MARK 15

Jesu Tu Pilate Suangga Maluong Wangbo

(Mt 27.1-2,11-14; Lk 23.1-5; Jn 18.28-38)

1Nsuan kaluse dibo singku paodung siniu kalangjiu katingmaidung, Tacheng-tajaigu katipaodung khatdi Apaimai mathiutu ku aruang lujiu makhiam thiu sude. Paliuniu Jesu tu ratlujiu Pilate khuga julu wangde. 2Siga Pilate niu pakhuga maniu-e, “Nang hai Jehudimai wangpiu sima?”

Jesu niu paokakge, “Nangniu dinbo si-e.”

3Singkupaodung siniu Jesu tu kengchangkha madam khaijiu bamme. 4Sijengniu Pilate niu pakhuga maniu lan-e, “Nang paokak khailak jiuma? Paliuniu madam khaijiu bambo hina hai nkinglo!”

5Jesu niu wadi dinmakge, siga Pilate se pasuang hamide.

Jesu Tu Kamshatra Suikhaibo

(Mt 27.15-26; Lk 23.13-25; Jn 18.39—19.16)

6Kenpadbo Ngee machangnaga bangkhai bambo rong gasu maidungniu khengbo mai khattu Pilate niu phutkhai khai-e. 7Sibo tingga maipiu khat pazanniu Barabbas kubo kabuakbo gasu maitu gimibo jengniu kavangkyga khai bamme. 8Maidungniu wang madui lujiu sise kamkhai raleng Pilate khuga kheng sude, 9Paniu paliu khuga maniu-e, “Iniu Jehudimai wangpiu tuse phutkhaira naliuniu lunima?” 10Singkupaodung siniu Jesu tu pakhuga pikhaibo lamse paniu simasan bamme, palamra paliuniu patu manmabo donniu-e.

11Chiudi dibo singku paodung siniu maidungtu kalung lujiu, Barabbas tu paliuleng phut khaira Pilate khuga khengra dinkhaide. 12Pilate niu maidung khuga dinlan-e, “Sichiusai, Iniu Jehudi mai wangpiu situ degu kamralo?”

13Paliuniu senjiu din-e, “Patu masengshat milo!”

14Siga Pilate niu maniu-e, “Paniu degu kamaobo kamkhai mibo bamjiulo?”

Paliuniu sen matanjiu din-e, “Patu masengshat milo!”

15Pilate niu maidung situ pikimkhai nijiu paliuleng Barabbas tu phutkhai mide. Khatdi Jesu tu chariangniu dapkhai lujiu masengshat mira pikhai mide.

Riphendungniu Jesu Tu Thenjiu Nuimenbo

(Mt 27.27-31; Jn 19.2-3)

16Riphendung siniu Jesu tu dihthinpao ky jengga pui ngutde khatdi paliu rupmaitu ku maduide. 17Paliuniu Jesu tu liklikbo fai benkhai bide, khatdi tathu keniu kambo pirun papeega runkhaide. 18Sigasu paliuniu patu kahumjiu din-e, “Jehudi mai wangpiu yo, tingthengjiu ring bamlo!” 19Sichiujiu paliuniu patuse tathun thin lujiu papee kakhiujiu, pazuga tatai masiu khaide, khatdi khudung kiujiu pamasuangga makhum kiude. 20Paliuniu patuse haichiu thenjiu nuimen khai lubo sai liklikbo faise khoipad lan mide khatdi pafaise benkhai lanbide. Sichiujiu paliuniu patu singchaiga jumaseng raleng puitad mide.

Jesu Tu Singchaiga Jumasengbo

(Mt 27.32-44; Lk 23.26-43; Jn 19.17-27)

21 # Rom 16.13. Paliuniu npui gase maipiu khat pazanniu Simon kubo piutu dao-e, pase manam lamsu namdilam wangkinbo-e, patuse riphendung siniu Jesu gu singchai phungra manomjiu minkhaide. (Simon hai Cyrene gasu-e khatdi pahai Alexander nai Rufus piu-e). 22Paliuniu Jesu tu Golgotha parambaniu “Tapeeruang luang” chiu kubo bamga puimengde. 23Siga paliuniu patu jaw nai singmendui kakhabo khai ajalujiu pisakra kamme, chiudi Jesu niu sise sakhai makge. 24#T.Lui 22.18.Siga paliuniu patu jumaseng khaide khatdi pafaise paliuleng njanra, taden thonjiu phuide. 25Paliuniu patu jumaseng subose nsuan wanchak chakiu ga-e. 26Patu madam khaibo ladkeng siniu raokhai-e: “Jehudi mai Wangpiu.” 27Paliuniu agatiumai khang nia tudi Jesu tu maluang maseng macham khai-e. Khatniu paben majatlam, khatniu paben mawilam chiujiu jumaseng khaide. 28Haise Masanbo ariakniu dinbose wangtang raleng-e, “Paniu kamaomai dam lumacham khai-e.”

29 # T.Lui 22.7; 109.25; Mk 14.58; Jn 2.19. Pamungga tadwangmai siniudi paliu pi kangumjiu Jesu tu nuimenjiu haichiu din-e: “Aha! Nang hai Charaky situ rathon lujiu jeng sum lungga thiulan rabo piu si-e! 30Tuhoira singchai gasu nkumlo khatdi naronna natu ranlulo!”

31Sise kumjiu, dibo singku paodung nai Tacheng-tajaigu katipaodung siniu Jesu tu nuimenjiu, khat khat khuga din-e, 32“Paniu maidung tura rankhai-e, chiudi paronna patu rankhai ngam makge. Tuhoira Israel mai Wangpiu Messiah siniu singchai gasu nkumbo aliu phuikhe, sichiusai aliuniu patu malum rabo-e!”

Sichiujiu Jesu tu maluang jumaseng macham khaibo khangnia siniudi patu din masajiu bamme.

Jesu Shaibo

(Mt 27.45-56; Lk 23.44-49; Jn 19.28-30)

33Niending tingga kadih pakhiangna, wanchak kak sum tamiu wang-e. 34#T.Lui 22.1.Wanchak sum kiuboga Jesu niu pakhuan tanjiu senpadle: “Eloi, Eloi, lema sabachthani?” Sibo rambara, “A-Rawang yo, A-Rawang yo, dekamjiu nang atu phutmi jiulo!”

35Siga bammai khangsianiu pakhuanse chiulujiu din-e, “Kinglo, paniu Elijah tu kujiu bamme!” 36#T.Lui 69.21.Paliu ruangga mai khatniu sak sabo jawse wapong khatga sumlujiu tathun ton-ga runglujiu pakwang, sise Jesu mun-ga madon khai-e. Siga mai khatniu din-e, “Khuanno, Elijah niu wangjiu patu singchai gasu lukiukhai suma aliuniu phuikhe!”

37Pakhuan tanjiu senkhai lujiu Jesu shai mide.

38 # Tad 26.31-33. Charaky lungga masengkhai bambo zusungfaise papee gasu parun tangbo njan nia thiujiu kekri mide. 39Singchai mungga chapbambo riphenpi siniu Jesu dechiu shaikiu milo chiubo ngao-e. Paniu din-e, “Hainase pachangjiu Tingwang Nahpiu siakge!”

40 # Lk 8.2,3. Maipuidung khangsia siga chap npen lujiu phui bamme. Sise Magdalene Mary, Jacob nabo nai Joseph pui Mary khatdi Salome paliu-e. 41Paliu hai Jesu niu Galilee ga bambo gasu suikinbo, khatdi patu nkha khaijiu kinbo puidung-e. Jerusalem lamsu patu maluanglu wangbo puidung kakengkhadi siga bamme.

Jesu Tu Baikhaibo

(Mt 27.57-61; Lk 23.50-56; Jn 19.38-42)

42Siga Arimathea maipiu, Joseph niu wangbo hai chawan ramliang mide. Pahaise Apaimai ruangga chakhuang thiubuibo, Tingwang gu Chawangdihtu khuanbambo mai khatle. 43Haise Kadenbo Nai-e (chiubora, Tabamnai suangbo nai-e) sijengniu Joseph niu Pilate khuga papum siakniu tadlujiu Jesu pum situ khengde. 44Jesu se shaimide chiubo chiuluboga Pilate se pasuang hamide. Paniu riphenpi situ kulujiu Jesu se shaimibo nakkha mijiuma chiubo maniu-e. 45Riphenpi ladse chiuluboga Pilate niu Jesu pumse lusui-e chiubo Joseph khuga dinkhaide. 46Joseph niu papumse ponkiu lujiu sise fainoiniu majiukhai lujiu, tatuga bungkhaibo rawga baikhai mide. Siga paniu charawse tatu kadibo khatniu kaladsim mide. 47Siga Mary Magdalene nai Joseph pui Mary siniu phuijiu bamme sichiujiu Jesu pumse dega khaimilo chiubo phuijiu bambo-e.

Currently Selected:

MARK 15: LIANBSI

Highlight

Copy