MARK 14

Jesu Tu Minra Kambo

(Mt 26.1-5; Lk 22.1-2; Jn 11.45-53)

1 # Tad 12.1-27. Haise chakhi khaimakbo taruak tiubo, Kenpadbo Ngee masuangga jengniabo nai-e. Singkudung nai Tacheng-tajaigu katipaodung siniu Jesu tu mahin minlujiu kamshat mira npui phiujiu kin-e. 2Paliuniu din-e, “Aliuniu haise changee tingga kammak rabo-e, palamra maidung siniu chakhuan-chara kampadmi rabo-e.”

Jesu Tu Bethany Ga Wasa Manuk Khaibo

(Mt 26.6-13; Jn 21.1-8)

3 # Lk 7.37,38. Jesu hai Bethany ga, Simon kubo, ka-nphenbo piu kyga bamme. Jesu niu katiu tiu bamboga, maipui khatniu paman kungbo parim wibo wasabung khat khoi lujiu wang-e. Paniu pagu wasabungse lepad lujiu, sise Jesu piga runkhai sude. 4Siga maidung khangsiara paliu lung pom mide, khatdi khat khat khuga dinsude, “Parim wibo haitu haichiujiu kam nchum bambo hai pageng degu bamjiulo? 5Haise rangkang kai sum suang kengjiu jonlu bui-e, sichiujiu kaleksa maidungtu njankhai lubui-e.” Sichiujiu paliuniu pakense tiak sude.

6Chiudi Jesu niu din-e, “Patu pijiu pakhen pani pithiu milo! Dekamjiu naliuniu patu kam kabuak bamjiulo? Paniu kawibo khatdi matai kawibo ngamse akhuga kamkhai bambo-e. 7#Taj 15.11.Naliuniu kaleksa maidung tura tingtheng maluang bamrabo-e, sichiujiu naliuniu daolubo wan ga, paliutu nkhakhai ngamme. Chiudi naliuniu atura tingtheng maluang bam lakge. 8Paniu kangambose paniu kam bambo-e, atu baikhai rabo tiense paniu kamkhai masuang bambo-e. 9Tuhoi, Iniu naliu khuga pachang paling dinbo-e, chiubora kadihpiri pabam hinaga kawicham dinron bamthen, paniu kamkhai mibo hai, patu maningtaobo thiujiu dinbammi rabo-e.”

Judas Niu Jesu Tu Jonra Suikhaibo

(Mt 26.14-16; Lk 22.3-6)

10Sichiujiu, khommai rong gasu khang khat, Judas Iscariot siniu dibo singku paodung khulam Jesu tu jonra tad mide. 11Paniu dinbo gase paliu chunwi mide, sichiujiu patu rangkang pira ladriat thiu lude. Sijengniu Jesu tu paliu khuga pikhaira pajad kawibo hai Judas niu phiu sude.

Jesu Niu Pakhommaitu Maluong Lujiu Kenpadbo Malod Tiubo

(Mt 26.17-25; Lk 22.7-14,21-23; Jn 13.21-30)

12Chakhi khaimakbo Taruak tiubo, Kenpadbo Ngee maluadleng milypoi kamshatbo naise pakhommaidung siniu pakhuga maniu-e, “Aliuniu debo bamga Kenpadbo maluadse kaden khaira nangniu lunilo?”

13Siga paniu paliu rong gasu khangniatu haichiu dinjiu langkhai mide, “Namdi gase tadsulo, siga mai khatniu taduikhiu ponkin niubo nanainiu daosune. 14Pasai suilujiu paniu ngutbo kygase ngutlo, khatdi chaky npao khuga haichiu dinlo, ‘Katipaoniu din-e, Iniu pakhommaidungtu maluang lujiu Kenpadbo Ngee maluad tiurabo bamse degalo?’ 15Siga paniu chakaigen lam kaden mawikhai bambo bamse lenkhai sune, siga nanainiu aliu mathiuleng wahina kaden khailo.”

16Khommai kania siniu namdi lamse tadde, siga Jesu niu dinkhaibo kumgapjiu daode; siga panainiu Kenpadbo Ngee maluadse kaden khaide.

17Chawanse wangboga, Jesu niu pakhommaidung khang kariu-je-niakiu situ maluang lujiu wangde. 18#T.Lui 41.9.Paliuniu chakuangkaiga katiu tiu bamboga, Jesu niu din-e, “Iniu pachangjiu naliu khuga dinbo-e, chiubora naliu rong gasu mai khatniu atu suimakjiu pipadmi sune.”

19Siga pakhommaidungse paliu chunsa mide, khatdi khat-khat thiujiu pakhuga maniu sude, “Iniu ma, Iniu ma?”

20Jesu niu paokakge, “Haise naliu rong gasu pagu taruakse chakuang khatga atu sumtiu macham bambo siniu-e. 21Chamai Nahpiu haira Masanbo ariakniu dinbo kumjiu shairabo-e; chiudi Chamai Nahpiu situ suimakjiu pipadbo piu sira dejiukha sansabo gulo! Patu mana wangmak tasai, pasan wi-nkiu rabo-e!”

Rapiu Gu Chawan Maluad

(Mt 26.26-30; Lk 22.14-20; 1 Co 11.23-25)

22Paliu katiu tiujiu bamboga, Jesu niu taruak khuang khat thinsu lujiu, Tingwang tu thuonjiu kakheng thiu khailu, khatdi phetpang lujiu pakhommaidung khuga pikhaijiu din-e, “Haise tiulo, haise atia-e.” 23Sibosai paniu chapiang sidi ponsu lujiu, Tingwang tu thuonkiu lujiu, paliu khuga pikhaide, sise paliu mathiu sakde. 24#Tad 24.8;Jer 31.31-34.Jesu niu din-e, “Haise maidungleng luangkhai mibo zai, khatdi Tingwang gu ladriat situ madan diangkhai mibo chamtan si-e. 25Iniu naliu khuga pachang paling dinbo-e: haibo mumjawse, Iniu Tingwang gu Chawangdihga wangjiu kasanbo mumjawse saklan makthen, wadaodi sak lanlak mide.”

26Sichiujiu paliu chalui khat thiujiu, Olive Luong lamse tadpad mide.

Peter Niu Suimak Rabotu Jesu Niu Din Masuangbo

(Mt 26.31-35; Lk 22.31-34; Jn 13.36-38)

27 # Zec 13.7. Jesu niu paliu khuga din-e, “Naliu mathiu atu phutkhai lujiu paktad kammi rabo-e, palamra Masanbo ariakniu din-e, ‘Tingwang niu milykhuanpao situ kamshat mine, siga milydungse pak marakam mine.’ 28#Mt 28.16.Chiudi Iniu ringsulan dasai, naliu masuangga Iniu Galilee lam tadrai bamniu sune.”

29Siga Peter niu paokakge, “Mai kakimainiu phutmi tadi, Ira wadaodi natu phut lakge.”

30Jesu niu Peter khuga din-e, “Iniu nakhuga pachangjiu dinbo-e: thaichun maruirengniu khuang lonnia makbo suangga, nangniu atu simakge chiujiu dinlon sum rabo-e.”

31Peter niu patun tanjiu paokak lan-e, “Iniu wadaodi sichiu lakge, Iniu kashaibo tangjiu natu maluang bam rabo-e.”

Sichiujiu kakibo pakhommaidung siniudi sikum gapjiu din kamme.

Jesu Niu Gethsemane Ga Kakheng Thiubo

(Mt 26.36-46; Lk 22.39-46)

32Paliuniu Gethsemane kubo bam gase wangde, siga Jesu niu pakhommaidung khuga din-e, “Iniu kakheng thiubo lungga, naliu haiga ntaobam niulo.” 33Sichiujiu paniu Peter, Jacob khatdi John paliutu maluanglu tadmide. Siga chunsabo nai nchungboniu palung phui mide. 34Siga paniu paliu khuga din-e, “Alungchun hai magenthiubo siniu, I shaira kum mide. Haiga naliu kakheng thiujiu bamniulo.”

35Paniu poinakha tadpad lujiu kadihga makhumkiu lujiu, daolu buisai, magenthiu chariubose wangmak raleng kheng-e. 36Paniu haichiu kheng-e, “Abba, Apiu yo, wahina nakhu gara sui kamme. Magenthiu chariubo piang hai akhugasu luthon khailo. Chiudi Iniu maningbo makjiu, nangniu nachunbo thiulo.”

37Sichiujiu paniu malan npadboga, khommai khang sumse jibing bamniubo daode. Paniu Peter khuga din-e, “Simon, nguiniu naliu sangjiu ma? Wanchak kak khat lengdi naliuniu raksu ngamlak siakjiu ma?” 38Sichiujiu paniu paliu khuga din-e, “Akhe sijiu bamlo, khatdi kahiamboga kaokhai makra naliu kheng lulo. Hiupuina sira masenjiu bamme, chiudi chapum sira son-e.”

39Paniu tadpad lanlujiu kalu kumgapjiu kheng lande. 40Sichiujiu paniu malanwang lanboga, pakhommaidungse jibing bamniubo daolande; paliu mikse rakpad lulak siakjiu bamme. Siga paliuniu pakhuga wadi dinra sita mide.

41Paniu malanwang pasumboga, paliu khuga din-e, “Naliu mathakjiu jibam khama? Buimide! Pawanse wangtang mide! Phuilo, Chamai Nahpiu situ tuhoira nuan phungmai ben-ga pikhai mide. 42Sulo, tadsukhe. Phuilo, atu suimakjiu pipadbo piuse haiga wang bamde.”

Jesu Tu Minbo

(Mt 26.47-56; Lk 22.47-53; Jn 18.3-12)

43Jesu niu haichiu dinbamga pakhommaidung khang kariu-je-niakiu gasu khang khatse chiubora Judas se wangtangde. Paniu dibo singku paodung, Tacheng-tajaigu katipaodung khatdi apaimaidungniu langkhaibo chaheng-changiu thinmai situ, majang lujiu wangde. 44Sichiujiu pipad khaibo piu siniu maidung khuga madan khat pikhai-e, Iniu biangpup khairabo piuse naliuniu machun kinbo piusi-e. Patuse minlujiu khatdi ratlujiu puitad milo.”

45Judas se wangtang gapda, paniu Jesu khuga wang lujiu din-e, “Katipao yo!” chiujiu patu biangpup khaide. 46Sichiujiu paliuniu Jesu tu minlude khatdi thinman lude. 47Chiudi siga chap bammai rong gasu khang khatniu paheng thadpad lujiu Dibo Singku vangpiu kuonse septap mide. 48Siga Jesu niu paliu khuga din-e, “Atu hai Tacheng-tajaiga kamaomai kumjiu, naliuniu atu minraleng, chaheng-changiu thinlu wangkin jiuma? 49#Lk 19.47; 21.37.Naimachang Charaky lungga Iniu naliutu katikhaijiu maluang bambo-e; siga naliuniu atu min makge. Chiudi haise Masanbo ariakga raokhai bambose wangtang raleng-e.”

50Sichiujiu pakhommaidung hinase patu saokhai lujiu pakkam mide.

51Chiudi akhangmai khatra fainoi ronna ben lujiu, Jesu saisui kin-e. Paliuniu patudi minra kamsude. 52Siga paniu pafaise thonkhai diak lujiu papumruang paktad mide.

Jesu Apaimaidung Masuangga

(Mt 26.57-68; Lk 22.54-55,63-71; Jn 18.13,14,19-24)

53Sigasu Jesu tu Dibo Singku khuga juwangde, siga dibo singku paodung hina, apaimai hina khatdi Tacheng-tajaigu katipaodung hina wang madui bamme. 54Peter se sailam npen bijiu suitad kinne, khatdi Dibo Singku ky jeng gase wangde. Siga akhemaidungtu padi maluang lujiu chami magajiu bamme. 55Singkupaodung nai apaimaidung siniu Jesu tu kamshatra pamao phiujiu bamme, chiudi paliuniu wakhatdi daomakge. 56Jengdin kakeng khaniu Jesu riga aratbo madam khaijiu bamme, chiudi paliugu jengdinse macham makge.

57Sichiujiu maidung khangsianiu chapsu lujiu Jesu riga aratbo jengdin madam khaijiu bamme. 58#Jn 2.19.“Maidungniu thiukhaibo Raky hai rathon milo, chiusai jengsum lungga chabenniu thiu makbo khat paniu thiu lubui-e,’ chiu dinbo aliu chiu-e.’” 59Sichiudi paliuniu madam khaibose wakhatdi macham makge.

60Dibo Singku siniu paliu mathiu masuangga chapkhang lujiu Jesu khuga maniu-e, “Paliuniu nariga kamaobo madam khaijiu bambo haiga nang wadi paokakra hajiuma?”

61Chiudi Jesu niu maliu makjiu bamme, wadi din makge. Siga Dibo Singku siniu patu maniu-e, “Nang hai Sanwibo Tingwang Nahpiu Messiah sima?”

62 # Dan 7.13. Jesu niu paokakge, “I-ye, Chamai Nahpiu siniu Ngamkambo Piu ben jatlam ntao bambo khatdi tinggen lamsu kamuang riganiu wangbo naliuniu ngao sune.”

63Siga Dibo Singku siniu pafai phetjiu din-e,, “Aliuniu kakibo jengdin lusonra hade! 64#Lev 24.16.Paniu Tingwang tu ping makjiu dinbo hai chiulude. Naliu degu maninglo?”

Paliu mathiudi patu din masa karen sude, “Pahai mao siakge, patu kamshatra bui-e.”

65Paliu khangsianiu Jesu gen-ga tatai masiukhai sude, khatdi pamik dom lujiu patu dapjiu din-e, “Saoniu natu dapbam jiulo din matailo.” Sichiujiu paliuniu patu julujiu kaphi sude.

Peter Niu Jesu Tu Suimakbo

(Mt 26.69-75; Lk 22.56-62; Jn 18.15-18,25-27)

66Dibo Singku vangpui khat kamalam padboga, Peter ntaobam kha-e. 67Peter niu chami magajiu bambose paniu ngao luboga, patu phui mating lujiu din-e, “Nangdi Nazareth Jesu sai suibo mai khatle.”

68Chiudi paniu sise suimakge. “I simakge--nangniu dinbambose I simakge,” chiujiu paniu paokakge. Sichiujiu kama lenlam tadpad mide. Siga maruireng khuang mide.

69Sibosai kavangpui siniu patu ngaolan lujiu pamungga chap bammai khuga din-e, “Padi paliu ruangga khang khatle.” 70Chiudi Peter niu suimak lande.

Bamnak lubo sai, pamungga chap bammai khatniu din lan-e, “Nangdi paliu ruangga khang khatle chiubo suimak silakge, palamra nangdi Galilee gasu-e.”

71Siga Peter niu din-e, “Iniu pachangjiu dinbo-e, chiubo siang ngamme. Naliuniu din bambo piutu Ira simakge!”

72Siga maruireng siniu khuang lonnia mide, siga Jesu niu pakhuga dechiu dinkhai milo chiubo Peter niu maningtaode, “Maruireng siniu khuang lonnia makhaga nangniu atu simakge chiujiu dinlon sum rabo-e.” Siga pase pachun sachang sajiu kapsude.

Currently Selected:

MARK 14: LIANBSI

Highlight

Copy