikaü she li jiimin, ümchaü ka wiihan she. Ümchaü ahan wa no ka jipi lütrok she. 37Krai mren, Shiikeawe raq lot mak chang ngutiika, jamlai phan min ahü.”

38Kiijiishe, Meriq raq rase bom ka treto, “Ngi ka Tatiwe jaqshi se. Ümniiraq ngi ma jamlai bom wa chongkuq laü kra, ngi ma ngohea shaqshaq dea mihong tha wan laq.” Kra riibom jai she, rase ka wawanto.

Meriq Ka Elijabeth Phana Kito

39Kra jai maq jaqlo miili she, Meriq ka taülaü khiq maq tiije raüta, Judia wang na ku akin tili kiijaq maiqhiq ashi asi kiina kihoto. 40Kra hiq na saüki raütiishe, apaiq ka Jekeria jam kiijaq diikito. Apaiq ka saüki raüta, Elijabeth ma, “Kiqkap khata,” nguta bomhoto. 41Elijabeth raq Meriq salam bomtsi kra tai ri li she, awok wa no kiimin atiime, aphe aphiiq she riito. Elijabeth ka Asii Wenyi raq ama riito. 42Krai mren, apaiq ka tiihong raüta akha bomto, “Shiikeawe raq ümniima jechakre tarü thaq na achan ana jonghea achu shiiman kuqto. Kiimaq ümwok na no sitlaq kriika, pinthum kechu maiqse ashi! 43I Tatiwe ma anyung raq ngi akhnok jehin nore maiqse rai riihumkai kilaü arka, ngi ma kiim jonghea pinthum! 44Ngi raq ümbom hiqkhu chong maq abom wan haü kra tai ri li she, i wok wa no kra, achochisi tsi ma, i wok mong na, adoq haha she tiimeshi pheto. 45Tatiwe raq ümniima tsütsa chongkuqtaq kriika poimak mihong tha wan nguta ümniiraq kamwan tlaü krai mren, ümniima pinthum kechu jonghea miraq!”

Meriq Raq Shiikeawe Shomra Shito

46Meriq raq akha treto,

“Tsan nai mong maq Tati shomra tiikang;

47I tsai i ji sanglili kai chochi,

Shiikeawe ka ngi Chhiiti.

48Apaiq raq ngi akhnok jehin nore mangchan kuqto!

Ümchaü miiphat she maiq angu wiita raq,

ngi arka kopan jonghea nyung ngutiishe mingu.

49Ajong Shiikeawe raq,

ngi ma jaqsham jonghea shamkuqto.

Apaiq mang ka Asii.

50Apaiq shreng wanti ma,

patshi maq riita patshi na saüli mangchan wantlo.

51Shiikong miilong maiqse tarü,

tsangshiq raq jamlai jaqsham wa sürii wantaq,

kra tiisham wan lap mak maq,

apaiq ningkun ajong chongwai kii maq,

pongpin riipin jobaiq wanto.

52Apaiq raq honyung hokham ajongbi ka,

hokham ngachang wa tiidea baiqto.

Raüta tsanin wokninti ka tiijong luwanto.

53Apaiq raq amang ale maiqse angu kra,

wok phetaktak hea tiiphaqsiq wan tlo,

shatmaq chiithe maiqse kra jaqmii maq tiiwa baiqtlo.

54Apaiq bomkham natitiim ma achong kuq thü,

tiihongkuq wanto she.

Ümchaü apaiq ajaqshi se Israilnok khrum kekai saükito she.

55Apaiq raq Abraham ma,

mangchan jonghea tiichhi kuqto she.

Abraham saüse phan ma,

pattup pat-sa mangchan tsantsii thü wanto she!”

56Meriq ka Elijabeth rai jipi lü tsam sithü damto. Raüta, ahiq niishe hali jang wan nongto.

Khamlamketi We Johan Rawüchhi

57Elijabeth ma nodo akhing she saüto. Krai mren, apaiq raq no ka maiqwe se chiito. 58Tatiwe raq apaiq ka ümtinkhan wa mangchantaq kra tsütsa ka chiiti nai tsangnai ma tanyang senobi thun raq taito. Krai mren, tsangshiq min, apaiq rai pinthum khoqriiq wan damto.

59Noshii ka chepat shi she angu na, athohan poi klo miitu riitamto ngato. Kiimaq tsangshiq raq no ka awe mang tiiphan Jekeria nguta mangchang nguta tiimato. 60Shatmaq, “Riimak! Apaiq mang ka Johan nguta mang chang,” nguta anyung raq tsangshiq ma chongto.

61Kiijiishe, tsangshiq raq, “Shatmaq, namta mang ka akha ahü kata!” nguta treto. 62Kiijiishe, tsangshiq raq awe ma, jaq maq tiichhi raüta, apaiq raq ase ka jamkhii mang wa rotla nguta waito.

63Kiijiishe, Jekeria raq lakwaiq chang longpen ka jaüto. Raüta, “Apaiq mang ka Johan,” nguta waiqto. Kra chhi raüta, tsangshiq tarü ka kai awang riito! 64Kra liipan bala li she, Jekeria ka abom dongsaq she riito. Krai mren, apaiq ka chojong chise maq, Shiikeawe shomnoqto. 65Chiiti thun raq kra chhi raüta, tsangshiq ka kai amao riito. Kiimaq ara tsütsa arka, pumhiq Judia wang kiina barap binrii niishe nyam wanto. 66Ara tsütsa ara tai wantibi maiq tarü raq, “Ara no arka jamkhii maiqse wa riita ahiq nya?” nguta tiima shiwea wanto. Kiimaq riibom wanto. Akha riibom nyiim wantaq arka, tsangshiq raq no khum na, Tatiwe ningkun ka asi nguta chhitaq kra kha maq, riibomto.

Jekeria Shammi Bomchong

67Kra akhing na Johan we Jekeria ka Asii Wenyi raq ama riito. Kriikha maq, apaiq raq Shiikeawe bomtsi ka akha chongkuqto:

68“Nashiq raq Israilnok Tati Shiikeawe ka shomnoq rong i!

Apaiq ka asengi Israilnok kharü diike kai she saükito,

tsangshiq ka ümchaü sanha lüsaü wase she.

69Apaiq raq nashiq Chhii wanti Ajong ashi tiisaüto she.

Apaiq ka ajaqshi se Dawit weraü phan wa.

70Apaiq raq rathup rapha niiphü dongdii,

Asii shammibi lümaq,

nashiq ma kiqkham raüpot khakuq wanto.

71Apaiq raq nashiq ka chiq se rewe jaqkhon mong wa,

mitiichhii kuqha nguto.

Nashiq ngengseng wanti maklii wa,

mikhup wongkuq wanha nguto.

72Apaiq raq na saü nase pat niimin,

kaphap mangchan laq mang nguto.

Apaiq raq tongshong khoqram kii ka thaq mang nguto.

73-74Apaiq raq atiitum raüta,

nati Abraham ma chongto,

nashiq ka najaqti jaqkhon mong wa,

mida wan ha nguto.

Raüta, nashiq ka apaiq wokhong na,

tsailam jilam maq,

apaiq shomnoq wan she mitiisi wan ha nguto.

75Krai mren,

nashiq ka rilung pattup Asii maiqse she mija wan rong i.

Kiimaq kechu maiqse miishe mija wan rong i.

76“I se le, ümniika,

Ajong Pinthum Shiikeawe shammi ngutiishe mingu.

Ümniika Tatiwe ma sinkhu na miki haü.

Laüta, apaiq kai chang lam kra mitanho haü.

77Laüta Tatiwe sengi ma,

Shiikeawe raq tsangshiq ngarai ka midii kuq wan,

raüta, tsangshiq ka mitiichhii kuq wan,

nguta michong kuq ho haü.

78Nashiq Shiikeawe ka mangchan rümti tsanin woknin.

Apaiq raq nashiq ma tiichhii wan rashe kii liliim kra mitli kuq wan she.

79Kra rashe kii ka ramungtan maq,

ranyaq tangtang mong na siti tarü ma mili liim wan.

Raüta, nashiq ka khusang rakhang rilung lam na,

mishun shea wan.”

80Kra no ka, han-ngam na, kiimaq wenyi na, kumchipo ikha phintsaq tsaq hea she chhanchhi jonglu wanto. Apaiq ka kumtsaiphii niili siwanto. Kra jai miishetiq, Israilnok mungmaiqse ma tra hokuq wanto.

Currently Selected:

LUKAQ 1: TANGSBSI

Highlight

Copy