MARK 13
13
Jesu niu Charaky Kam Maha Mirabo Lamga Dinbo
(Mt 24.1-2; Lk 21.5-6)
1Jesu niu Charaky gasu tadpadboga, pakhommai khatniu din-e, “Phuilo, katipao yo! Haise dejiukha ngao wibo kydunglo khatdi dejiukha maisuang habo tudunglo!”
2Jesu niu paokakge, “Naliuniu haibo ky dungse ngaoma? Tatukang khatnadi masiak khai lakge, pakhiangnase kaladthon kammi rabo-e.”
Magenthiu Chariubo Nai Mathadbo
(Mt 24.3-14; Lk 21.7-19)
3Peter, Jacob, John khatdi Andrew niu Jesu khuga mahin wangboga, Jesu se Charaky kenpad lujiu Olive Luongga ntaobam niu-e. 4Paliuniu din-e, “Haise dedao padsu ralo, khatdi haidungse padsu rabo tingga dekumbogu tasibo padsu ralo chiubo aliu khuga dinkhailo.”
5Jesu niu paliu khuga din-e, “Ningting sijiu bamlo, sichiujiu naliutu mai khatniudi pijiu sonmi tulo. 6Maidung kakeng khaniu chamtan gasu wangjiu din sune, ‘I hai pa-e!’ sichiujiu paliuniu maidung kakeng khatu aratjiu son sune. 7Khatdi naliuniu pabam hinaga tathiu-chari khuan chiu sai manangmi tulo. Haikumbo hinase padsiak rabo-e, chiudi haisiniu kanambo wangmide chiubo makge. 8Kadih khatniu kadih khattu chari thiu sune; chawang kadih khatniu chawang kadih khattu aphen sune. Pabam hinaga kathi wangsune, khatdi charakhum wangsune. Haidungse ngenatu manabo thad thiu karaibo kumbo-e.
9 #
Mt 10.17-20; Lk 12.11,12. “Naliu kaden sijiu bamrabo-e. Naliutu minlujiu ladzankyga pipad sune. Naliutu maduiky gasu dap sune. Naliuniu mawangpaodung khatdi chawangdung suangga adonjengniu chaplujiu Kawibo champaose paliu khuga dinrabo-e. 10Chiudi kanambose wangtang makhaga Kawicham hai mai hina khuga dinron khai rabo-e. 11Sichiujiu naliutu minlujiu ladzankyga jukhaibo tingga naliuniu degu dinralo chiujiu manangmi tulo; naliu khuga pikhaibose dinlo. Palamra naliuniu dinrabo chamse naliugu makge; sise Masanbo Hiupuina khugasu wangrabo-e. 12Maidung siniu paliu singna siaktu kamshat raleng pipad sune, khatdi papiudung siniu paliu nahdungtu pipad sune, sichiujiu panahdung siniudi paliu pui-piudung situ pipad sune. 13#Mt 10.22.Adonjengniu naliutu mai hina mareng sune. Chiudi kanambo tangna khenglu mai situ rankhaibi rabo-e.
Maning Kamlakbo Wan
(Mt 24.15-28; Lk 21.20-24)
14 #
Dan 9.27; 11.31; 12.11. ‘Naliuniu buimakbo bamga chapbambo tingga, ‘Maning kamlakbo mathadse’ chapbambo tingga ngaosune.” (Ariak hai kenbo mai siniu paramba haise sirabo-e). “Sichiujiu Judea ga bammai siniu maluang genlam pakkhai sune. 15#Lk 17.31.Chaky riga bambo piu siniu kalungga pagu mania khoira nkum mak rabo-e. 16Chaluga bambo piu siniu pafai khoira chakyga malanwang mak rabo-e. 17Sibo tingga pawon kaphungpuidung nai npampuidungse dejiukha chariu ralo! 18Haikumbose tathe tingga padmakra Tingwang khuga khenglulo! 19#Dan 12.1; Mad 7.14.Palamra sikumbo magenthak haise nda Tingwang niu kadih dambo gasu tuhoi tangbo pad makhabo-e. Khatdi haikumbose wadaodi padlan lakge. 20Chiudi Rapiu niu sibo tingmik riakse kam madun khai mide; paniu sichiu khaibi maksai, mai khatdi ringsi lakge; paniu kadalu mai jengniu sibo tingse kam madun khaibo-e.
21“Sichiusai, mai khatniu nakhuga, ‘Phuilo, haiga Khrista se bamme!’ chiu dindi sise malummi tulo. 22Palamra aratbo khristadung khatdi aratbo phaimiukakungdung padsu rabo-e. Tingwang niu kadalubo maitu tangbo sonra paliuniu maisuang kahabo khatdi tasibodung kamsune. 23Kaden sijiu bamlo! Patingse wangtang makhaga pakhiangnase naliu khuga Iniu dinkhaibo-e.
Chamai Nahpiu Wanglan Rabo
(Mt 24.29-31; Lk 21.25-28)
24 #
Isa 13.10; Joel 2.10,31; 3.15; Mad 6.12;
Isa 13.10; Ezk 32.7. “Magenthiu chariubo hai padlubo saiga naimikse tamiuwang mirabo-e, chahiuse pabiu padtami rabo-e; 25#Isa 34.4; Mad 6.13;Joel 2.10.chagandungse tinggen lamsu tiakiumi rabo-e, khatdi tingpuk lam bambo pumtandungse paliu bam kalimi rabo-e. 26#Dan 7.13; Mad 1.7.Sichiusai Chamai Nahpiuse kamuang gasu pumtan nai maken dibo jaojiu madukiu surabo-e. 27Sichiujiu Tingwang niu kadalu maitu khom maduira kadih pake madai gase mazadung situ langkiu rabo-e.
Ndutbanggu Ngiudon
(Mt 24.32-35; Lk 21.29-33)
28“Ndutbang siniu naliutu ngiudon khat katikhaibo thiululo. Paniwse madiakwangjiu khatdi pamum padsu dasai, kariak tingse wangkinne chiubo naliuniu si-e. 29Sise kumjiu, naliuniu haidungse padbo ngao dasai, patingse nawang kinne chiubo sirabo-e. 30Haidungse tuhoi lungbam maidungniu shaikam makhaga padrabo-e chiubo maningtaolo. 31Tinggen nai kadihse hami rabo-e, chiudi agu ladkeng sira wadaodi halakge.
Pating Pawanse Mai Khatdi Simakge
(Mt 24.36-44)
32 #
Mt 24.36. “Sichiujiu mai khatniudi, pating, pawanse dedao wangralo chiubo simakge, tinggen mazadung niudi, Nahpiu siniudi simakge, sise Papiu ronna sibo-e. 33Akhe sijiu bamlo, mathing sijiu bamlo, palamra pating pawanse dedao padralo chiubo naliuniu simakge. 34#Lk 12.36-38.Haise maipiu khatniu pangamse kamraleng pavangdungtu khaidiak lujiu, khatdi kamun khuanbo piutu akhera khaidiak lujiu chabin tadmibo kumbo-e. 35Sichiusai, kaden silo, palamra papaose dedao chakyga malanwang ralo chiubo simakge. Haise chawandi sui-e, chundingdi sui-e, nsuan kaludi sui-e, maksai naimik padgapbo gadi sui-e. 36Paniu bungjiu wang dasai, nangniu jibamniubo paniu daomak rabo-e. 37Sichiusai, Iniu naliu khuga dinbo hina hai, mathiu khuga dinbo-e. Akhe sijiu bamlo!”
Currently Selected:
MARK 13: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
