JOHAN 6

Maiq Hingbiingi Ma Tiiphaqsiqto

(Mot 14.13-21; Mak 6.30-44; Luk 9.10-17)

1Kra jai miishe Jesuq ka ajaqshisetiim rai Gelili thamchum konü thamreko shoknok (Tiberias Thamchum ngutiimin ngutlo) binjü nü na jin wanto. 2Apaiq raq maiq atsiti tiiheake wan awang chang jaqsham wantaq kra thun ka chhiwi raüta, maiq phong ka khunyaq khukhi akong ada riishe apaiq jai ka phan wanto. 3Jesuq ka ajaqshisetiim rai hiqlam ashi niishe ngawato. 4Kra akhing ka Tiichhii Wan Poiho nini she riito. 5Jesuq raq atok ka ra na do raüta, apaiq tro na tro tri lii kiita, maiqphong ka pahea, apaiq pha nü na awarai chhito. Kra chhi raütiishe, apaiq raq Philip ma, “Philip maiqphong achu arma tiiphaqsea chang ka jamwo mihum rong i?” nguta waito. 6(Apaiq raq Philip ma bom waitaq arka Philip kamtsantsii kra tei ma nguta waito. Apaiq raq Philip ma miwai shaq niiphü, jamkhii raüta tiiphaq sia chang wa kriika, atsan na atiije wishe riito.)

7Kiijiishe, “Maiqphong achu armiika kamsii shinai maq winsii ri raüta pheakuq raü min, nü chhuq min kham mak khata miraq,” nguta Philip raq treto.

8Ajaqshi se ashi, amang Andru, Simon Petar ma ano raq Jesuq ma chongto, 9“Arjaq nonose ashi asi. Apaiq jaq na jaili winsii phubiingi, kiimaq ngiq shin phunai asi. Shatmaq, kriise raq maiqphong achu ara miika jamwo mikham.”

10Kiijiishe, “Nokwe ka tarü atiinga ronglaq” nguta Jesuq raq ajaqshisetiim ka thaüto. (Kra nokwe tiitlaq ba niika sangphii asi riito.) Krai mren, nokmaiqse ka tarü anga riito. Kra maiq phong tiingataq kiijiika, maiqwere siisaq li dongdii min hingbiingi riito. 11Jesuq raq winsii ka ajaq na sham raüta Shiikeawe ma kechu tumto. Raüta, maiqphong ngatlaq kiima tiiphea kuqto. Ngiq phuse nai kiimin kiikhiisii hali kechutum raüta, nokmaiqse ma tiiphea kuqto. Krai mren, maiq tarü raq wok phetak chhaq phaq siqto. 12Nokwe raq phetak phaqsea lot jai she, Jesuq raq ajaqshisetiim ka, “Apun awun seabung atiichong ka wiita riichom ronglaq. Akhiismin tiiwiihii raa mak,” nguta thaüto. 13Krai mren, tsangshiq raq jaili winsii phubiingi wa nokwe raq phaqsea jai she abung atiichong kra riichomto. Kra nokwe raq phaqsea jai, seabung kra riichom kiita, tamlii roqshi ri anai tuptup mali riito.

14Jesuq raq kra wangchang jaqshamke kra chhi raüta, mungnyung mungse raq, “Arwe arka Asii Bomtsi na jai maq shammi weshi mangjong hiq na mikilii nguta chongtlaq we kriidea saükito sham!” nguta tsangshiq liipan na bom ka riichongto. 15Jesuq raq kra mungmaiqse hon atsii ka atak wishe riito. Tsangshiq raq apaiq ka ningkun maq lap raüta, tsangshiq hokham we ma tiija wan danto. Apaiq raq kra tho ka heraüta, hiqlam nü nü kiina apaiq honhonse she wawanto.

Jesuq Ka Kham Thaq Na Khumto

(Mot 14.22-23; Mak 6.45-52)

16Rajiko niishe, Jesuq jaqshisetiim ka thamchum kii nü na kihoto 17Tsangshiq ka lai maq Kaparniam chela wiiq nü na hali she thamchum ka jin wan nongto. Tsangshiq tiido wan niika ranyaq she riito. Shatmaq, Jesuq ka tsangshiq phana misaü shaqli riito. 18Kra liipan niili she rahai ka henghea saü wanto. Raüta, thamchum ka brak wan raüta, khamtso jonghea she dong wanto. 19Ajaqshisetiim ka lai maq meng biingi tin sha, trok tin she wa jiiq wanto. Kiijiishe tsangshiq raq Jesuq ka kham thaq maq tsangshiq lai tho nü na awa rai chhito. Kra chhi raütiishe tsangshiq ka pinthum kiinyiito. 20Kiijiishe, Jesuq raq, “Namshiq ka naqhai rongkiq. Arka ngi tiina!” nguta tsangshiq rai bomdamto. 21Kra tai raütiishe, tsangshiq raq chochi khiq miishe, Jesuq ka tsangshiq lai niishe tiinga wanto. Kiimaq tsangshiq ka tsangshiq wachang jü reko hiq ba kiiniishe saü wa saqli she saüto.

Tiiphaqsitaq Maiqphong Raq Apaiq Ritto

22Kiimaq anap ranaiq niishe hali, nokmaiqse phong raq tsangshiq kongkhu ranaiq thamchumkii na thung raitaq ba binjü niika, naiqkhu ranaiq awang chang jaqshamtaq akhing na, lai ka ashi li riito ihata nguta asap. Kra lai miika, Jesuq jaqshisetiim lamlamli ahin nü na wawanto, Jesuq ka ahü, wadam mak dea nguta asap. 23Kiijiishe, Tiberias hiq nü wa asaüki lai wiijam ka, Tatiwe raq achu jaü raüta, nokmaiqse phong ma winsii tiiphaq siqtaq hiq tho thamchum kii niishe saükito. 24Kra akhing na, nokmaiqse phong raq, Jesuq nai ajaqshisetiim ka kiijaq ahü she chhi raüta, tsangshiq ka kiijaq lai thun asi kriimaq, Kaparniam hiq binwiiq nü niishe, Jesuq rit wan wawanto.

Jesuq Ka Rilung Tsitsü Winsii

25Kiimaq nokmaiqse kong Jesuq ritwan wataq kra raq, Jesuq ka thamchumkii hiq ba ahin niishe hum raüta, apaiq ma, “Shrinketi we! Ümniika ana ümtiiko saüwa laü?” nguta apaiq ma waito.

26Kiijiishe, Jesuq raq treto, “Ngi raq chongtiikang arka tengteng: Namshiq raq ngi rit tlan arka, awang chang jaqsham kang kra liichum tak lantiika riimak. Shatmaq, namwok phetak chhaq phaqsiq lan kra miitu rit tlan. 27Abi kai chang phaqsea miitu minshiiq ka naq niiko rai rongkiq. Shatmaq, pattup pat-sa rilung phaqsea miitu minshiiq ka shiichaq rong laq. Arka Maiq Se raq namshiq ma mikuq. Ara jamkhano chongtiikang ngukla, Awe Shiikeawe raq ahup akhang wan arang hotlaq kriika apaiq ma ake kun she.”

28Kra tai raütiishe tsangshiq raq waito, “Riita, ikhiijiika Shiikeawe raq lungwii tlaq thun jaqsham ka sham miitu, naishiq raq jamlai klo chang wa?”

29Kiijiishe, Jesuq raq treto, “Shiikeawe raq namshiq ka apaiq raq atiiki, we kiima kam ronglaq nguta thaütlo”

30Kiijiishe tsangshiq raq apaiq ma hali tre nongto, “Riita, ikha jiika naishiq raq ümniima kam wan li chang miitu ka, ümniiraq naishiq ma jamlai phan awang chang jaqsham kaiwa wa mitiichhi kuq haü? Ümniiraq jamlai phan jaq wa misham haü? 31Asii Bomtsi na, ‘Apaiq raq tsangshiq ka ra winsii maq dung wanto’ nguta chongtlo. Krai mren, naititiim raq kumtsaiphii maq ra maq atiidea kuq mana winsii kra phaqsiq raüta siwanto.”

32Kiijiishe Jesuq raq tsangshiq ma chongto, “Ngi raq chongtiikang arka tengteng: Mosheq raq namshiq dungtaq winsii kriika ramung- tan winsii riimak. 33Ara jamkhano chongtiikang ngukla, Shiikeawe raq kuqtlaq winsii ka ramungtan maq mangjong hiq na satkito she. Raüta, phiija maiqse ma rilung kuqtlo.”

34Kiijiishe, Tsangshiq raq jaüto, “Shiilang we! Kra winsii ka naishiq ma ranaiqtek kuq lili riiliina.”

35Kiijiishe, Jesuq raq tsangshiq ma chongto, “Ngi ahata rilung tsitsü winsii. Juwa i puk na nyap tlaq, kriiti miika ram tsimak she miraq. Juwa ngi ma kam tlaq, kriiti ma khamnyang min tsimak she miraq. 36Riita, ümchaü ngi raq namshiq ma chongpha. Namshiq raq ngi ka chhi lanshe. Shatmaq, ngi miika kam man mirhan. 37I We raq ngi rii nguta ümchuwa maiqse thiiqtaq, kriiti thun ka i puk na minyap wan. I puk na nyap wanti ka ngi raq jumin jai na tiijang baiq mang she. 38Ara jamkhano chongtiikang ngukla, ngi ka ramungtan maq mangjong hiq na satkikang arka, i tsiitsii maq jaqsham kai akiha ka riimak. Shatmaq, ngi tiikaiti we Shiikeawe raq jamlai wa thapthi tlaq, kra shamkai kikang. 39Kiimaq ngi tiikaiti we raq tiima tlaq ka, apaiq raq ngi ma maiqse ümchuwa kuq wantaq, kiiwa ngi raq ashi min tiimo baiq mang maq, phangthum ranaiq na, ngi raq tsangshiq tarü ma, tsitsü rilung mikuq ha dongdii nguta riichopisiqtlo. 40Riita, i We riika, maiqse angu ümchuro, ngi Ase rai sham riichhi tlaq, raüta, ngi ma kamwantlaqti thun maiqse tlotli raq, pattup pat-sa rilung kra milap wan laq nguta thapthitlo. Krai mren, ngi raq tsangshiq ka phangthum ranaiq na amaa wa mitiidong kuq wan ha.”

41Apaiq raq, “Ngi ahata ramungtan wa asatkiha winsii,” nguta tiichong kra tai raüta, Jehudinok ka bottrang wanto. 42Kriikha maq tsangshiq ka, “Apaiq ka Joseph se Jesuq riimak sha? Nashiq raq awe nai anyung ka asap i. Riita apaiq riika, apaiq ka ramungtan wa asatki we ngutiika, jamkho tiishom ra rai tla?” ngutiishe bottrang hoto.

43Kiijiishe, Jesuq raq treto, “Hongto. Namshiq liipan niika naq bot nyan trang rongkiq. 44Ngi tiikaiti i We raq shunshea raüta, tiinyap wan hü miika, i puk na jumin nyap wan lot mak. I puk na nyap wanti ka phangthum ranaiq na, ngi raq amaa wa atra mitiidong wanha. 45Shammibi phong wa weshi raq, ‘Kiimaq tsangshiq tarü ma Shiikeawe riishe mishrin kuq wan’ nguta waiqthüto. Krai mren, jurwa Awe bom ka ni tiitsii raüta tai tlaq, kriiti kli i puk na minyap. 46Maiqse raq Awe sham ka jurmin chhi mak dea. Ngi ahata Awe pha wa akiha. Ngi tlea raüta Awe ka jurmin chhi mak dea. 47Ngi raq chongtiikang arka tengteng: jurwa ngi ma kam tlaq, kriiti riika pattup pat-sa rilung alap wan wishe. 48Ngi ahata rilung winsii. 49Namtitiim riika, kumtsaiphii maq mana phaqsiq raüta siwanto. Shatmaq, tsangshiq ka wiita tsai wanto. 50Shatmaq, ramungtan wa aki winsii ka jurwa phaqsiqtlaq, kriiti ka tsai mak she miraq. 51Ngi ahata ramungtan wa asaüki atra tsitsü raü winsii. Jurwa ara winsii ara miphaq, kriiti ka pattup pat-sa atrali she misi wan. Ngi raq apaiq ma winsii mikuqha ngutiikang arka, i han ngam phu ara mikuqha. Ara i ngam phu kuq tiikang arka, mangjong maiqse ka atra tiisi wan miitu kuq tiikang.”

52Kra tai raütiishe Jehudinok ka, “Arwe riitiq, nashiq ma ahan ngam phu ka jamkha tiiphaq nang wa chongrat tla nya?” ngutiishe tsang- shiq liipan na akhiq wa trang liishe riikhii trangto.

53Kiijiishe, Jesuq raq tsangshiq ma chongkuq nongto, “Ngi raq chongtiikang arka tengteng: Namshiq raq Maiq Se ngam phu kra phaq man, kiimaq apaiq tiijai kra nyang man jiila, rilung tsitsü ka lap man mirhan. 54Jurwa i ngam phu ara phaq tlaq, kiimaq i tiijai ara nyang tlaq, kriiti riika pattup pat-sa rilung alap wan wishe ngushat. Kiimaq phangthum ranaiq na, ngi raq apaiq ka amaa wa atiidong mirwan ha. 55Ara jamkhano chong tiikang ngukla, i ngam phu ahata riikhaqli phaqsea kiimaq i tiijai ahata riikhaqli anyang chang phan phaq nai sia. 56Jurwa i ngam phu ara phaq tlaq, kiimaq i tiijai ara nyang tlaq, kriiti ka i pum na sitlo. Kiimaq ngi ka apaiq pum na sitiikang. 57Tsitsü raüchong rümti atra Awejong raq ngi ka ana tiikito. Krai mren, ngi min atra sitiikang. Kiikhiisii hali, jurwa i ngam phu ara phaq siq tlaq, kriiti ka ngi lümaq atra she misi wan. 58Riita, ahata ramungtan wa asatki winsii phu. Ara winsii arka, namtitiim raq phaqsiq wantaq, shatmaq, kra winsii phaq sia jai min, tsangshiq ka atsai riiwantaq, kiikha phan winsii ka riimak. Jurwa ara winsii phaq tlaq, kriiti ka pattup pat-sa atrali she misi wan.”

59Jesuq raq arthun traho bomtsi chongkuq wantaq arka, Kaparniam sinagok maq, trahoke lam maq chongkuqto.

Pattup Pat-sa Rilung Bomtsi

60Apaiq jaiphan wanti maiq apako raq, ara traho bom chongke ara tai raüta, “Ara chong tlaq tri arka tsinhea. Arka juwero milanglot?” ngutiishe riibomto.

61Tsangshiq botnyan trang tlaq kriika, jurmin Jesuq miika chong mak dea. Shatmaq, Jesuq riika asap. Kriikha maq, apaiq raq, “Namshiq ka ara tsii chongke bomtsi ara tai lanta, tsinhea taklot mai, athaq baiq chang she ngutiisha tiima tlan? 62Bom shiiton, namshiq raq Maiq Se ka apaiq sichüchang ba kiijaq jang wan nong chhihan jiiha? Jamlai she wa mitiima han? 63Tsitsü keti ka Shiikeawe Wenyi kli. Maiqse han-ngam ningkun miika, maiqse ma tsitsü raü triiche kuqlot mak. Ngi raq namshiq ma chongkuq tiikang i bomtsi ahata, namshiq ma tsitsü keti Shiikeawe Wenyi raüchong. 64Ngi raq atinkhan chongke wan jai min, namshiq phong wa maiq wiijamti raq ngi ma kam man.” (Jesuq raq apaiq ma kam makti ka juju wa, kiimaq apaiq shaphaqti ka juwa miraq, kra thun ka apha miiphü asap.) 65Raüta Jesuq raq abom ka triichesaq, “Arkha miitiina, ngi raq namshiq ma, i We raq ngi rii nguta thiiq wan hü wiiwii, maiqse ka jumin i puk na nyap wan lot mak nguta chongkuq pha ihata.”

66Ara atsin maq bomchongke ara tai raütiishe, Jesuq jaiphanti phong wa, maiq pahea raq apaiq jai ka phan mak she tsaqkito. 67Kra ningkhan she, apaiq raq ajaqshisetiim roqshi ri wenai kiima bom ka akhiishe waito, “Riita, namshiq ha? Namshiq min jai niishe sha mijang wan han?” 68Kiijiishe, Simon Petar raq Jesuq bom ka treto, “Tatiwe! ümniika miimbaiq thü laita, naishiq ka jujai she wa miphan hai? Ümniili pattup pat-sa rilung tsitsü raü shamti we.

69“Riita, ümchaü sanha naishiq raq ümniika Shiikeawe raq atiiki Asii Maiq Se nguta kamwan tiikai.”

70Kiijiishe, Jesuq raq treto, “Ngi raq namshiq ka roqshi ri wenai tsea wan pha riimak sha? Kra taü maq dongdii min, namtsam phong wa weshi ka tha kaü!” 71Apaiq raq ara tiithai raüta chong tlaq arka, Simon Iskariot se Judas kra ngo nang riito. Ara jamkhano tiithai tlaq ngukla, Judas ka ajaqshisetiim roqshi ri wenai phong wa ashi. Shatmaq, apaiq raq Jesuq ka maiq jaq khon mong na mishaphaq baiq wan.

Currently Selected:

JOHAN 6: TANGSBSI

Highlight

Copy