MARK 11
11
Jerusalem Ga Chawang Thiujiu Ngutbo
(Mt 21.1-11; Lk 19.28-40; Jn 12.12-19)
1Paliuniu Jerusalem manawang suboga, Bethphage nai Bethany namdiga wangboga paliuniu Olive Luong gase khangde, Jesu niu pakhommai khangniatu haibo lad dinkhaijiu langkhai masuang mide, 2“Nanai masuangga bambo nam gase tadsulo. Nanainiu siga mengtang gapboga qonniam poi wadaodi tong matai makhabo khat daosune. Sise khilujiu haiga juwanglo. 3Siga mai khatniu nanai khuga. ‘Sise dekam ralo?’ chiu maniusai haichiu pakhuga dinlo, ‘Papaopiu siniu pageng bambo-e, khatdi langwang lanbi rabo-e.”
4Sichiujiu panaise tadde, khatdi qonniampoise puidi mung katiangga khinkhai bambo daode. Sichiujiu panainiu khijiu bamboga, 5pamungga chapbam mai siniu panai khuga maniu-e, “Sibo qonniampoise khilujiu dekam ralo?”
6Jesu niu dinkhaibo kumgapjiu panainiu paokak khaiboga, panaitu paliuniu suikhai bide. 7Paliuniu qonniampoise Jesu khuga juwang lujiu, paliu faise sibo riga thapkhai biboga, Jesu se tongsude. 8Maidung kakeng khaniu paliu faise puikiga thapkhai sude, khangsia mainiu chapiuniw danlujiu thapkhai sude. 9#T.Lui 118.25,26.Pasai pasuang lam tadkinmaidung siniu haichiu sensude, “Hosanna! Rapiu zan ga wangmaitu Tingwang niu thoikhai bilo! 10Wangkinbo aliu piu David wangdihtu Tingwang niu thoikhai bilo! Tingwang tu thuonlo!”
11Jesu niu Jerusalem ga wanglujiu, Charaky lungga ngutde, khatdi wahina awa-ajangjiu phuikhaide. Chiudi haise chawan rimibo donniu Bethany lamse pakhommaidung khang kariu-je-niakiu situ maluang lujiu tadmide.
Jesu Niu Ndut Bangtu Siangbo
(Mt 21.18-19)
12Pasaibo naise, paliuniu Bethany gasu malan wangboga, Jesu mariu mide. 13Paniu pabam khatga phuimengboga, paniw lung nphob bambo ndutbang khattu ngaolujiu, daolu buisai chiujiu tadpadle. Chiudi paniu siga mengboga, paniw ronna daode, palamra haise ndutsy masibo ken makge. 14Jesu niu ndutbang situ din-e, “Mai khatniudi nakhu gasu nasyse tiulan tamilo!” Haichiu paniu dinbose pakhommaidung siniu chiu bamme.
Jesu niu Charaky lungga Tadbo
(Mt 21.12-17; Lk 19.45-48; Jn 2.13-22)
15Paliuniu Jerusalem ga wangtangboga, Jesu niu Charaky lunggase ngutlujiu, wa jonjiu khatdi liujiu bammaitu hathon sude. Rangkang nkhiakjiu bammai nai makhao jonjiu bammai kuongkaidung khatdi paliu bamdungse tun taliang sude, 16sichiujiu paniu mai khattudi Charaky lenlam wakhatdi pijiu ponpad makge. 17#Isa 56.7; Jer 7.11.Sichiujiu paniu maidungtu katikhai sude: “Tingwang niu dinbose Masanbo ariakga raokhai nbambo-e. ‘Araky haitu mai hinaniu, jat hinagu kakheng thiubo ky chiujiu kurabo-e!’ Chiudi naliuniu haisitu agatiumai nbaibam pithiu khai mide!” 18Singkudung nai Tacheng tajai katipaodungniu haise chiulude, sijengniu paliuniu Jesu tu kamshatra npui phiusude. Paliuniu patu ping-e, palamra mai hinase pagu katikhai gase paliu suang hajiu bambo-e.
19Chawanse wangsuboga, Jesu nai pakhommaidung namdise phudkhai lujiu tadmide.
Ndutbang Gasu Katikhaibo Ngiudon
(Mt 21.20-22)
20Pasaibo nai nsuan kalu paliuniu npuiki gase tadwangboga, paliuniu ndutbangse ngaode. Haise pamen katangna shaimi bamniubo paliuniu ngao lude. 21Degu padmilo chiubo maningtao lujiu, paliuniu Jesu khuga din-e, “Phuilo, katipao yo, nangniu siangkhaibo ndutbangse shai mide!”
22Jesu niu paliutu paokakge, “Tingwang tu malumlo. 23#Mt 17.20; 1 Co 13.2.Iniu naliu khuga pachangjiu dinbo-e, mai khatniu malum siakjiu, wadi malum masabo thiumakjiu, haibo maluang situ duipui gase thonkhai milo chiu dinsai, sise padmi rabo-e. 24Haijengniu naliu khuga Iniu dinbo-e: Naliuniu kakheng thiujiu, wakhat khengsai, naliu daosiak lune chiubo malumlo, sichiusai naliuniu kakhengbo hinase naliu khuga pikhai rabo-e. 25#Mt 6.14,15.Khatdi naliuniu kakheng thiura chapsu dasai, naliu khuga maokhai mimai situ kuak khai bilo, sichiusai tinggen lam bambo naliu Piu siniu naliu maose kuakkhai bine. 26Naliuniu maidungtu kuak khai maksai, tinggen lam bambo naliu Piu siniu naliu nuanse kuak khai lakge!”
Jesu Gu Pumtan Lamga Maniubo
(Mt 21.23-27; Lk 20.1-8)
27Paliuniu Jerusalem ga wangjiu Charaky lungga Jesu niu tad mariujiu bamboga Tacheng-tajaigu katipaodung khatdi apaimaidungse pakhuga wangde. 28Sichiujiu pakhuga maniu-e, “Haibo ngamdung hai kamra nagu maji degu bamjiulo? Haibo majise saoniu natu pikhai jiulo?”
29Jesu niu paliutu paokakge, “Iniu naliu khuga wakhat maniune, sichiujiu naliuniu atu paokak khaisai, Iniu haidungse kamra agu maji degu bamlo chiubo Iniu naliu khuga dinkhai bine. 30John niu tadui nphumbogu majise delam sulo; haise Tingwang khuga suma maksai chamaina khuga suniulo?”
31Paliu karai ari sude. Aliuniu degu dinralo? Aliuniu ‘Tingwang khuga suniu-e,’ chiusai paniu din-e, ‘Sichiusai dekamjiu naliuniu John tu malummak jiulo?’ 32Chiudi aliuniu ‘Chamaina khuga suniu-e chiusai...’” (Maidungtu paliuniu ping-e, palamra mai hinaniu John hai phaimiukakung khatle chiujiu lukhai-e). 33Sijengniu paliuniu Jesu tu paokakge, “Aliu simakge.”
Jesu niu paliu khuga din-e, “Sichiusai, degu majiniu haidungse Iniu kambo gulo chiubo naliu khuga dinkhai lakge.”
Currently Selected:
MARK 11: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
