JOHAN 7

Anotiim Riimin Apaiq Ma Kam Mak

1Arjai maq, Jesuq ka Gelili wang na traho bom chongke wa wawanto. Kra bala apaiq ka Judia wang na trahokai kiro mak riito. Jamkhano ngukla, Jehudinok mung rümtibi raq, apaiq ka atsea baiq chang nguta mat kha ka tanshat she riito. 2Kra akhing ka Lamjap Poi ho nini she riito. 3Kriikha maq, Jesuq ma anotiim raq apaiq ma akha bomto, “Ümniika arwa Judia wang na kiho liina. Laüta, kiijaq, awang chang jaqsham laüta ümsengi ma tiichhikuq kikiq na. 4Jurwa maiqmii mang tiijong tiima tlaq, kriiti raq maiqmii jaqsham kaiwa ka ahukse miika sham mak. Riita, ija, ümniiraq ri, ümjaq sham ka sham tlaü she dongdii kha maq, mangjong maiqse raq sapli chang she sham wan lili riiliina!” 5Tsangshiq raq ara jamkhano nguta ngukla, anotiim raq dongdii min, apaiq miika kam mak kha maq akha nguto.

6Kiijiishe, Jesuq raq tsangshiq bom ka treto, “Ngi ma aranaiq akhing ka ümchaü ümsaü shaqli. Namshiq miika ümra ranaiq li jiimin, hong ruq phan. 7Phiijawa raq namshiq shulii chang lamlu ka ahü. Shatmaq, ngi ka tsangshiq raq shulii tlo. Arka ngi raq tsangshiq ngarai lamphan ka abi nguta chongkuq tiikang kriikha maq ngeng tlo. 8Namtsam ka Poi lomkai kirong liina. Ümchaü lak poi arka ngi lomki mangli. Ara jamkhano chongtiikang ngukla, ngi ma ranaiq akhing ka misaü shaqli.” 9Apaiq raq tsangshiq ma ara chongkuq raüta, apaiq ka Gelili wang na heashi se sithüto.

Jesuq Ka Lamjap Poi Lomdam

10Anotiim ka Poi lomkai kaiho jai she, Jesuq min Poi rü na kihoto. Apaiq ka tantan miika kimak dea. Shatmaq, ahukse maq lat hosaq li kihoto. 11Kra akhing na mung rümti Jehudinok welabi raq Poi rü na apaiq rit lam maq, “Mungshukti we ira ümba niiwa?” nguta poi lomdamti nanok ma bom ka waito.

12Maiq muklung riinyiim rai tlaq liipan na, Jesuq miitu bom riiwaisoti maiq ka pahea riito. “Apaiq ka maiqshaq,” nguta maiq wiijam raq nguto. Kiimahali, “Riimak. Apaiq raq maiq tiishontlo,” nguta maiq wiijamti raq hali khiito. 13Shatmaq, tsangshiq ka mung rümti Jehudinok welabi ma hai ma, apaiq miitu nokwe raq taili chang ka riichong mak.

14Kra Poi ka tlung tiiwii akhing ba niishe, Jesuq ka Jerusalem Shomjam na wato. Raüta nokwe ma trahokuqto. 15Jesuq raq thungtri shrinke wan ka jü jang wa ikha, tsan na washasha chongke wan kra tai raüta, Jehudinok welabi ka kai awang li riito. Kiimaq, “Arwe arka lak shrinkai chong awii niimin ngaki mak dea shatmaq, apaiq raq atinkhan thungtri phaqchi ara jambawo tsin tiinya?” nguta tsangshiq liipan na riiwaisoto.

16Kra tairaütiishe Jesuq raq tsangshiq bom ka treto, “Ngi raq namshiq ma shrinkuq tiikang bomtsi arka, i tsan mong maq acham ka riimak. Arka Shiikeawe nübok maq atiidea bomtsi chongkuq tiikang. 17Maiq ümriiti riiwa Shiikeawe raq athithi na jaqsham kli lungwii tlaq, kriiti raq ara ngi raq shrinkuq tiikang traho bomtsi arka, Shiikeawe aming miisha chongkuq tiikang, sha ngi raq maiqmii arang miiwa chongkuq tiikang, kra mitak lot. 18Maiq ümriiti riiwa maiqmii raq athithi na traho bom chongkuq tlaq, kriiti riika, maiqmii khushü tiijong lamlu kli rittlo. Shatmaq, jurwa apaiq tiikaiti we khushü kra tiijong kli tiima tlaq, kriiti ka tingting maiqse. Apaiq tiima tsantsii niika arot akiq tsantsii ka ahü. 19Riita namshiq ma Mosheq raq Thungtri kuq thütaq riimak sha? Shatmaq, namshiq phong wa, maiq weshi ra raq dongdii min kra Thungtri ka lang man. Riita, kra taü maq, namshiq raq ngi ka atsea baiq chang nguta jaram wa tan khan tlan?”

20Kra tai raütiishe, “Ümnaq ara aru kha na! Ümtsia tan khan wanti ka juwa?” nguta nokmaiqse raq Jesuq bom ka treto.

21Kiijiishe, Jesuq raq tsangshiq bom ka treto, “Ngi raq awang chang jaqsham ashi ka sham phata, kra chhi lanta, namshiq ka kai awang riiwan lan. 22Mosheq raq namshiq ma maiq we setiim ka athohan chang nguta aming kuqthüto. (Mosheq riika akha aming ka kuqthü mak dea. Shatmaq, arka namtitiim riishe pha wanto.) Krai mren, namshiq raq Asii Niitiitsak ranaiq niimin, apii ashi min ngu man maq, no maiqwe se tho ka hankuq tlan. 23Riita, ija, namshiq raq Asii Niitiitsak ranaiq na no ma athohanke ka, Mosheq Thungtri jin ka riimak nguta tiima tlan jiika, ngi raq Asii Niitiitsak ranaiq na, maiq weshi, athatsi chamchao litkot mong wa, tiidoqra tiihea kuq pha ta, namshiq raq ngi ma jam nguto khiqriq rai tlan? 24Riita namshiq raq phanrap ka rakhütsiri tri miili ka naq shin rongkiq. Shatmaq, tingting kappe maq shin rong laq.”

Apaiq Ka Khristo Dea Sha?

25Jerusalem wa mungmaiqse wiijamti raq Jesuq ka akha shinchong siqto. “Mung rümtibi raq arwe kaü arka atsea baiq chang nguta rit wan tlo riimak sha? 26Shatmaq, liimanta! Apaiq ka arjaq mungphong na trahoke rea ahata. Shatmaq, tsangshiq riika apaiq shinchong sia bom ka jam min ngu mak ahata. Tsangshiq raq apaiq arka Khristo ngutiidea sha tiima raiwi tla? 27Shatmaq, ümtiikiiwa Khristo ka saüki jiiq, apaiq dong chong ka maiq juwe riimin sap mak miraq. Shatmaq, arwe kaü arka ümriibati wa, kriika nashiq tarü raq asap i,” nguta apaiq ka chongsiqto.

28Kra akhing na Jesuq ka Shomjam mong na nokmaiqse ma trahoke rea riito. Apaiq raq tiihong raüta kholam kholiiq maq mungmaiqse ma, “Riita namshiq raq ngi ka ju nguto tiima tlan? Kiimaq i dong chang chong ka ümba niiwa kra asap han dea sha? Ngi ka mangjong hiq na i tsiitsii maq asaüki ha ka riimak. Shatmaq ngi ka ara mangjong hiq na tiikaiti we ka tingting we. Shatmaq namshiq raq apaiq ka juwa kra sap man. 29Shatmaq, ngi raq apaiq ka juwa kriika asap ha. Apaiq ka ngi tiikaiti we. Ngi ka apaiq pha wa akiha,” nguta Jesuq raq nokmaiqse ma traho kuqto.

30Kiijiishe, mungmaiqse phong wa maiq wiijamti raq apaiq ka alap riilai nguta danto. Shatmaq, jurmin apaiq dü na jaqkaiq maq sham lot mak riito. Kriika, apaiq ningthoi akhing misaü shaqli kha maq tsangshiq raq apaiq ka laplot mak riito. 31Shatmaq, mungmaiqse phong wa maiq pahea raq apaiq ma kam wanto. Kiimaq tsangshiq raq, “Ümtiikiiwa Khristo saüki jiiq, kra akhing na ümchaü arwe raq awang chang jaqsham wantaq arthaq na achat raüta, akao lin she sha misham wan nya?” nguta tsangshiq liipan na riibomto.

Shomjam Kheti Hokranok Jesuq Lapkai Tiikito

32Phorisinok wiijamti raq nokwe phong na, Jesuq tsaki riishap shaü wan tlaq kra tho ka heto. Krai mren, tsangshiq nai ramwe jongbi raq Shomjam kheti hokrabi ka apaiq lapkai tiikito. 33Kiijiishe, Jesuq raq tsangshiq ma bom ka akha chongkuqto, “Ngi ka namshiq rai heashise lishe misiha. Lata ngi tiikaiti we phaniishe mijang wanha. 34Kiijiishe, namshiq raq ngi ka mirit han. Shatmaq, ngi ka hum man she mirhan. Ara jamkhano chongtiikang ngukla, ngi ka ümbano wawan tiikang, kiijaq namshiq ka wawan lot man.”

35Kra tai raütiishe, Jehudinok welabi raq tsangshiq liipan na bom ka akha riichongto, “Riita, apaiq ka nashiq raq chhiwa lotmai chang ka, jamkhiiba hiq na wawan wa chongtliinya? Grik mung chela thun kiijaq nashiq nok min asi kiina wawan raüta, Grik mung ma trahoke wa sha dan tla? 36Riita, nashiq raq apaiq ka rit hai jiimin humlot mai she miraq nguta nashiq ma chongtlaq ahata. Kiimaq apaiq sichang kiijaq nashiq ka walot mai she miraq nguta chongtlaq ahata. Riita, arka jamlai ngo nang wa ngu tla?” nguta tsangshiq liipan na riiwaito.

Tsitsü Raüchong Khamrai

37Poi thum wan ranaiq ka poijong pinthum. Kra ranaiq Jesuq ka nokwe man na chap raüta, tiihong raüta kholam kholiiq akha trahokuqto, “Juwa kham nyangtsi, kriiti ka ngi phana warong ra. Lanta, i jaq wa kham ara nyang wa rongkiq. 38Asii Bomtsi na, ‘Juwa ngi ma kam tlaq, kriiti mongjii wa rilung tsitsü jüseraisetiim miphok wan,’ ” nguta chongtlo. 39Jesuq raq ara chong taq arka, apaiq ma kamwantibi ma jai maq, Asii Wenyi kewan chang asi kra nangnga chongtlo. Kra akhing na Jesuq ma kamwanti maiqse ma, Asii Wenyi ka mikuq shaqli riito. Jamkhano mikuq shaqli ngukla, Jesuq ka ra na mitsom thü shaqli riito. Kiimaq apaiq khushü ngao kiimin mitiijong wan shaqli.

Jesuq Miitu Maiq Riidojin

40Maiq phong mong wa, maiq wiijamti raq apaiq bomchong ara tai raüta, “Arwe arka Shammi we misaüki nguta kherat tiikai we kra dea ahata!” nguta bomto.

41Jesuq raq ara traho bomtsi chongkuqtaq ara tai raüta, maiq wiijamti raq, “Arwe arka Khristo dea ahata!” nguta riibomto. Shatmaq, tsangshiq phong wa maiq wiijamti riika, “Khristo ka Gelili hiq shong wiika poki mak miraq! 42Asii Bomtsi na Khristo ka Dawit weraü phan wa mipoki. Kiimaq Dawit changkhü Bethlehem hiq na michiiki nguta chongtlo,” nguta riibomto. 43Krai mren she, Jesuq miitu, tsangshiq mungmaiqse liipan na bom ka riikhii riilea she riido jin wanto. 44Kra akhing na maiq wiijamti riika, apaiq ka alap riilai nguta danto. Shatmaq, apaiq dü niika juwe riimin jaqkaiq maq sham li ka sham mak dea.

Jehudinok Welabi Raq Jesuq Ma Kam Mak

45Shomjam kheti hokranok ka shaqmii jang wan kiita, ramwe jongbi nai Phorisinok raq tsangshiq ma bom ka akha waito, “Namtsam raq apaiq ka jam nguto lap wan man riilan?”

46Kiijiishe, hokranok raq, “Arwe raq trahoke khan ka, ümchaü niitaq maiq ahinti juwe riimin hoku mak shaq chhi mai!” nguta Phorisinok bom ka treto.

47Kiijiishe, Phorisinok raq, “Namtsam kiimin apaiq mo niishe sha shang wan dam lan? 48Namtsam raq welabi phong wa, maiq weshi ra raq nai Phorisinok phong wa maiq weshi ra raq, apaiq bomchong ma kam tlo nguta chhi tlan sha? 49Ara mungmaiqse thun arka Mosheq Thungtri manphan jüche ka jam min sap mak. Kriikha maq, tsangshiq ka Shiikeawe manson howan raüta sitlo!” nguta hokranok ka sonto.

50Kiijaq tsangshiq Phorisinok phong na, maiq weshi, amang ka Nikodemas nguta kriiwe kiimin kiijaq asi riito. Apaiq ka kongkhuji na, Jesuq phana kiraüta riihum kito. Apaiq raq anok bom ka akha treto, 51“Riita, welabi lei, nashiq Thungtri maq, nashiq raq maiq weshi ka, apaiq ma kongkhu tiichong laita, apaiq shut lam khü akha kra chhi wan hü maq, apaiq ka ajiq we dea nguta, tiishut baiq lot mai.”

52Kra tai raütiishe, tsangshiq raq, “O, ngo mai ri ahea kata. Ümniikiimin la Gelili hiqshongti sii dea riimak sha? Asii Bomtsi ka samhea phat laüta liiwan liina. Laüta, Gelili hiqshong wiika Shiikeawe shammi ka dong mak nguta bom chongtlaq kra misap haü,” nguta apaiq bom ka treto.

Currently Selected:

JOHAN 7: TANGSBSI

Highlight

Copy