MARK 12

Mumsireng Mathakbo Piutu Din Champanbo

(Mt 21.33-46; Lk 20.9-19)

1 # Isa 5.1,2. Sigasu Jesu niu paliu khuga din champanbo thiujiu din-e: “Nda maipiu khatniu mumsireng khat renglujiu, mumsy thunraleng pabam chukhaide, khatdi khom maduirabo apaky thiukhaide. Sichiulujiu paniu mumsirengse maidung khuga mathak khaidiak lujiu chabin tadmide. 2Sichiujiu mumsyse atiat ting wangsuboga paniu kavang khattu pareng mathak khaidiak maidung khuga padam lura langkhaide. 3Mathak khai maidung siniu kavang situ minlujiu dapkhai bide, khatdi wadi pikhai makjiu matha kalan khai mide. 4Sigasu papaopiu siniu kavang khattu langkhai lande; mathak khai maidung siniu patu dapjiu kam mangam khaijiu langkhai bide. 5Papaopiu siniu kavang khattu langkhai lande, siga paliuniu patu kamshat mide. 6Tuhoira langkhai lanrabo sira paniu kungbo panahpiuse ronna mide. Sichiujiu, kanam thuboga, paniu panahpiu situ mathak khai maidung khugase langkhaide. Paniu din-e, ‘Anahpiu tura paliuniu chakhuang thiusu rabo-e.’ 7Chiudi mathak khai maidung siniu khat khat khuga din-e, ‘Hainase papaopiu nahpiu kalek lurabo si-e. Wanglo, aliuniu patu kamshat mikhe, sichiusai pagu maniadungse aliugu thiumi rabo-e!’ 8Sichiujiu paliuniu panahpiu situ kamshat lujiu paphawse kareng lenlam thonkhai mide.

9“Sichiu dasai, mumsireng paopiu siniu degu kamsu ralo?” chiujiu Jesu niu maniu-e. “Paniu wanglujiu simaidung situ kamshat lujiu katammai khuga mathak khai mirabo-e. 10#T.Lui 118.22,23.Pachangjiu naliuniu haibo Masanbo ariakse kentao bamrabo-e,

‘Chaky kathiu maidung siniu pageng ha-e chiujiu thon mibo tu siniu

wahinagu kungthubo thiumi rabo-e.

11Haise Rapiu niu kamkhai mibo-e;

dejiukha maisuang habo gulo!’”

12Jehudi maidunggu katingmaidung siniu Jesu tu minra kam sude, palamra paniu din champan khaibo hai paliutu dinbambo-e chiubo paliuniu simide. Chiudi maidung situ paliuniu pingbo jengniu, patu phutkhai lujiu tadmide.

Ramkha Pirabo Lamga Maniubo

(Mt 22.15-22; Lk 20.20-26)

13Pharisee maidung khangsia nai Herod rupgu khangsiatu wa maniubo tathak gasu Jesu tu minra langkhaide. 14Paliuniu pakhuga wanglujiu din-e, “Katipao yo, nangra mai khat tudi pi chariukhai makjiu majibose din-e chiubo aliu si-e. Nangra mai khat tudi manang makjiu Tingwang lamga majibose katikhai-e. Siniu Romai Wangdipiutu ramkha pibo hai aliugu Tacheng-tajaiga suima suimaklo? Aliu khuga dinkhailo. Aliuniu sise pirama, maksai pimak ralo?”

15Chiudi Jesu niu paliu thakse ngaolujiu haichiu paokakge, “Dekamjiu naliuniu atu madiu bamjiulo? Rangkang-gi pum khat akhuga khoiwanglo, I phui mataine.”

16Paliuniu rankanggi khat pakhuga khoiwang-e siga paniu maniu-e, “Haise sao menglo khatdi sao zanlo?”

“Wangdipiu gu-e” chiujiu paliuniu paokakge.

17Siga Jesu niu din-e, “Wide, sichiusai Wangdipiu guse Wangdipiutu pimilo, khatdi Tingwang guse Tingwang tu pirabo-e.”

Jesu gu chamkakga paliu suang hamide.

Kashaibo Gasu Ringsu Lanbo Lamga Maniubo

(Mt 22.23-33; Lk 20.27-40)

18 # Tk 23.8. Siga kashaibo gasu ringsulan lakge chiujiu dinbo Sadducee maidung siniu Jesu khuga wanglujiu din-e. 19#Taj 25.5.“Katipao yo, aliuleng Mose niu raokhai diakbo cheng sira: ‘Mai khatniu panao thiujiu panah lungmakjiu shaimi sai, sinapiu saikariupiu siniu sibo kamipui situ lulujiu shai mibo piu nahleng panainiu lungkhai rabo-e,’ chiu-e. 20Sichiujiu pawan khatga mai khangkhat pasingnadung khang chinnia bamniu-e; tingthubo piu siniu panao thiulujiu panah lungmakjiu shai mide. 21Sigasu niabopiu siniu sibopui situ lulande, padi panah lungmakjiu shailan mide. Pasumbopiu khugadi sichiu padlande, 22sichiujiu paliu mathiu khuga padde: singnadung khang chinnia siniu sinapui situ maluang lung khaide, chiudi ngena khatnadi lungmakjiu shaikam mide. 23Tuhoira, kashaimaidung hina ringsulanbo naise ringsulan dasai, pase saonao ralo? Paliu khang chinniase patu maluang lung kam mibo-e.”

24Jesu niu paliutu paokakge, “Dejiukha naliu hai maolo! Haise naliu simak jiuma? Haise naliuniu Masanbo Ariakkhuangtu maksai Tingwang gu pumtantu simakbo jengniu-e. 25Palamra maidung siniu ringsulan dasai, paliuse tinggen gu mazadung kummi rabo-e, siga tanao-tanah thiubo bamlakge. 26#Tad 3.6.Tuhoira, kashaimaitu piringsu lanbo lamga, Mose gu Ariakkhuangga chaphepiu taobo lamga, naliuniu kentao makma? Siga haichiujiu raokhai bamme chiubora Tingwang niu Mose khuga din-e, ‘I hai Abraham Rawang-e, Isaac Rawang-e khatdi Jacob Rawang-e.’ 27Pahai kashaimai Rawang makjiu, karingmai Rawang-e. Naliu hai maoju mide!”

Kadibo Ladrian

(Mt 22.34-40; Lk 10.25-28)

28Tacheng-tajaigu katipao khatniu paliu npao bambose chiulude. Sadducee maidungtu Jesu niu paokak mawikhai mide chiubo paniu silujiu, paniu pakhuga wanglujiu maniu-e: “Dekambo ladrian siniu kungthulo?”

29 # Taj 6.4,5. Jesu niu paokakge, “Kungthubo sira: ‘Israel mai yo, kinglo! Aliu Rapiu Tingwang hai khat nakhabo Rawang si-e. 30Rapiu Tingwang tu, nalungchun pakhiangna, nahiupuina pakhiangna, namaning pakhiangna khatdi napumtan pakhiangnaniu lungsalo.’ 31#Lev 19.18.Niaboga kungthubo ladrian siniu: ‘Naky ningmaitu napum kumgapjiu lungsalo.’ Haibo ladrian nia riga nkiubo ha-e.”

32 # Taj 4.35. Tacheng-tajaigu katipao siniu Jesu khuga din-e, “Wide, Katipao yo! Nangniu dinbose maji-e, Rapiu sira Tingwang-e, paronna sangnu kakibo ra ha-e. 33#Hos 6.6.Khatdi mai khatniu Tingwang tu palungchun pakhiangna, pamaning pakhiangna khatdi papumtan pakhiangnaniu lungsa rabo-e; khatdi paniu pakining maitu papum kumgapjiu lungsa rabo-e. Tingwang khuga khaoring kadkhaijiu, wa katam tambo kadkhaibo suangdi, haibo ladrian nia haitu majaibo siniu wi-nkiu-e.”

34 # Lk 10.25-28. Pagu chamkak hai ningting-e chiubo Jesu niu silubo jengniu pakhuga din-e, “Tingwang gu Chawangdih gasu nang-hai diuta mide.”

Haibo saiga mai khatniudi Jesu khuga wa maniu huta mide.

Messiah Lamga Maniubo

(Mt 22.41-46; Lk 20.41-44)

35Jesu niu Charaky lungga katikhaijiu bamboga, paniu maniu-e, “Dechiujiu Tacheng-tajaigu katipaodung siniu Messiah haise David riangrui-e chiu dinjiulo? 36#T.Lui 110.1.Masanbo Hiupuina siniu David tu kachu khaijiu din-e:

‘Rapiu niu a-Rapiu khuga din-e:

Iniu nagu mikremaitu naphipa hangga khaimak then,

aben majatlam ntao bamlo.’

37David papum siakniu patu ‘Rapiu’ chiu ku-e sai dechiujiu Messiah hai David kai-kik thiusi ralo?”

Tacheng-Tajaigu Katipaodung Lamga Rukhaibo

(Mt 23.1-36; Lk 20.45-47)

Chamai mendi khatniu Jesu chamtu chunwijiu nking bamme. 38-39Paniu paliutu katikhaijiu haichiu din-e, “Paliu ntiang kathengbo khailujiu senkiga maidungniu paliutu chakhuang thiujiu kahum khaira tad kinbo mai, sichiujiu maduikyga, khatdi khumkiboga pabam kawibotu kadajiu tadkinbo mai, Tacheng-tajaigu katipaodung situ mari lulo. 40Paliuniu kamipuidung ma ruptiujiu khatdi paliu ky humtiujiu kinbo-e, sichiujiu kakhengthiu mathengbo jai kamjiu bambo-e. Paliugu mathadse dejiukha sa nkiu ralo!”

Kamipuigu Potkad

(Lk 21.1-4)

41Jesu niu Charaky gu rangkang bung mungga wang ntaolujiu, maidungniu paliugu rangkang thonkhai bambotu phui bamme. Lungwi maidung kakeng khaniu rangkang kengjiu thonkhai bamme; 42siga kaleksabo kamipui khatniu wanglujiu paisa ginia, chiubora damli khat siga thonkhaide. 43Paniu pakhommaidung situ ku madui lujiu paliu khuga din-e, “Iniu naliu khuga dinbo-e chiubora haibo kaleksabo kamipui hainiu maidung suang kengjiu kadkhai bamme. 44Palamra maidung siniu paliugu lungwibogu malipadbose khai-e; chiudi para haijiukha kaleksajiu bamdi, paniu tiujiu ringlu buibo, pagu kabambo hinase pikhai mide.”

Currently Selected:

MARK 12: LIANBSI

Highlight

Copy