JOHAN 5

Jesuq Raq Aküwe Tiiheato

1Arjai maq, Jesuq ka Jerusalem na Shiikeawe shomnoq Poi lomkai kihoto. 2Jerusalem na Sku Walam Kilü ngutlaq kra tho na thamchum ashi asi. Kra thamchum kiina, maiq khumchang lam ka biingi asi. Kra thamchum mang ka Jehudinok bom maq Bethjatha ngutlo. 3Kra lam thun kriijaq maiq atsi asiti thun ka pahea, riiphong riirong bum raqraq. Makchuk jaqmii, akü ashii, kiimaq ahan amaa arkiti thun ka kiijaq asi riito. 4Jamkhano ngukla akhing khing na Tatiwe rase ka thamchum na satki lili raüta kham ka tiibrak tlo. Raüta atsiti juwa thamchum tiimejai na sinkhu na thamchum mong na satkitlaq kriiti thatsi ka heakitlo. 5Kra phong na maiq weshi asi. Apaiq ka wiiroqtsam ri wiitiichat she atsi riito. 6Jesuq raq kriiwe ka kiijaq bum raü chhito. Kiimaq apaiq raq kriiwe ka atsi luhea she sitlo nguta asap. Kriikha na, Jesuq raq, “Ümthatsi ka tiihea wan ro tlaü sha?” nguta apaiq ma waito.

7Atsiti we raq treto, “Shiilang we lei, khamchum tiime rai tlaq bala, ngi ara khamchum na tiitsamkai miitu khrum keti maiq jumin ahü. Ümtiikiiwa ngi ka khamchum na tiitsam kila nguta tiimeshi tiikang na, ngi ka nanok ahinti riili shiiho lili riitlo.”

8Kiijiishe, Jesuq raq, “Tiido laq. Laüta ümdamsii ka kom laq. Laüta pishat maq walaq,” nguta apaiq ka thaüto. 9Krai mren, kriiwe tsi ka tiidoqra heasaq she heakito. Kiimaq, apaiq riimin adamsii kom ka pisaq raütiishe, kokkok she wawanto.

Ara atsi tiiheake wan ranaiq ka Asii Niitiitsak ranaiq riito. 10Kra ningkhan, “Ümchaü ranaiq ka Asii Niitiitsak ranaiq. Ümniiraq ümdamsii kom pi wan ka raa mak. Arka nashiq Thungtri na apii,” nguta Jehudinok welabi raq atsi wa aheaki we kra, sonto.

11Shatmaq, “I tsi ara tiihea keti we raq, ara damsii kom ara pi laüta walaq nguta chongto,” nguta apaiq raq, tsangshiq bom ka treto.

12Kiijiishe, “Riita, ümniima akha bom chongketi we ka ju wa?” nguta tsangshiq raq, apaiq ma waito.

13Shatmaq, atsi wa aheaki we raq, Jesuq ka juwa, kriika sapmak dea. Kra akhing bala kiijaq maiq phong ka pahea riitsap riikhat asi riito. Nokwe phong mong maq Jesuq ka ahin niishe lat hoto.

14Kra jai miishe, Jesuq raq apaiq ka Shomjam na hali humto. Raüta, “Tai laq! Ümthatsi ka heakito she. Ngarai anye ka naq tang nongkiq she. Tangnong haü la, ümniima arthaq niimin chamchao jonghea misaü kiiphaü,” nguta apaiq ma akha tsii chongkuqto.

15Kiijiishe, kriiwe ka wawan raüta, apaiq thatsi ka Jesuq raq tiihea kuqto nguta, Jehudinok welabi miishe chongto. 16Jesuq raq arwe thatsi ka, Asii Niitiitsak ranaiq na tiiheake wan kha na, tsangshiq raq Jesuq kriishe tiichamchao phahoto. 17Shatmaq, Jesuq raq tsangshiq bom ka treto, “I We raq maiqse ka wranaiqshe khrum kuqtlo. Krai mren, ngi riimin wranaiq she maiqse ka khrum kuq tiikang.”

18Ara bomtsi ara tai raütiishe, Jehudinok welabi raq apaiq ka atsea baiq chang, ngutiishe tsangshiq raq tri ka tiipha khato. Tsangshiq raq Jesuq ngeng wantaq arka, apaiq raq Asii Niitiitsak ranaiq tri raü kra jin wan lamlam li min riimak, shatmaq, Shiikeawe kiimin apaiq ma Awe nguta tiingo tlo ngutiishe ngeng wanto. Arka, apaiq kiimin Shiikeawe rai mren chhaq arang hoti we nguta tiingo riito.

Awe Raq Ase Ma Akuq Arang

19Kriikha maq, Jesuq raq tsangshiq bom ka treto, “Ngi raq chongtiikang arka tengteng: Ase raq apaiq tsii tsii miika jamlai phan sham akai min shamlot mak. Apaiq riika Awe jaqtho kra liiraü tli shamtlo. Awe raq jamlai wa sham tlaq, kriili Ase riimin shamtlo. 20Ara jamkhano chongtiikang ngukla, Awe raq Ase ka pinthum lungwii tlo. Krai mren, apaiq raq jamlai wa sham tlaq, kriika Ase ma thumthum tiichhikuq tlo. Awe raq apaiq ma, arthun arthaq niimin kao raüta jaqsham ajong tiichhike wan chang dea asi shaqli. Kra thun kriika namshiq raq chhi wan han jiila kai awang mirhan. 21Awe raq maiqse ka amaa wa tiijangtlo. Raüta tsangshiq ma rilung tsitsü ka kuqtlo. Kiikhiisii hali, Ase riimin apaiq raq ümriiti miiwa rilung tsitsü kewan lungwii tlaq, kriiti ma rilung tsitsü ka kuqtlo. 22Kiimahali, Awe riika apaiq tsii tsii maq, ju min ajiq alam nguta shin mak. Phanrap phanrii ajiq alam shin miitu tri raü tu ka, Ase jaq niishe kiinong kuqto. 23Krai mren, maiqse angu wiita raq, Awe raq jamkho shreng tlaq kiikhiisii hali, Ase kiimin mishreng. Jurwa Ase shreng mak, kriika Ase tiikaiti we, Awe kiimin shreng mak.

24“Ngi raq chong tiikang arka tengteng: Jurwa i bom chong ara tai tlaq kiimaq ngi tiikaiti we ma kam tlaq, kriiti raq pattup pat-sa rilung ka alap wan wishe. Kriiti kha ka apho chang ahü she. Amaa wa atra she. 25Ngi raq chongtiikang arka tengteng: Akhing saü wanto she. Chongtiikang akhing ka saükito she. Ümchaü ka amaati riimin Shiikeawe Se bomchong ka mitai wan she. Kra tai tlaqti ka, atra she misam wan. 26Awe ka tarü ma tsitsü raüchong. Krai mren ngi, Ase armin tarü ma tsitsü raüchong. 27Kiimaq Awe raq, Ase ma kha phoke wan arang ka akekun she. Ara jamkhano chongtiikang ngukla, ngi ahata Maiq Se. 28Ara tai lanta namshiq ka naq wang rongkiq. Ara jamkhano chong tiikang ngukla, maiq amaati thun wiita raq i bom tai miitu akhing ka saükito she. 29Kra tai raüta, tsangshiq ka maiqmii maakho mong wa midong wan. Juwa arilung na tingting maq siwantaq, kriiti ka amaa wa dong wan raüta, atra she misi wan. Shatmaq, juwa arilung na ajiq jaqsham raüta siwantaq, kriiti ka amaa wa dong wan jai, atiishut she mirbaiq wan.

Jesuq Rai Pongti Hakhibi

30“Ngi raq i tsiitsii maq tri raü ka sham mang. I We raq chongkuq tlaq kra phanphan li shin tiikang. Kriikha maq, ngi raq jamlai wa shin tiikang, kriika khaqkhaq shin tiikang. Ara jamkhano chongtiikang ngukla, ngi riika i mang jong miitu sham mang. Shatmaq, ngi tiikaiti we raq ahea nguta jamlai wa thimi tlaq, kriili sham tiikang.

31“Ngi raq maiqmii miitu saqse kham ha jiika, kriika tengto dea nguta maiq raq lang mak miraq. 32Shatmaq, ngi dong chang raüchong kra chongketi ka Shiikeawe asi. Ngi miitu apaiq raq jamlai wa chong tlaq, kriika tengteng dea nguta ngi raq asap ha. 33Namshiq raq Johan phana maiq tsasoqti tiiki lanta, apaiq ka juwa nguta bom tiiwai kilan ihata. Krai mren, Johan raq ngi miitu namshiq ma bom chongkuqto ihata. Apaiq raq ngi miitu jamlai bom wa chong kuqtaq, kriika tengteng. 34Ngi ka juwa, kra miitu maiqse hakhi ka raa mak. Johan raq ngi miitu akuq hakhi bomtsi chong tiikang arka, namshiq ka mitiichhii kuq wan laq nguta ngo maq chong kuq tiikang. 35Johan traho bomchong ka namshiq ma wanii tu. Kra tai lanta namshiq ka chochi wan lan ihata. Namshiq ka bala shi se miitu, apaiq bomchong walü li na siwan lungwii lan ihata. Lanta chochi lan ihata. 36Shatmaq, ngi miitu Johan raq jamlai hakhi wa kuqtaq, kra thaq niimin ajong hakhi kewanti ka asi. Ngi raq jamlai wa sham tiikang thun arka, i We raq atiisham wan. Arthun jaqsham ara riili, ngi arka, i We raq atiiki dea nguta, ngi miitu hakhi kuq tlo. 37Kiimaq ngi tiikaiti i We riimin la, ngi miitu tengteng hakhi kuqtlo. Namshiq raq apaiq bom ka jangshi min tai man shaq li. Kiimaq apaiq sham kiimin chhi man shaq li. 38Kiimaq namshiq raq apaiq bomtsi ka, namtsan na shaq man kata. Ara jamkhano chongtiikang ngukla, ngi ardea apaiq raq atiiki we kra nguta, namshiq raq ngi ma kamwan man. 39Namshiq raq Asii Bomtsi ka sidi phat siq tlan. Namshiq raq Asii Bomtsi phat tlan kriika, kiiwa namshiq raq pattup pat-sa rilung ka lap wan ma nguta phat tlan. Riita, ara Asii bomtsi riika, ngi arka juwa kra chongkuq tlo! 40Kiikhiitaü maq dongdii min, namshiq ka i puk na riikhaqli rilung lap wan miitu nyap wan ro man.

41“Ngi riika maiqse raq shomra kriika rit mang. 42Ara jamkhano chongtiikang ngukla, ngi raq namshiq hon atsii ka wiita asapha. Kiimaq namtsan na Shiikeawe ma lungwii tsii rüm man kriimin asap ha. 43Ngi ka i We aming maq namshiq phana saükikang. Shatmaq, namshiq raq ngi ka tao man. Shatmaq, ümtiikiiwa maiq weshi ra ka, maiqmii arang maq namshiq phana saüki raüla, kriiti ka namshiq raq mitao han. 44Namshiq riika maiq nai maiq liipan na tiishomra sea kli lungwii tlan. Shatmaq, juwa Shiikeawe nguta sitlaq, kriiwe raq namshiq ka shomra chang lam ka ritwan man. Kiikhiiti riika ngi ma jamkho mikam han? 45Ngi raq namshiq ka i We man na mitiishut ngutiika naq tiima rongkiq. Shatmaq, namshiq raq ranphan tlan we, Mosheq raq namshiq ka mishra. 46Namshiq raq ngohea shaq shaq dea, Mosheq ma kam tlan ngu haü jiika, ngi miimin mikam han wa. Mosheq raq jamlai wa waiqtaq kra ma, namshiq ka kamwan man dea riilan. Ara jamkhano chongtiikang ngukla, Mosheq riika, ngi miitu bomchong ka waiq wanto. 47Riita, ija, apaiq raq jamlai wa waiqtaq kriima santla, namshiq raq kamwan man riilan, ikhiijiika, ngi raq chongkuq tiikang, i bomtsi armiika jamkho mikam han?”

Currently Selected:

JOHAN 5: TANGSBSI

Highlight

Copy